London, British Library, BL Oriental 718

folio : 1

Alignment Start a translation alignment with Alpheios Alignment. You can also add morphological annotations there. See instructions in GitHub.

Quotations Check for marked up quotations of a passage in this section
back to top

| | በስመ፡ አብ፡ ወወልድ፡ ወመንፈስ፡ ቅዱስ፡ ፩ አምላክ፡ ሥሉስ፡ ዘኢይሰደቅ፡ ዋሕድ፨ ዕሩይ፡ ታሉት፡ ዘኢይነፍድ፤ ዘሀሎ፡ እምቅድመ፡ ክ ዋኒሁ፡ እንዘ፡ ኢይትበዓድ፨ ወእምህላዊሁ፡ እንዘ፡ ኢየሐፅፅ፡ ወኢይፈደፍድ፨ በአናስረ፡ ዓ ለም፡ ዘኢይተረጐም፡ ወኢይትዔለድ፨ ወዘ ኢይትፈለጥ፡ ወልድ፡ እምአቡሁ፡ ወመንፈስ፡ እምወልድ፨ ዘአምጽአ፡ ዓለመ፡ በቃለ፡ ጽ ውዓ፡ እምኀበ፡ ኢሀሎ፡ በአሐቲ፡ ምክር፡ ወበአ ሐቲ፡ ፈቃድ፨ ዘሣረራ፡ ለምድር፡ በልቡና፡ | ዘኢ ይኄለድ፨ ወሰማይኒ፡ ዘአንበራ፡ በዓየር፡ እሳት፡ ዘይነድድ፨ ወለእሳትኒ፡ ዘሰፍሖ፡ በዓየር፡ ሰማይ፡ እንበለ፡ ገሢሥ፡ በእድ፤ ወለነፋስ፡ ዘረበቦ፡ ዲበ፡ ሰረገላ፡ ጽልመት፡ እንበለ፡ መሠረት፡ ወድድ፤ አርጊዖ፡ ማየ፡ ዘረሰየ፡ ሰማየ፡ ወሰቀሎ፡ ከመ፡ ቀመር፡ ወዓምድ፨ ዘረሰዮሙ፡ ለመላእክቲሁ፡ መንፈሰ፡ ወለእለ፡ ይትለአክዎ፡ አይቁና፡ ዘነድ፨ ዘይመይጦ፡ ለንጥረ፡ መብረቅ፡ ወያጸንዖ፡ ለነጐድጓድ፨ ዘይፌትቶ፡ ለዕብነ፡ በረድ፨ እ ምከርሠ፡ ደመና፡ በበሕጠታቲሁ፡ ከመ፡ ይረድ፨ | | ዘይጌሥፆ፡ ለፀዓዕ፡ ወይዘርዎ፡ ለጊሜ፡ ከመ፡ ሐመድ፨ ጌልጌላሁ፡ ዘነበልባል፡ ወሰረገላሁ፡ መርዕድ፨ ዘያረምማ፡ ለማዕበለ፡ ባሕር፡ ወያዝኅና፡ ለሞገደ፨ ዘኢየኃልቅ፡ ምስፍናሁ፡ ለትውልደ፡ ትውልድ፨ ወኢይትዌዳእ፡ ምኵናኑ፡ ለዘመደ፡ ዘመድ፨ ጥንተ፡ መዋዕሊሁ፡ ዘኢይትኌለቍ፡ ወስፍሐ፡ ሀልዎቱ፡ ዘኢይትኄለድ፨ ዘለሐኮ፡ ለአዳም፡ በአርአያሁ፡ ከመ፡ ይትገሃድ፨ ለዘከመዝ፡ እግዚእ፡ እንዘ፡ እገኒ፡ ወእሰግድ፨ እነግር፡ ዜና፡ ገድለ፡ ፃማሁ፡ ብፁዕ፡ ወለቅዱስ፡ ብእሲ፡ ክቡር፡ ወርኡስ፡ ስቡሕ፡ | ወውዱስ፨ ለባሴ፡ ንጹሕ፡ ዘኢለከፎ፡ ደነስ፨ ፀዋሬ፡ ንዴት፡ ዘምስለ፡ ንግሥ፤ ዘኢያንሶሰወ፡ በፍኖት፡ መብዕስ፨ ዘኢተሀይጰ፡ በአሕፃሁ፡ መስተቃርን፡ ዘውእቱ፡ ዲያብሎስ፡ ደብረ፡ ወርቅ፡ ወደብረ፡ ብሩር፡ ደብረ፡ ባሕርይ፡ ወደብረ፡ ሰንፒር፡ ወግረ፡ ቀንዓት፡ ወወግረ፡ ስኂን፡ መንክር፨ ደብረ፡ ወርቅ፡ ንብሎ፡ በእንተ፡ ስነ፡ ሃይማኖቱ፡ ርትዕት፨ ወበእንተ፡ ስነ፡ ትዕግሥቱ፡ በውስተ፡ ገድል፡ እንዘ፡ ይጽሕቅ፡ ለፈጽሞ፡ ቃለ፡ ወንጌል፡ እስመ፡ ይሰምዖ፡ ለቀርነ፡ መድኃኒትነ፡ ዘውእቱ፡ ብስራተ፡ እስራኤል፡ ሐዲሳን፡ ዘደምፀ፡

folio : 2


back to top

| | እምልሳነ፡ በግዑ፡ እንዘ፡ ይትነፋሕ፡ በቤተ፡ ክርስቲያን፡ በአፈ፡ ካህን፤ ወድምፀ፡ ቃሉ፡ ከመዝ፡ ይብል፨ በትዕግሥትክሙ፡ ታጠርይዋ፡ ለነፍስክሙ፡ ወካዕበ፡ ይቤ፡ ባኡ፡ እንተ፡ ጸባብ፡ አንቀጽ፡ እስመ፡ ርኀብት፡ አንቀጽ፡ ወስፍሕት፡ ፍኖታ፡ እንተ፡ ትወስድ፡ ወታበውእ፡ ውስተ፡ ሐጕል፨ወፈድፋደ፡ ጸባብ፡ አንቀጽ፡ ወጥቀ፡ መቅዓን፡ ወጽዕቅት፡ ፍኖታ፤ እንተ፡ ትወስድ፡ ወታበውእ፡ ውስተ፡ ሕይወት፨ ወኅዳጣን፡ ይበውእዋ፡ ወውስተ፡ ስፍሕትሰ፡ አንቀጽ፡ ይብል፡ ብዙኃን፡ እለ፡ ይበውእዋ፨ እለ፡ መኑኬ፡ እለ፡ ቦእዋ፡ ለአንቀጸ፡ ሐጕል፡ | ወእለ፡ መኑ፤ ካዕበ፡ እለ፡ ይበውእዋ፡ እምድኅረ፡ ዝንቱ፡ እስመ፡ ኢተዓፅዋ፡ እስከ፡ ይእዜ፡ እላንቱ፡ ፍናው፡ ክልኤቲ፡ አሐቲ፡ እንተ፡ ሞት፤ ወአሐቲ፡ እንተ፡ ሕይወት፨ ወእለ፡ ቦእዋሰ፡ ለአንቀጸ፡ ሐጕል፡ እሉ፡ እሙንቱ፡ እለ፡ ሖሩ፡ በፍኖተዝ፡ ዓለም፡ ስፉሕ፡ ዘውእቱ፡ በሊዕ፡ ወሰትይ፡ ዘእንበለ፡ ዓቅም፨ እስመ፡ እለ፡ ይበልዑ፡ ወይሰትዩ፡ ዘእንበለ፡ ዓቅም፡ ይትቃረንዎ፡ ለቃለ፡ ወንጌል፤ ዘይቤ፡ ኢታክብዱ፡ ልበክሙ፡ በበሊዕ፡ ወሰትይ፨ ወይትፌጸም፡ ላዕሌሆሙ፡ ቃለ፡ ነቢይ፡ ዘይቤ፡ አሌ፡ ሎሙ፡ ለእለ፡ ይገይሱ፡ በጽባሕ፡ ቤተ፡ መያሲ፡ ወይውዕሉ፡ | | ውስተ፡ ስታይ፡ ወያነድዶሙ፡ ወይን፨ ወካዕበ፡ ወያቴክሎሙ፡ አፍአ፡ እምቤተ፡ ግዕዘ፡ ቃለ፡ መርዓዊ፡ ዘይቤ፡ አሌ፡ ሎሙ፡ ለእለ፡ ይጸግቡ፡ ይእዜ፡ እስመ፡ እሙንቱ፡ ይርኅቡ፤ እስመ፡ ኃደግዋ፡ ለቃሉ፡ መሐሪተ፡ ጽሙና፡ እንተ፡ ትብል፡ ተገብሩ፡ እንከ፡ ለመብልዕ፡ ዘይነብር፡ ለሕይወት፡ ዘለዓለም፡ ዘይሁበክሙ፡ ወልደ፡ እጓለ፡ እመሕያው፡ ወእኮ፡ ለመብልዕ፡ ኃላፊ፡ ወይፈልስ፡ ጸጋ፡ እግዚአብሔር፡ እምስሱዓነ፡ ከርሥ፡ ኀበ፡ እለ፡ ያፈቅሩ፡ ጽሙና፨ በከመ፡ ፈለሰ፡ ብኵርና፡ ኢሳው፡ መፍቀሬ፡ መብልዕ፡ ኀበ፡ ያዕቆብ፡ ማኅፈደ፡ ጽሙና፡ | ወእሉ፡ ካዕበ፡ እለ፡ ይበውእዋ፡ ለአንቀጸ፡ ሐጕል፡ ምስለ፡ እለ፡ አቅደምነ፡ ነጊረ፡ ምስለ፡ ስሱዓን፡ ወዘማውያን፡ ሐሳውያን፡ ዓላውያን፡ ሠራቅያን፡ መስተበቅላን፡ ሐያድያን፡ መስተመይናን፡ መስተሣልቃን፡ ዕቡያን፡ ዝኁራን፡ መሰግላን፡ ወእለ፡ ይትአመኑ፡ በሐሳበ፡ ከዋክብት፡ በቃለ፡ ብእሲት፡ እለ፡ ይብሉ፡ ነአምር፡ ዘይመጽእ፡ ወንፈስጥ፡ ዘይከውን። እሉኬ፡ ወእለ፡ ይመስልዎሙ፡ ፍኖተ፡ ሐጕል፡ ፍኖቶሙ፡ ሞት፡ ደኃሪቶሙ። ዛቲ፡ ይእቲ፡ ተፍጻሜታ፡ ወተርጓሜሃ፡ ለአንቀጽ፡ ስፍሕት፡

folio : 3


back to top

| | እንተ፡ ትወስድ፡ ውስተ፡ ሐጕል፨ ኢይምሰልክሙ፡ ኦፍቁራንየ፡ ሶበ፡ ተሰምዑ፡ አንቀጸ፡ ሐጒል፡ ዘተብህለ፡ በወንጌል፡ ከመ፡ ሀለወት፡ ውስተ፡ ሰማያት፡ አላ፡ በዝየ፡ ይእቲ፡ በምድር፡ ውስተ፡ ሰማያትሰ፡ አልቦ፡ አንቀጸ፡ ሐጕል፡ ዘእንበለ፡ አንቀጸ፡ ሣህል፨ ኀበ፡ ይነብር፡ አምላክነ፡ ባሕረ፡ ምሕረት፡ ወነቅዓ፡ በረከት፨ ወዘይትሐጐልሰ፡ ኢየዓርግ፡ ውስተ፡ ሰማይ፨ ሶበሰ፡ ዘተሰምየ፡ ሊቀ፡ መላእክት፡ ወድቀ፡ እምሰማይ፨ ሶበ፡ ሐለየ፡ ሕሊና፡ ሐጕል፡ እፎኬ፡ የዓርግ፡ ሰማየ፡ ብእሴ፡ ሐጕል፨ ወእለሰ፡ ቦኡ፡ አንቀጸ፡ ጸባበ፡ እሉ፡ እሙንቱ፡ እለ፡ ፆሩ፡ መስቀሎ፡ | ለክርስቶስ፡ ወተለውዎ፨ በፀዊረ፡ መስቀሉኒ፡ ዛቲ፡ ይእቲ፡ ጾም፡ ምስለ፡ አኰቴት፨ ፍቅር፡ ምስለ፡ የውሃት፡ ዘምስለ፡ ትሕትና፡ ንዴት፡ አንብዕ፡ ዘምስለ፡ ትጋህ፡ አልጕሞ፡ ልሳን፡ ዘምስለ፡ ትእግሥት፨ እምነገረ፡ ጽርፈት፡ እምነቢበ፡ ዓመፃ፡ ወሐሰት፡ ወርኂቅ፡ እምግብር፡ ኃላፊት፡ እንተ፡ ትወስድ፡ ውስተ፡ ሐጕል፡ ወሞት፨ አንጽሖ፡ ሥጋ፡ እምዝሙት፡ ዓዪል፡ ውስተ፡ ገዳም፡ በዘብድወ፡ ጠሊ፡ ወበሐሜለት፨ ወተዘግሖ፡ ውስተ፡ ጾማዕት፨ አንጽሖ፡ ልቡና፡ እምሐልዮ፡ ኃጢአት፨ ወተዘክሮ፡ ሞት፡ በኵሉ፡ ጊዜያት፨ ዛተኬ፡ | | አንቀጸ፡ ከመ፡ ይባእ፡ ተኃየለ፡ ተመሪሖ፡ በእለ፡ ቀደምዎ፡ ቅዱሳን፡ ወቦአሂ፡ ዝንቱ፡ ብእሲ፡ መካህ፡ ዘስሙ፡ ላሊበላ፡ ዘተሰምየ፡ ገብረ፡ መስቀል፡ አመ፡ ቅብዓተ፡ ንግሡ፡ ዘአመስቀለ፡ አክናፈ፡ ሕሊናሁ፡ ከመ፡ አክናፈ፡ ኪሩቤል፡ ከመ፡ ይትመሠጥ፡ ቦቶን፨ ኀበ፡ መንበረ፡ መለኮት፡ ከመ፡ ይኀበር፡ ሰብሖ፡ ምስለ፡ ሱራፌል፨ እስመ፡ ተወክፈ፡ ኵሎ፡ ሥቃያተ፡ እለ፡ አቅደምነ፡ ነጊረ፡ ተሠጢሞ፡ ውስተ፡ ባሕረ፡ ትእግሥት፨ እስመ፡ ርኂብኒ፡ ኢይትከሀል፡ ዘእንበለ፡ ትእግሥት፨ ወጸሚዕኒ፡ ኢይትከሀል፡ ዘእንበለ፡ ትእግሥት፨ ዓሪቅኒ፡ | ወተፅናስኒ፡ በእንተ፡ እግዚአብሔር፨ ወፈጽሞ፡ ኲሉ፡ ቃለ፡ ወንጌል፡ ኢይትከሀል፡ ዘእንበለ፡ ትእግሥት፡ ወበእንተዝኬ፡ ለብሰ፡ እልታሐ፡ ትእግሥት፡ ወድርዓ፡ እንግድዓ፡ ዘመዊዕ፡ ከመ፡ ይማዕ፡ ኵሎ፡ ምንዳቤ፡ ገድል፨ ዝንቱ፡ ብእሲ፡ ዘሰመይናሁ፡ ደብረ፡ ወርቅ፨ እስመ፡ በከመ፡ ወርቅ፡ ይትዓቀብ፡ ውስተ፡ አስከሬን፡ ተዘጊሖ፡ በቀማጥር፨ ከማሁ፡ ኮኖ፡ መዝገበ፡ ለቃለ፡ ወንጌል፡ አስከሬን፡ ልቡ፡ ለብፁዕ፡ ወለቅዱስ፡ ላሊበላ፡ ወቃለ፡ ወንጌልሰ፡ በአማን፡ ወርቅ፡ ውእቱ፡ ዘአልቦ፡ ተምያን፨ ዘኃደረ፡ ውስተ፡ ልቡ፡ ለዝንቱ፡ ብእሲ፡ ፍጹም፡

folio : 4


back to top

| | ብፁሐ፡ አምጣነ፡ በአቅሙ፡ ለክርስቶስ፨ ህየንተ፡ ቀማጥርኒ፡ ኮኖ፡ ትሕትናሁ፨ እስመ፡ በሐብለ፡ ትሕትና፡ ዕሡር፨ ወህሉል፡ ክሣደ፡ ልቦሙ፡ ለጻድቃን፨ እስመ፡ እንበለ፡ ትሕትና፡ ኢይትከሀል፡ ያሥምርዎ፡ ለእግዚአብሔር፨ በከመ፡ ነበበ፡ ነቢይ፡ ተመጣዌ፡ ፍሕም፡ እምጕጠተ፡ ሱራፌል፡ እንዘ፡ ይብል፡ ከመዝ፡ ይቤ፡ እግዚአብሔር፡ ኀበ፡ መኑ፡ እኔጽር፡ ዘእንበለ፡ ኀበ፡ የዋህ፡ ወትሑት፡ ወጽምው፡ ዘይርዕድ፡ እምቃልየ፨ ወእግዚእ፡ ነቢያኒ፡ ይቤ ተመሐሩ፡ እምኔየ፨ እስመ፡ የዋህ፡ አነ፡ ወትሑት፡ ልብየ፡ ወትረክቡ፡ ዕረፍተ፡ ለነፍስክሙ፨ | ደብረ፡ ብሩርሂ፡ ወደብረ፡ ሰንፔር፡ አስተማሰልኖ፡ በእንተ፡ ቃለ፡ ፍትሕ፡ ዘይወፅእ፡ እምአፉሁ፡ ሣዕሣዕ፡ ወቅሡም፡ ልሳኑ፡ በፄወ፡ መለኮት፨ ደብረ፡ ባሕርይኒ፡ ንቤሎ፡ በእንተ፡ ንጽሐ፡ ሥጋሁ፨ እስመ፡ አጥረየ፡ ንጽሐ፡ ከመ፡ መላእክት፨ ወአፅደለ፡ ባሕርየ፡ ንጽሑ፡ ምስብዒተ፡ እምአሶንያ፡ ወእምኑርያሬስ፡ ወእምአርዮብ፡ ወአማዝሮት፨ እስመ፡ ይሰምዖ፡ ለሐዋርያ፡ እንዘ፡ ይብል፡ አንጽሑ፡ ልበክሙ፡ ወአንጽሑ፡ እደዊክሙ፨ ወዓዲ፡ ተዳይቀቶ፡ ቃል፡ እምአፈ፡ ጳውሎስ፡ እንተ፡ ትብል፡ ከመዝ፡ አልቦ፡ እምውስቴትክሙ፨ | | ዘይከውን፡ ዘማዌ፡ ወርኩሰ፨ ወካዕበ፡ ይቤ፡ ወዘሰ፡ አማሰነ፡ ቤቶ፡ ለእግዚአብሔር፡ ሎቱኒ፡ ያማስኖ፡ እግዚአብሔር፨ ወዓዲ፡ ተፍዕመ፡ ሕጠተ፡ ቃል፡ እምአስካለ፡ ትንቢቱ፡ ለብፁዕ፡ ዳዊት፨ ዘይቤ፡ መሥዋዕተ፡ ወቍርባነ፡ ኢፈቀድኩ፡ ሥጋከ፡ አንጽሕ፡ ሊተ፡ መሥዋዕተ፡ ዘበእንተ፡ ኃጢአት፡ ኢሠመርኩ፨ ወዘንተ፡ ኵሎ፡ ዓቂቦ፡ ውስተ፡ ምጕንጳ፡ ንጽሕ፡ ተኃብአ፡ ከመ፡ ኢይርከቦ፡ ሕምዘ፡ ከይሲ፡ ዘያስዖዝዝ፡ ኀበ፡ ተነዝኃ፡ ሕምዙ፨ በእንተዝኬ፡ ጐየ፡ እምሐውዘ፡ ጣዕሙ፡ ለዝ፡ ዓለም፡ ዘያወረዙ፡ ለአብሶ፡ ከመ፡ ይሰመይ፡ ጥሪተ፡ ዓቢየ፡ | ዘዕሉድ፡ ውስተ፡ መዝገበ፡ ቤቱ፡ ለልዑል፨ በከመ፡ ይቤ፡ ሰሎሞን፡ ጥሪተ፡ ክቡር፡ ብእሲ፡ ንጹሕ፨ወግረ፡ ቀንዓትሂ፡ ወወግረ፡ ስሒን፡ ተብህለ፡ በእንተ፡ አፈዋተ፡ ኂሩቱ፡ ዘምዕዘ፡ ዕፍረተ፡ ርሔሁ፡ ውስተ፡ ኵሉ፡ አጽናፈ፡ ዓለም፨ በከመ፡ ይቤ፡ መጽሐፍ፡ እምአጽናፈ፡ ምድር፡ ሰማዕነ፡ ዝክረ፡ ተስፋሁ፡ ለጻድቅ፨ ወነዋ፡ ያረውፆሙ፡ ለሕዝብ፡ ወለአሕዛብ፡ ወለመኳንንት፡ ወለመሳፍንት፡ ለዓበይት፡ ወለበሐውርት፨ ወመዓዘ፡ ዕፍረቱ፡ ዘኢተመዝመዘ፡ እስከ፡ ይእዜ፡ ጣዕመ፡ ጹዓጤሁ፨ በከመ፡ ይቤ፡ መጽሐፍ፡ በመዓዛ፡ ዕፍረትከ፡ ንረውጽ፨ ወዕፍረቱሰ፡

folio : 5


back to top

| | ለዝንቱ፡ ብእሲ፡ ብፁዕ፡ አኮ፡ ከመ፡ መዓዘ፡ ዕፍረቱ፡ ለአሮን፡ ካህን፡ ዘእምአፈዋተ፡ ጽጌ፡ ዘከርቤ፡ ወአበሜ፡ ወኢዘእምአበሞ፡ ወቀናንሞስ፡ ወቅብዖን፡ እምዘይት፨ አላ፡ ዕፍረቱኒ፡ እምአፈዋተ፡ ወንጌል፡ ወኢኮነ፡ እምዕፅ፨ ወማኅፈደ፡ ደብተራሁኒ፡ ኢኮነ፡ ከመ፡ ደብተራ፡ ሙሴ፨ እስመ፡ አርአያሃ፡ ወጽላሎታ፡ ይእቲ፡ ደብተራ፡ ሙሴ፡ ለእንተ፡ ትመጽእ፡ ሠናይት፡ ሐዳስ፡ ደብተራ፡ እንተ፡ ይእቲ፡ ቤተ፡ ክርስቲያን፨ ወፈድፋደሰ፡ ዘተገብረ፡ በእደ፡ ላሊበላ፡ ሕንጸ፡ ማኅፈደ፡ ቤተ፡ ክርስቲያን፡ ወቤተ፡ መርዓ፡ ዘበግዑ፡ ዘኢተገብረ፡ በኀበ፡ ካልአን፡ | በሐውርተ፡ ወኢበአሐቲኒ፡ እስከ፡ ኀበ፡ ይሬኢ፡ ፀሐየ፡ ወኵሎ፡ ግብረታቲሆን፡ ወድኅረ፡ ንነግረክሙ፡ ዘከመ፡ እፎ፡ ግብረ፡ ሕንጻሆን፨ ወቀዲሙሰ፡ ንፈቅድ፡ ንንግርክሙ፡ ግብሮ፡ ለሐናጺሆን፨ እፎ፡ ኮነ፡ ጥንቱ፡ ወእፎ፡ ኮነ፡ ተፍጻሜቱ፨ እምከመ፡ ሰአልናሁ፡ ለመጥባቤ፡ አብዳን፡ ከመ፡ ያርኁ፡ ለነ፡ አናቅጸ፡ ቃል፨ በከመ፡ ይቤ፡ ሐዋርያ፡ እመቦ፡ ዘኃጥአ፡ ለጥበብ፡ ለይስእል፡ ኀበ፡ ወሀቢ፡ እግዚአብሔር፡ ዘይሁብ፡ ለኵሉ፡ በስፉሕ፨ ወይስአል፡ እንዘ፡ ይትአመን፡ ወኢይናፍቅ፡ ወይትወሀብ፡ ሎቱ፨ ወአንተሙሂ፡ ኦፍቁራንየ፡ ሕዝብ፡ ዘምክህ፡ | | ዘይሰመይ፡ እስራኤል፡ ሐዳሳን፡ እለ፡ ትሴሰዩ፡ እምጥብሕ፡ መንክር፡ ዘኢየዓፂ፡ ገደላሁ፡ ዘኢኮነ፡ እምፍርፍርት፡ ዘኮነ፡ ዕፄ፡ ወወፅኣ፡ በአእናፈ፡ እለ፡ በልዕዎ፨ ወእለ፡ ትሰትዩ፡ ማየ፡ ሕይወት፡ እምኰኵሓ፡ ምሥጢር፡ ዘኢኮነ፡ እምኰኵሐ፡ ኮሬብ፡ ዘአምጽአ፡ ማዩ፡ ቅስተ፡ ማእከለ፡ እግዚአብሔር፡ ወማእከለ፡ ነቢዩ፨ ሰአሉ፡ ሊተ፡ ከመ፡ የሀበኒ፡ ልሳነ፡ ጥበብ፡ ከመ፡ አእምር፡ ዘእንብብ፨ እስመ፡ አነ፡ ሕፁፀ፡ ልብ፡ እስከ፡ ይእዜ፡ ኢገሠሥኩ፡ ማእዘንተ፡ ነገረ፡ ዚአሁ፡ ለዘእትናገር፡ በእንቲአሁ፡ እስመ፡ ነዋህ፡ ነገሩ፡ ወልጐት፡ ክሥተተ፡ ምሥጢሩ፨ ወባሕቱ፡ እነግረክሙ፡ | በሐሳበ፡ ክህልኩ፡ እንዘ፡ እትአመን፡ በኃይለ፡ ጸሎትክሙ፨ ወበጸሎቱ፡ ለዝንቱ፡ ብእሲ፡ ኮከበ፡ ክብር፡ ጽባሐዊ፡ ዘየኃይድ፡ ብርሃኑ፡ እምብርሃነ፡ ካልአን፡ ከዋክብት፨ እንዘ፡ አብ፡ ይረድእ፡ ለወጢን፡ በለብዎ፡ ወእንዘ፡ ወልድ፡ ያጸንዕ፡ በአስተሰናእዎ፨ ወመንፈስ፡ ቅዱስ፡ እንዘ፡ ይከውን፡ ፈጸሜ፡ ኃይለ፡ ቃል፡ በአስተታልዎ፨ በሰላመ፡ ዚአሁ፡ አሜን፨ ጸሎቱ፡ ወበረከቱ፡ ብፁዕ፡ የሃሉ፡ ምስለ፡ ፍቅርቱ፡ ንግሥትነ፡ ወለተ፡ ኢየሱስ፡ወምስለ፡ ወልዳ፡ መስፍን፡ ኃይለ፡ ኢየሱስ፡ለዓለመ፡ ዓለም፡ አሜን፨

