London, British Library, BL Oriental 782

በስመ፡ አብ፡ (…)ommission by ንወጥን፡ በረድኤተ፡ እግዚአብሔር፡ ወሠናይ፡ ስንአሁ፡ በጽሒፈ፡ መጽሐፍ፡ ንስቲት፡ ዘይከሥት፡ በእንተ፡ አርትዖ፡ ሃይማኖት፡ እምቃለ፡ አብ፡ ትሩፍ፡ መነኮስ፡ ጊዮርጊስ፡ ተልሚድ፡ አቡነ፡ እንጦንዮስ፡ በረከተ፡ ጸሎቱ፡ ይኩን፡ ምስለ፡ ንጉሥነ፡ ሠርፀ፡ ድንግል፡ ለዓለም፡ አሜም። ወእምድኅረ፡ ሰብሖቱ፡ ለእግዚአብሔር፡ ወአእኵቶተ፡ ትሩፋቲሁ፡ ወመንክራቲሁ፡ ወተአምኖ፡ በኂሩቱ፡ ወኑኃ፡ ትዕግሥቱ፡ ወጸጋሁ፡ ወተአምኖተ፡ ሀብታቲሁ፡ እንተ፡ ኮነ፡ ባቲ፡ እምእሊአሁ፡ ወደቂቁ። ወሶበ፡ አስተርአየት፡ በመዋዕሊነ፡ ዛቲ፡ ተፈልጦት፡ ውስተ፡ ቤተ፡ ክርስቲያን፡ አርቶዶክሳዊት፡ ወቦአ፡ ማእከለ፡ ደቂቅ፡ ሕሊና፡ ሙስንት፡ ዘኢይሰነዓው፡ መሠረታቲሃ፡ ወሥርዓታ፡ በእንተ፡ ተአምኖ፡ ጽድቅት፡ ዘትሥጉት፡ ስቡሕ፡ ይትመየጥ፡ ግብር፡ ባቲ፡ ኀበ፡ ቃል፡ ዘኢይደሉ፡ ተአምኖቱ፡ ወኢይደሉ፡ ለሐዊሮቱ፡ ወኢተአምኖቱ፡ ወዝንቱ፡ ውእቱ፡ እምዘ፡ ኮኑ፡ አበው፡ ትሩፋን፡ አዕማደ፡ ቤተ፡ ክርስቲያን፡ እለ፡ ጽኑዓን፡ በእድ፡ ጽንዕት፡ ጽህቁ፡ ወተጋደሉ፡ በእንተ፡ ደምሦተ፡ አሠራ፡ እምአልባበ፡ ምእመናን። ወአሰሰሉ፡ ዝከራ፡ እምልሳናተ፡ አርቶዶክሳዊያን፡ ዘከመ፡ ቃሉ፡ ለአርዮስ፡ ጠዋይ፡ ዘኮነ፡ ይትአመን፡ ከመ፡ ኢየሱስ፡ ክርስቶስ፡ ወልደ፡ እግዚአብሔር፡ ፍጡር፡ እምጥንቱ። ወመቅዶንዮስ፡ ዘይቤ፡ እስመ፡ መንፈስ፡ ቅዱስ፡ ፍጡር፡ ከመ፡ ኵሎሙ፡ ፍጥረታት። ወአውጣኪ፡ ዘይቤ፡ እስመ፡ ሥጋ፡ ዘተነሥአ፡ እምእግዝእትነ፡ ማርያም፡ ድንግል፡ አኮ፡ ውእቱ፡ ከመ፡ ሥጋነ፡ አዳማዊ። ወደእሙ፡ ኢይሰነዓዎ፡ በህላዌሁ። ወአቡሊናርዮስሂ፡ ዘኮነ፡ ይሔሊ፡ ከመ፡ መለኮት፡ ቆመ፡ ለትስብእት፡ ህየንተ፡ ነፍስ። ወማኒ፡ ሐሳዊ፡ ዘይቤ፡ አማልከተ፡ ብዙኃን፡ ወዘይመስሎሙ፡ ለእሉ፡ ዐላዊያን፡ ርኩሳነ፡ ሃይማኖት። ወእምዝ፡ ተዘርወት፡ ሕሊና፡ | በዛቲ፡ እምነታት፡ ወወድቀ፡ ሀከክ፡ ወተቃርኖት። ቦእምኔሆሙ፡ ኮነ፡ ይሔሊ፡ ከመ፡ ሥጋ፡ ዘተነሥአ፡ እማሕፀነ፡ እግዝእትነ፡ ንጽሕት፡ ድንግል፡ ማርያም፡ እምድኅረ፡ ተዋሕዶቱ፡ በአምላክ፡ ቃል፡ ቀዳማዊ፡ ኮነ፡ ቀዳማዌ፡ ወኢይደሉ፡ ላዕሌሁ፡ ተሰምዮተ፡ ፍጡር። ወቦ፡ እምኔሆሙ፡ ዘየዐሉ፡ ዘንተ፡ ሃይማኖተ፡ ወይሔሊ፡ ከመ፡ ዝንቱ፡ ሥጋ፡ ዘተነሥአ፡ እምህላዌ፡ እግዝእትነ፡ ማርያም፡ ኢተወለጠ፡ እምድኅረ፡ ተዋሕዶቱ፡ በአምላክ፡ ቃል፡ እምህላዌሁ፡ ወባሕርይሁ፡ በኵሉ፡ ግብሩ። ወባሕቱ፡ ኡይደሉ፡ ይትበሀል፡ በእንቲአሁ፡ እምፍኅረ፡ ተዋሕዶ፡ ብሂለ፡ ፍጡር፡ ወተከውኖ፡ ወተገብሮ፡ ዘይደሉ፡ ለፍጥረታት። ወሶበ፡ ተራከበ፡ ምስሌየ፡ አሐዱ፡ እምዘ፡ ይደሉ፡ ላዕሌየ፡ ፈዲየ፡ እዳሁ፡ ወይደልወኒ፡ አጽንዕ፡ በጻህቅ፡ አርትዖቶ፡ ወገሥዖቶ፡ በጽድቅ፡ ወኮነት፡ ቦአት፡ ውስቴቱ፡ ሕሊና፡ ወትፈትሕ፡ ለአማስኖ፡ ሃይማኖቱ። ወይረክብ፡ ጸላእቱ፡ ውስቴቱ፡ መፍቅዶ፡ ወፍትወቶ። ወከሠተ፡ ሊተ፡ እምዘ፡ ሀሎ፡ ኀቤሁ፡ እምነ፡ ገዐር፡ ወተከፍሎ፡ ሕሊና፡ ወውእቱ፡ እምዝንቱ፡ በሕማም፡ ማሕመሚት። ወይፈርህ፡ ከመ፡ ያበጽሖ፡ ዝንቱ፡ ሕማም፡ ኀበ፡ ሞት፡ ዘእዙዝ፡ በእንቲአሁ፡ በአማኅዕኖ። ወአኮ፡ ውእቱ፡ ሞተ፡ ሥጋት፡ ወብልየት። ወአስተብቍዓኒ፡ ከመ፡ አዝክር፡ ሎቱ፡ ዘሀሎ፡ እምኀቤየ፡ በእንተ፡ ዛቲ፡ ሃይማኖት፡ ዘከሠተዋ፡ ደቂቀ፡ ዛቲ፡ ዘመን። ወዘይደሉሂ፡ ተሊዎቶ፡ በእንተ፡ አጽድቆ፡ ሃይማኖት፡ ርትዕት። ወዘከርኩ፡ ሎቱ፡ ከመ፡ አበው፡ ቀደምት፡ በዐለ፡ ትንህርት፡ ወገቢር፡ ይኄይስ፡ ተሊወ፡ ትምህርታቲሆሙ። ወሐዊርሂ፡ በፍናዊሆሙ፡ ወበአሠሮሙ። ወናሁ፡ ሠርዑ፡ በድርሳናቲሆሙ፡ እምዘ፡ ኢይፈቅድ፡ ኀበ፡ መይጦቱ። ይደልወከኬ፡ አንብቦቱ፡ ዘልፈ፡ አእምሮቱ፡ ወለብዎቱ። እመሰ፡ ኮኑ፡ እሉ፡ ሥርዐታት፡ ጽዱቃት፡ እንተ፡ ወፅአት፡ እምኀበ፡ እልክቱ፡ | አጋእዝት፡ በዓለ፡ አእምሮ፡ ወልቡና፡ ብሩሃት፡ ኢታረዊ፡ ጽምአከ፡ ወኢትፌውስ፡ ደዌከ። ወናሁ፡ ተፈጸመ፡ ላዕሌከ፡ ዘነበበ፡ ቦቱ፡ ወንጌል፡ ቅዱስ፡ በእንተ፡ አውሥኦቱ፡ ለአብርሃም፡ አበ፡ አበው፡ ለዝኩ፡ ባዕል፡ ኀበ፡ ይቤሎ፡ እመሰ፡ ኮኑ፡ አኃዊከ፡ ኢይሰምዕ፡ እምነ፡ ሙሴ፡ ወእምነቢያት፡ ወለእመሂ፡ ተንሥአ፡ አሐዱ፡ እምነ፡ ምውታን፡ ወመጽአ፡ ኀቤሆሙ፡ ኢየአምንዎ። ወአበይኩ፡ ተናግሮ፡ በዘ፡ ይደሉ፡ በእንተ፡ መሠረታተ፡ ሃይማኖት፡ ርትዕት፡ አእሚርየ፡ ሕፀዕየ፡ ወድካምየ፡ በእንተ፡ ተንሥኦ፡ ወዐሪግሂ፡ ውስተ፡ ዛቲ፡ መዓርጋት። ወሶበ፡ ቀነዮሙ፡ ለሰብአ፡ ዘመንነ፡ ብዙኃ፡ ጽልመታት፡ ወከደነት፡ አልባቢህፕሙ። ወዘሰ፡ ይጸብት፡ ውስተ፡ ዛቲ፡ ባሕር፡ ርኅብት፡ ይሤኒ፡ ለዘ፡ አጽንዐ፡ መዝራዕቶ፡ ወሰፍሐ፡ አእዳዊሁ፡ ወኮነ፡ እምነ፡ እለ፡ ይጽህቁ፡ ወእምሰብእ፡ ማእምራን፡ ወለባዊያን። ወንሕነኒ፡ ዮም፡ ናሁ፡ ጠፍአ፡ እምዘመንነ፡ ብርሃነ፡ ትምህርት፡ ወተኃድገ። ወተፈጸመ፡ ላዕለ፡ ኖላዊሂ፡ ወመርዔቱ፡ ቃል፡ ዘተብህለ፡ ዕዉር፡ ለዕዉር፡ ይትማርኁ፡ ክልኤሆሙ፡ ይወድቁ፡ ውስተ፡ ግብ። ወኢያዘንም፡ በኢዘመኑ፡ ወየአክሎ፡ በውስተ፡ ዘመን፡ በአምጣነ፡ ዝውይክል፡ አግምሮቶ፡ ወኢይትኃባእ፡ እምኔከ፡ እስመ፡ መርዔት፡ ኢጐዩ፡ እምኔሆሙ፡ ወኢሰለብዎሙ፡ ፈያት፡ ክብሮሙ፡ ወብዕሎሙ፡ ወሕይወቶሙ፡ ዘእንበለ፡ ዳእሙ፡ በእንተ፡ ሕፀፀ፡ ኖሎቶሙ፡ እምዘ፡ ሠርዐ፡ እግዚአብሔር፡ ላዕሌሆሙ፡ ወመሠጥዎሙ፡ ተኵለት፡ እምእደዊሆሙ። ሶበሰ፡ ኢፈራህኩ፡ ከመ፡ ይነውኅ፡ ነገር፡ እምዘከርኩ፡ ዘተብህለ፡ ወዘይትብሀል፡ ወዘይደልዎሙ፡ ለኖሎት፡ ውስተ፡ ዛቲ፡ አንቀጽ። ወእመሰ፡ አኅፅርኩ፡ አነ፡ ወበኀበ፡ ማእምራንሰ፡ እሙር፡ ውእቱ። ወሶበ፡ አገበረኒ፡ እትሉ፡ መፍቅዶ፡ ወፍትወቶ፡ እምድኅረ፡ ከሠተ፡ ከመ፡ ውእቱ፡ ይትዔዘዝ፡ ሊተ፡ ወበተአዝዞቱ፡ ይሴስል፡ ደዌሁ፡ ወይትመየጥ፡ ጥዒናሁ። ወአነሂ፡ ተአዘዝኩ፡ ሎቱ፡ በእንተ፡ ተአዝዞ፡ ለእኍ፡ ዘያረብኅ። እስመ፡ ተአዝዞሂ፡ በሕሊና፡ ኄር፡| ይፈደፍድ፡ እምነ፡ ሠዊዕ። ወኮንኩ፡ ዓዲ፡ አይዳእክዎ፡ በእንተ፡ ዛቲ፡ መዋዕል፡ ዘአመረ፡ መጽሐፍ፡ በእንቲአሃ፡ ወአንቅሃ፡ ላዕሌሃ፡ በብሂሎቱ፡ ይመጽእ፡ መዋዕል፡ ዘይበዝኅ፡ ውስቴታ፡ ረኀብ፡ ወጽምእ፡ ወአኮ፡ እምኅብስት፡ ወኢእማይ። ወባሕቱ፡ እምኃጢአ፡ አእምሮ፡ ቃለ፡ እግዚአብሔር፡ ወበመዋዕለ፡ ረኃብሰ፡ ወጽምእ፡ የአክሎ፡ እምነ፡ ሲሳይ፡ በኅዳጥ፡ ፍርፋራት። ወእማይሂ፡ በነጠብጣብ፡ ንስቲት። ወሶበ፡ ቦአ፡ ላዕለ፡ ተሰናእዎት፡ ኅዳጥ፡ ወሠምረ፡ በዘ፡ ይሠምሮ፡ ጽድቅ፡ እመ፡ ጊዜ፡ ረኃብ፡ ወጽምእ፡ ወተወክፈ፡ አመክንዮትየ፡ ወጠየቀ፡ ሕፀፅየ፡ ወንዴትየ። አሜሃ፡ አቅረብኩ፡ ሎቱ፡ እምፍርፋራተ፡ ማእደ፡ አጋእዝት፡ በዐለ፡ ልቡና፡ ጽሩያን። ወብርሃናትሂ፡ ሥሩቃን፡ ወስንሂ፡ ሠናያን። እስመ፡ አግብርትሰ፡ የሐይዉ፡ በዘ፡ ይወድቅ፡ እማእደ፡ አጋእዝቲሆሙ፡ ወኢይክል፡ ይሕየው፡ መኑሂ፡ እንበለ፡ ያጼኑ፡ እምእስትንፋሰ፡ መንፈሶሙ፡ ወኢይጸንዕ፡ ግብሩ፡ ለዘ፡ ኢሐነፀ፡ ላዕለ፡ ኰኵሐ፡ መሠረቶሙ፡ ወቦሙ፡ ንትዓቀብ፡ ወንፀወን፡ ወበብርሃኖሙ፡ ንትመሪሕ፡ ኀበ፡ ፍኖት፡ ርትዕት፡ በዘ፡ ነኃሥሦ፡ ወንትመራሕ፡ ቦቱ። ወበአስተብቍዖቶሙ፡ ንድኅን፡ እምእከየ፡ ተወላውሎ፡ በውስተ፡ ቃላት። ወንገድፍ፡ ሐዊረ፡ ፈቃድ፡ እንተ፡ ትወስድ፡ ኀበ፡ ምግባር፡ ሙስንት።