folio : 6


back to top

| | አቀድም፡ አእኵቶቶ፡ ለእግዚአብሔር፡ በእንተ፡ እግዚእነ፡ ኢየሱስ፡ ክርስቶስ፡ ዝውእቱ፡ ወልዱ፡ ወቃሉ፡ ለአብ፡ ዘበሕፅነ፡ አቡሁ፡ ሠረፀ፡ ፍሬ፡ ስብሐት፡ ዓቃቤ፡ ሥራይ፡ ዘወረደ፡ እምሰማያት፡ ከመ፡ ይደይ፡ ርጢኖ፡ ዲበ፡ እለ፡ ቈስሉ፡ በንስከተ፡ አርዌ፡ አስዋር፡ ወአልህምተ፨ ኦተቡዕ፡ ወአዕኑስ፡ ፈኒዎ፡ መንፈሰ፡ ኀበ፡ ነቢያቲሁ፡ ዘያጌብሮሙ፡ ከመ፡ ይበልዎ፡ እግዚኦ፡ አጽንን፡ ሰማያቲከ፡ ወረድ፨ አንሥእ፡ ኃይለከ፡ ወነዓ፡ አድኅነነ፨ አምላከ፡ ኃያላን፡ ሚጠነ፡ ግሥሦሙ፡ ለአድባር፡ ወይጠይሱ፨ ምንትኑ፡ ግሠቶሙ፡ ለአድባር፡ | ወጢሰቶሙ፨ እምከመሰ፡ ጤሱ፡ ይጠፍቡ፨ አድባረሰ፡ ይሰመዩ፡ ሰይጣን፡ ወአጋንንቲሁ፡ በእንተ፡ ልዕልና፡ ትዕቢቶሙ፡ እስመ፡ ቀዳሚሁ፡ ሰይጣን፡ ኮነ፡ ደብረ፡ ትዕቢት፡ ፀኒሶ፡ በፃዕር፡ ዘወለደ፡ ኃጢአተ፡ አማኅፀኑ፡ ዘምሉዕ፡ ኅምዘ፡ ዘይቀትል፡ ወይእቲ፡ ኃጢአቱ፡ ልሒቃ፡ ፍጡነ፡ ኮነቶ፡ ቀኖተ፡ ለአዳም፨ ወሶበ፡ ርእየ፡ ልሕኵቶ፡ እንዘ፡ ይፄዓር፡ ባአርዑተ፡ ቅኔሁ፡ ለሰይጣን፨ ወረደ፡ እንዘ፡ ኢዓርቅ፡ እመንበሩ፡ ስብሐቲሁ፨ ዘሰማየ፡ ሰማያት፡ ኢያገምሮ፡ ውስተ፡ | | ማኅፀነ፡ ብእሲት፡ ኃዲሮ፡ ፱ተ፡ አውራኃ፡ እንዘ፡ ኢያርኁ፡ ማኅተመ፡ ድንግልናሃ፡ ተወሊዶ፡ ዘበደባትረ፡ ብርሃን፡ ይሤወር፡ በአፅርቅት፡ ተጠብሊሎ፨ ዘበጽርሐ፡ አርያም፡ ያሰምክ፡ ውስተ፡ ጎል፡ ሰኪቦ፨ ዘኢይበልዕ፡ ሥጋ፡ ላህም፡ ወኢይሰቲ፡ ደመ፡ ጠሊ፡ ሕፃነ፡ ሐሊበ፡ ጠቢዎ፨ ዘበክነፈ፡ ነፋስ፡ ይፀወር፡ በአብራክ፡ ተሐቂፎ፨ ዘብሉይ፡ መዋዕሊሁ፡ በበሕቅ፡ ልሒቆ። ዘይትለአክዎ፡ አእላፈ፡ አእላፋት፡ መላእክት፡ ከመ፡ ገብር፡ ተልኢኮ፨ ዘሐፀቦ፡ ለዓለም፡ በማየ፡ አይኅ፡ በዮርዳኖስ፡ ተጠሚቆ፨ ፵፡ መዓልተ፡ ወ ፵፡ ሌሊተ፡ በውስተ፡ | ገዳም፡ ጸዊሞ፨ ወእምድኅረዝ፡ ርኂቦ፨ እምኀበ፡ ዲያብሎስ፡ ተመኪሮ፡ ወወንጌለ፡ መንግሥት፡ ምሒሮ፨ ድውያነ፡ ፈዊሶ፨ ዕውራነ፡ ከሢቶ፡ መፃጕዓነ፡ አርቲዖ፨ ወሐንካሳነ፡ አርዊፆ፡ ወሕሙማነ፡ ፈቲሖ፡ ሕሱፋነ፡ አዔርዮ፡ ወእለ፡ ለምጽ፡ አንጺሖ፨ ጽሙማነ፡ አስሚዖ፡ ወበሐማነ፡ አስተናጊሮ፨ ዘደመና፡ ፀበለ፡ እገሪሁ፡ ምድረ፡ ከይዶ፨ ዘይፂዓን፡ ዲበ፡ ኪሩቤል፡ ምድረ፡ ከይዶ፡ ወዲበ፡ ዕዋለ፡ አድግ፡ ተፅዒኖ፨ ወኵሎ፡ ትሕትና፡ አርእዮ፡ ወሕማማተ፡ ሥጋ፡ ተወኪፎ፨ በየማነ፡ ገብር፡ ቀዊሞ፨ ከመ፡ ጊጉይ፡

folio : 7


back to top

| | ተዓሢሮ፨ በእደ፡ ገብር፡ ተጸፊዖ፨ በበትረ፡ ሕለት፡ ርእሶ፡ ተኰሪዖ፨ ወዲበ፡ መስቀል፡ ተሰቂሎ፡ ዲበ፡ አእጋር፡ ወአዕዳው፡ ተቀኒዎ፨ ወሐሞተ፡ ዘምስለ፡ ከርቤ፡ ቱሱሐ፡ ሰትዮ፨ ወሠሊጦ፡ መዊተ፡ በአጽንኖ፡ ርእሱ። ወገቦሁ፡ ተረጊዘ፡ እንተ፡ እምኔሁ፡ ውኅዙ፡ ክልኤቱ፡ አፍላገ፡ ሕይወት፨ ወተገኒዞ፡ በሰንዱናተ፡ ገርዜን፨ ወተቀቢሮ፡ ውስተ፡ መቃብር፨ ወተዓፂዎ፡ በዕብነ፡ ማኅተሞሙ፡ ለአይሁድ፡ ወነቢሮ፡ ውስተ፡ ልበ፡ ምድር፡ ሠሉሰ፡ መዋዕለ፡ ወሠሉሰ፡ ለያልየ፨ ወተንሢኦ፡ እምውታን፨ | ወአንሢኦ፡ ምውታነ፡ ዓርገ፡ ሰማያተ፡ ወሀሎ፡ ይነብር፡ በየማነ፡ ዕበዩ፡ ዘውእቱ፡ አብ፡ ወይትዋቀሥ፡ በእንቲአነ፨ ወዘንተ፡ ኵሎ፡ ፈጺሞ፡ ኃደገ፡ ለነ፡ ማዕተቦ፡ ሰቲሮ፡ አሕባለ፡ ማሣግር፡ ወአንዲዶ፡ እሳተ፡ አኮ፡ ከመ፡ ያውዒ፡ አባለ፡ ሥጋ፨ አላ፡ እሳተ፡ ፍቅሩ፡ ውእቱ፡ ዘኢያቈርሮሙ፡ ላህቡ፡ ለእለ፡ ያፈቅርዎ፨ በከመ፡ ይቤ፡ አበ፡ ኵሉ፡ ለሊሁ፡ ወሲሳየ፡ ኵሉ፡ ሥጋሁ፨ እሳተ፡ አምጻእኩ፡ ለብሔር፡ ወእፈቅድ፡ አንድዶታ፨ ወሶበ፡ ነደት፡ ይእቲ፡ እሳት፡ መልዓ፡ ነበልባለ፡ እሳት፡ ውስተ፡ ልበ፡ ኵሎሙ፡ ኅሩያኒሁ፨ ወቦቲ፡ ነዲዶሙ፡ | | አርአዩ፡ ፍድፋዴ፡ ፍቅር፡ ዘበግዑ፡ በቃል፡ ወበምግባር፨ በቃሎሙሰ፡ ይቤሉ፡ ወበከመ፡ ኮነ፡ ውእቱ፨ ኮነ፡ ንሕነኒ፡ ውስተ፡ ዝንቱ፡ ዓለም፨ ወበምግባሮሙኒ፡ ፈጸሙ፡ ኵሎ፡ ፍኖተ፡ ወንጌል፡ በዛቲ፡ እሳት፡ ውዕዮሙ፡ ውዕዮሙ፡ ሰማዕትኒ፡ አጥፍዑ፡ ዕቶነ፡ እሳት፡ ዘአንደዱ፡ ዓላውያን፡ እስመ፡ በዛቲ፡ እሳት፡ ውዕዮሙ፡ ሰማዕትኒ፡ አጥፍኡ፡ እቶነ፡ እሳት፡ ዘአንደዱ፡ ዓላዊያን፡ እስመ፡ ትኄይል፡ እሳተ፡ ፍቅር፡ ዘውስተ፡ ልቦሙ፡ ዘአንደዳ፡ መድኅን፨ በዛቲ፡ እሳተ፡ ውዕዮሙ፡ ጻድቃን፡ አጥፍዑ፡ እሳተ፡ ውርዙት፡ ዘቍጹር፡ ውስተ፡ ሥጋሆሙ፡ ወአጥረዩ፡ ንጽሐ፡ እስከ፡ ተሰምዩ፡ መላእክተ፡ እንዘ፡ | ሀለው፡ በሥጋሆሙ፡ ለብሱ፡ ጠባይዓ፡ እሳት፡ ወኮኑ፡ ከመ፡ ኪሩቤል፡ እለ፡ ስሱ፡ አክናፊሆሙ፨ እስመ፡ ፈጻሚያነ፡ ቃለ፡ ወንጌል፡ ስሱ፡ ምስለ፡ ኵሉ፡ ፍድፋዴ፨ ወበእንተዝኬ፡ ኮኑ፡ ቢጸ፡ ሱራፌል፡ ወሰባሕያነ፡ ምስሌሆሙ፨ በዛቲ፡ እሳት፡ ውዕዮሙ፡ ደናግል፡ ኃደጉ፡ አውስቦ፡ ወሐጸው፡ ርእሶሙ፡ ለመንግሥተ፡ ሰማያት፨ በዛቲ፡ እሳት፡ ውዕዮሙ፡ መነኮሳት፡ ተናከርዎ፡ ለዝንቱ፡ ዓለም፡ ወለጣዕሙ፡ ወአይበሱ፡ ሥጋሆሙ፡ በትኅርምት፨ ወዔሉ፡ ገዳመ፡ እንዘ፡ ኢይፈርሁ፡ እምአናብስት፡ እምዋዕየ፡ መዓልት፡ ወእምቊረ፡

folio : 8


back to top

| | ሌሊት፨ ወመሣግረኒ፡ ዘሰተረ፡ አኮ፡ በከ፡ አላ፡ ከመ፡ ይስብሐቦሙ፡ ቦቱ፡ ኀበ፡ መልዕልት፡ ለእለ፡ አሥገሮሙ፨ በከመ፡ ይቤ፡ ለሊሁ፡ እግዚእነ፡ እምከመ፡ ተለዓልኩ፡ እምድር፡ እስሕብ፡ ኵሎ፡ ኀቤየ፨ ወበዝንቱ፡ ሐብል፡ ተሠጊሮሙ፡ ብዙኃን፡ እለ፡ ወፅኡ፡ እምዓዘቅተ፡ ኅርትምና፡ ወእምፅቡረ፡ አምዓም፡ ተባልሑ፨ በዝንቱ፡ ሐብል፡ ተሠጊሮሙ፡ መሠግራነ፡ ዓሣ፡ ኃደጉ፡ መሣግሪሆሙ፡ ወተለውዎ፡ ለዓሥጋሬ፡ ሰብእ፡ ከመ፡ ይትመሐሩ፡ እምኔሁ፡ ንዒወ፨ ከመ፡ ይንዓው፡ እሙንቱሂ፡ አናብስተ፡ በአየውሆ፡ ወአናምርተ፡ | በአበግዖ፨ ወኵሎ፡ ዘቦ፡ እከየ፡ በመይጦ፡ ኀበ፡ ግዕዝ፡ ሠናይ፨ ወዝንቱኒ፡ ዕፀ፡ ገነት፡ ርጡብ፡ ዘስሙ፡ ላሊበላ፡ በዘትረ፡ ቃሎሙ፡ ተሠቂዮ፡ ጸገየ፡ ምዑዘ፡ ወበሐብለ፡ ሐረጎሙ፡ ተእኂዞ፡ ፈረየ፡ ሐዋዘ፨በከመ፡ ይትከሠት፡ ይእዜ፡ ፍሬ፡ ምግባሩ፡ ፍድፉድ፡ ሶበ፡ ነኃልፍ፡ ንስቲተ፨ ወፍሬሁሰ፡ አኮ፡ ዘ ፩ ዕፀ፡ ገነት፨ አላ፡ ዘዘ፡ ዚአሁ፡ ኅበሪሁ፡ ወዘዘ፡ ዚአሁ፡ አርአያሁ፡ ወዘዘ፡ ዚአሁ፡ አስካሉ፡ በከመ፡ ይትዓወቁ፡ ዘገነታት፡ ፍሬያት፡ በበመዓዛሆሙ፡ ወበበአርአያሆሙ፡ ወበበኅበሪሆሙ፨ ፍሬ፡ ወይንኒ፡ ካልእ፡ አርአያሁ፡ | | ወጥላሌሁ፡ ወመዓዛሁ፡ ወፄናሁ፨ ፍሬ፡ ሮማንኒ፡ ካልእ፡ አርአያሁ፡ ወአምሳሊሁ፡ ወመዓዛሁ፡ ፍሬ፡ ከርካዕኒ፡ ካልእ፡ አርአያሁ፡ ወአምሳሊሁ፡ ወጣዕመ፡ መዓዛሁ፨ ፍሬ፡ ተመርትኒ፡ ካልእ፡ አርአያሁ፡ ወአምሳሊሁ፡ ወጣዕመ፡ መዓዛሁ፡ ወፍሬ፡ መልጰጶንሂ፡ ካልእ፡ አርአያሁ፡ ወአምሳሊሁ፨ ወፍሬ፡ ዕንጐታትሂ፡ ካልዕ፡ አርአያሁ፡ ወአምሳሊሁሙ፨ .................................................................................................................................................................... ወከማሁኬ፡ ዝንቱኒ፡ ብእሴ፡ አምላክ፡ ላሊበላ፡ እንዘ፡ ንጉሥ፡ ውእቱ፡ ዘተመሰለ፡ ወዓሌ፨ እንዘ፡ እግዚአ፡ ነባርያን፡ | ዘተመሰለ፡ ነባሬ፨ እንዘ፡ እግዚአ፡ መኳንንት፡ ተመሰለ፡ ተኰናኔ፨ አርአየ፡ ፍሬ፡ ኂሩታቲሁ፡ ፍሬ፡ ጾም፡ ዘምስለ፡ ፍሬ፡ ትእግሥት፡ ፍሬ፡ ትሕትና፡ ዘምስለ፡ ፍሬ፡ ንዴት፨ ፍሬ፡ ጸሎት፡ ዘምስለ፡ ፍሬ፡ የውሃት፨ ፍሬ፡ ሰጊድ፡ ዘምስለ፡ ፍሬ፡ ነጸፍጻፈ፡ ሐፍ፡ እንተ፡ ትትሜሰል፡ ከመ፡ ደመ፡ ሰማዕት፨እስመ፡ ትትዔፀር፡ እምጠባይዕ፡ እንበለ፡ ምክያድ፨ ወእንበለ፡ መጥባሕት፡ ፍሬ፡ ንጽሕ፡ ዘምስለ፡ ፍሬ፡ ገይሰ፡ ቤተ፡ ክርስቲያን፡ ቅድስት፨ ፍሬ፡ ተቀብሎ፡ ነግድ፡ ዘምስለ፡ ፍሬ፡ ምጽዋት፨ ፍሬ፡ ፍቅር፡ ዘምስለ፡ ፍሬ፡ ምሕረት፡

folio : 9


back to top

| | ፪ ፍሬ፡ ስብሐት፡ ዘምስለ፡ ፍሬ፡ ገንይ፡ ወአኰቲት፡ ፍሬ፡ አርምሞ፡ ዘምስለ፡ ፍሬ፡ ኢለሚደ፡ ሐሜት፨ ፍሬ፡ ዓቂበ፡ እጓለ፡ ማውታ፡ ዘምስለ፡ ፍሬ፡ ረዲአ፡ ዕቤራት፨ ፍሬ፡ ዓቂበ፡ ኵሎን፡ ቃለ፡ መጻሕፍት፡ አጥረየ፡ ብፁዕ፡ ወቅዱስ፡ ላሊበላ፡ አሰተጋብኦ፡ እምቅዱሳን፡ ቀደምት፨ ፍሬ፡ ምግባራቲሆሙ፡ ሠናየ፡ እንተ፡ ይእቲ፡ ፍሬ፡ መንፈስ፡ ቅዱስ፨ በከመ፡ ይቤ፡ ጳውሎስ፡ ልሳነ፡ ዕፍረት። ወፍሬሁሰ፡ ለመንፈስ፡ ቅዱስ፡ ዝውእቱ፡ ሃይመኖት፡ ወሰላም፡ ትእግሥት፨ ወየውሃት፡ ኢዘምዎ፡ | ፍቅር፨ እስመ፡ ፍቅርሰ፡ ርእሰ፡ ኵሎን፡ ምግባር፡ ይእቲ፡ ወተፍጻሜተ፡ ኵሎን፡ ትእዛዛት፨ እስመ፡ ፍቅር፡ ኢያስተጌብር፡ እኩየ፨ ፍቅር፡ ኢያስተቃንዕ፨ ፍቅር፡ ያስተዔግሥ፡ በኵሉ፨ ፍቅር፡ ያስተምህር፨ ፍቅር፡ ያስተፌሥሕ፡ በኵሉ፨ ፍቅር፡ ኢያስተፌሥሕ፡ በግፍዕ፨ ፍቅር፡ ኢስ/ተ/ምዕዕ፨ ፍቅር፡ ኢያሔሊ፡ እኩየ፨ ፍቅር፡ ኢየኃሥሥ፡ ተድላ፡ ለባሕቲቱ፨ ፍቅር፡ ኢያስተዓቢ፨ ዘንተኬ፡ ኵሎ፡ ዓቂቦ፡ አርአየ፡ ፍሬሁ፡ በበአግዋሊሁ፡ ዘምዑዝ፡ ፄናሁ፡ ወጥዑም፡ ፍሬሁ፡ ዘተዘግበ፡ | | ውስተ፡ ሰማያት፡ ኀበ፡ ኢይረክቦ፡ ፃፄ፡ ወኢቍንቍኔ፡ ውስተ፡ መዛግብተ፡ ጽድቆሙ፡ ለቅዱሳን፡ እሉ፡ እሙንቱ፡ ብርሃናተ፡ ዓለም፨ ብፁዕኬ፡ ዘበልዓ፡ እምፍሬሁ፡ ለዝንቱ፡ ብእሲ፡ ጻድቅ፡ ቀሲሞ፡ እምአስካለ፡ ፃማሁ፡ በተመስሎተ፡ ምግባራቲሁ፡ እስመ፡ ዘይትሜሰሎ፡ በምግባር፡ ይሄሉ፡ ኀበ፡ ሀሎ፡ ውእቱ፡ ወኀበ፡ ቦአ፡ ይበውአ፡ ወኀበ፡ አሥመከ፡ ያሠምክ፡ ወኀበ፡ ተጽሕፈ፡ ስሙ፡ ይጸሐፍ፡ ስመ፡ ተመሳሊሁ፨ ወዘተሠርገወ፡ ስነ፡ ይሠርገው፡ ተላዌ፡ ፍኖቱ፨ ወዘተቀጸለ፡ አክሊለ፡ | ምዝጋና፨ ይትሜሰል፡ ዘይትሜሰሎ፡ በገድል፨ ናሁ፡ ውእቱሰ፡ ነሥአ፡ አክሊለ፡ ምዝጋናሁ፡ ዘኢየኃልፍ፡ ወዘኢይጸመሂ፡ ዘተገብረ፡ በሐሳበ፡ ሕሊናሁ፡ ለዓሣዪ፡ ሕይወት፡ ዘኢተገብረ፡ በሐሳበ፡ ህክሚሆሙ፡ ለጠቢባን፡ መዓሥቃን፡ እለ፡ ያሤንዩ፡ አኒመ፡ በሜላት፨ ወበኅብረ፡ ለይ፡ ወበኅብረ፡ ደርከኖ፡ ወበአዝመር፨ ወዓዲ፡ ነሥአ፡ ክብረ፡ እምኀበ፡ እግዚአብሔር፡ ዘየዓቢ፡ እምክብረ፡ ካልአኒሁ፨ እስመ፡ ብዙኅ፡ ፆታ፡ ክብሮሙ፡ ለቅዱሳን፡ በከመ፡ አርአየ፡ ጳውሎስ፡ ወነገረ፡ በምሳሌ፡

folio : 10


back to top

| | እንዘ፡ ይብል፡ ካልእ፡ ክብሩ፡ ለፀሐይ፡ ወካልእ፡ ክብሩ፡ ለወርኅ፡ ወካልእ፡ ክብሮሙ፡ ለከዋክብት፨ ወኮከብ፡ እምኮከብ፡ ይኄይስ፡ ክብሩ፨ ከማሁኬ፡ ልብሰቶሙ፡ ለቅዱሳን፡ ከመ፡ ኮከብኒ፡ ወከመ፡ ወርኅኒ፡ ቦሙ፡ ልብሰት፨ ወበአምሳለ፡ ፀሐይኒ፡ ቦሙ፡ ዑጻፌ፡ ወለዝንቱሰ፡ ብፁዕ፡ ወቅዱስ፡ ምክሀ፡ ኵልነ፨ ልብሰተ፡ ክብሩ፡ ኢኮነ፡ ከመ፡ ካልአን፡ ኢከመ፡ ፀሐይ፡ ወኢካዕበተ፡ እምፀሐይ፡ ይበርህ፡ ምስብዒተ፡ ስነ፡ አልባሲሁ፡ ዘተኣንመ፡ በእደ፡ ኬንያ፡ ዘአልቦ፡ ዘይትማሰሎ፡ እምነ፡ ኪነውት፨ | ብፁዕኬ፡ ዘረከበ፡ ክፍለ፡ ምስለ፡ ብፁዕ፡ ላሊበላ፡ ወዘተዓፅፈ፡ ልብሰተ፡ ዑጻፌሁ፨ ወዘሰ፡ ኢተመሰሎ፡ በምግባሩ፡ ኢይነሥአ፡ ለክብሩ፨ ወዘሰ፡ ይፈቅድ፡ ይባእ፡ ኀበ፡ ቦአ፡ ላሊበላ፡ ይልበሳ፡ ለፃማሁ፨ በከመ፡ ይቤ፡ ጳውሎስ፡ ለእመ፡ ዓረይነ፡ ሕማመ፡ ንዔሪ፡ ክብረ፨ ወለእመ፡ ዓረይነ፡ መዊተ፡ ንዔሪ፡ ሕይወተ፡ ወለእመ፡ ዓረይ፡ ሕይወተ፡ ንዔሪ፡ ነጊሠ፨ እስመ፡ እንበለ፡ ፃማ፡ ኢይትከሃል፡ ይባእዋ፡ ለመንግሥተ፡ ሰማያት፡ በከመ፡ ይቤ፡ ካዕበ፡ ጳውሎስ፡ በብዙኅ፡ ፃማ፡ ሀለወነ፡ ንባአ፡ ለመንግሥተ፡ | | እግዚአብሔር፨ ወዘሰ፡ ይብል፡ እረክብ፡ መክፈልተ፡ ውስተ፡ ርስቶሙ፡ ለቅዱሳን፡ ዘኢለበሰ፡ ፃማሆሙ፡ ለቅዱሳን፡ ይዘልፎ፡ ቃለ፡ ነቢይ፡ ዘይቤ፡ ወይፈድዮ፡ ለኵሉ፡ በከመ፡ ምግባሩ፨ ወለእለሰ፡ ቦሙ፡ ምግባረ፡ ጽድቅ፨ ሎሙ፡ ክብር፡ ወሎሙ፡ ስብሐት፨ ወሎሙ፡ ዕፀ፡ ሕይወት፨ ወሎሙ፡ መንበር፡ ድልው፡ በየማነ፡ በግዑ፡ በከመ፡ ይቤ፡ በአፈ፡ ላዕኩ፡ እጓለ፡ አንበሳ፡ ዘእምነገደ፡ ይሁዳ፨ ወለዘሰ፡ ሞአ፡ እሁቦ፡ ይንበር፡ ምስሌየ፡ ውስተ፡ መንበርየ፨ በከመ፡ አነ፡ ሞእኩ፡ ወነበርኩ፡ ውስተ፡ መንበሩ፡ | ለአቡየ፨ ወይሰምዑ፡ ካዕበ፡ ቃለ፡ አስተብፅዖ፡ እምአፈ፡ ነቢይ፡ ዘሰንቀወ፡ እንዘ፡ ይብል፡ ብፁዓን፡ እለ፡ ንጹሓን፡ በፍኖቶሙ፨ እለ፡ የሐውሩ፡ በሕገ፡ እግዚአብሔር፡ ብፁዓን፡ እለ፡ የኃሡ፡ ስምዖ፨ ወበኵሉ፡ ልቦሙ፡ የኃሥዎ፨ ዝኬ፡ ውእቱ፡ ፍዳሆሙ፡ ለጻድቃን፨ ለእለ፡ ዓቀቡ፡ ሕጎ፡ ለልዑል፨ እንዘ፡ ይትኄየሉ፡ በገድል፨ ወለገባርያነ፡ እኪትሰ፡ ሎሙ፡ ኃሣር፡ ወሎሙ፡ ፅእለተ፡ ወሎሙ፡ ዘርክዮ፡ ወሎሙ፡ ምናኔ፡ እምኀበ፡ እግዚአብሔር፡ ወእምኀበ፡ መላእክት፡ ወእምኀበ፡ ሰብእ፨ ወሎሙ፡ መርገም፡

folio : 11


back to top

| | ወሎሙ፡ ረኃብ፡ ወሎሙ፡ ጽምዕ፡ ወሎሙ፡ ደይን፡ ወሎሙ፡ እሳት፡ ርሱን፡ ሎሙ፡ ሲኦል፡ ወሎሙ፡ ገሃነም፡ ዘውእቱ፡ ዳግም፡ ሞት፡ በዘይመጽእ፡ ዓለም፨ ወይሰምዑ፡ ካዕበ፡ ቃለ፡ መደንግፀ፡ ወመፍርሃ፡ ወመርዕደ፡ እምአፈ፡ መድኅን፡ ዘይብል፡ ሑሩ፡ እምኔየ፡ ርጉማን፡ ውስተ፡ እሳት፡ ዘለዓለም፡ ዘድልው፡ ለሰይጣን፡ ወለመላእክቲሁ፡ እስመ፡ ርኅብኩ፡ ወኢያብላዕክሙኒ፨ ጸማዕኩ፡ ወኢያስተይክሙኒ፨ ነግደ፡ ኮንኩ፡ ወኢተወከፍክሙኒ፡ ወኢያኀደርክሙኒ፨ ዓረቁ፡ ወኢያልበስክሙኒ። | ደወይኩ፡ ወኢሐወፅክሙኒ፨ ተሞቃሕኩ፡ ወኢመጻእክሙ፡ ኀቤየ፡ ወኢነበብክሙኒ፨ ዝውእቱ፡ ፩ አፈ፡ ሰይፍ፡ እም ፪፡ ዘይቤ፡ ዮሐንስ፡ አቡቀለምሲስ፡ ወይወፅአ፡ እምአፉሁ፡ ሰይፍ፡ በሊሕ፡ ዘክልኤ፡ አፉሁ፨ ዝውእቱ፡ ሰይፍ፡ ዘይበትክ፡ ቃሎሙ፡ ለዕልዋን፨ ለእለ፡ አግብኡ፡ ቃለ፡ እንዘ፡ ይብሉ፡ እግዚኦ፡ ማእዜኑ፡ ርኢናከ፡ ርኁበከ፡ ወኢያብላዕናከ፨ አው፡ ጽሙዓከ፡ ወኢያስተይናከ፨ ወማእዜኑ፡ ርኢናከ፡ ነግደከ፡ ወኢተወከፍናከ፡ ወኢያኅደርናከ፨ ወማእዜኑ፡ ርኢናከ፡ ዕሩቀከ፡ | | ወኢያልበስናከ፨ ወማእዜኑ፡ ርኢናከ፡ ደውየከ፡ ወኢሐወጽናከ፨ ወሙቁሐከኒ፡ ወኢመጻእነ፡ ኀቤከ፡ ወኢነበብናከ፡ ወያወሥኦሙ፡ ዝኩ፡ አፈ፡ ሰይፍ፡ እንዘ፡ ይበትክ፡ ቃሎሙ፡ ወይቤሎሙ፨ አማን፡ እብለክሙ፡ ኵሎ፡ ዘኢገበርክሙ፡ ለ ፩፡ እምእሉ፡ ንዑሳን፨ አኃውየ፡ እለ፡ የአምኑ፡ ብየ፡ ሊተ፡ ኢገበርክሙ፡ ወእምዝ፡ አልቦ፡ ዘአውሥኡ፡ እስመ፡ ተበትከ፡ ቃሎሙ፡ በሰይፈ፡ ቃሉ፡ ለልዑል፡ ወይትፈጸም፡ አፉሆሙ፨ በከመ፡ ይቤ፡ ነቢይ፨ እስመ፡ ይትፈጸም፡ አፍ፡ ዘይነብብ፡ ዓመፃ፨ ወባሕቱ፡ የሐውሩ፡ | ውስተ፡ ኵነኔ፡ ወመቅሠፍት፡ ዘለዓለም፨ ተዓሲሮሙ፡ በስሱ፡ ቃለ፡ ወንጌል፨ ወያንኰረኵሩ፡ ውስተ፡ ግበ፡ ሲኦል፡ ወይዘረው፡ አዕፅምቲሆሙ፨ ወምስለ፡ ሲኦል፡ ካዕበ፡ ይትሜጠዎሙ፡ ገሃነም፡ ወህየ፡ ቤቶሙ፡ እስከ፡ ለዓለም፨ ዝኬ፡ ፍዳሆሙ፡ ለገበርተ፡ ዓመፃ፨ ወካልኡሂ፡ አፈ፡ ሰይፍ፡ ዘይወልድ፡ ሕይወት፡ ዝንቱ፡ ውእቱ፡ ዘይብሎሙ፡ ለጻድቃኒሁ፡ ወልደ፡ እግዚአብሔር፨ ንዑ፡ ኀቤየ፡ ቡሩካኑ፡ ለአቡየ፡ ትረሱ፡ መንግሥተ፡ ሰማያት፡ ዘአስተደለወ፡ ለክሙ፡ እምቅድመ፡ ይትፈጠር፡

folio : 12


back to top

| | ዓለም፨ እስመ፡ ርኅብኩ፡ ወአብላዕክሙኒ፡ ጸማእኩ፡ ወአስተይክሙኒ፨ ነግደ፡ ኮንኩ፡ ወተወከፍክሙኒ፡ ወአኅደርክሙኒ፨ ዓረቁ፡ ወአልበስክሙኒ፨ ደወይኩ፡ ወሐወፅክሙኒ፨ ተሞቃሕኩ፡ ወመጻእክሙ፡ ኅቤየ፡ ወነበብክሙኒ፨ ወእምዝ፡ አሜሃ፡ ያወሥእዎ፡ ጻድቃን፡ ወይብልዎ፡ እግዚኦ፡ ማእዜኑ፡ ርኢናከ፡ ርኁበከ፡ ወአብላዕናከ፨ አው፡ ጽሙዓከ፡ ወአስተደናከ፨ ወማእዜኑ፡ ርኢናከ፡ ነግደከ፡ ወተወከፍናከ፡ ወአኅደርናከ፨ወማእዜኑ፡ ርኢናከ፡ ዕሩቀከ፡ ወአልበስናከ፨ ወማእዜኑ፡ | ርኢናከ፡ ድውየከ፡ ወሐወፅናከ፨ ወማእዜኑ፡ ርኢናከ፡ ሙቁሐከ፡ ወተልእናከ፨ ወያወሥኦሙ፡ ዝኩ፡ ሰይፈ፡ ቃል፡ ማኅየዊት። ወይብሎሙ፡ አማን፡ አማን፡ እብለክሙ፡ ኵሎ፡ ዘገበርክሙ፡ ለ፩ እምእሉ፡ ንዑሳን፡ አኃውየ፡ እለ፡ የአምኑ፡ ብየ፡ ሊተ፡ ገበርክሙ፨ ወየሐውሩ፡ እሉሂ፡ ተስሒቦሙ፡ በስሱ፡ እሕባለ፡ ቃለ፡ ወንጌል፡ ውስተ፡ መንግሥተ፡ ሰማያት፨ ወይበውኡ፡ ኀበ፡ ሀለወ፡ እግዚአብሔር፡ ምስለ፡ በግዑ፡ ወምስለ፡ መንፈሱ፨ ወዝንቱ፡ ገብረ፡ መስቀል፡ ፩፡ ውእቱ፡ እምኔሆሙ፡ | | እምእለ፡ ቦኡ፡ ውስተ፡ ኢየሩሳሌም፡ ሰማያዊት፡ አግዓዚት፡ ብርሃን፡ ዘኢየኃልፍ፡ እንተ፡ ኢይበውአ፡ ውስቴታ፡ ቈላፍ፡ ዘኢተገዝረ፡ ቍልፈተ፡ ልቡ፡ በመጥባሕተ፡ ሃይማኖት፡ ዘንቱሰ፡ ብፁዕ፡ ወቅዱስ፡ ዘተገዝረ፡ ቍልፈተ፡ ነፍስቱ፡ በመጥባሕት፡ ሥጋዊት፨ ወሀገራሰ፡ ኀበ፡ ቦአ፡ ላሊበላ፡ ኢትፈቅድ፡ ከመ፡ ያብርሁ፡ ላቲ፡ ብርሃነ፡ ፀሐይ፡ ወወርኅ፡ ወኢብርሃነ፡ ከዋክብት፨ እስመ፡ ብርሃነ፡ እግዚአብሔር፡ ያበርህ፡ ላቲ፡ ወብርሃነ፡ በግዑ፡ ውስቴታ፡ ኃደረ፡ | ምስለ፡ አብያጺሁ፡ ብርሃናውያን፨ እስመ፡ በርሀ፡ ልቡ፡ በፀዳለ፡ መንፈስ፡ ቅዱስ፡ ወበቃለ፡ መጻሕፍት፡ በከመ፡ ተብህለ፡ ፌ፡ መንክር፡ ስምዕከ፨ በእንተዝ፡ ኃሠሠቶ፡ ነፍስየ፡ ነገረ፡ ቃልከ፡ ያበርህ፡ ወያጠብብ፡ ሕፃናተ፨ ወዓዲ፡ ይቤ፡ ኖን፡ ማኅቶት፡ ለእግርየ፡ ሕግከ፡ ብርሃን፡ ለፍኖትየ፨ ወካዕበ፡ ሕጉ፡ ለእግዚአብሔር፡ ንጹሕ፡ ወይመይጣ፡ ለነፍስ፨ ስምዑ፡ ለእግዚአብሔር፡ እሙን፡ ወያጠብብ፡ ሕፃናተ፨ ኵነኔሁ፡ ለእግዚአብሔር፡ ርቱዕ፡ ወያስተፌሥሕ፡ ልበ፨ ትእዛዙ፡ ለእግዚአብሔር፡ ብሩህ፡

folio : 13


back to top

| | ወያበርህ፡ አዕይንተ፨ ፈሪሃ፡ እግዚአብሔር፡ ንጹሕ፡ ወያሐዩ፡ ለዓለም፨ ፍትሑ፡ ለእግዚአብሔር፡ ጽድቅ፡ ወርትዕ፡ ኅቡረ፨ ወይትፈቶ፡ እምወርቅ፡ ወእምዕንቊ፡ ክቡር፨ ወይጥዕም፡ እመዓር፡ ወሦክር፨ ወገብርከሰ፡ የዓቅቦ፨ ወበዓቂቦቱ፡ ይተዓሠደ፡ ብዙኃ፨ በአማንኬ፡ ዓቀበ፡ ሕገ፡ ብሉየ፡ ወሐዲሰ፨ ወጥዕሞ፡ ቃለ፡ እግዚአብሔር፡ ውስተ፡ አፉሁ፡ እመዓር፡ ወሦከር፨ በከመ፡ ተብህለ፡ በነቢይ፡ ጥዑም፡ ሰጉርዔየ፡ ነቢብከ፨ እመዓር፡ ወሦከር፡ ጥዕመኒ፡ ለአፉየ፨ ወእምትእዛዝከ፡ ለበውኩ፨ በእንተዝ፡ | አፍቀርኩ፡ ትእዛዘ፨ እምወርቅ፡ ወእምጳዝዮን፨ በእንተዝ፡ አርታዕኩ፡ ኀበ፡ ኵሉ፡ ትእዛዝከ፨ ኵሎ፡ ፍኖተ፡ ዓመፃ፡ ጸላእኩ፨ በአማንኬ፡ ጸልዓ፡ ኵሎ፡ ፍኖተ፡ ዓመፃ፨ እስመ፡ ፍኖተ፡ ዓመፃ፡ ውእቱ፡ ፀሩ፡ ለብርሃን፨ ወዘገብረ፡ ኪያሁ፡ ኢይመጽእ፡ ኀበ፡ ብርሃን፨ በከመ፡ ይቤ፡ ዮሐንስ፡ ወልደ፡ ነጐድጓድ፡ ወዘሰ፡ እኩይ፡ ምግባሩ፡ ኢይመጽእ፡ ኀበ፡ ብርሃን፡ ከመ፡ ኢይትከሠቶ፡ ምግባሩ፨ ወዘሰ፡ ጽድቅ፡ ምግባሩ፡ ወዘይገብር፡ ጽድቀ፨ ይመጽእ፡ ኀበ፡ ብርሃን፡ ከመ፡ ያስተርኢ፡ ምግባሩ፡ እስመ፡ | | በእንተ፡ እግዚአብሔር፡ ይገብረ፨ በእንተዝኬ፡ ሖረ፡ በፍኖተ፡ ብርሃን፡ ከመ፡ ይትመሰሎ፡ ለብርሃን፡ ዘውእቱ፡ ኢየሱስ፡ ክርስቶስ፡ ተሰሒቦ፡ በሐብለ፡ ቃሎ፡ ዘይቤ፡ ተመሰሉ፡ ኪያየ፡ እስመ፡ ያረውጾ፡ ካዕበ፡ ቃለ፡ ሐዋርያ፡ ዘይቤ፡ ተመሰሉ፡ ኪያየ፡ በከመ፡ አነ፡ እትሜሰሎ፡ ለክርስቶስ፡ ዮሐንስኒ፡ ዓዲ፡ ይቤ፡ ወዘሰ፡ ይብል፡ ውስተ፡ ብርሃን፡ ሀሎኩ፡ መፍትው፡ ይሑር፡ በከመ፡ ሖረ፡ ዝክቱ፨ በእላንቱኬ፡ አሕባለ፡ ቃል፡ ተስሒቦ፡ ወራግናቶኒ፡ እንዘ፡ ይሔድፍ፡ በመቃድፈ፡ ሃይማኖት፡ ከመ፡ ኢየኃይሎ፡ ነፋሰ፡ ዓውሎ፡ ዘኃጢአት፨ | ወአንሶሰወ፡ ውስተ፡ ባሕረ፡ ዓለም፡ እንዘ፡ ኢይለክፎ፡ ማየ፡ ኃጢአት፡ ወእገሪሁኒ፡ ጥቀ፡ እንዘ፡ ኢይርሐስ፨ በከመ፡ ይቤ፡ ፩ እምነ፡ ብርሃናተ፡ ዓለም፡ እንዘ፡ ይነግር፡ በእንተ፡ ኵሎሙ፡ ወበእንተ፡ ርእሱኒ፡ ወበእንተ፡ ካልአኒሁኒ፨ እስመቦ፡ እለ፡ ይትሔዘቡነ፡ ከመ፡ በሥጋነ፡ ነሐውር፡ ወአኮ፡ ሕገ፡ ዚአሁ፡ ዘንገብር፨ እስመ፡ ንዋየ፡ ሐቅሉ፡ ለፀብዕነ፡ ኢኮነ፡ በሕግ፡ ዘሥጋ፨ አላ፡ በኃይለ፡መንፈስ፡ ቅዱስ፡ ውእቱ፡ ዘይነሥት፡ ወዘያንሐል፡ ኵሎ፡ አጽዋናተ፨ በኀይለ፡ መንፈስ፡

folio : 14


back to top

| | ቅዱስኬ፡ አንሒሎ፡ ኵሎ፡ አጽዋናተ፡ ዘኃጢአት፨ ሖረ፡ መጽያሕቶ፡ ርቱዓ፡ በዘጼሑ፡ ሎቱ፡ ነቢያት፡ ወሐዋርያት፡ እንዘ፡ ኢይትመየጥ፡ ኢለየማን፡ ወኢለጸጋም፨ በከመ፡ ይቤ፡ ወንጌላዊ፡ ጺሑአ፡ ፍኖቶ፡ ለእግዚአብሔር፨ ወዓርዩ፡ መጽያሕቶ፡ ኵሉ፡ ማዕምቅ፡ ይምላዕ፡ ወኵሉ፡ ደብር፡ ወወግር፡ ይተሐት፨ ወይኩን፡ መብዕስ፡? መጽያሕተ፡ ርቱዓ፡ ወያዓሪ፡ ፍኖተ፡ መብዕሰ፨ ወይርአይ፡ ኵሉ፡ ዘነፍስ፡ አድኅኖቶ፡ ለእግዚአብሔር፨ ወዘንተ፡ ኵሎ፡ ሰሚዖ፡ እምቃለ፡ መብህል፡ ወዕመቀ፡ ቃላቲሁ፡ ለቢዎ፡ ጽሕቀ፡ | ከመ፡ ይፈጽም፡ ገቢሮቶ፨ ጺሑሰ፡ ፍኖቶ፡ ለእግዚአብሔር፡ ሶበ፡ ይብል፡ ነፍስ፡ ወሥጋ፡ ውእቱ፡ ዘያንሶሱ፡ ውስቴቶን፡ ጳራቅሊጦስ፨ ዘውእቱ፡ ማኅተመ፡ ፍጽምነ፡ ወስምዓ፡ ግዕዛንነ፡ ዘተሐተምነ፡ ቦቱ፡ በዕለተ፡ ተወለድነ፡ እማይ፡ ወበእንተ፡ ዝንቱ፡ አዕተተ፡ ርስሐተዝ፡ ዓለም፨ እምነፍሱ፡ ወሥጋሁ፡ ከመ፡ ይኩን፡ ማኅደረ፡ ለሥሉስ፡ ቅዱስ፡ በከመ፡ ይቤ፡ እግዚእነ፡ እመቦ፡ ዘያፈቅረኒ፡ ወአነሂ፡ አፈቅሮ፡ ወእርእዮ፡ ርእስየ፨ ወንመጽእ፡ አነ፡ ወአቡየ፡ ወነኃድር፡ ኀቤሁ፡ ወንነብር፡ ምስሌሁ፡ | | ወጳውሎስኒ፡ ይቤ፡ ወቤቱሰ፡ ለእግዚአብሔር፡ አንትሙ፡ ውእቱ፨ ወካዕበ፡ ይቤ፡ ወኢታተክዝዎ፡ ለመንፈስ፡ ቅዱስ፡ ዘየኃድር፡ ውስቴትክሙ፡ ዘቦቱ፡ ተዓተብክሙ፡ በዕለተ፡ ተባልሖትክሙ፡ ወዘንተ፡ ሰሚዖ፡ አንጽሐ፡ ምኵራበ፡ ሥጋሁ፡ ወማኅፈደ፡ ነፍሱ፡ ወአልቦ፡ ዘገብረ፡ ወኢምንተኒ፡ እምግባራት፡ በዘ፡ ያቲክዝ፡ መንፈስ፡ ቅዱስ፡ ዘየኃድር፡ ውስቴቱ፡ አላ፡ ባሕርይ፡ ውእቱ፡ ሥጋሁኒ፡ ወባሕርይ፡ ውእቱ፡ ነፍሱኒ፡ ዘያፈትዎ፡ ለመንፈስ፡ ግዕዛን፡ ከመ፡ ይኅድር፡ ውስቴቱ፡ ወኢይትፈለጥ፡ እምኔሁ። | እስመ፡ ኢይትገኃሥ፡መንፈስ፡ ቅዱስ፡ እምብእሲ፡ ንጹሕ፡ እምአመ፡ ተወልደ፡ እምኔሁ፨ ወኀበሰ፡ ዘቦ፡ መንፈሰ፡ እከይ፡ ኢየኃድር፡ ውስቴቱ፨ እስመ፡ ኢይዴመር፡ መንፈስ፡ ቅዱስ፡ ምስለ፡ መንፈስ፡ ሰይጣን፨ በከመ፡ ኢይዴመር፡ ጽልመት፡ ምስለ፡ ብርሃን፨ በከመ፡ ይቤ፡ ጳውሎስ፡ መምህረ፡ አሕዛብ፡ መኑ፡ ዘደመሮ፡ ለጽልመት፡ ምስለ፡ ብርሃን። ወመኑ፡ ዘያኃብሮ፡ ለክርስቶስ፡ ምስለ፡ ቤልሖር፨ ወመኑ፡ ዘያነብር፡ ጣዖተ፡ ውስተ፡ ቤተ፡ እግዚአብሔር፨ ከማሁኬ፡

folio : 15


back to top

| | ኢየኃድር፡ መንፈሰ፡ እግዚአብሔር፡ ምስለ፡ መንፈሰ፡ ነኪር፨ በመዋዕለ፡ አንጽሐ፡ ብእሲ፡ ርእሶ፡ ይሔውጾ፡ መንፈስ፡ ቅዱስ፡ ወየኃድር፡ ውስቴቱ፡ ወይነብር፡ ምስሌሁ፡ እንዘ፡ ይመርሖ፡ በፍናዊሁ። ወእንዘ፡ ይሜህሮ፡ ቀትለ፡ ወፀብዓ፡ ምስለ፡ ዕድው፡ ሰይጣና፨ ወውእቱ፡ መንፈስ፡ ቅዱስ፡ እንዘ፡ ይከውኖ፡ ሰይፈ፡ ረድኤት፡ ዘቦቱ፡ ይትወቀይ፡ ርእሰ፡ ከይሲ፡ መስዖዝዝ፨ ወካዕበ፡ በመዋዕለ፡ አገመነ፡ ብእሲ፡ ርእሶ፡ የኃድጎ፡ መንፈሰ፡ ቅዱስ፡ ወይመፅእ፡ እምኔሁ፨ ወየሐንቆ፡ መንፈሰ፡ ጋኔን፨ | በከመ፡ ሐነቆ፡ ለሳኦል፡ ሶበ፡ ኃደጎ፡ መንፈሰ፡ እግዚአብሔር፨ ወይከውን፡ ሥጡጠ፡ ውእቱ፡ ብእሲ፡ ዘወፅአ፡ እምኔሁ፡ መንፈሰ፡ እግዚአብሔር፨ በከመ፡ ተሠጠ፡ መገጦላዕተ፡ ምኵራብ፨ እንዘ፡ ይወፅእ፡ መንፈሰ፡ ትንቢት፡ ወመንፈሰ፡ ክህነት፨ እስመ፡ ኀበ፡ ከዓውያነ፡ ደም፡ ኢይፈቅድ፡ ሀልዎ፨ ወይከውን፡ ዓዲ፡ መዝብረ፡ ሶበ፡ ወፅአ፡ እምኔሁ፡ መንፈሰ፡ እግዚአብሔር፡ አስሚዖ፡ እንዘ፡ ይብል፡ ሚመጠነ፡ ፈቀድኩ፡ አስተጋብእከ፡ ከመ፡ እንተ፡ ታስተጋብእ፡ ይርሆ፡ ዕጐሊሃ፡ ታሕተ፡ ክነፊሃ፡ | | ወአበይከ፡ ናሁ፡ አኃድግ፡ ለከ፡ ቤተከ፡ በድወ፨ ወሶቤሃ፡ ይከውን፡ ውእቱ፡ ብእሲ፡ ዕሩቀ፡ እመንፈስ፡ ቅዱስ፡ እመንፈሰ፡ ጥበብ፡ ወአእምሮ፡ እመንፈሰ፡ ኃይል፡ ወጽንዕ። እመንፈሰ፡ ልቡና፡ ወርትዕ፨ ወይመጽእ፡ ኀቤሁ፡ መንፈሰ፡ ጋኔን፡ ወየኃድር፡ ውስቴቱ፡ እንዘ፡ ያንፈርዕፅ፨ ከመ፡ እንተ፡ ዝዕብ፡ ዘረከበ፡ በድነ፡ ወይጼውዕ፡ በክላሕ፡ ዐቢይ፡ አብያጺሁ፡ አዝዕብተ፡ ከመ፡ ይትፈሥሑ፡ ምስሌሁ፨ ቦእምኔሆሙ፡ ዘይቀይዕ፡ ውስተ፡ ልበ፡ ውእቱ፡ ብእሲ፡ ኅምዘ፡ ክሂድ፨ ወቦ፡ እምኔሆሙ፡ ዘይወዲ፡ ውስቴቱ፡ | ኅምዘ፡ ዝሙት፡ ወያስተናጕዕ፡ በውስተ፡ ከርሡ፡ ወሥጋሁ፡ ኵሎ፡ ስብሐ፡ እክል፡ ወያረውጾ፡ ድኅረ፡ አንስት፡ ዘማውያት፨ ወቦ፡ ዘይወዲ፡ እምኔሆሙ፡ ውስተ፡ ልሳኑ፡ ነገረ፡ ሐሰት፡ ወነገረ፡ ሐሜት፨ ነገረ፡ ላኳ፡ ወጋዕዝ፡ ነገረ፡ ኃፍረት፡ ወነገረ፡ ፅርፈተ፡ ወነገረ፡ ውዴት፡ ወነገረ፡ ወጽልሑት፨ ወቦ፡ እምኔሆሙ፡ ዘይወዲ፡ ውስተ፡ ሐቋሁ፡ ሐብለ፡ ቅንዓት፡ ወውስተ፡ እዴሁ፡ ሰይፈ፡ በቀል፡ ከመ፡ ይቅትሎ፡ ለእኅዋሁ፨ በከመ፡ ቀተሎ፡ ቃየል፡ ለአቤል፡ እኁሁ፡ ቦእምኔሆሙ፡ ዘይወዲ፡ ውስተ፡ እንግድዓሁ፡

folio : 16


back to top

| | እልታሐ፡ ባዕስ፡ ወውስተ፡ ዘባኑ፡ ሞጣሕተ፡ ሞት፡ እዴሁ፡ አውቃፈ፡ ሐጕል፡ ወውስተ፡ ክሣዱ፡ ቃማ፡ ጌጋይ፡ ወውስተ፡ መላትሔሁ፡ ቅብዓ፡ ኃጢአት፨ ወውስተ፡ ድማሁ፡ ጊራ፡ ሕሠም፨ ከመ፡ ይኩን፡ ፍጹመ፡ ሥርግወ፡ በዘዚአሆሙ፡ ሠርጕ፨ ወይነብሩ፡ ምስሌሁ፡ እንዘ፡ የዓቅብዎ፡ ከመ፡ ኢያዕርቅ፡ ርእሶ፡ እምነ፡ ጌራሆሙ፡ ወኢክሣዶ፡ እምነ፡ ቃማሆሙ፡ ወኢእደዊሁ፡ እምነ፡ አውቃፊሆሙ፨ ወኢእንግድዓሁ፡ እምነ፡ እልታሆሙ፡ ወኢዘባኖ፡ እምነ፡ ሞጣሕቶሙ፨ ወኢሐቋሁ፡ እምነ፡ | ሐብለ፡ ግብርናቶሙ፡ ወኢእገሪሁ፡ እምነ፡ አሣዕኒሆሙ፨ ወለእመ፡ ኮነ፡ ፍጻሜ፡ ፀዓቱ፡ እምዝንቱ፡ ዓለም፨ በዘ፡ ከመዝ፡ ልብሰቱ፡ ይትፌሥሑ፡ ተጋቢኦሙ፡ ኵሎሙ፡ ማኅበረ፡ አጋንንት፨ ወይደምፁ፡ መዝሙረ፡ ሐጕለ፡ ብእሲሁ፨ እንዘ፡ ይብሉ፡ መኑ፡ ዘያድኅና፡ ለነፍስከ፡ እምእደ፡ ሲኦል፡ እስመ፡ ለእግዚእ፡ ግዕዛንከ፡ መነንኮ፡ ወተዓወርኮ፡ እንዘ፡ ይብል፡ በቃሉ፡ ኩን፡ ቅዱሰ፡ ኮንከ፡ ርኩሰ፡ እንዘ፡ ይብለከ፡ ኩን፡ ንጹሐ፡ ኮንከ፡ ርሱሐ፨ እንዘ፡ ይብለከ፡ ኩን፡ ጻድቀ፡ ኮንከ፡ ኃጥአ። እንዘ፡ | | ፪ ይብለከ፡ ኩን፡ የዋሃ፡ ከመ፡ ርግብ፡ ወጠቢበ፡ ከመ፡ አርዌ፡ ምድር፡ ኮንከ፡ አብደ፡ ከመ፡ እንስሳ፨ ወኮንከ፡ ድሩከ፡ ከማነ፡ እንዘ፡ ይብለከ፡ ተሴሰይ፡ ዘልፈ፡ እማዕድየ፡ ወኢትፃእ፡ እምቤትየ፨ ወአንተሰ፡ ፈተውከ፡ ትሴሰይ፡ ሐመረ፡ ፅራዕ፡ ዘይሴሰዩ፡ አሕርው፡ እስመ፡ ንሕነ፡ መዝመዝነ፡ ቅብዓ፡ ክርስትናከ፡ እምይእዜሰ፡ ምስሌነ፡ ርስትከ፨ ወሶቤሃ፡ ይወድይዎ፡ ውስተ፡ ግቦሙ፡ ወውስተ፡ ማኅደር፡ ዘድልው፡ ሎሙ፨ እስመ፡ ዓቃቤ፡ ትእዛዞሙ፡ ውእቱ፡ ወመፍቀሬ፡ ሥርዓቶሙ፨ ወሶቤሃ፡ የአምር፡ | ውእቱ፡ ብእሲ፡ ዘኢያእመር፡ በሕይወቱ፡ ወይጌሥጻ፡ ለነፍሱ፡ በኀበ፡ ኢይበቍዕ፡ ተግሣጽ፨ ወይላሁ፡ በኀበ፡ ዘኢይበቊዕ፡ ላህ፨ ሶበ፡ አሕመሞ፡ ላህበ፡ ገሃነም፡ ወቊረ፡ ሲኦል፡ እስመ፡ ቦቱ፡ ውሣጤ፡ ለኵነኔሆሙ፡ ለኃጥአን፡ ዘውእቱ፡ ሲኦል፡ ሶበ፡ ይከውን፡ ቈሪረ፡ ዘአልቦ፡ ዓቅም፡ ለቊረቱ፡ ሶበ፡ አሕመሞሙ፡ በቍረቱ፡ ይትመየጥ፡ ወይከውን፡ ውዑየ፡ ዘአልቦ፡ መጻልው፡ ለውዕየቱ፨ ወከመዝ፡ የሐሞሙ፡ በተባርዮ። ወይኔስሑ፡ በኀበ፡ ኢይበቊዕ፡ ንስሐ፨ በከመ፡ ይቤ፡ ዳዊት፡ ወእለሰ፡

folio : 17


back to top

| | ፫ ይጸልዕዋ፡ ለጽድቅ፡ ይኔስሑ፡ ወንስሐሆሙኒ፡ አልቦ፡ ማኅለቅት፨ በከመ፡ ለንስሐ፡ ዲያብሎስ፡ ለኵነኔሁ፡ አልቦ፡ ማኅለቅት፡ ወኢትፍጻሜት፨ ከማሁ፡ ለኵነኒ፡ እሊዓሁኒ፡ አልቦ፡ ማኅለቅት፡ ወኢተፍጻሜት፨ ያድኅነነኬ፡ እመሥገቱ፡ ለዝንቱ፡ ጽጉበ፡ ደም፡ አርዌ፡ ዘየኃሥሥ፡ እስከ፡ ይእዜ፡ ነፍሳተ፡ ከመ፡ የኃጥ፡ እንዘ፡ ይጥሕር፡ ከመ፡ አንበሳ፡ ወኢያርመመ፡ እምአዳም፡ እስከ፡ ዮም፨ ፋሕለ፡ ጥሕረቱ፡ እንዘ፡ ይፈቅድ፡ ከመ፡ ይድቢ፡ አለ፡ ተሰምዩ፡ ናዝራዊያነ፨ እስመ፡ | ሰምዓነ፡ እንዘ፡ ናውግዞ፡ መይጠነ፡ ገጸነ፡ መንገለ፡ ምሥራቅ፡ በዕለተ፡ ለበስናሁ፡ ለመርዓዊ፡ ሰማያዊ፡ ብእሲ፡ ሐዲስ፡ ዘውእቱ፡ ክርስቶስ። ወኃደግናሁ፡ ለብሉይ፡ ብእሲ፡ ዘውእቱ፡ ዲያብሎስ፡ እንዘ፡ ንብሎ፡ ርጉም፡ አንተ፡ ወርጉም፡ ሕሊናከ፡ ወርጉም፡ ግብርከአ ወበእንተዝኬ፡ ይትመዓዕ፡ ላዕሌነ፨ ወለነኒ፡ የሀበነ፡ እግዚእነ፡ ኢየሱስ፡ ክርስቶስ፡ ሰይፈ፡ ረድኤት፡ በከመ፡ ወሀቦ፡ ለላሊበላ፡ ሰይፈ፡ መዊዕ፡ ከመ፡ ይውቂ፡ ክሣዶ፡ ለዝንቱ፡ አርዌ፡ ርጉም፡ ወይረስየነ፡ ለነኒ፡ ከመ፡ | | ናውቂ፡ ክሣዶ፡ በከመ፡ አውቀዮ፡ ውእቱ፡ አሜን፨ ወዝንቱሰ፡ ብእሲ፡ ክቡር፡ ኮከብ፡ ፅዱል፡ ዘያንሶሱ፡ መልዕልተ፡ ዓየር፡ በጢሎ፡ እምሕሊና፡ ዘበምድር፨ አልቦ፡ ዘገብረ፡ ምግባራተ፡ ዘያምዕዖ፡ ለመንፈሰ፡ ለእግዚአብሔር። ወአልቦ፡ አመ፡ ሰሳለ፡ መንፈስ፡ ቅዱስ፡ እምኔሁ፨ እምአመ፡ ተወልደ፡ እምከርሠ፡ ጥምቀት፨ እስመ፡ አተግኅሠ፡ እምቃለ፡ መጻሕፍት፡ ዘውእቱ፡ እስትንፋሰ፡ መለኮት፨ ወበእንተ፡ ዝንቱ፡ ኮነ፡ ምብያተ፡ ለምግባረ፡ ሠናይ፨ እስመ፡ ይጽሕቅ፡ ከመ፡ ይፈጽም፡ ቃላተ፡ | ወንጌል፨ ወፈድፋደሰ፡ ይደጕጽ፡ በቃለ፡ ጳውሎስ፡ ዘይቤ፡ እስመ፡ አኮ፡ በአጽምኦ፡ መጻሕፍት፡ ዘይጸድቁ፡ አላ፡ በገቢሮቱ፨ በዝንቱ፡ ቃል፡ ተጐዲዖ፡ በጽሐ፡ ኀበ፡ ፍጻሜሁ፡ ለቃለ፡ ፍሬ፡ ወንጌል፨ እስመ፡ ፈረየ፡ ህየንተ፡ ፩ ፴ ወ ፷ ወ ፻፡ በዓቂበ፡ ቃላቲሁ፡ ንጹሕ፡ ወጽሩይ፨ ተጸሚዶ፡ ታሕተ፡ አርዑቱ፡ ሠናይ፨ ወፆሩ፡ ቀሊል፨ በከመ፡ ይቤ፡ እግዚእነ፡ ንሥኡ፡ ወፆሩ፡ አርዑትየ፨ እስመ፡ አርዑትየኒ፡ ሠናይ፡ ወፆርየኒ፡ ቀሊል፨ ወሐረገ፡ ወይን፡ ከዊኖ፡ ተወጥሐ፨ ዲበ፡ ሠርዌ፡ ኂሩታቲሁ፡

folio : 18


back to top

| | ለወልደ፡ እግዚአብሔር፨ እስመ፡ ዘእንበሊሁ፡ አልቦ፡ ዘይክል፡ ገቢረ፡ ወኢምንተኒ፨ ወዓፅቀ፡ ወይን፡ ከዊኖ፡ ነበረ፡ ውስተ፡ ጕንደ፡ ምግባራቲሁ፡ ለኢየሱስ፡ ክርስቶስ፡ እስመ፡ አልቦ፡ ዘይክል፡ ፈርየ፡ አዕፁቂሁ፡ አመ፡ ኢሀሎ፡ ውስተ፡ ጕንደ፡ ወይኑ፨ በከመ፡ ይቤ፡ ለሊሁ፡ እግዚእነ፡ አነ፡ ውእቱ፡ ዓፀደ፡ ወይን፡ ዘጽድቅ፨ አንትሙ፡ አዕፁቂሁ፡ ወአቡየ፡ ገባሪሁ፨ ወከዊኖ፡ ካዕበ፡ ዕፀ፡ ገነት፡ ርጡበ፡ ዘኢያነትግ፡ ፈርየ፨ ኢበክረምት፡ ወኢበሐጋይ፡ ወሀበ፡ ፍሬሁ፡ በበጊዜሁ፡ እስመ፡ ይሠቀይ፡ ዘልፈ፡ | በዘትረ፡ መጻሕፍት፨ በከመ፡ ይቤ፡ ዳዊት፡ ብፁዕ፡ ብእሲ፡ ዘኢሖረ፡ በምክረ፡ ረሲዓን፨ ወዘኢቆመ፡ ውስተ፡ ፍኖተ፡ ኃጥአን፨ ወዘኢነበረ፡ ውስተ፡ መንበረ፡ መስተሣልቃን፨ ዘዳዕሙ፡ ሕገ፡ እግዚአብሔር፡ ሥምረቱ፨ ወዘሕጎ፡ ያነብብ፡ መዓልተ፡ ወሌሊተ፨ ወይከውን፡ ከመ፡ ዕፅ፡ እንተ፡ ትክልት፡ ኀበ፡ ሙኃዘ፡ ማይ፨ እንተ፡ ትሁብ፡ ፍሬሃ፡ በበጊዜሃ፨ ወቈፅላኒ፡ ኢይትነገፍ፡ ወኵሎ፡ ዘገብረ፡ ይፌጽም፨ወቈፅላኒ፡ ኢይትነገፍ፡ ብሂል፡ ኢይማስን፡ ሥጋ፡ ወነፍሰ፡ ጻድቃን፨ በአማንኬ፡ ኢይማስን፡ ሥጋሁ፡ ለላሊባለ፡ | | እስመ፡ ኢገብረ፡ ኃጢአተ፡ በሥጋሁ፨ ወኢተረክበ፡ ሐሰት፡ ውስተ፡ አፉሁ፨ እንዘ፡ ይፄዕልዎ፡ ኢፀዓለ፡ ወእንዘ፡ ያሐምምዎ፡ ኢተቀየመ፨ አላ፡ አግብአ፡ ለዘይኳንን፡ ጽድቀ፨ በከመ፡ ተብህለ፡ በእንተ፡ ሊቁ፡ ተፈጸመ፡ በላዕሌሁ፡ እስመ፡ ኢያንተገ፡ እምኵሉ፡ ምግባረ፡ ሠናይ፡ እምዘ፡ ወጠነ፡ እምዘ፡ ነጽሐ፡ ኢረስሐ፨ ወእምዘ፡ ተቀደሰ፡ ኢረኵሰ፨ ወእምዘ፡ ረትዓ፡ ኢተጠወየ፡ እምዘ፡ ሠነየ፡ ኢአከየ፨ እምዘ፡ ጠብዓ፡ ድኅሪተ፡ ኢገብዓ፨ እስመ፡ ሐረሳዊ፡ ውእቱ፡ በመዋፍረ፡ ወንጌል፡ ወበፅርፈ፡ መስቀል፨ ወበእንተ፡ | ዝንቱ፡ ኢያጽነነ፡ ትልመ፡ ገራውሂሁ፨ በከመ፡ ይቤ፡ እግዚእነ፡ አልቦ፡ ዘይእኅዝ፡ ፅርፈ፡ ወየሐርስ፡ ድኅሪተ፨ ወይከውን፡ ድልወ፡ ለመንግሥተ፡ ሰማያት፨ ርትዕት፡ ይእቲ፡ መንግሥተ፡ ሰማያት፨ ወዘንተ፡ ሰሚዖ፡ ኮነ፡ ሐረሳዊ፡ ዘመንፈስ፨ እስመ፡ ሰሚዖ፡ ሰብእ፡ ቃለ፡ ሕይወት፡ የሐውር፡ በፍኖተ፡ ሕይወት፨ ወበዝንቱ፡ ቃለ፡ ሕይወት፡ ዕቀባ፡ ለንግሥትነ፡ ወለተ፡ ኢየሱስ፡ ወዕቀቦሙ፡ ለውሉዳ፡ ኃይለ፡ ኢየሱስ፡ ኃይለ፡ ሚካኤል፡ ወልደ፡ ማርያም፡ ወለአዋልዲሃ፡ {ወለተ፡ ማርያም}፡ ኅሩተ፡ ሥላሴ፡ ለዓለመ፡ ዓለም፡ አ፤

folio : 19


back to top

| | ወቅዱስኒ፡ ወብፁዕ፡ ላሊበላ፡ አኮ፡ ሰሚዖ፡ ቃለ፡ መንፈስ፡ ዘየኀድግ፡ ዘእንበለ፡ ይግበር፡ እስመ፡ ይፈርህ፡ ቃለ፡ ሐዋርያ፡ ዘይቤ፡ እመቦ፡ ዘያጸምዖ፡ ለቃል፡ ወኢይገብሮ፨ ይመስል፡ ከመ፡ ብእሲ፡ ዘይሬኢ፡ ፍጥረተ፡ ገጹ፡ በመጽሔት፡ ወጠይቆ፡ ርእሶ፡ ረስዓ፡ ዘከመ፡ እፎ፡ ውእቱ፨ ወለገቢሮቱኒ፡ ለዝንቱ፡ ቃል፡ ወርዘወ፡ በምዕዳነ፡ ሐዋርያ፨ ዘይቤ፡ እትልውዋ፡ ለሠናይት፡ በሃይማኖትክሙ፡ ወእምውስተ፡ ሃይማኖትክሙ፡ ለአእምሮ፨ ወእምውስተ፡ አእምሮ፡ ለኢዘምዎ፨ ወእምውስተ፡ | ኢዘምዎ፡ ለትእግሥትክሙ፨ ወእምውስተ፡ ትእግሥትክሙ፡ ለአምልኮቱ፨ ወእምውስተ፡ አምልኮቱ፡ ለተአኅዎ፨ ወእምውስተ፡ ተአኅዎ፡ ለተፋቅሮ፨ ወዝንቱ፡ ኵሉ፡ እምከመ፡ ሀለወ፡ ኀቤክሙ፡ ወበዝኃ፡ ውስቴትክሙ፡ ወኢኮንክሙ፡ ጽሩዓነ፡ ወኢኮንክሙ፡ እለ፡ ዘእንበለ፡ ፍሬ፡ አላ፡ ያበጽሐክሙ፡ ኀበ፡ አእምሮቱ፡ ለእግዚእነ፡ኢየሱስ፡ ክርስቶስ፡ ወናሁ፡ ዝንቱኒ፡ ብእሲ፡ መካህ፡ ዘስሙ፡ ላሊበላ፡ ኢኮነ፡ ፅኑሰ፡ ወኢኮነ፡ ዘእንበለ፡ ፍሬ፨ አላ፡ ባዕል፡ ውእቱ፡ ዘቦ፡ ዘርአ፡ በጽዮን፡ | | ወአብያተ፡ በኢየሩሳሌም፨ ወዘርኡኒ፡ ኢኮነ፡ ዘስርናይ፡ ሥጋዊ፡ ወአብያቲሁኒ፡ ኢኮነ፡ ሕንጻ፡ ዘበ ዕብነ፡ ወዘዕፅ፡ ወፅቡር፨ አላ፡ አብያተ፡ ብርሃን፡ ውእቱ፡ እንተ፡ ኬንያሃ፡ ወሐናጺሃ፡ ወልደ፡ እግዚአብሔር፨ በከመ፡ ይቤ፡ ጳውሎስ፡ ለእመኒ፡ ተነሥተ፡ ቤተ፡ ማኅደርነ፡ ዘበምድር፨ ብነ፡ ሕንጻ፡ ዘበሰማያት፡ ዘኢገብሮ፡ እዳ፡ ሰብእ፡ ወኪያሁ፡ ንሴፎ፡ ከመ፡ ንልበስ፡ ቤተነ፨ ዘንተኬ፡ ተሰፊዎ፡ ብእሴ፡ አምላክ፡ ላሊበላ፡ እንዘ፡ ንጉሥ፡ ውእቱ፡ ተመሰለ፡ ከመ፡ ፩፡ እምነ፡ ሕዝባዊያን፨ እንዘ፡ ቀናዪ፡ | ውእቱ፡ ተመሰለ፡ ቅኑየ፡ በኣትሕቶ፡ ርእሱ፨ በከመ፡ ይቤ፡ ሐዋርያ፡ አትሕቱ፡ ርእሰክሙ፡ ታሕተ፡ እዴሁ፡ ለእግዚአብሔር፡ ጽንዕት፡ ከመ፡ ያልዕልክሙ፡ አመ፡ ይሔውጸክሙ፨ ወኵሎ፡ ሕሊናክሙ፡ ግድፉ፡ ላዕሌሁ፨ እስመ፡ ውእቱ፡ ይሔሊ፡ በእንቲአክሙ፨ ወኮነ፡ መዝገበ፡ ጥበብ፡ ከመ፡ ይማኦ፡ ለመንገነ፡ አርዌ፨ እስመ፡ ይቤ፡ ጥበቡ፡ እንከ፡ ወአጥብቡ፡ ልበክሙ፨ እስመ፡ ጸላኢክሙ፡ ጋኔን፡ ይጥሕር፡ ከመ፡ አንበሳ፡ ወየኃሥሥ፡ ዘይውኅጥ፨ ወቆመ፡ ዲበ፡ ኰኵሐ፡ ሃይማኖት፡ ዘኢያንቀለቅል፡

folio : 20


back to top

| | መሠረቱ፡ በኃይለ፡ ነፋሳት፨ እለ፡ እሙንቱ፡ ዓላውያን፡ እለ፡ አውከኩ፡ እምጽድቅ፨ ወተዓተቱ፡ እምርትዕ፡ ወእምሃይማኖት፡ መንክር። በከመ፡ ይቤ፡ አጽንዑ፡ ቀዊመ፡ በሃይማኖትክሙ፨ lacuna ወኮነ፡ ልቡ፡ ጽሌ፡ ዘሕግ፡ ዘይሜህር፡ ርትዓ፡ ወምጽዋተ፡ ወምሒረ፡ ነዳያን፡ ወሰርየ፡ ለአባስያን፨ በከመ፡ ይቤ፡ እግዚእነ፡ በወንጌል። ለእመ፡ አበሰ፡ ለከ፡ እኁከ፡ ኅድግ፡ ሎቱ፡ ስብዓ፡ በበስብዕ፨ ወኍላቋሁሰ፡ ለዝንቱ፡ ፬ ፻ ወ ፺፡ ወበእንተዝ፡ ጽሕቀ፡ ከመ፡ ይዕርር፡ ፍሬ፡ ሕይወት፡ | እምገራህተ፡ ምሕረት፡ ከመ፡ ይትመካህ፡ በዕለተ፡ ደይን፨ በከመ፡ ይቤ፡ ሐዋርያ፡ ወይትሜካህ፡ ባሕቱ፡ በዕለተ፡ ደይን፡ ዘገብረ፡ ምሕረተ፨ አማንኬ፡ ይትሜካህ፡ ቅዱስ፡ ወብፁዕ፡ ላሊበላ፡ ዘኢተግሕሠ፡ ወኢወፅአ፡ እምቃለ፡ መጻሕፍት፨ በከመ፡ ይቤ፡ ጳውሎስ፡ ኢትፃኡ፡ እምቃለ፡ መጻሕፍት፡ ከመ፡ ኢተአብሱ፨ ወበእንተ፡ ዝንቱ፡ ኮነ፡ አፍዓሁ፡ ወውሣጤሁ፡ ሥርግወ፡ በቃለ፡ እግዚአብሔር፨ አፍአሁሰ፡ ዝውእቱ፡ አዕይንቲሁ፡ ወእዘቲሁ፡ ወአእዛኒሁ፡ ወልሳኑ፡ ወአፉሁ፡ ወእደዊሁ፡ ወአእገሪሁ፡ | | ወበአዕይንቲሁኒ፡ ኢርእየ፡ እኵየ፨ ወኢያስተሐየጸ፡ ለርእየ፡ ከንቱ፨ በከመ፡ ይቤ፡ እግዚእነ፡ በውስተ፡ ኪዳኑ፨ አዑሩ፡ አዕይንቲክሙ፡ እለ፡ በገሃድ፡ ከመ፡ ታእምሩ፡ ፈቃዶ፡ ለእግዚአብሔር፡ ወኵሎ፡ ምሥጢረ፡ መድኃኒትክሙ፨ ወካዕበ፡ ይቤ፡ በውስተ፡ ወንጌሉ፡ ቅዱስ፡ ለእመ፡ ዓይንከ፡ ዘየማን፡ ታስሕተከ፨ ምልሕ፨ ይኄይሰከ፡ ነቋረከ፡ ትባእ፡ ውስተ፡ መንግሥተ፡ ሰማያት፨ እምትባእ፡ ምስለ፡ ክልኤሆን፡ አዕይንቲከ፡ ውስተ፡ እሳተ፡ ገሃነም፨ ኀበ፡ እሳቱ፡ ዘኢይጠፍዕ፨ ወዕፄሁ፡ ዘኢይነውም፨ ወበእዘኒሁኒ፡ | ኢሰምዓ፡ ነገረ፡ ሐሰት፡ ወቃለ፡ ኅብል፨ በከመ፡ ይቤ፡ ካዕበ፡ እግዚእነ፡ አጽምሙ፡ አእዘኒክሙ፡ ወእለ፡ ይትረአያ፡ አዑሩ፡ አዕይንቲክሙ፨ ወሙሴኒ፡ ይቤ፡ ወውዴተ፡ ዘሐሰት፡ ኬትሠጠው፨ ወበልሳኑኒ፡ ኢነበበ፡ ንባበ፡ ጽሩዓ፨ እስመ፡ ይቤ፡ መድኃኒነ፡ ወለኵሉ፡ ዘይነብብ፡ ንባበ፡ ጽሩዓ፡ በከመ፡ ረከበ፡ ያገብኡ፡ በእንቲአሁ፡ በዕለተ፡ ደይን፡ ወይትኳነን፡ ባቲ፨ ወሐዋርያኒ፡ ይቤ፡ እመቦ፡ ዘይትሔረም፡ ወኢያለጒመ፡ ለልሳኑ፡ ወአስሐቶ፡ ለልሳኑ፡ ለዘከማሁ፡ ከንቱ፡ ሕርመቱ፨ ወዓዲ፡ ይቤ፡ ወዘሰ፡ ኢይስሕተ፡ በቃሉ፡

folio : 21


back to top

| | ብእሲ፡ ፍጹም፡ ውእቱ፡ ወይክል፡ ወድየ፡ ልጓም፡ ለኵሉ፡ ሥጋሁ፨ ወካዕበ፡ ይቤ፡ ልሳንሰ፡ ንስቲት፡ አባል፡ ይእቲ፡ ወድምፃ፡ ዓቢይ፨ ወናሁ፡ ልሳን፡ ተፈጥረት፡ ውስተ፡ ነፍስትነ፡ ወታረምፆ፡ ለሥጋነ፡ ወታውዒ፡ እምገሃነም፨ ወትሎሉ፡ ክቡተ፡ ፍጥረተነ፨ ወዓዲ፡ ይቤ፡ መሥገርቱ፡ ለብእሲ፡ ንባበ፡ አፉሁ፨ ወሰሎሞንኒ፡ አትለወ፡ ቃለ፡ በእንተ፡ ልሳን፡ ወይቤ፡ መሥገርት፡ ጽኑዕ፡ ውእቱ፡ ከናፍረ፡ ብእሲ፨ ወደገመ፡ ዓዲ፡ እንዘ፡ ይብል፡ ሞት፡ ወሕይወት፡ ውስተ፡ እደ፡ ልሳን፨ ወላሊበላ፡ አልቦ፡ አመ፡ | ስሕተ፡ በዝንቱ፡ ኵሉ፡ ወአልቦ፡ አመ፡ አበሰ፨ ወበእደዊሁኒ፡ ኢገሠሠ፡ ርኩሰ፨ እስመ፡ ይቤ፡ ኢትግሥሥ፡ ወኢትልክፍ፡ ወኢትጥዓም፡ ዘንተ፡ ለሙስና፨ ወበእገሪሁኒ፡ ኢያንሶሰወ፡ ውስተ፡ እኩይ፡ እስመ፡ ይቤ፡ ኢሳይያስ፡ ኢታንሥአ፡ እደዊከ፡ ወእገሪከ፡ ለገቢረ፡ እኩይ፨ አዕይንቲሁኒ፡ አንቅዕድዋት፡ ዘልፈ፡ ኀበ፡ መንበረ፡ መለኮት፨ በከመ፡ ይቤ፡ ዳዊት፡ አዕይንትየሰ፡ ዘልፈ፡ ኀበ፡ እግዚአብሔር፨ እስመ፡ ውእቱ፡ ይባልሖን፡ እመሥገርት፡ ለእገርየ፨ ነጽር፡ ላዕሌየ፡ ወተሠሃለኒ፡ ወዓዲ፡ ደገመ፡ ወይቤ፡ ኀቤከ፡ እግዚኦ፡ አንቃዕዶነ፡ | | አዕይንተነ፡ ዘትነብር፡ ውስተ፡ ሰማይ፨ ናሁ፡ ከመ፡ አዕይንተ፡ አግብርት፡ ውስተ፡ እደ፡ አጋአዝቲሆሙ፡ ወከመ፡ ዓመት፡ ውስተ፡ እደ፡ እግዝታ፨ ከማሁ፡ አዕይንቲነ፡ ኀበ፡ እግዚአብሔር፡ አምላክነ፨ እስከ፡ አመ፡ ይሠሃለነ፨ ወበዝ፡ ካዕበ፡ ላሊበላ፡ ብፁዕ፡ ንጉሠ፡ ኢትዮጵያ፡ ወምክሐ፡ ኵሉ፡ አድያሚሃ፡ ተመሰሎሙ፡ ለትጉሃነ፡ ሰማይ፨ እስመ፡ ኢወሀበ፡ ንዋመ፡ ለአዕይንቲሁ፨ ወኢድቃሰ፡ ለቀራንብቲሁ፨ ወኢዕረፍተ፡ ለመላትሒሁ፨ እስከ፡ ይረክብ፡ መካኖ፡ ለእግዚአብሔር፨ ወማኅደሮ፡ ለአምላከ፡ ያዕቆብ፨ በከመ፡ | ይቤ፡ በመዝሙር፡ ከመ፡ ኢይሁቦን፡ ንዋመ፡ ለአዕይንትየ፨ ወኢድቃሰ፡ ለቀራንብትሐየ፨ ወኢዕረፍተ፡ ለመላትሕየ፨ እስከ፡ እረክብ፡ መካኖ፡ ለእግዚአብሔር፨ ወማኅደሮ፡ ለአምላከ፡ ያዕቆብ፨ ወኮና፡ አዕይንቲሁ፡ ዓዘቅተ፡ አንብዕ፡ ዘኢይነጽፍ፡ ነቅዑ፨ በከመ፡ ይቤ፡ ነቢይ፡ ወአንበርኩ፡ አንብዕየ፡ ቅድሜከ፡ በከመ፡ አዘዝከ፨ ወበከመ፡ ይቤ፡ ካዕበ፡ ጳውሎስ፡ ወኢያንተጉ፡ አንብዕየ፡ መዓልተ፡ ወሌሊተ፨ ወአውጽሕ፡ በእንተ፡ መሥዋዕተ፡ አምልኮ፡ ዘበሃይማኖትክሙ፨ ወእዜኒሁኒ፡ ጽልዋት፡

folio : 22


back to top

| | ወትረ፡ ለሰሚዓ፡ ቃለ፡ መጻሕፍት፨ ወዕፅዋት፡ ካዕበ፡ እዘኒሁ፡ እምሰሚዐ፡ ቃላት፡ ጽሩዓት፡ ወርኅዋት፡ ለሰሚዓ፡ ስእለተ፡ ነዳያን፡ ወምስኪናን፡ ወገዓረ፡ ኅዙናን፨ እስመ፡ ለኵሉ፡ ይቴክዝ፡ ወየኃዝን፨ እስመ፡ መሐሪ፡ ውእቱ፡ ከመ፡ እግዚኡ፨ ወልሳኑኒ፡ ድኅንፃ፡ ስብሐት፡ ይእቲ፡ በከመ፡ ተብሕለ፡ ትሰነቁ፡ ዘልፈ፡ ልሳንየ፡ ያነብብ፡ ጽድቀከ፨ ወኵሎ፡ አሚረ፡ ስብሐቲከ፨ አፉሁ፡ ለጻድቅ፡ ይትሜሀር፡ ጥበበ፨ ወልሳኑ፡ ይነብብ፡ ጽድቅ፨ ወሕገ፡ አምላኩ፡ ውስተ፡ ልቡ፨ ወኢይድኅፅ፡ | ሰኰናሁ፨ ወኢይትዓፀዋ፡ አፉሁ፡ ወከናፍሪሁ፨ እስመ፡ ክሡታት፡ እማንቱ፡ ወለዘምሮ፡ ወለሰብሖ፨ እስመ፡ ዘእንበለ፡ ዝንቱ፡ አልቦን፡ ካልአ፡ ተናግሮ፡ ዘኢይከውን፡ ለበቍዔት፡ ወለባርኮስ፡ ወትረ፡ ክሡታት፡ በከመ፡ ይቤ፡ ዳዊት፡ እባርኮ፡ ለእግዚአብሔር፡ በኵሉ፡ ጊዜ፨ ወዘልፈ፡ ስብሐቲሁ፡ ውስተ፡ አፉየ፨ ወዓዲ፡ ይቤ፡ ትከሥት፡ ከናፍርየ፡ ወአፉየ፡ ያየድዓ፡ ስብሐቲከ፨ ወጽሪት፡ ይእቲ፡ ልሳነ፡ላሊበላ፡ ከመ፡ ብሩር፡ ጽሩይ፡ ዘተነጥፈ፡ ስብዓ፨ በከመ፡ ይቤ፡ ሰሎሞን፡ ብሩር፡ ርሱን፡ ልሳነ፡ ጸድቅ፡ | | ወእደዊሁኒ፡ ስፉሐት፡ ለጸልዮ፡ ወለውሂበ፡ ምጽዋት፨ በከመ፡ ይቤ፡ ነቢይ፡ አንሥአ፡ እደዊየ፡ መሥዋዕተ፡ ሰርክ፨ ሢም፡ እግዚኦ፡ ዓቃቤ፡ ለአፉየ፨ ወማዕፆ፡ ዘአቅም፡ ለከናፍርየ፨ ወጳውሎስኒ፡ ይቤ፡ በእንተ፡ አንሥኦ፡ አዕዳው፡ ለጸሎት፡ እንዘ፡ ይኤዝዝ፨ ወያንስኡ፡ እደዊሆሙ፡ ወይጸልዩ፡ በኵሉ፡ ገጸ፡ መካን፡ ወይጸልዩ፡ ዘንበለ፡ ኑፋቄ፡ ወዘእንበለ፡ ነጐርጓር፨ ወማኅበረ፡ ነቢያትኒ፡ ይቤሉ፡ በሲኖዶሶሙ፡ ወሶበ፡ ትሰፍሕ፡ እደዊከ፡ ለጸልዮ፡ ኢተሐሊ፡ ከመ፡ ሶበ፡ ትፈጽም፡ ታግብአ፡ ኀቤከ፨ | ወእስከሬነ፡ ምጽዋትኒ፡ ኮነ፡ አዕዳዊሁ፨ በከመ፡ ይቤ፡ መድኃኒነ፡ ምጽዋተ፡ አበድር፡ አምነ፡ መሥዋዕት፨ ወበከመ፡ ይቤ፡ ካዕበ፡ ጴጥሮስ፨ ወምጽዋትሰ፡ ኢይርሐቅ፡ እምኔከ፨ ወይኩንከ፡ ትእምርተ፡ ቤትከ፨ ወእገሪሁኒ፡ አንሶሰዋ፡ በፍኖተ፡ ሰላም፨ ወኮና፡ ሰረገላ፡ መንፈስ፡ ቅዱስ፡ እስመ፡ ይረውጻ፡ ውስተ፡ ፍኖተ፡ ሰላም፡ ወለገይሰ፡ ቤተ፡ ከርስቲያን፡ ወለናዝዞ፡ ሙቁሐን፡ ወለሐውጾ፡ ድውያን፡ በከመ፡ ይቤ፡ ጳውሎስ፡ ሩጹ፡ ወተባድሩ፡ እስመ፡ ዘሮጸ፡ ወዘበደረ፡ ይነሥእ፡ አክሊለ፡ ምዝጋናሁ፡

folio : 23


back to top

| | ዘበደረ፨ ዘንተ፡ ኵሎ፡ ዓቂቦ፡ ወፈጺሞ፡ ገቢረ፡ ብእሴ፡ እሳት፡ ተሰምየ፨ እስመ፡ ተውኅጠ፡ ኵለንታሁ፡ በእሳተ፡ መንፈስ፡ ቅዱስ፡ መንፈሳዊት፨ ወተወለጠ፡ ጠባይሁ፡ አኮ፡ በጢሎ፡ እምከዋኔሁ፨ አላ፡ እስመ፡ ተመይጠ፡ ኀበ፡ ግዕዘ፡ መላእክት፨ እስመ፡ ምግባራተ፡ ሥጋሁ፡ አውዓየ፡ እሳተ፡ መንፈስ፡ ቅዱስ፡ ከመ፡ ኢይርከብ፡ ሰይጣን፡ ንዋየ፡ ሐቅል፡ በውስተ፡ ሥጋሁ፡ በዘይመውኦ፡ እስመ፡ በውስተ፡ ሥጋ፡ ይነብር፡ ንዋየ፡ ሐቅሉ፡ ለሰይጣን፨ ዝውእቱ፡ ዝውእቱ፡ ምርዓት፡ ስስዕት፡ ወአፍቅሮ፡ | መብልዕ፡ ወመስቴ፡ ወአፍቅሮ፡ ፍግዐ፡ ዘበ፡ ምድር፨ ዝንቱ፡ ኵሉ፡ ዘይመስሎ፡ ንዋየ፡ ሐቅሉ፡ ውእቱ፡ ለሰይጣን፡ ወምጒንጳሁኒ፡ ሥጋሁ፡ ውእቱ፨ እስመ፡ በከመ፡ አኅፃ፡ ይነብር፡ ተኃቢኦ፡ ውስተ፡ ምጕንጳ፨ እስከ፡ ያወፅኦ፡ ብእሴ፡ ሐፅ፡ ለጊዜ፡ ፀብዕ፡ ከማሁኬ፡ ሰይጣንኒ፡ ይፀብዖ፡ ለብእሲ፡ በእላንቱ፡ አሕፃት፡ እለ፡ ዘከርነ፡ ቀዳሚ፡ እለ፡ ይነብራ፡ ውስተ፡ ሥጋ፨ ዘንተኬ፡ ከመ፡ ያብጥል፡ እምሥጋሁ፨ ወከመ፡ ይውዓያ፡ አሕፃተ፡ ዘነኪር፡ ለብሰ፡ ላሊበላ፡ እሳተ፡ መንፈስ፡ ቅዱስ፡ | | በዘይውዒ፡ ንዋየ፡ ሐቅሉ፡ ለሰይጣን፡ በከመ፡ ይቤ፡ መጽሐፈ፡ ወያውዒ፡ በእሳት፡ ንዋየ፡ ሐቅል፨ እስመ፡ ቦቱ፡ ይትዌስጥ፡ ግዕዘ፡ መዋቲ፡ ኀበ፡ ግዕዘ፡ ሕያዋን፨ ወዝንቱሰ፡ ብእሲ፡ ፀሐየ፡ ጽድቅ፡ ብሩህ፡ ረከበ፡ ዘንተ፡ ኵሎ፡ ሀብታተ፡ እንዘ፡ ሀሎ፡ በሥጋሁ፡ ኮነ፡ ከመ፡ ዘኢለብሰ፡ ሥጋ፨ ወኮነ፡ ሀገሪተ፡ ምስለ፡ ሱራፌል፡ ወእኅወ፡ ለኪሩቤል፨ ወቢረሲ፡ ለቅብዓ፡መንፈስ፡ ቅዱስ፡ እስመ፡ ኵለንታሁ፡ ኮነ፡ ሕንጻ፡ እሳት፡ ዘውእቱ፡ ምብያተ፡ ጰራቅሊጦስ፡ እስመ፡ ተሐፅነ፡ በክልኤ፡ አጥባቲሃ፡ ለመርዐት፡ | እለ፡ እሙንቱ፡ ሐሊብ፡ ወመዓር፨ ሐፀነቶ፡ መርዓተ፡ ንጉሥ፡ ሰማያዊ፡ እስመ፡ አእመረት፡ ከመ፡ ይከውና፡ ወልዳ፡ ዘምክህ፡ ዘይትሜካህ፡ በፍናዊሃ፡ ወበኃሢሠ፡ ሕገጊሃ፨ በከመ፡ ትቤ፡ ሐና፡ እመ፡ ሳሙኤል፡ ወዘሰ፡ ይትሜካህ፨ በአእምሮ፡ ወበለብዎ፡ እግዚአብሔር፨ በገቢረ፡ ፍትሕ፡ ወጽድቅ፡ በማእከለ፡ ምድር፨ ወላሊበላኒ፡ አፍቀረ፡ አጥባቲሃ፡ ለዘሐፀነቶ፡ እስመ፡ ይጥዕሞ፡ አጥባቲሃ፡ እምወይን፡ ወአፈዋቲሃኒ፡ ይምዕዝ፡ እምኵሉ፡

folio : 24


back to top

| | ዕፍረታት፡ በከመ፡ ይቤ፡ ሰሎሞን፡ በውስተ፡ መኃልየ፡ መኃልይ፡ አዳም፡ አጥባትኪ፡ እምወን፨ ወመዓዛ፡ ዕፍረትኪ፡ እምኲሉ፡ አፈው፤ በመዓዛ፡ ዕፍረታቲሃ፡ ተስሒቦ፡ አንሶሰወ፡ ውስተ፡ መርህባ፨ ወኢፈቀደ፡ ይፃእ፡ እምውሣጥያቲሃ፨ እስመ፡ ፈድፋደ፡ ይሔወዝ፡ ሀልዎ፡ ምስሌሃ፨ በከመ፡ ይቤ፡ ነቢይ፡ ዕግትዋ፡ ለጽዮን፡ ወሕቀፍዋ፨ ወተናገሩ፡ በውስተ፡ ማኅፈዲሃ፨ ደዩ፡ ልበክሙ፡ ውስተ፡ ኃይላ፨ ወትትካፈልዎ፡ ለክበዲሃ፨ በአማንኬ፡ ተካፈለ፡ ክበዲሃ፡ ለጽዮን፨ እንተ፡ | ይእቲ፡ ቤተ፡ ክርስቲያን፨ ወክበዲሃኒ፡ ምሥጢረ፡ መለኮት፡ ውእቱ፨ ወላሊበላኒ፡ ተካፈለ፡ ምሥጢራተ፡ ቅድሳት፡ ዘይትቀዳሕ፡ በውስቴታ፡ አስራበ፡ ሕይወት፨ ከዊኖ፡ ትኩስ፡ ውስተ፡ ዓፀዳ፨ ከመ፡ ዕፀ፡ ዘይት፡ ሥሙር፡ ዘኢየዓብር፡ ፍሬሁ፨ ወኢይጸመሂ፡ ቈፅሉ፡ ወኢይየብስ፡ ጕንዱ፨ ወኢይጸነጽን፡ አዕፁቂሁ፡ ወኢይበኈብኊ፡ ስረዊሁ፨ እስመ፡ ማየ፡ ሕይወት፡ ይሰቂዮ፡ እም ፬ አፍላገ፡ ወንጌል፨ ወኮነ፡ ሙካፈ፡ ለዘትረ፡ ወንጌል፨ ዘውእቱ፡ ፈልፈለ፡ ሣህል፨ | | ፫ ዘነቅዓ፡ እምአፉሁ፡ ለእግዚእነ፡ ወአምላክነ፡ ወመድኀኒነ፡ ወፈራቂነ፡ ኢየሱስ፡ ክርስቶስ፡ በዝንቱኬ፡ ተጠሊሎ፡ ኮነ፡ ከመ፡ ገነተ፡ ርውይት፨ ወከመ፡ ዓዘቅት፡ ዘኢይነጽፍ፡ ማያ፨ በከመ፡ ይቤ፡ ኤርምያስ፡ ነቢይ፨ ቡሩክ፡ ብእሲ፡ ዘይትዌከል፡ በእግዚአብሔር፡ ወእግዚአብሔር፡ ተስፋሁ፨ ወይከውን፡ ከመ፡ ዖም፡ ዘጽፉቅ፡ አዕፁቂሁ፡ ወኢይፈርህ፡ ሶበ፡ ይመጽአ፡ ሐሩር፡ ወኢያነትግ፡ ፈርየ፡ ዕመቀ፡ ልቡ፨ ጥዩቀኬ፡ ተፈጸመ፡ ዝንቱ፡ ቃል፡ በላዕለ፡ ላሊበላ፡ ብፁዕ፡ ቀትረ፡ መንግሥት፡ | ዘአልቦ፡ ጽልመት፡ ውስቴቱ፨ እስመ፡ ያበርህ፡ ማኅቶተ፡ መንፈስ፡ ቅዱስ፡ ውስተ፡ ልቡ፨ እስመ፡ ኮነ፡ ዓምደ፡ ለኵሉ፡ ምግባራተ፡ ሠናይ፨ ዘተብህለ፡ ለዘገብሮ፡ የሐዩ፡ እስከ፡ ለዓለም፡ ወኮነ፡ ለቤተ፡ ክርስቲያንሂ፡ ከመ፡ ብንተ፡ ዓይን፡ እንዘ፡ ያስተሐይጽ፡ ዘልፈ፡ ግብረ፡ ሥርዓታቲሃ፨ እመቦ፡ ዘቦ፡ ውስቴታ፡ ተፅናሰ፡ እምሥርዓተ፡ ምሥጢራቲሃ፡ ከመ፡ ያስተሐምም፡ ላቲ፨ እስመ፡ ወልዳ፡ ውእቱ፡ ዘወለደቶ፡ እመርዓዊ፡ ሰማያዊ፡ ወሩካቤሃኒ፡ ሰማዓ፡ ቃለ፡ ወንጌል፡ ውእቱ።

folio : 25


back to top

| | ፬ ወበእንተዝ፡ ኮነ፡ ብፁዕ፡ ወቅዱስ፡ ላሊበላ፡ መስተገብረ፡ ለአስተናሥኦታ፨ በከመ፡ ይቤ፡ ነቢየ፡ ምሥጢር፨ ህየንተ፡ አበውኪ፡ ተወልዱ፡ ለኪ፡ ደቂቅ፨ አበዊሃሰ፡ ነቢያት፡ እሙንቱ፨ ወደቂቀ፡ አበዊሃኒ፡ ሐዋርያት፡ እሙንቱ፡ ወወልደ፡ ሐዋርያትሂ፡ ላሊበላ፡ በከመ፡ ይሰምዕ፡ ወልድ፡ ትእዛዘ፡ አቡሁ፨ ከማሁ፡ ይሰምዕ፡ ትእዛዞሙ፡ ወኢያንተገ፡ እምቃለ፡ ምዕዳኖሙ፡ በከመ፡ እሙንቱ፡ ሐዋርያት፡ ኮንዋ፡ ለቤተ፡ ክርስቲያን፡ ሐፁረ፡ ወጥቅመ፨ ከማሆሙ፡ ኮና፡ ለቤተ፡ ክርስቲያን፡ | ሐፁረ፡ ወጥቅመ፡ ብፁዕ፡ ላሊበላሂ፡ እስመ፡ ወልደ፡ ሐዋርያት፡ ውእቱ፨ ወዓቃቤ፡ ትእዛዞሙ፡ ወተላዌ፡ አሰሮሙ፨ እስመ፡ ኢኃደገ፡ ፍኖቶሙ፡ ወግብረ፡ ሥርዓቶሙ፨ በከመ፡ ይቤ፡ መክብብ፡ እስመ፡ ኢየኃድግ፡ ወልድ፡ ግብረ፡ አቡሁ፨ አማንኬ፡ ኢኃደገ፡ አሰሮ፡ ለክርስቶስ፡ ለዘወለዶ፡ እምከርሠ፡ ጥምቀት፨ ወግብሮሙኒ፡ ለሐዋርያቲሁ፡ ወበከመ፡ እሙንቱ፡ ሐሙ፡ በእንተ፡ ፍቅሩ፡ ለእግዚኦሙ፡ እንዘ፡ ይብሉ፡ አልቦ፡ ዘያኃድገነ፡ ፍቅሮ፡ ለክርስቶስ፡ ኢሞት፡ ወኢሕይወት፡ | | ኢእሳት፡ ወኢመጥባሕት፡ ኢኲናት፡ ወኢረኃብ፡ ወኢጽምፅ፡ ኢጸድፍ፡ ወኢዳግም፡ ልደት፡ ወላሊበላኒ፡ ተሊዎ፡ አሰሮሙ፡ ኢፈርሃ፡ ሞተ፡ ወኢእሳተ፡ ወኢመጥባሕተ፡ ኢረኃበ፡ ወኢጽምዓ፡ ኢቍረ፡ ፅርቃነ፨ ኢድካመ፡ ወኢኃፈ፨ ወበእንተ፡ ዝንቱ፡ ላሊባላ፡ ተጸውዓ፡ ለመርዓ፡ በግዑ፡ ኀበ፡ ተደለወ፡ ማዕደ፡ ሕይወት፨ ወኀበ፡ ተቀድሐ፡ ጽዋዓ፡ በረከት፨ ኀበ፡ ሀለው፡ ነቢያት፡ ወኀበ፡ ሀለው፡ ሐዋርያት፨ እስመ፡ ለነቢያትኒ፡ መፍቀሬ፡ ትንቢቶሙ፡ ውእቱ፨ ወለሐዋርያትኒ፡ ተላዌ፡ አሰሮሙ፡ | ወበእንተዝ፡ ደለዎ፡ ከመ፡ ይርከብ፡ መክፈልተ፡ ወርስተ፡ ውስተ፡ በአቶሙ፡ ለእሉ፡ ቅዱሳን፨ በከመ፡ እሙንቱሂ፡ አሥመርዎ፡ ለእግዚኦሙ፡ ከማሆሙ፡ አሥመሮ፡ ለእግዚአ፡ ነዚያት፡ ወሐዋርያት፡ እስመ፡ ኮነ፡ ሙዳየ፡ ለቃሎሙ፡ ወመዝገበ፡ ለበረከቶሙ፡ ወለጸጋ፡ ረድኤቶሙ፡ ሚመጠንኬ፡ ይደልዎ፡ ውዳሴ፡ ለዘከመዝ፡ ብእሲ፡ ለዘ፡ ኢነትገ፡ እምነቢያት፡ ወኢሐፀ፡ እምሐዋርያት፨ ኃይለ፡ ትንቢቶሙኒ፡ ለነቢያት፡ ኃደረ፡ ውስቴቱ፨ ወመንፈሰ፡

folio : 26


back to top

| | ትርሲቶሙኒ፡ ለሐዋርያት፡ ኢርኅቀ፡ እምኔሁ፡ አሶተ፡ ረድኤቶሙኒ፡ ለጻድቃን፡ ኢሰሰለ፡ እምላዕሌሁ፨ ወጸጋ፡ መዊኦቶሙኒ፡ ለሰማዕት፡ ኢበጠለ፡ እምኔሁ። ወንጽሖሙኒ፡ ለምእመናን፡ ኢዓርቀት፡ እምሥጋሁ፨ ወሀብተ፡ ትጋሆሙኒ፡ ለመላእክት፡ ህልውት፡ ምስሌሁ። ወበረከተ፡ ኵሎሙ፡ ኅሩያነ፡ አምላከ፡ ዕርፍት፡ ውስተ፡ ድማሁ፨ እስመ፡ አዔረየቶ፡ ፃማ፡ ምግባራቲሁ፡ ፍድፍድት፡ ምስለ፡ እሉ፡ ኵሎሙ፨ ነቢይኒ፡ ውእቱ፡ እስመ፡ የአምር፡ እምቅድመ፡ ይኩን፡ ዘሀለዎ፡ ይኩን፨ | ሐዋርያኒ፡ ውእቱ፡ እስመ፡ ሰባኬ፡ ኮነ፡ ሎሙ፡ ለእለ፡ ኢየአምሩ፡ ስብከተ፡ መድኃኒት፨ ወመሐሮሙ፡ አሚነ፡ በስመ፡ ሥላሴ፡ ወአብኦሙ፡ ውስተ፡ ዓቢይ፡ ክርስቲያን፡ ለብዙኃን፡ አረማውያን፡ ወአጥመቆሙ፡ በስመ፡ አብ፡ ወወልድ፡ ወመንፈስ፡ ቅዱስ፡ በከመ፡ ይቤ፡ መድኃኒነ፡ በወንጌል፡ ሑሩ፡ መሐሩ፡ በስምየ፡ ወእንዘ፡ ታጠምቅዎሙ፡ በሉ፡ በስመ፡ አብ፡ ወወልድ፡ ወመንፈስ፡ ቅዱስ፡ ወላሊበላሰ፡ ገብረ፡ ከመዝ፨ ከመ፡ ኢይኩን፡ ንቱገ፡ እምሐዋርያት፨ ወአእመኖሙ፡ ለዕልዋን፨ | | ወበእንተዝ፡ ተሰምየ፡ ሐዋርያ። ጻድቅኒ፡ ውእቱ፡ እስመ፡ በበትረ፡ ጽሙና፡ ኵኑን፡ አሕባለ፡ ሥጋሁ፨ ሰማዕትኒ፡ ውእቱ፡ እስመ፡ ነበረ፡ እንዘ፡ ይትኴነን፡ በተቀሥፎ፡ ወእንዘ፡ ይሰደድ፡ እምሀገር፡ ለሀገር፡ በግፍዕ፡ እንዘ፡ አልቦ፡ ዘአበሰ፨ ወበእንተ፡ ዝንቱ፡ ደለዎ፡ ከመ፡ ይርከብ፡ ክፍለ፡ ውዳሴ፡ ምስሌሆሙ፨ እስመ፡ በኀበ፡ ኵሉ፡ ተሰምዓ፡ ዜናሁ፡ ወኢኃልቀ፡ እስከ፡ ይእዜ፡ ዝክረ፡ ውዳሴሁ፡ ወኢይኃልቅሂ፡ እምይእዜ፡ ወእስከ፡ ለዓለም፨ እምአፈ፡ ዕደው፡ ወአንስት፨ እምአፈ፡ | አዕሩግ፡ ወሕፃናት፤ እምአፈ፡ ደናግል፡ ወመነኮሳት፨ እምአፈ፡ ዕቤራተ፡ ወእጓለ፡ ማውታ፡ ወመበለታት። እምአፈ፡ መሳፍንት፡ ወመኳንንት፡ እምአፈ፡ ሊቃናት፡ ወመሐዘት፡ እስመ፡ መንክር፡ ውእቱ፡ ዘተገብረ፡ በላዕለ፡ እደዊሁ፨ በዘተከሥተ፡ በመዋዕሊሁ፡ መድፍን፡ ኅቡእ፨ እስመ፡ ኮነ፡ ፍሥሐ፡ ለኵሉ፨ ለንኡስኒ፡ ወለዓቢይኒ፡ ለልሒቅኒ፡ ወለደቂቅኒ፡ ለዕቤራትኒ፡ ወለእጓለ፡ ማውታ፡ ለአብዕልትኒ፡ ወለነዳያንኒ፨ ደኃርዎ፡ ዐበይት፡ እስመ፡ ውእቱ፡

folio : 27


back to top

| | አዕበዮሙ፨ ደኃርዎ፡ አዕሩግ፡ እስመ፡ ውእቱ፡ ሶቀ፡ ርስእናሆሙ። ደኃርዎ፡ ሕፃናት፡ እስመ፡ ውእቱ፡ አልሐቆሙ፨ ደኃርዎ፡ እጓለ፡ ማውታ፡ እስመ፡ ውእቱ፡ ሐፀኖሙ፨ ወናዘዞሙ፡ ወአንገፈ፡ ላሆሙ፡ እስከ፡ ረስዑ፡ ድክትምናሆሙ፨ ደኃራሁ፡ ዕቤራት፡ እስመ፡ ካልአ፡ ተፅናሶን፡ ወናዘዞን፡ እምኃዘን፨ በከመ፡ ይቤ፡ ዳዊት፡ ፍትሑ፡ ለነዳይ፡ ወለእጓለ፡ ማውታ፨ ወአጽድቁ፡ ግፉዓ፡ ወምስኪነ፨ ወአድኅኑ፡ ባሕታዌ፡ ወፅኑሰ፨ ወአንግፍዎሙ፡ እምእደ፡ ኃጥአን፨ ወላሊበላሰ፡ | ኢያሕፀፀ፡ እምእላንቱ፡ ቃላት፨ ወዓዲ፡ አካዕበተ፡ ገቢረ፨ ደኃርዎ፡ አብዕልት፡ እስመ፡ ውእቱ፡ አብዓሎሙ፨ ወአልቦ፡ ዘተዓገሎሙ፡ ዘእንበለ፡ ዘወሀቦሙ፡ ወአልቦ፡ ዘነሥኦ፡ እምኃቤሆሙ፨ ደኃርዎ፡ ነዳያን፡ እስመ፡ ውእቱ፡ ኮኖሙ፡ ምስካየ፡ ወረድኦሙ፡ በኵሉ፡ ትካዞሙ፨ ለቢዎ፡ ዘይቤ፡ ብፁዕ፡ ዘይሌቡ፡ ላዕለ፡ ነዳይ፡ ወምስኪን፨ እምዕለተ፡ እኪት፡ ያድኅኖ፡ እግዚአብሔር፨ እግዚአብሔር፡ የዓቅቦ፡ ወያሐይዎ፡ ወያበፅዖ፡ ዲበ፡ ምድር፨ ወኢያገብኦ፡ ውስተ፡ | | እደ፡ ጸላኢሁ፨ እግዚአብሔር፡ ይረድኦ፡ ውስተ፡ ዓራተ፡ ሕማሙ፡ ወይመይጥ፡ ሎቱ፡ ኵሎ፡ ምስካቢሁ፡ እምደዌሁ፨ ደኃርዎ፡ ዕሩቃን፡ እስመ፡ ውእቱ፡ ከደነ፡ ዕርቃኖሙ፡ ደኃርዎ፡ ርኁባን፡ እስመ፡ ውእቱ፡ ሴሳዮሙ፨ በከመ፡ ይቤ፡ ኢሳይያስ፡ ነቢይ፡ አብእ፡ ነዳየ፡ ውስተ፡ ቤትከ፡ ወአኅድሮ፡ ውስተ፡ ጽላሎትከ፡ ወአጽግብ፡ ርኁበ፡ እምእክልከ፨ ወዘንተ፡ እምከመ፡ ገበርከ፡ እግዚአብሔር፡ ይሄሉ፡ ምስሌከ፨ ወጊዜ፡ ጸዋዕኮ፡ ነየ፡ ይብለከ፨ ወየሐውር፡ ጽድቅከ፡ ቅድመ፡ ገጽከ፨ ወይሠርቅ፡ | ብርሃንከ፡ ከመ፡ ብርሃነ፡ መዓልት፨ ወትከውን፡ ከመ፡ ገነት፡ ርውይት፡ ወከመ፡ ዓዘቅት፡ ዕምቅት፡ ዘኢይነጽፍ፡ ማያ፨ ደኃርዎ፡ ጽሙዓን፡ እስመ፡ ውእቱ፡ አርወዮሙ፡ እምጽሙዖሙ፡ በስቴሁ፡ ሠናይ፡ ወጥዑም፨ በከመ፡ ይቤ፡ ጳውሎስ፡ ለስመ፡ ርኅበ፡ እኁከ፡ አብልዖ፨ ወለእመ፡ ጸምዓ፡ አስትዮ፨ ደኃርዎ፡ ባሕታውያን፡ እስመ፡ ውእቱ፡ ኮኖሙ፡ ረድአ፡ ወመጋቤ፡ በኵሉ፡ ውስተ፡ ኵሉ፨ ዘንተ፡ ኲሎ፡ ቡራኬያተ፡ አስተጋቢኦ፡ እማኅበረ፡ ቤተ፡ ክርስቲያን፡ እምንዑሳን፡

folio : 28


back to top

| | እስከ፡ ዓቢያን፡ ተሰምየ፡ ውሉዶሙ፨ ወካዕበ፡ በእንተ፡ ዘፆረ፡ ትካዞሙ፡ ለኵሉ፡ በበፆታሆሙ፨ ለድኩምኒ፡ በከመ፡ ድካሙ፨ ወለጽኑዕኒ፡ በከመ፡ ጽንዑ፨ ወበእንተ፡ ዝንቱኒ፡ ተሰምየ፡ አቡሆሙ፡ እስመ፡ ርቱዕ፡ ይሰምይ፡ አበ፡ ለኵሉ፡ ዓለም፡ ዘከመዝ፡ መናዝዝ፨ ወዘከመዝ፡ መተንብል፨ እስመ፡ ባቍዕ፡ ውእቱ፡ ዘበሰማይኒ፡ ወዘበምድርኒ፨ እፎኬ፡ ንዊድሶ፡ ለዝንቱ፡ ብእሲ፡ ክቡር፡ ዘረከበ፡ ክብረ፡ እምኀበ፡ እግዚአብሔር፨ ወበኀበ፡ ሰማያውያን፡ ወበኀበ፡ ምድራዊያን፨ | እፎኬ፡ ንክል፡ አብጽሖ፡ ውዳሴሁ፡ በልሳነ፡ ሥጋ፡ መዋቲ፡ እስመ፡ ውዳሴሁ፡ ይበዝኅ፡ እምኆፃ፡ ባሕር፨ ወእምከዋክብተ፡ ሰማይ፨ ኦም፡ ዓቢይ፡ ውእቱ፡ ብፁዕ፡ ላሊበላ፡ ዘልምሉም፡ ቈፅሉ፡ ወብዙኅ፡ አዕፁቂሁ፡ ዘምዑዝ፡ ጽጌሁ፡ ወጥዑም፡ ፍሬሁ፨ ወንሕኒኒ፡ አጽለልነ፡ ታሕተ፡ ሪያመ፡ አዕፁቂሁ፨ ወአዕረፍነ፡ እምሐሩረ፡ መርቄ፨ ተከዲነነ፡ በመንጦላዕተ፡ ጽሎቱ፨ ወተምዕዝነ፡ በጽጌሁ፨ ወጸገብነ፡ እምፍሬሁ፡ በግዕ፡ ውእቱ፡ ላሊበላ፡ ዘዕጡፍ፡ ፀምሩ፡ | | ዘኢተቀርፀ፡ በመጥባሕተ፡ ኃጢአት፨ መሐስዕ፡ ውእቱ፡ ላሊበላ፡ ዘጸግበ፡ ሐሊበ፡ እምበግዕት፡ አርያማዊት፨ ወአመስኵዓ፡ እምፂዖት፡ ሠናይ፡ ዘጥልልት፡ በማየ፡ ሕይወት፨ ላህም፡ ውእቱ፡ ላሊበላ፡ ዘጽሙድ፡ ታሕተ፡ አርዑተ፡ ወንጌል፡ ዘኢያጽነነ፡ ትልመ፡ ገራህቶ፡ ለሐረሳዊ፨ ወሐረሳዊሁሰ፡መንፈስ፡ ቅዱስ፡ ውእቱ፡ ዘያረውጾ፡ ውስተ፡ ወፍረ፡ ዚአሁ፡ እንተ፡ ይእቲ፡ ወፍረ፡ ሕይወት፨ እንተ፡ እምኔሃ፡ ይትዓረር፡ ስርናየ፡ መንፈስ፡ እንተ፡ ትዘገብ፡ ውስተ፡ ሙዳየ፡ ጽድቆሙ፡ ለቅዱሳን፨ ምሥዋዕ፡ | ውእቱ፡ ላሊበላ፡ እስመ፡ አጥረየ፡ ይዋሄሁ፡ ለበግዓ፡ ምሥጢር፨ ወበእንተዝ፡ ተሰምየ፡ መሥዋዕተ፡ ለእግዚአብሔር፨ በከመ፡ ይቤ፡ ዳዊት፡ ነቢይ፨ መሥዋዕቱ፡ ለእግዚአብሔር፡ መንፈስ፡ የዋህ፨ ልበ፡ ትሑተ፡ ወየዋሃ፡ ኢይሜንን፡ እግዚአብሔር፨ ባሕርይ፡ ውእቱ፡ ላሊበላ፡ ዘያፀድል፡ ስኑ፡ በውስተ፡ ጽልመት። ገሪፍ፡ ውእቱ፡ ላሊበላ፡ ዘአስተጋብአ፡ ዘመደ፡ ዓሣት፡ እምባሕረ፡ ገድሎሙ፡ ለቅዱሳን፨ ወሪዎ፡ ርእሶ፡ ውስተ፡ ሰመቀ፡ ቀላየ፡ ፃማሆሙ፡ ወኮነ፡ ሎሙ፡ ዘውገ፡ ገይበ፡ ወርቅ፡ ውእቱ፡

folio : 29


back to top

| | ዘንጡፍ፡ ስብዓ፨ ወወርቁኒ፡ አልዓስኬር፡ ዘይትቀዳሕ፡ ውስቴቱ፡ እምዘትረ፡ ምሥጢር፨ ዘነቅዓ፡ እምገቦ፡ በግፅ፡ መለኮታዊ፨ ዘኢከሠተ፡ አፉሁ፡ በሕማሙ፨ ወኢነበበ፡ በቅድመ፡ ዘይቀርፆ፨ ጽንሐሕ፡ ውእቱ፡ ላሊበላ፡ ዘይትሜዓዝዎ፡ ውሉደ፡ ቤተ፡ ክርስቲያን፡ ሠርፀ፡ መርዓት፡ ሐዲሳን፡ እለ፡ ንዙኃን፡ በደመ፡ ኪዳን፨ ሠርዌ፡ ውእቱ፡ ላሊበላ፡ ዘኢረከቦ፡ አስናነ፡ ዕፄ፡ ዘሙስና፡ እስመ፡ ዕቁብ፡ ውእቱ፡ ውስተ፡ ሜካኖቱ፡ ለአኃዜ፡ ኵሉ፡ ዓለም፨ እፎ፡ ንክል፡ ፈጽሞ፡ ውዳሴሁ፡ ንሕነ፡ መዋትያን፨ እስመ፡ | ብዙኅ፡ ውእቱ፡ ኊልቋ፡ ውዳሴሁ፡ እምነ፡ መሬተ፡ ምድር፨ ወለእመኒ፡ ኮነ፡ ኵሉ፡ አባልየ፡ ልሳነ፡ ፻፨ ወኵሉ፡ ሕሊናየ፡ አእምሮ፡ ኢይክል፡ አብጽሖ፡ ውዳሴሁ፡ ወነጊረ፡ ኂሩታቲሁ፨ ወለእመሰቦ፡ ዘይፈቅድ፡ ይንግር፡ ኵሎ፡ ትሩፋቲሁ፨ ይደልዎ፡ ከመ፡ ይኅድግ፡ ሕሊና፡ ዘበምድር፡ ወያዕርቅ፡ ርእሶ፡ እምልብሰተ፡ ሥጋ፨ ወይልበስ፡ ጠባይዓ፡ ዘመላእክት፡ ከመ፡ ይንግር፡ ዝክረ፡ ውዳሴሁ፡ ፍጹመ፡ ወይረሲ፡ ሎቱ፡ መጠነ፡ ባሕር፡ ቀለመ፨ ወመጠነ፡ ዕፀወ፡ ገዳም፡ ብርዓ፨ ወመጠነ፡ አቊጽሊሆሙ፡ | | ክርታሰ፨ ወመጠነ፡ ኑኃ፡ ሰማይ፡ እንግድዓ፨ ወመጠነ፡ ከዋክብት፡ ሠርጐ፡ ቃል፨ እስመ፡ ዓቢይ፡ ውእቱ፡ ብእሲሁ፡ ወዓቢይ፡ ዝክረ፡ ውዳሴሁ፨ ወበከመ፡ ይመውዕ፡ ብርሃነ፡ ፀሐይ፡ ብርሃነ፡ ወርኅ፡ ወብርሃነ፡ ከዋክብት፨ ከማሁ፡ ይመውእ፡ ክብረ፡ ዝንቱ፡ ብእሲ፡ ዘስሙ፡ ላሊበላ፡ አምክብረ፡ ካልአኒሁ፡ ቅዱሳን፨ ወበእንተዝ፡ ይንሣእ፡ ሎቱ፡ ብእሲ፡ ዘይፈቅድ፡ ከመ፡ ይጠንቅቅ፡ ውዳሴሁ፨ አፈ፡ ዘኪሩቤል፡ ወልሳነ፡ ዘሱራፌል፨ እስመ፡ እንዘ፡ ንጉሥ፡ ውእቱ፡ ዝንቱ፡ ብፁዕ፡ ላሊበላ፡ ኢበልዓ፡ እማዕደ፡ | መንግሥቱ፨ ዘከመ፡ ይደልዎ፡ ለንጉሥ፡ ቅሡማተ፡ በጣዕመ፡ ዝንቱ፡ ዓለም፡ ዘያፈግዕ፡ ሥጋ፨ እስመ፡ መፍቀሬ፡ ጽሙና፡ ውእቱ፡ ከመ፡ መነኮሳት፡ እለ፡ ይዔይሉ፡ ገዳማተ፡ ወከመ፡ እለ፡ ያፈቅሩ፡ ፆማዕተ፨ ወከመ፡ እለ፡ ይትዓረዙ፡ ሰቃተ፨ እስመ፡ ፃማ፡ እሉ፡ ኵሎሙ፡ ተጣግዓት፡ ውስተ፡ ሥጋሁ፡ ወተጋብአት፡ ኀቤሁ፨ እስመ፡ ጽምዕት፡ ነፍሱ፡ ኀበ፡ አምላክ፡ ሕያው፨ በከመ፡ ይቤ፡ ነቢይ፡ ከመ፡ ያፈቅር፡ ሃየል፡ ኀበ፡ አንቅዕተ፡ ማያት፡ ከማሁ፡ ታፈቅር፡ ነፍስየ፡ ኀበ፡ እግዚአብሔር፨ ጸምዓት፡ ነፍስየ፡ ኀበ፡

folio : 30


back to top

| | አምላኪየ፡ ሕያው፨ ማእዜ፡ እበጽሕ፡ ወእሬኢ፡ ገጸ፡ ለአምላኪየ፨ ሲሳየ፡ ኮነኒ፡ አንብዕየ፡ መዓልተ፡ ወሌሊተ፨ ኣማንኬ፡ ተሴሰየ፡ ኅብስተ፡ ንዴት፡ ምስለ፡ ኃዘን፡ ወገዓር፡ በእንተ፡ መንግሥተ፡ ሰማያት፨ ወስቴሁኒ፡ ሰትየ፡ ምስለ፡ ብካይ፡ ወአንብዕ፡ በእንተ፡ እግዚአብሔር፨ በከመ፡ ይቤ፡ ዳዊት፡ በመዝሙር፨ ዘ ፻፡ ወ ፬፡ ወስቲየኒ፡ ምስለ፡ አንብዕየ፡ ሰተይኩ፨ እፎኬ፡ ይክል፡ ብእሲ፡ ለባሴ፡ ሥጋ፡ አብጽሖ፡ ውዳሴሁ፨ ወጸቢተ፡ ውስተ፡ ዕመቀ፡ ትሕትናሁ፡ ለብፁዕ፡ ወለቅዱስ፡ ላሊበላ፡ እንዘ፡ ንጉሥ፡ | ውእቱ፡ ዘፆረ፡ ዘከመዝ፡ ንዴተ፨ ወዘከመዝ፡ ትሕትና፨ ወንሕነሰ፡ እንዘ፡ ነዳያን፡ እምንዋየ፡ ዝንቱ፡ ዓለም፨ ንትዔበይ፡ እንዘ፡ አልብነ፡ ዘንኴንን፡ ወኢምንተኒ፨ ኢአግብርት፡ ወኢአዕማት፨ ኢወርቅ፡ ወኢብሩረ፨ ወኢአልባሰ፡ ቀጠንተ፨ ወሶበ፡ ተከደነ፡ ጠለበስነ፡ ፀጕረ፡ በግዕ፡ ወአጌያተ፡ ዘገዚፍ፡ ፈትሉ፨ ይመስለነ፡ ዘንበጽሕ፡ ውስተ፡ ደመናት፨ ወነዓርግ፡ ውስተ፡ ሰማይ፨ ወይትነፋሕ፡ ልብነ፡ በነፋሰ፡ ትዕቢት፨ ወንትሜሰል፡ ከመ፡ ዘኢንመውት፨ ወብፁዕሰ፡ | | ወላሊበላ፡ እንዘቦ፡ አግብርት፡ ወአዕማተ፡ ወሥልጣን፡ ላዕለ፡ ኵሉ፡ ሕዝብ፡ ዘአመገቦ፡ እግዚአብሔር፡ እምታሕቴሁ፨ ኢቀነየ፡ አግብርቲሁ፡ በሕገ፡ አግብርት፡ ወአዕማቲሁ፡ በሕገ፡ አዕማት፨ አግብርቲሁኒ፡ ይሬሲ፡ ከመ፡ እንተ፡ ውሉዱ፡ እለ፡ ወፅኡ፡ እምሐቋሁ፨ በከመ፡ ይቤ፡ ጳውሎስ፡ ብርሃነ፡ ቤተ፡ ክርስቲያን። አጋእዝትኒ፡ ዕሩየ፡ ግበሩ፡ ሎሙ፡ ለነባሪክሙ፨ እስመ፡ ተአምሩ፡ ከመ፡ ብክሙ፡ እግዚእ፡ በሰማያት፨ ወአመታቲሁኒ፡ ያፈቅር፡ ከመ፡ እንተ፡ አዋልዲሁ፨ ወአልባሰ፡ ቀጠንተኒ፡ ኢለብሰ፡ | ብፁዕ፡ ወቅዱስ፡ ላሊበላ፡ እንዘ፡ ንጉሥ፡ ውእቱ፡ በእንተ፡ ዘኢለብሰ፡ ቀጠንተ፡ ኢተመክሐ፨ በከመ፡ ይቤ፡ መድኃኒነ፡ በብስራተ፡ መድኃኒት፡ ወኵሎ፡ ዘገበርክሙ፡ ገቢረክሙ፡ በሉ፡ አግብርት፡ ፅሩዓን፡ ንሕነ፨ ወባሕቱ፡ ዘይደልወነ፡ ለገቢር፡ ገበርነ፡ ግብረነ፨ ወይቤ፡ ካዕበ፡ ኢትክሉ፡ ተቀንዮ፡ ለክልኤ፡ አጋእዝት፨ እመ፡ አኮ፡ አሐደ፡ ታፈቅሩ፡ ወካልኦ፡ ትጸልኡ፨ ኢትክሉኬ፡ ተቀንዮ፡ ለእግዚአብሔር፡ እንዘ፡ ንዋየ፡ ታፈቅሩ። ወዘንተ፡ ቃለ፡ ሰማዖ፡ ብፁዕ፡ ወቅዱስ፡ ላሊበላ፡ መነነ፡ ዘበምድር፡ ንዋየ፡

folio : 31


back to top

| | ዘይበሊ፡ ወዘይማስን፨ ወርቀ፡ ዘይዝሕል፡ ወአልባሰ፡ ዘይቈነቍን፨ ተሰፊዎ፡ ንዋየ፡ ዘኢያስተርኢ፡ ዘሀሎ፡ ውስተ፡ ሰማያተ፨ ዘኢይደልዎሙ፡ ከመ፡ ይርከብዎ፡ መፍቀርያነ፡ ወርቅ፡ እለ፡ ፈጸሙ፡ ፍትወቶሙ፡ ዘዲበ፡ ምድር፨ በኵሉ፡ ትፍግዕታት፡ ኃላፍያት፡ ወኢነባርያት፨ እስመ፡ ምስሌሆሙ፡ ይማስን፡ ትፍግዕቶሙ፨ በከመ፡ ይቤ፡ ዮሐንስ፡ ሐዋርያ፡ ዘረፈቀ፡ ውስተ፡ እንግድዓ፡ እሳት፨ ኢታፍቅርዎ፡ ለዓለም፡ ወኢዘሀሎ፡ ውስተ፡ ዓለም፨ እስመ፡ ኵሉ፡ ዘሀሎ፡ | ውስተ፡ ዓለም፨ ፍትወቱ፡ ለሥጋ፡ ወፍትወቱ፡ ለዓይን፡ ወስራሑ፡ ለመንበርት፡ ኢኮነ፡ ዝንቱ፡ እምኀበ፡ እግዚአብሔር፨ አላ፡ እምዓለም፡ ወዓለምኒ፡ የኃልፍ፡ ወፍትወቱኒ፨ ወዘሰ፡ ይገብር፡ ፈቃዶ፡ ለእግዚአብር፡ ይነብር፡ ለዓለም፨ ወበእንተ፡ ዝንቱ፡ ብፁዕ፡ ወቅዱስ፡ ላሊበላ፡ ኢጥዕመ፡ ግሙራ፡ እምፍግዕቶሙ፡ ለኃጥአን፡ ወኢእምአልባሰ፡ ቀጠንት፡ ወኢእማዕድ፡ ጥዕማት፨ እንዘ፡ ይሴፎ፡ በሊዓ፡ እማዕደ፡ ሕይወት፨ እስመ፡ ሰምዓ፡ ቃለ፡ ዘተብህለ፡ | | እምኀበ፡ እግዚአብሔር፡ በአፈ፡ ነቢይ፡ እለ፡ ይትቀነዩ፡ ሊተ፡ ይበልዑ፡ ወአንትሙሰ፡ ረኃቡ፨ እለ፡ ይትቀነዩ፡ ይሰትዩ፡ ወአንትሙሰ፡ ጽሙዑ፨ እለ፡ ይትቀነዩ፡ ሊተ፡ ይለብሱ፨ ወአንትሙሰ፡ ዕረቁ፨ እለ፡ ይትቀነዩ፡ ሊተ፡ ይትፌሥሑ፨ ወአንትሙሰ፡ ኅዝኑ፨ እለ፡ ይትቀነዩ፡ ሊተ፡ ይትሐሠዩ፡ በሐሤት፨ ወአንትሙሰ፡ ገዓሩ፡ በመንሱት፨ በሕማመ፡ ልብክሙ፡ ወበቅጥቃጤ፡ ሐቋክሙ፡ አውይው፡ በእንተዝኬ፡ ብፁዕ፡ላሊበላ፡ ያሜክራ፡ ለሥጋሁ፡ በጾም፡ በረኃብ፡ ወበጽምዕ፨ አመ፡ | ይርኅቡ፡ በላዕያነ፡ ከመ፡ ይጽገብ፨ አመ፡ ይጸምፁ፡ ሰታይያን፡ ከመ፡ ይርወይ፨ አመ፡ ያረምሙ፡ ሰሐቅያን፡ ከመ፡ ይትወሐዋሕ፨ ወአመ፡ የኃዝኑ፡ ፍጉዓን፡ ከመ፡ ይትፈሣሕ፨ ወአመ፡ የዓርቁ፡ እለ፡ ይለብሱ፡ ቀጠንተ፡ ከመ፡ ይትዓፀፍ፡ ሜላተ፡ ብርሃን፡ ንጹሐ፡ ዘኢተአንመ፡ በእደ፡ መሬታዊ፨ ወባሕቱ፡ ዝንቱ፡ ኵሉ፡ ኢይትረከብ፡ ዘእንበለ፡ መከራ፡ ወሕማም፨ ወባሕቱ፡ ሕማሙሰ፡ ለዝንቱ፡ ዓለም፡ ኢኮነ፡ መጠና፡ ለእንተ፡ ትመጽእ፡ ሕይወት፡ ዘለዓለም፨ ወበእንተዝ፡ ብፁዕ፡

folio : 32


back to top

| | ላሊበላ፡ ውዱሰ፡ ምግባር፡ ተወክፈ፡ ሕማመ፡ ወምንዳቤ፡ ወመከራ፡ ብዙኃ፡ በእንተ፡ ጽድቅ፨ በከመ፡ ይቤ፡ መምህረ፡ አሕዛብ፨ ጽድቁ፡ እንከ፡ በአሚን፡ ወንርከብ፡ ሰላመ፡ በኀበ፡ እግዚአብሔር፡ ወእግዚእነ፡ ኢየሱስ፡ ክርስቶስ፡ ዘበእንቲአሁ፡ ተመራሕነ፡ ውስተ፡ ጸጋሁ፡ እንተ፡ ባቲ፡ ቆምነ፡ ወይእቲ፡ ምክህነ፨ ወአኮ፡ በባሕቲታ፡ ዓዲ፡ ንትሜካህ፡ በሕማምነሂ፨ እስመ፡ ተአምሩ፡ ከመ፡ እምሕማሙ፡ ይትዓወቅ፡ መከራሁ፡ ወተመኪሮ፡ ይረክብ፡ ተስፋሁ፨ ወተክፋሁኒ፡ ኢያስተኃፍሮ፡ እስመ፡ | መልዓ፡ ፍቅረ፡ እግዚአብሔር፡ ውስተ፡ ልብነ፡በመንፈስ፡ ቅዱስ፡ ዘወሀበነ፨ በዝንቱኬ፡ ቃላት፡ ወበፍቅረ፡ መንፈስ፡ ቅዱስ፡ ተወርዚዎ፡ ብፁዕ፡ ላሊበላ፡ ዝኅዙኃ፡ ገድል፡ ተወካፌ፡ ምንዳቤ፡ ሥጋ፡ ከመ፡ ይኩን፡ ሥሉጠ፡ ላዕለ፡ ዕፀ፡ ሕይወት፨ በከመ፡ ይቤ፡ ቴዎጎሎስ፡ ወልደ፡ ነጐድጓድ፨ ብፁዓን፡ እለ፡ ያነጽሑ፡ አልባሲሆሙ፨ ከመ፡ ይኩን፡ ሥልጣኖሙ፡ ላዕለ፡ ዕፀ፡ ሕይወት፨ አመ፡ ይሰደዱ፡ ወይወፅኡ፡ አፍአ፡ ሐምስቱ፡ አክላብ፡ እሉ፡ እሙንቱ፡ መሠርያን፡ ወዘማውያን፡ ወቀታልያን፡ | | ፬ ወእለ፡ ያጣዕው፡ ወኵሎሙ፡ እለ፡ ያፈቅሩ፡ ግብረ፡ ሐሰት፨ ወእሉ፡ አመ፡ ይወፅኡ፡ እምከብካበ፡ መርዓ፡ መንገለ፡ አፍአ፨ ወውእቱሰ፡ ላሊበላ፡ ይበውእ፡ ተጸዊዖ፡ በቃለ፡ መርዓዊ፡ ሰማያዊ፡ ዘይብል፡ ንዑ፡ ኀቤየ፡ ቡሩካኑ፡ ለአቡየ፡ ትረሱ፡ መንግሥተ፡ ሰማያት፡ ዘአስተዳለወ፡ ለክሙ፡ እምቅድመ፡ ይትፈጠር፡ ዓለም፨ በከመ፡ ይቤ፡ ለሊሁ፡ በአፈ፡ ረድኡ፡ እመቦ፡ ዘሰምዓ፡ ቃልየ፡ እሬስዮ፡ ዓምደ፡ ውስተ፡ መቅደሱ፡ ለአምላኪየ፨ ወኢያወፅኦ፡ አፍአ፡ ወእሁቦ፡ መጽሐፈ፡ ብርሃን፡ ኅቱመ፨ | ዘኢየአምሮ፡ ካልእ፡ ዘእንበለ፡ ዘነሥአ፨ ወእሴስዮ፡ መና፡ ኅቡእ፨ አማንኬ፡ ይደልዎ፡ ለላሊበላ፡ ከመ፡ ይባእ፡ ውስተ፡ ቤተ፡ መርዓ፡ ከመ፡ ይኩን፡ ዓምደ፡ ውስተ፡ ቤተ፡ መቅደሱ፡ ለበግዑ፨ ወይደልዎ፡ ካዕበ፡ ከመ፡ ይንሣእ፡ መጽሐፈ፡ ብርሃን፡ ኅቱመ፨ እንተ፡ ይእቲ፡ ሥጋሁ፡ ለክርስቶስ፡ ወይእቲ፡ ኅብስተ፡ አምልኮ፡ ዘጽሐፍ፡ ላዕሌሃ፡ ስመ፡ ግዕዛን፡ በደመ፡ መለኮት፨ ወይእቲ፡ ሲሳዮሙ፡ ለምእመናን፨ እለ፡ ዕቱባን፡ በስመ፡ ሥላሴ፡ ወአመ፡ ይሠራዕ፡ ማዕደ፡ ሕይወት፡ በዝንቱ፡ ኅብስት፡

folio : 33


back to top

| | ፭ ዘጽሑፍ፡ ላዕሌሃ፡ ስም፡ ሐዲስ፡ ዘኢያአምራ፡ ካልእ፡ ዘእንበለ፡ ዘነሥአ፡ ወአመ፡ ይቀንት፡ ወያረፍቆሙ፨ ወአመ፡ ያንሶሱ፡ ወይሜጥዎሙ፡ ለአግብርቲሁ፡ ኄራን፨ ወለጻድቃኒሁ፡ ቡሩካን፨ እለ፡ ፆሩ፡ ክበዳ፡ ወላህባ፡ ለዕለት፨ ወለነኒ፡ አሥራተ፡ ምሕረት፡ ይንሥአነ፡ ምክሀ፡ ኵልነ፡ ብፁዕ፡ ላሊበላ፡ ከመ፡ ንባእ፡ ምስሌሁ፡ ኀበ፡ ቦአ፡ ላሊሁ፨ ወከመ፡ ንርፍቅ፡ ኀበ፡ ረፈቀ፡ ውእቱ፡ ከመ፡ ንሳተፎ፡ በፍሥሐሁ፨ ወከመ፡ ንደለው፡ በተድላሁ፨ ወከመ፡ ናንሶሱ፡ ውስተ፡ ቤተ፡ መርዓ፡ ሐዳስ፨ ዘኢይበውእ፡ | ውስቴታ፡ ዘኢለብሰ፡ ልብሰ፡ ከብካብ፡ መርዓ፡ ወዘኢተሠርገወ፡ በብርሃነ፡ ሥላሴ፡ ወአመ፡ ይሠራዕ፡ ማዕደ፡ ሕይወት፡ ይበለነ፡ ብፁዕ፡ላሊበላ፡ በይእቲ፡ ሰዓት፡ ነየ፡ አነ፡ ወደቂቅየ፡ ዘወሀበኒ፡ እግዚአብሔር፨ ወያቁመነ፡ ምስሌሁ፡ ቅድመ፡ ገጸ፡ በግዑ፡ ኃቢኦ፡ በጽላሎተ፡ ክነፊሁ፨ ወከዲኖ፡ በመንጦላዕተ፡ ጸላሎቱ፨ ከመ፡ ኢይቅረቡ፡ ኀቤነ፡ መላእክተ፡ እሳት፡ እኁዛነ፡ አስይፍት፡ እለ፡ የዓፅዱ፡ ክርዳደ፡ አርዮሙ፡ እማእከለ፡ ስርናይ፨ ወየዓስርዎሙ፡ በበከላስስቲሆሙ፡ | | ለአንድዶቶሙ፡ ወለእለ፡ ይፈልጥዎሙ፡ ለኃጥአን፡ እማእከሎሙ፡ ለጻድቃን፨ ወለእለ፡ ይሌልይዎሙ፡ ለጸዋጋን፡ እማእከሎሙ፡ ለየዋሃን፨ ወእሉ፡ መላእክተ፡ መዓት፡ ከመ፡ ኢይቅረቡ፡ ኀቤነ፡ ወከመ፡ ኢይፍልጡነ፡ እምኔሁ፡ ይመግበነ፡ ሐቂፎ፡ በየማነ፡ እዴሁ፨ወያድኅና፡ እመከራ፡ ሥጋ፡ ወነፍስ፨ ለአመተ፡ ንግሥትነ፡ወለተ፡ ኢየሱስ፡ ወይዕቀባ፡ ለወለታ፡ ኂሩተ፡ ሥላሴ፡ ለዓለመ፡ ዓለም፡ አሜን፨ | ንትመየጥኬ፡ ኀበ፡ ጥንተ፡ ገድሉ፡ ለዝንቱ፡ ዕፍረቱ፡ ምዑዝ፡ ከመ፡ ኢይምሰሎ፡ ዝንጋዔ፡ ለልበ፡ አብድ፡ ለዘኢያፈቅር፡ ውዳሴሆሙ፡ ለጻድቃን፡ ወለዘ፡ ኢይትጌበር፡ ለረብሐ፡ መንፈስ፨ እስመ፡ ቦእምውስተ፡ ሕዝብ፡ እለ፡ ያንጐረጕሩ፡ ሶበ፡ ይሰምዑ፡ ኑኃ፡ ውዳሴሆሙ፡ ለጻድቃን፨ ወጣዕመ፡ ቀስሞሙ፡ ለመጻሕፍት፨ ወፃማ፡ ገድሎሙ፡ ለቅዱሳን፡ ዘኢያስተአድሞሙ፡ ወለእለሰ፡ ቦሙ፡ ፈሪሃ፡ እግዚአብሔር፡ ወጽሙዓን፡ ለሰሪበ፡ ቃሉ፡ እመኒ፡ ሰምዑ፡ እንዘ፡ ይትነበብ፡ እምነግህ፡

folio : 34


back to top

| | እስከ፡ ሰርክ፡ ነገራተ፡ መንፈስ፡ ኢይጸግብዎ፨ ወእገሪሆሙኒ፡ ኢይደክም፡ እምቀዊም፨ ወእደዊሆሙኒ፡ ኢያስተጋብኡ፡ እምዘ፡ ሰፍሑ፨ ወአዕይንቲሆሙኒ፡ ኢይደክማ፡ እምነጽሮ፨ ወክሣዶሙኒ፡ እምአንቃዕድዎ፡ ኢይትሔየያ፡ ወኢይትሀከያ። ወልሳኖሙኒ፡ እምተናግሮ፡ ኢየዓርፋ፡ በውኂዘ፡ ስብሐት፡ እንዘ፡ ይሠቀያ፡ ወኢረውያ፨ ወእዘኒሆሙኒ፡ ኢይጸግባ፡ እምአጽምዖ፨ ወሕሊናሆሙ፡ ኢተወላወላ፡ እስመ፡ መንፈስ፡ ቅዱስ፡ ያኄይሎን፡ | ወያረስን፡ ልቦሙ፡ ወያውዕዮሙ፨ እስመ፡ አቡሆሙ፡ ዘበሰማያት፡ ይሁቦሙ፡ ሠናየ፡ ሀብተ፡መንፈስ፡ ቅዱስ፡ ለእለ፡ ያፈቅርዎ፡ ወይስእልዎ፨ ወለእለሰ፡ አልቦሙ፡ ፈሪሃ፡ እግዚአብሔር፡ ወአሚነ፡ ተስፋሆሙ፡ ለጻድቃን፡ ወተፀውኖ፡ በኃይላ፡ ጸሎቶሙ፡ ለቅዱሳን፡ ለእመ፡ ሰምዑ፡ ሶበ፡ ይትነበብ፡ ፃማሆሙ፡ ለመስተጋድላን፨ ወለእመ፡ ኖኃ፡ ነገሩ፡ ይብሉ፡ ምንትኑዝ፡ ዘከመዝ፡ ዝንጋዔ፨ ዘንተኬ፡ ይሔልዩ፡ ወያንጐረጕሩ፡ ላዕለ፡መንፈስ፡ ቅዱስ፡ እስመ፡ ኢይጥ/ዕ/ሞሙ፡ | | ቃለ፡ መለኮት፡ ለጽሩዓን፨ እስመ፡ ኢተቶስሐ፡ ልቦሙ፡ በሃይማኖት፡ ወኅጡአን፡ እምእሳተ፡ መንፈስ፡ ቅዱስ፨ ወቈሪራነ፡ ልብ፡ ከመ፡ አስሐትያ፡ ዘኣሜ፡ ክረምት፨ ወይወፅኡ፡ እምቤተ፡ ክርስቲያን፡ እንዘ፡ ኢይትፌጸም፡ ነገረ፡ እግዚአብሔር፡ ወግብር፡ መንፈሳዊት፨ ወሶቤሃ፡ ይትፌሣሕ፡ ሰይጣን፡ ምስለ፡ አጋንንቲሁ፡ እስመ፡ በሀብለ፡ ሀኬት፡ አሲሮ፡ አውፅኦሙ፡ ወይኤምኆሙ፡ ሐቂፎ፡ ክሣዶ፡ ከመ፡ ዘይኤምኅ፡ አብ፡ ወልዶ፡ ፍቁሮ፨ ወይተልዎሙ፡ ኀበ፡ ሖሩ፡ እንዘ፡ | ይሜግብዎሙ፡ አጋንንቲሁ፡ ይምነ፡ ወጽግመ፡ ከዋላ፡ ወፍጽመ፡ ያድኅነነ፡ እግዚአብሔር፡ እመክፈልቶሙ፡ ለእሉ፨ ወያጽሕቅ፡ ልበነ፡ ለሰሚዓ፡ ቃላቲሁ፡ ወለገቢረ፡ ትእዛዛቲሁ፨ ወይረስየነ፡ ድልዋነ፡ ከመ፡ ንኅድር፡ ውስተ፡ ቤቱ፨ ወከመ፡ ንጻመድ፡ ውስተ፡ ቤተ፡ መቅደሱ፡ በኵሉ፡ መዋዕለ፡ ሕይወትነ፨ ወያርእየነ፡ በዘኖሠምሮ፡ ሎቱ፡ በኃይለ፡ ጸሎቱ፡ ለዝንቱ፡ ፀሐየ፡ ጽድቅ፡ ዘስሙ፡ ላሊበላ፡ ወይዕቀባ፡ ለአመተ፡ እግዚአብሔር፡ ንግሥትነ፡

folio : 35


back to top

| | [36] ወለተ፡ ኢየሱስ፡ ለዓለመ፡ ዓለም፡ አሜን፨ ....................................................................................................................................................................... ስምዑኬ፡ ኦፍቁራንየ፡ እለ፡ ተኃሥሡ፡ በረከተ፡ ጸጋሁ፡ ለጻድቅ፡ ወእለ፡ ትፃምው፡ ለፍቅረ፡ ላሊበላ፡ ከመ፡ ትርወዩ፡ እምነቅዓ፡ ገድሉ፡ ጥዑም፨ ዘይበውእ፡ ከመ፡ ማይ፡ ውስተ፡ አማዑት፨ ወከመ፡ ቅብዕ፡ ውስተ፡ አዕፅምት፨ እስመ፡ ክረምተ፡ ውዳሴ፡ ውእቱ፡ ዘኢይሐጊ፨ ክሥቱኬ፡ እዝነ፡ ልበክሙ፨ ወናሁ፡ ወጠንኩ፡ እንግርክሙ፡ ለእመ፡ ክህለ፡ ላዕላአ፡ ወጸያፍ፡ ልሳንየ፨ ወሕፁፅ፡ | አእምሮትየ፨ ዜንዎ፡ ኅዳጠ፡ እምነ፡ ብዙኅ፡ መንክራቲሁ፨ ወአኮ፡ ፍጹመ፡ ዘእክል፡ ከመ፡ እዜኑክሙ፨ አላ፡ ኅዳጠ፡ መክፈልተ፡ እምነ፡ ፃማሁ፡ ለዝንቱ፡ ብፁዕ፡ ከመ፡ ይትፈሥሐክሙ፡ ልብክሙ፨ በሰሚዖቱ፡ እስመ፡ ዜና፡ ጻድቅ፡ ያስተፌሥሕ፡ ፈድፋደ፡ እምነ፡ ማዕድኒ፡ ሥሩዕ፡ ያጸግብ፨ ወእምነ፡ ወይንኒ፡ ወእምነ፡ ሜስ፡ ያጠልል፨ ወእምነ፡ ዘይትኒ፡ ወእምነ፡ ቅብዕ፡ ያጽሕድ፨ በከመ፡ ይቤ፡ ነቢይ፡ ወጽሕደ፡ እምቅብዕ፡ ነገሩ፨ ወአንትሙሂ፡ መፍትው፡ | | በተአምኖ፡ ትልበስዎ፡ ከመ፡ ልብስ፨ ወትትሞጣሕዎ፡ ከመ፡ ሞጣሕት፨ እንዘ፡ ታከብርዎ፡ ከመ፡ መላእክት፨ ወከመ፡ ነቢያት፡ ወሐዋርያት፨ ወከመ፡ ጻድቃን፡ ወሰማዕት፡ ወከመ፡ ደናግል፡ ወመነኮሳት፨ እስመ፡ ውእቱኒ፡ ኢሐፀ፡ እምኔሆሙ፨ ጸሎቱ፡ ወስእለቱ፡ ወሀብተ፡ ረድኤቱ፡ ወበረከተ፡ ተስፋሁ፡ የሃሉ፡ ምስለ፡ አመተ፡ እግዚአብሔር፡ ንግሥትነ፡ ወለተ፡ ኢየሱስ፡ ወምስለ፡ ወለታ፡ ኂሩተ፡ ሥላሴ፡ ወምስለ፡ ኵልክሙ፡ ዝየ፡ እለ፡ ሀለውክሙ፡ ዝየ፡ | ወእለ፡ መጻእክሙ፡ እምርኁቅ፡ ወእምቅሩብ፨ እንዘ፡ ትትአመኑ፡ በጽላሎተ፡ ክነፊሁ፡ ወውእቱኒ፡ ኢይርኃቅ፡ እምኔክሙ፨ ለዓለመ፡ ዓለም፡ አሜን፨ .................................................................................................................................................................... ወሀለወት፡ አሐቲ፡ ሀገር፡ እምአህጉራተ፡ ኢትዮጵያ፡ እንተ፡ ትሰመይ፡ ሮሐ፡ ሀገረ፡ ሙላዱ፡ ለብፁዕ፡ ላሊበላ፡ ወሀለወ፡ በይእቲ፡ ሀገር፡ አሐዱ፡ ብእሲ፡ እንተ፡ እምዘመደ፡ ዓበይት፡ ወክቡራን፡ ወብዑላን፡ ፈድፋደ፡ በወርቅ፡ ወበብሩር፡ ወበአልባስ፡ ወበአልባስ፡ ቀጠንት፡ ወበአግብርት፡

folio : 36


back to top

| | ወአዕማት፨ ወስሙሰ፡ ለውእቱ፡ ብእሲ፡ ዣን፡ ሥዩም፨ ወነሥአ፡ ሎቱ፡ ብእሲተ፡ ወወልደ፡ እምኔሃ፡ ለዝንቱ፡ ቡሩክ፡ ወቅዱስ፡ ዘተሰምየ፡ ላሊበላ፡ በምሥጢር፡ ወትርጓሜሁ፡ እነግረክሙ፡ በእንተ፡ ምንት፡ ተሰምየ፡ ወተጸውዓ፡ በዝንቱ፡ ስም፡ ዘውእቱ፡ላሊበላ፡ ወአመ፡ ወለደቶ፡ እሙ፡ መጽኡ፡ አንህብተ፡ ብዙኃን፨ ወዓገትዎ፡ ከመ፡ ዘየዓግቱ፡ መዓረ፨ ወርእያ፡ እሙ፡ እሎንተ፡ አንህብተ፡ ከመ፡ ዓገትዎ፡ ወሐጸርዎ፡ ለሕፃና፡ ከመ፡ ዘየዓውድዎ፡ ሐራሁ፡ ለንጉሥ፨ | ወሶበ፡ ርእየት፡ ዘንተ፡ ወረደ፡ ኅቤሃ፡ መንፈሰ፡ ተነብዮ፨ ወትቤ፡ ንህብኒ፡ አእመረ፡ ከመ፡ ዓቢይ፡ ውእቱ፡ ዝንቱ፡ ሕፃን፨ ወበእንተ፡ ዝንቱ፡ ሰመየቶ፡ ላሊበላ፡ ንህብ፡ አእመረ፡ ጸጋሁ፡ ብሂል፨ አማንኬ፡ አእመረ፡ ጸጋሁ፡ ንህብ፡ እስመ፡ ዓገትዎ፡ ከመ፡ እንተ፡ መዓር፡ እስመ፡ ንህብ፡ ያፈቅር፡ መዓር፨ ወበእንተ፡ ዝንቱ፡ ከበብዎ፨ እስመ፡ ሀለዎ፡ ለብፁዕ፡ ላሊበላ፡ ከመ፡ ያምዕር፡ ጸቃውዓተ፡ ዘምግባረ፡ ሠናይ፨ አስተጋቢኦ፡ ጽጌያተ፡ ዘዘ፡ ዚአሁ፡ ኅበሪሁ፨ ወዘዘ፡ ዚአሁ፡ | | አርአያሁ፨ ወዘዘ፡ ዚአሁ፡ ፄናሁ፨ ወዘዘ፡ ዚአሁ፡ መዓዛሁ፨ እምነ፡ ገድለ፡ ኵሎሙ፡ ቅዱሳን፨ እምነ፡ ጸዋምያንኒ፡ ጾመ፨ ወእምነ፡ ንጹሐን፡ ንጹሐ፡ ወእምነ፡ ቀዋምያን፡ ቀዊመ፨ ወእምነ፡ ሰጋድያን፡ ሰጊደ፨ ወእምነ፡ ትሑታን፡ ትሕትና፤ ወእምነ፡ የዋሃት፡ የውሃተ፨ ወእምነ፡ መሐርያን፡ ምሕረተ። ወእምነ፡ መጽዋትያን፡ ምጽዋተ፨ ወእምነ፡ መፍቀርያነ፡ ሰብእ፡ አፍቅሮተ፡ ቢጽ፨ ወእምነ፡ ረዋጽያን፡ ለገይሰ፡ ቤተ፡ ክርስቲያን፨ ወእምነ፡ ሰላማዊያን፡ | ሰላመ፨ ወእምነ፡ ኵሉ፡ ዘቦ፡ ምግባረ፡ ሠናይ፡ አልቦ፡ ዘኢያስተጋብአ፡ ብፁዕ፡ ላሊበላ፡ ዘንተኬ፡ ኵሎ፡ ጽጌያተ፡ ምግባር፡ ዘሠናይ፡ ከመ፡ ያስተጋብእ፡ አእሚሮ፨ ዘይፈትን፡ ልበ፡ ወኵልያተ፡ ፈነዎሙ፡ ለአንህብት፡ ከመ፡ ይዕግትዎ፨ በከመ፡ የዓግቱ፡ መዓረ፡ በዕለተ፡ ተወልደ፡ ዝንቱ፡ ብፁዕ፡ላሊበላ፡ ወዓዲቦ፡ ካልአኒ፡ አምሳለ፡ ዘይፌጽም፡ ትእምርተ፡ ዝንቱ፡ ንህብ፡ ላዕለ፡ ብፁዕ፡ ወቅዱስ፡ላሊበላ፡ እስመ፡ ዓቢይ፡ ምሥጢር፡ ተከሥተ፡ በዕለተ፡ ልደቱ፨

folio : 37


back to top

| | አመ፡ ሕፃን፡ ውእቱ፡ ዘሀለዎ፡ ይከውን፡ አመ፡ ልሕቅናሁ፨ ንህብሰ፡ ይትሜሰል፡ በሠራዊተ፡ ንጉሥ፨ ወመኃሜሆሙኒ፡ በዘቦቱ፡ ያሐሙ፡ ሰብአ፡ በንዋየ፡ ሐቅል፡ ዘሠራዊተ፡ ንጉሥ፡ በዘቦቱ፡ ይፀብዑ፡ ዓላውያነ፡ እለ፡ አፅረርዎ፡ ለንጉሥ፡ እስመ፡ ሀለዎ፡ ለብፁዕ፡ ላሊበላ፡ ከመ፡ ይኩን፡ ንጉሠ፨ ወበእንንተ፡ ዝንቱ፡ ዓገትዎ፡ አንህብት፡ በአምሳለ፡ ሠራዊተ፡ ንጉሥ፡ ወሐራሁ፨ እንዘ፡ ኢየአምር፡ ለሊሁ፡ ተአምረ፡ ምኵናነ፡ ዚአሁ፨ ወእንበለ፡ ይሢምዎ፡ ተዓውቀ፡ ሢመተ፡ | ንግሡ፨ ወእንበለ፡ ያምልክዎ፡ ተዓውቀ፡ ምልክናሁ፨ ወእንበለ፡ ያመስፍንዎ፡ ተዓውቀ፡ ምስፍናሁ፨ ወንህብሰ፡ ኢኮነ፡ ዘሥጋ፨ አላ፡ መላእክት፡ እሙንቱ፡ እለ፡ ተመሰሉ፡ አንህብተ፡ እንዘ፡ ያኤምሩ፡ ንግሦ፨ ወጸቃውዓተ፡ ምግባር፡ ዘይትቀዳሕ፡ እምኔሁ፨ እስመ፡ ሀለዎ፡ ለብፁዕ፡ላሊበላ፡ ከመ፡ ይልበስ፡ ወይፈጽም፡ ዘንተ፡ ኵሎ፡ ትንቢታተ፡ ዘበምድር፡ እንተ፡ ይእቲ፡ ምግባረተ፡ ጽድቅ፨ ወእምዝ፡ ልሕቀ፡ እንዘ፡ የሐፅኖ፡ መንፈስ፡ | | ቅዱስ፡ ወያጸንዖ፡ በኃይል፡ ወበጥበብ፡ ወበምክር፡ ወበግርማ፡ መንክር፨ ወኵለንታሁኒ፡ አዳም፡ ውእቱ፨ ወአልቦ፡ ሕሡም፡ እምኔሁ፡ እምርእሱ፡ እስከ፡ እገሪሁ፨ ወቂሐተ፡ መላትሒሁኒ፡ ከመ፡ ቅረፍተ፡ ሮማን፨ አዕይንቲሁኒ፡ ከመ፡ ኮከበ፡ ጽባሕ፨ ወአፃብአ፡ እደዊሁኒ፡ ዘውገ ማዕነቅ፨ ወአዕናፊሁኒ፡ ቀዋም፨ ወአውሥኦተ፡ ቃሉ፡ ጥዑም፨ ወሣዕሳዕ፡ አፉሁ፡ ወበለዝ፡ ልሳኑ፨ ወከመዝኬ፡ ልሕቀ፡ እንዘ፡ ትተልዎ፡ ጸጋ፡ እግዚአብሔር፡ ወረድኤተ፡ | ኢየሱስ፡ ክርስቶስ፡ ወሀብተ፡ መንፈስ፡ ቅዱስ፡ ወኵሉ፡ ዘርእዮ፡ ያነክሮ፡ እምግርማሁ፡ ወእምነ፡ አርአያሁ፨ ወይትኔበዩ፡ ሎቱ፡ መንግሥተ፨ እስመ፡ ንህብ፡ አመረቶሙ፡ ቀዳሚ፡ በዕለተ፡ ልደቱ፨ ዝኩ፡ ሕፃን፡ መድኃኔ፡ ገጽነ፡ ዘተወልደ፡ እምቅድስት፡ ድንግል፡ ዘእንበለ፡ ዘርአ፡ ብእሲ፡ በከመ፡ ፈነወ፡ ኮከበ፡ ኀበ፡ ሰብአ፡ ሰገል፡ ዘይዜንዎሙ፡ ልደቶ፨ ወይኤምሮ፡ ንጉሦ፡ እስመ፡ ተወልደ፡ ንጉሠ፡ ሰማያት፡ ወምድር፡ ውስተ፡ ምድረ፡ ይሁዳ፤ ከማሁ፡ ህየንተ፡ ኮከብ፡

folio : 38


back to top

| | ዘከመ፡ ተወልደ፡ ቅዱስ፡ ላሊበላ፡ ሀገረ፡ ሮሐ። miniature | | ፈነወ፡ ንህ/በ/፡ አመ፡ ልደቱ፡ ዘይኤምር፡ ንግሦ፡ ለብፁዕ፡ ላሊበላ፡ አመ፡ ሕፃን፡ ውእቱ፨ እስመ፡ ሀለዎ፡ ይኩን፡ ንጉሠ፡ አመ፡ ልሕቅናሁ፨ እስመ፡ ይፈቅድ፡ ኢየሱስ፡ ክርስቶስ፡ ከመ፡ ይክፍሎ፡ መንግሥተ፡ ዘበሰማይኒ፡ ወዘበምድርኒ፨ ዘሎቱ፡ ልደተ፡ ሰበከ፡ ኮከብ፨ ወልደተ፡ ገብሩኒ፡ ላሊበላ፡ ሰበከ፡ ንህበ፨ እስመ፡ ይፈቅድ፡ እግዚኡ፡ ከመ፡ ያዔርዩ፡ ምስሌሁ፨ ወበእንተዝ፡ መልዓ፡ መንፈስ፡ ቅዱስ፡ እምከርሠ፡ እሙ፨ ከመ፡ ኤርምያስ፡ ወዮሐንስ፨ ወከመዝ፡ ተወልደ፡ ብፁዕ፡ | ላሊበላ፡ እንዘ፡ ምሉዕ፡ መንፈሰ፡ አእምሮ፡ ወመንፈሰ፡ ጥበብ፨ መንፈሰ፡ ልቡና፡ ወመንፈሰ፡ ምክር፨ መንፈሰ፡ ቅድስና፡ ወመንፈሰ፡ ንጽሕ፨ ወከመዝ፡ ተወልደ፡ በፈቃደ፡ አብ፡ ወበሥረተ፡ ወልድ፡ ወበኃይለ፡ መንፈስ፡ ቅዱስ፡ ወእልክቱሰ፡ ሠራዊተ፡ ንህብ፡ አለ፡ ዓገትዎ፡ አመ፡ ልደቱ፡ ከልዕዎሙ፡ በዊአ፡ ለእለ፡ ሀለው፡ አፍአ፡ እምነ፡ ቤት፡ ዘተወልደ፡ ቦቱ፡ ብፁዕ፡ ላሊበላ፡ ወለእለሂ፡ ሀለው፡ ውስተ፡ ውእቱ፡ ቤት፡ ከልዕዎሙ፡ ወፂአ፡ እንዘ፡ ይቀሥፍዎሙ፡

folio : 39


back to top

| | በመሐሜሆሙ፨ በከመ፡ ይቀሥፉ፡ ሐራ፡ ንጉሥ፡ ሶበ፡ ፈቀዱ፡ ይባኡ፡ ኀበ፡ ሀለወ፡ እግዚኦሙ፡ እንዘ፡ ኢያበውሖሙ፨ ወከማሁኬ፡ ከልእዎሙ፡ ለእለ፡ ሀለው፡ በኣፍአ፡ በዊአ፡ ኀበ፡ ሀለወ፡ ብፁዕ፨ ወለእለ፡ ውሥጥኒ፡ ከልእዎሙ፡ ወፂኣ፡ ተመሲሎሙ፡ ከመ፡ ሠራዊተ፡ ንጉሥ፨ ወከመ፡ ወዓልቱ፡ ገባርያነ፡ ፈቃዱ፨ ወእልክቱኒ፡ ሰብእ፡ ርእዮሙ፡ ዘንተ፡ መንክረ፡ ይቤሉ፡ ዮም፡ ተወልደ፡ ሕፃን፡ ሮስ፡ ዘንህብ፡ ማዕፆሁ፨ ወእምአሜሃ፡ አኃዙ፡ ይትነበዩ፡ ንጉሦ፨ ወይቤሉ፡ | ሀለዎ፡ ይኩን፡ ንጉሠ፡ አመ፡ ልሕቀ፡ ዝንቱ፡ ውእቱ፡ ቀዳሜ፡ መንክራት፡ ዘኮነ፡ በላዕለ፡ ብፁዕ፡ ላሊበላ፡ ዘተቀብዓ፡ ኃይለ፡ ውስተ፡ ቈናዝዓ፡ ድማሁ፡ ከመ፡ ሶምሶን፡ ቃዴ፡ እስራኤል፡ እስመ፡ ናዝራዊሁ፡ ለእግዚአብሔር፡ ቅዱስ፡ ውእቱ፨ ጸሎቱ፡ ወስእለቱ፨ ወበረከቱ፡ ወሀብተ፡ ረድኤቱ፡ የሃሉ፡ ምስለ፡ ንግሥትነ፡ወለተ፡ ኢየሱስ ፨ ወምስለ፡ ወለታ፡ኂሩተ፡ ሥላሴ፡ ወይባርከነ፡ ለኵልነ፡ ዝየ፡ እለ፡ ሀለውነ፡ ውሉሰ፡ ቤተ፡ ክርስቲያን፡ ለዓለመ፡ ዓለም፡ አሜ፨ | | ለነዳያን፡ ልጁን፡ እንደ፡ መጸወተ፡ miniature

folio : 40


back to top

| | ወእምዝ፡ እነግረክሙ፡ ካልአኒ፡ ነከራ፡ ዘተገብረ፡ በላዕለ፡ ብፁዕ፡ ላሊበላ፡ አመ፡ ውርዛዌሁ፨ ወዝንቱሰ፡ ዘእከሥት፡ ለክሙ፡ ይእዜ፡ በቍዔት፡ ውእቱ፡ ለነፍሳቲክሙ፨ እስመ፡ ሎቱኒ፡ ኮነቶ፡ በቍዔተ፨ ወለነኒ፡ ለእመ፡ ተመሰልናሁ፡ ትከውነነ፡ በቍዔተ፨ ወአክሊለ፡ ውዳሴ፡ ትፀፍር፡ ለነ፨ ወትሬስየነ፡ ዘውገ፡ ምስሌሁ፨ ወታስተዴልወነ፡ ለበዊኣ፡ መንግሥተ፡ ሰማያት፡ ወውእቱሰ፡ ብፁዕ፡ ወቅዱስ፡ ላሊበላ፡ ዓብየ፡ እንዘ፡ የዓውዶ፡ ጸጋ፡ እግዚአብሔር፨ ወኵሉ፡ | ዘርእዮ፡ ይደነግፅ፡ ከመ፡ ዘርእየ፡ ወረከበ፡ አንበሳ፡ ሐቅል፨ እስመ፡ ግርማሁ፡ ኢኮነ፡ ከመ፡ ካልአን፡ ዘቦ፡ ኣቅም፨ አላ፡ እንታክቲ፡ ግርማ፡ እንተ፡ አኅለፈት፡ አናቅጸ፡ ስብሐቲሃ፡ አርብዓ፡ በደብረ፡ ኮሬብ፡ በቅድመ፡ ነቢይ፡ ቲዝቤጣይ፨ በከመ፡ ይቤሎ፡ ላሊሁ፡ ዘአስተርአዮ፡ ወቁም፡ ጌሠመ፡ ዝየ፡ ውስተ፡ ደብር፨ ወይኅልፍ፡ እግዚአብሔር፨ ወይመጽእ፡ ኀቤከ፡ ነፋስ፡ ጽኑዕ፡ ዘይፈትሕ፡ አድባረ፡ ወይፌትቶ፡ ለኵኵሕ፨ ወኢሀለወ፡ እግዚአብሔር፡ | | ፭ ውስተ፡ ውእቱ፡ ነፋስ፨ ወእምድኅረ፡ ዝንቱ፡ ይመጽእ፡ ኀቤከ፡ ድልቅልቅ፡ ወኢሀለወ፡ እግዚአብሔር፡ ውስተ፡ ውእቱ፡ ድልቅልቅ፨ ወይመጽእ፡ ኀቤከ፡ እሳት፡ ወኢሀለወ፡ እግዚአብሔር፡ ውስተ፡ ውእቱ፡ እሳት፨ ወእምድኅረ፡ ዝንቱ፡ ይመጽእ፡ ኀቤከ፡ ቃል፡ ቀጢን፡ ከመ፡ ዘይትፋጸይ፨ ወህየ፡ ሀለወ፡ እግዚአብሔር፨ በእላንቱኬ፡ አርባዕ፡ ረቂቃን፡ ዘፄሐ፡ ፍኖቶ፨ ወበድምፀ፡ ፋጻ፡ ዘአመረ፡ ሀልዎቶ፡ በዘከመዝ፡ ግርማ፡ ዘተርእዮ፡ ለነቢይ፨ በላዕለ፡ | ብፁዕ፡ላሊበላ፡ አርአየ፡ ሰዊጦ፡ ግርማሁ፡ አኮ፡ አፍአ፡ እምሥጋሁ፡ ከመ፡ ግርማ፡ ሙሴ፡ እንተ፡ ትፈቅድ፡ ግላ፨ ከመ፡ ኢይርአዩ፡ ገጾ፡ ሕዝብ፨ አላ፡ እንተ፡ ውሥጡ፡ ኅብእት፨ ወባሕቱ፡ ትትዓወቅ፡ ግርማሁ፡ እንዘ፡ ኢታስተርኢ፨ በከመ፡ ፋጻ፡ ኢይትረአይ፨ አላ፡ በድምፁ፡ ይትዓወቅ፡ ግርማሁ፨ እንዘ፡ ሀለወ፡ ተኃቢአት፡ ግርማ፡ ጸጋሁ፡ ለእግዚአብሔር፡ እንተ፡ ውሥጡ፡ ለብፁዕ፡ ወለቅዱስ፡ላሊበላ፡ እንዘ፡ ኢትትዓወቅ፡

folio : 41


back to top

| | ፮ ውስተ፡ ገጹ፡ በዋካሃ፨ ወከመዝ፡ ልሕቀ፡ ወበጽሐ፡ መጠነ፡ አካል፡ እንዘ፡ ይጊርም፡ ለኵሉ፡ ሰብእ፨ ወግርማሁሰ፡ አኮ፡ በተዓብዮ፡ ልብ፡ ሥጋዊት፨ ወኢበአልዕሎ፡ ቃል፡ ዲበ፡ ካልኡ፨ አላ፡ እመንፈሰ፡ ጸጋ፡ ተመሊኦ፡ ኮነ፡ ግሩመ፨ ወይእቲ፡ ዘትሬስዮ፡ መደንግፀ፨ ለእመኒ፡ ፈቀደ፡ ወለእመኒ፡ ኢፈቀደ፨ ወበእንተ፡ ዝንቱ፡ ወፅአ፡ ስሙዓተ፡ ነገሩ፨ ወደምፀ፡ ትንቢተ፡ መንግሥት፡ ወኵለሄ፡ በእንቲአሁ፡ ወበውእቱ፡ መዋዕል፡ ሀሎ፡ እኁሁ፡ ዲበ፡ መንበረ፡ መንግሥት፡ | ዘስሙ፡ ኃርባይ፨ ወሶበ፡ ሰምዓ፡ ትንቢተ፡ መንግሥት፡ በእንተ፡ላሊበላ፡ እኁሁ፨ እንዘ፡ ይመስሎ፡ ከመ፡ ይነሥኦ፡ ወየኃይዶ፡ ንግሦ፡ እንበለ፡ ፈቃደ፡ እግዚአብሔር፡ ተሀውከ፨ ወኵሎሙ፡ ፍቁራኒሁ፡ ተሀውኩ፡ ምስሌሁ፨ ወባሕቱ፡ ነሢአ፡ መንግሥትሰ፡ ኢይትከሀል፡ ዘእንበለ፡ ፈቃደ፡ እግዚአብሔር፡ ወአመሰ፡ በጽሐት፡ ፈቃደ፡ /እግዚአብሔር፡/ ኢይተርፍ፡ ዘእንበለ፡ ይኩን፨ ወእኁሁሰ፡ ነጋሢ፡ አኃዘ፡ ይኂሶ፡ በእንተ፡ ቅንዓተ፡ መንግሥቱ፨ ወኵሎሙ፡ ቤተ፡ መንግሥት፡ ሠራዊተ፡ እኁሁ፡ ጸልእዎ፡ | | እንበይነ፡ ቅንዓተ፡ መንግሥቱ፡ ለእግዚኦሙ፡ በከመ፡ ጸልዕዎ፡ እኃዊሁ፡ ለዮሴፍ፨ በእንተ፡ ዘነገሮሙ፡ ሕልሞ፡ እንዘ፡ ይብል፡ እሬኢ፡ በሌሊት፡ ከመ፡ ዘሀሎነ፡ ውስተ፡ ገራህት፡ ወነዓፅድ፨ ወመጽኡ፡ ከላስስቲክሙ፨ ወሰገዱ፡ ለከላስስተ፡ ዚአየ፨ ወአእመሩ፡ አኃዊሁ፡ ሕልመ፡ አኁሆሙ፨ ወይቤልዎ፡ አንተኑ፡ ትነግሥ፡ ላዕሌነ፡ ወት/ከ/ውነነ፡ ንጉሠ፨ ወበእንተዝ፡ ሤጥዎ፡ ውስተ፡ ብሔረ፡ ግብጽ፨ ወባሕቱ፡ ኢተኃድገ፡ ዝንቱኒ፡ ዘእንበለ፡ ይኩን፡ አመ፡ በጽሐ፡ ዕድሜሁ፨ | ወአኃዊሁኒ፡ ሰገዱ፡ ሎቱ፨ ምስለ፡ አንስቲያሆሙ፡ ወምስለ፡ ደቂቆሙ፡ ውስተ፡ ምድረ፡ ግብጽ፡ እስመ፡ በህየ፡ ነግሠ፡ ዮሴፍ፨ ወዘንተኒ፡ ኢያእመሩ፡ እለ፡ ጸልዕዎ፡ ለብፁዕ፡ ላሊበላ፡ እንዘ፡ ቦሙ፡ ጽሑፍ፡ እምትካት፨ በከመ፡ ይቤ፡ ነቢይ፡ ኢያእመሩ፡ ወኢለበው፡ ውስተ፡ ጽልመት፡ የሐውሩ፨ ሶበሰ፡ አእመሩ፡ እምኢጸረፍዎ፡ ሎቱ፡ ወእምኢተሣለቅዎ፡ አላ፡ እምይቤሉ፨ ለዘ፡ አቅነየነ፡ እግዚአብሔር፡ ንትቀነይ፡ ወለአኰነነነ፡ ንትኳነን፨ ወባሕቱ፡ ተኬነው፡ ሎቱ፡ እንዘ፡ ይመስሎሙ፡ ከመ፡

folio : 42


back to top

| | ይክሉ፡ ቀቂሎቶ፡ በሥራይ፨ ወአሐተ፡ ዕለተ፡ ሰትየ፡ ብፁዕ፡ ላሊበላ፡ ሀበ፨ ወበ፡ ዝንቱ፡ ደኪሞ፡ እንዘ፡ ሀለወ፡ እስመ፡ መድክም፡ ውእቱ፡ ወዘሰትየ፡ ወያወፅእ፡ ርስሐተ፡ ዘውስተ፡ ከርሥ፨ ወሀለወት፡ አሐቲ፡ ብእሲት፡ እኅቱ፡ ለላሊበላ፡ ዘተወልደት፡ ምስሌሁ፡ እምአሐዱ፡ አብ፨ ወይእቲሰ፡ እኪት፡ ምግባር፡ ይእቲ፡ ወለታ፡ ለኤልዛቤል፡ ወካልእታ፡ ለሄሮድያዳ፡ ወዘውጉ፡ ለቃየል፡ ቀታሌ፡ እኁሁ። ይእቲኬ፡ አምጽኣት፡ ለእኁሃ፡ ገቢራ፡ ሥራየ፡ ሕምዘ፡ ዘይቀትል፡ ቶሲሐ፡ | በምዝር፡ እንዘ፡ ትሔሊ፡ ከመ፡ ፍጡነ፡ ይሙት፡ ከመ፡ ኢይኩን፡ ንጉሠ፨ ፈነወት፡ ሎቱ፡ ውእተ፡ ሕምዘ፡ መሊዓ፡ በጽዋዕ፨ ወላሊበላ፡ ጐጕዓ፡ ከመ፡ ይስተይ፡ እንዘ፡ ይመስሎ፡ ከመ፡ ምዝር፡ ባሕቲቱ፨ እስመ፡ ጽሙዕ፡ ውእቱ፡ ወኢያእመረ፡ ከመ፡ ሕምዝ፡ ቶስሑ፡ ሎቱ፡ ወአዘዘ፡ ለአሐዱ፡ ዲያቆን፡ ዘይቀውም፡ ቅድሜሁ፡ ወልደ፡ ቤቱ፡ ውእቱ፨ ወይቤሎ፡ ስተይ፡ መቅድመ፡ እንዘ፡ ትባርክ፡ ሊተ፨ እስመ፡ ከመዝ፡ ውእቱ፡ ልማዱ፡ ለላሊበላ፡ መቅደመ፡ ያሰትዮ፡ ለዲያቆን፡ | | እምነ፡ ጽዋዕ፨ ወእምዝ፡ ይሰቲ፡ ውእቱ። ወውእቱሰ፡ ዲያቆን፡ ሶበ፡ ሰትየ፡ እምውእቱ፡ ጽዋዕ፡ ተሠውጠ፡ ውስተ፡ ኵሉ፡ አባሉ፡ እምርእሱ፡ እስከ፡ እገሪሁ፨ ወበጊዜሃ፡ ቄዓ፡ ወወድቀ፡ ወሞተ፡ ግብተ፡ እስመ፡ ፈድፋደ፡ ጸዋግ፡ ኅምዙ፨ ወቂያዓኒ፡ ዘቄዓ፡ ውእቱ፡ ሰትየ፡ ከልብ፡ ዘሀለወ፡ ህየ፨ ወውእቱኒ፡ ሞተ፡ በጊዜሃ፨ ወሶበ፡ ርእየ፡ ብፁዕ፡ላሊበላ፡ ዘንተ፡ ግብረ፡ ዕፁበ፡ ወአንከረ፡ ወይቤሎ፡ እፎ፡ ሞቱ፡ ፍጡነ፡ ውእቱ፡ ዲያቆን፡ ዘሰትየ፡ እምውእቱ፡ ጽዋዕ፡ ዘፈነወት፡ ሎቱ፡ እኅቱ፡ ወውእቱኒ፡ ከልብ፡ ዘሰትየ፡ ቂያዖ፡ | ለውእቱ፡ ዲያቆን፡ ዘንተ፡ ርእዮ፡ ብፁዕ፡ላሊበላ፡ ከመ፡ ሞቱ፡ ክልኤሆሙ፡ ግብተ፡ በጊዜ፡ ሰትይዎ፡ ለውእቱ፡ ጽዋዕ፡ ዘቦቱ፡ ሕምዘ። ወላሊበላሰ፡ ርእዮ፡ ዘንተ፡ ተሠጥመ፡ ውስተ፡ ባሕረ፡ ኃዘን። በእንተ፡ ሞቶሙ፡ ለእሉ፡ ክልኤቱ፡ ወጐድዓ፡ እንግድዓሁ፡ ወሆከ፡ ርእሶ፡ ወይቤ፡ እንዘ፡ ይበኪ፡ አሌሊተ፡ ኣኮኑ፡ በእንቲአየ፡ ዝንቱ፡ ጽዋዓ፡ ሕምዝ። ወበእንቲአየ፡ ሞቱ፡ እሉኒ፡ ክልኤቱ፡ ዲያቆንኒ፡ ወከልብኒ፡ እስመ፡ ጌጋይየ፡ በዝኃኒ፡ እስመ፡ በእንቲአየ፡ ተቀትሉ፡ እሉኒ፨ ወዘንተ፡ ኵሎ፡

folio : 43


back to top

| | ብሂሎ፡ በከየ፡ ብዙኃ፡ ወተጋብአ፡ ውስተ፡ ልቡ፡ ፍቅረ፡ እግዚአብሔር፨ ወፍቅረ፡ አኃው፡ እስመ፡ ሰምዓ፡ እምውስተ፡ መጻሕፍት። ወፈድፋደሰ፡ ዘይቤ፡ ጳውሎስ። ወዓዲ፡ እንተ፡ ትኂይስ፡ ፍኖተ፡ እሜህረክሙ፡ አልቦ፡ ዘይበቍዓክሙ፡ ምንትኒ፡ ገቢረክሙ፡ እንበለ፡ አፍቅሮ፡ ቢጽክሙ። እመኒ፡ አእመርኩ፡ ነገረ፡ መላእክት፡ ወነገረ፡ ኵሉ፡ በሐውርት፨ ወዓዲ፡ ሥጋየኒ፡ ለውዕየተ፡ እሳት፡ ከመ፡ እትመዝገን፡ አልቦ፡ ዘበቋዕኩ፨ ወእመኒ፡ ተነበይኩ፡ ወአእመርኩ፡ ኵሎ፡ ዘኅቡእ፡ | ወዘክሡት፨ ወተፋቅሮ፡ አልብየ፡ ከንቶ፡ ኮንኩ፡ ወአልቦ፡ ዘበቋዕኩ፡ እስመ፡ ተፋቅሮ፡ አልብየ፡ ከንቶ፡ ኮንኩ፡ ወአልቦ፡ ዘበቋዕኩ፡ እስመ፡ ተፋቅሮሰ፡ ፍጹም፡ ሕግ፡ ውእቱ፨ ዘንተኬ፡ ርእዮ፡ ላሊበላ፡ ወአእሚሮ፡ አፍቅሮተ፡ ሰብእ፡ ዘእግዚእነ፡ ኢየሱስ፡ ክርስቶስ፡ ከመ፡ ያፈቅሮ፡ ለሰብእ፡ ነሥአ፡ ውእተ፡ ጽዋዓ፡ ዘቀተሎሙ፡ ለዲያቆንኒ፡ ወለከልብኒ፡ ወሰትየ፡ እስመ፡ ይቤ፡ ለእሙት፡ ከማሆሙ፡ እስመ፡ በእንቲአየ፡ ሞቱ፡ እሙንቱኒ፨ ርእዩኬ፡ ኦፍቁራንየ፡ ዘከመዝ፡ | | ይዋሄ፡ ወዘከመዝ፡ ንጹሐ፡ ልብ፡ ዘኃደረት፡ ላዕለ፡ላሊበላ፡ ዘመጠወ፡ ነፍሶ፡ ለሞት፡ በእንተ፡ ሞተ፡ ካልኡ፡ ወኢመሐከ፡ ርእሶ፨ እስመ፡ ላህበ፡ ፍቅረ፡ መንፈስ፡ ቅዱስ፡ ነደት፡ ውስቴቱ፡ ወኢቈረት፡ እምውስተ፡ ልቡ፡ እስመ፡ ኢለከፈቶ፡ ማየ፡ ሙስና፨ ርእዩኬ፡ ኦፍቁራንየ፡ ወለእመሰ፡ ኮነ፡ ዝንቱ፡ ነገር፡ በላዕለ፡ ካልአን፡ እምአእኰትዎ፡ ለእግዚአብሔር፨ በእንተ፡ ዘኢሰትዩ፡ ቀዲሙ፡ ውእተ፡ ጽዋዓ፡ ሕምዝ፡ ዘቀተሎ፡ ለዲያቆን፡ በጊዜ፡ ሰትየ፡ አኮ፡ ብዙኃ፡ አላ፡ ንስቲተ፡ ሶበ፡ ጥዕመ፡ ቀተለቶ፡ | ፍጡነ፨ ወላሊበላኒ፡ ርእዮ፡ ይቤ፡ ለእሙት፡ ከማሁ፡ እስመ፡ ጽዋዓ፡ ሞት፡ ዘዚአየ፡ ቀተለቶ፡ ለካልእየ፨ እስመ፡ ኃጢአትየ፡ ሊተ፡ አኪላ፡ ተደኃፈቶ፡ ለእኁየ፨ ወዘንተ፡ ብሂሎ፡ ነሥኣ፡ ውእተ፡ ጽዋዓ፡ ሞት፡ ወሰትየ፡ በጥቡዕ፡ ልብ፡ ወበፍቅር፡ ፍጽምት፨ ኦአኃውየ፡ መኑ፡ ዘይሬኢ፡ ቀታሌ፡ ወኢይጐይይ፡ እምኔሁ፨ ወመኑ፡ ዘይሬኢ፡ ኵናተ፡ ሥሁለ፡ ውስተ፡ እደ፡ ኃያል፡ ጸላኢሁ፡ ወኢይፈቅድ፡ ያምሥጥ፡ እምኔሁ፨ ወመኑ፡ ዘይሬኢ፡ ሰይፈ፡ ስሑለ፡ ወያነብር፡ ዲበ፡ ክሣዱ፡ ወኢይፈርህ፡

folio : 44


back to top

| | እምብልሁ፨ ወመኑ፡ ዘይሬኢ፡ እሳተ፡ ውዑየ፡ ወይትዌገር፡ ውስቴቱ፡ ወኢይጌግጽ፡ እምላህቡ፤ ወመኑ፡ ዘይሬኢ፡ ጸድፈ፡ ዐቢየ፡ ወያንኰረኵር፡ እመልዕልቲሁ፡ እስከ፡ መትሕቲሁ፨ አልቦ፡ ዘይገብር፡ ዘንተ፡ ዘከመ፡ ገብረ፡ ላሊበላ፡ በእንተ፡ ፍቅረ፡ ቢጹ፨ እስመ፡ ኮነ፡ አስከሬነ፡ ለፍቅረ፡ እግዚአብሔር፡ ወለፍቅረ፡ ካልኡ፨ ወካልኣንሰ፡ ለእመ፡ ኮኑ፡ ወለእመ፡ በጽሖሙ፡ ዘከመዝ፡ ምግባር፡ ወዘከመዝ፡ ነገር፨ እምኢለከፍዎ፡ ጥቀ፡ በአፅባዕቶሙ፡ ለውእቱ፡ ጽዋዕ፡ እንዘ፡ ይሬእዩ፡ ዘይቀትል፡ | ካልኦሙ፡ ለዘቀደሞሙ፡ ሰትየ፨ ወዓዲ፡ እምአንሥኡ፡ ጸባዒተ፡ ላዕለ፡ ይእቲ፡ ብእሲት፡ ዘወሀበቶሙ፡ እምተሳነንዋ፡ ወእምተበአስዋ፡ ወእምአብጽሕዋ፡ ለሞት፨ ወይመስለኒሰ፡ ሥጋሃኒ፡ እምበልዑ፡ ወደማኒ፡ እምሰትዩ፨ ወዘንተኒ፡ ኵሎ፡ ገቢሮሙ፡ እምኢኃድዓ፡ ልቦሙ፨ እስመ፡ ፈድፋደ፡ መሪር፡ ነገሩ፨ ወላሊበላሰ፡ ኢፈርሃ፡ ሰትየ፡ ጽዋዓ፡ ሞት፡ እንዘ፡ ያዜክራ፡ ለነፍሱ፡ ሐሞተ፡ ወብሒአ፡ መጺጸ፡ ዘምስለ፡ ከርቤ፡ ቱሱሐ፡ በዲበ፡ መስቀል፡ ዘሰትየ፡ መድኃኒነ፡ በእንተ፡ ቤዛ፡ | | ብዙኃን፨ በከመ፡ ይቤ፡ ለሊሁ፡ እሜጡ፡ ነፍስየ፡ ቤዛ፡ አባግዕየ፨ አልቦ፡ ዘየዓቢ፡ እምዝ፡ ፍቅር፡ ከመ፡ ዘይሜጡ፡ ነፍሶ፡ ህየንተ፡ ቤዛ፡ አዕርክቲሁ፨ ዘንተኬ፡ ቃለ፡ ዘወፅአ፡ እምአፈ፡ በግዑ፡ ከመ፡ ይፈጽም፡ ፈተወ፡ ብፁዕ፡ ላሊበላ፡ ወፈቀደ፡ ከመ፡ ይትመሰሎ፡ ሎቱ፨ በከመ፡ ይቤ፡ ለሊሁ፡ ተመሰሉ፡ ኪያየ፡ በከመ፡ አነ፡ እትሜሰሎ፡ ለአብ፨ እግዚእነ፡ ኢየሱስ፡ ክርስቶስ፡ ሰትየ፡ ጽዋዓ፡ ሞት፡ ዘዓፀሩ፡ ሎቱ፡ በእንተ፡ ፍቅረ፡ ሰብእ፡ ዘአቅበሩ፡ ሎቱ፡ ነገደ፡ ሕዝቡ፡ ዕብራዊያን፨ ወላሊበላኒ፡ | ሰትየ፡ ጽዋዓ፡ ሞት፡ በእንተ፡ ፍቅረ፡ ካልኡ፡ ዘተዓፅረ፡ ሎቱ፡ በእደ፡ እኅቱ፡ ናሁ፡ ዓረየ፡ ረድእ፡ ምስለ፡ መምህሩ፨ ወበግዕ፡ ምስለ፡ ኖላዊሁ፨ ወገብር፡ ምስለ፡ እግዚኡ፡ እስመ፡ ይደሉ፡ ከመ፡ ይኩን፡ ገብር፡ ከመ፡ እግዚእ፡ ወረድእ፡ ከመ፡ መምህሩ፨ ወሐዋርያኒ፡ ከመ፡ ዘፈነዎ፨ ወበእንተ፡ ዝንቱ፡ ኢፈርሀ፡ ላሊበላ፡ ሞተ፡ ተወልቲዎ፡ በወልታ፡ ፍቅር፡ ሥሙር፡ ወበወልታ፡ ሃይማኖት፡ ጽኑዕ፡ ዘኢይሰቍሮ፡ ኵናተ፡ ዓላዊ፡ ወዘኢይክሎ፡ ስረተ፡ ሐፅ፡ ወውፅፈተ፡ ዕብን። ወሊተሰ፡ ይመስለኒ፡ እመሰማዕትኒ፡

folio : 45


back to top

| | ዘየዓቢ፡ ብፁዕ፡ ወቅዱስ፡ ላሊበላ፡ ዘሰትየ፡ ጽዋዓ፡ ሞት፡ በእንተ፡ ፍቅረ፡ ቢጹ፡ እንዘ፡ አልቦ፡ ዘአገበሮ። ሰማዕትሰ፡ ሰትዩ፡ ጽዋዓ፡ ኅምዝ፡ ዘይቀትል፡ ሶበ፡ አገበርዎሙ፡ ዓላውያን፡ ከመ፡ ይስተዩ፡ ኅምዝ፡ ሥራይ። ወእመ፡ አኮ፡ ከመ፡ ይክሀድዎ፡ ለአግዚኦሙ። ወከመ፡ ይኅድጉ፡ ሃይማኖቶሙ። ወበእንተ፡ ዝንቱ፡ ሰትዩ፡ ጽዋዓ፡ ሞት፡ ሰማዕት፨ እምይክሀዱ፡ ሃይማኖተ፨ እስመ፡ ይቤሎሙ፡ መድኃኒነ፡ ኢትፍርህዎሙ፡ ለእለ፡ ይቀትሉ፡ ሥጋክሙ። ወለነፍስክሙሰ፡ ኢይክሉ፡ | ቀቲሎታ፨ ወአርእየክሙ፡ ዘትፈርሁ፨ መነ፡ ዘትፈርሁ፡ ፍርህዎሰ፡ ለዘ፡ እምድኅረ፡ ቀተለ፡ ሥጋ፡ ሥልጣን፡ ሎቱ፡ ነፍሰኒ፡ ወሥጋኒ፡ ይቅትል፨ ወይደይ፡ ውስተ፡ እሳተ፡ ገሃነም፨ ዘንተኬ፡ ፈሪሆሙ፡ ሰማዕት፡ ዘአጥብዑ፡ ለሞት፡ እመኒ፡ በሰትየ፡ ሕምዝ፨ ወለእመኒ፡ በእሳት፨ ወለእመኒ፡ በመጥባሕት። እስመ፡ ዘይክህድ፡ ይትዓሠይ፡ እሳተ፨ ወላሊበላሰ፡ አኮ፡ በእንተ፡ ኢክሂደ፡ ሃይማኖት፡ ዘሰትየ፡ ጽዋዓ፡ ሞት። ወኢሂ፡ በእንተ፡ ፍጻሜ፡ ትእዛዛት። አላ፡ በእንተ፡ አፈድፍዶ፡ ኂሩት፡ | | እንዘ፡ ይትሜሰሎ፡ ለጸጋዌ፡ ትእግሥት፡ እግዚአብሔር፡ ዘፆረ፡ ኵሎ፡ ሕማማተ። ወኵሎ፡ ቅሥፈታተ። ወሪዶ፡ እምሰማያት፡ እንዘ፡ አልቦ፡ ዘአገበሮ፡ ለቢሶ፡ ትስብእተ፨ ወመዊቶ፡ ጸገወ፡ ሕይወተ፡ ለምውታን፡ እስመ፡ በፈቃዱ፡ ጥዕመ፡ ሞተ፡ በእንተ፡ እሊአሁ፡ ወበእንተ፡ ፍቁራኒሁ፡ ምእመናን፨ ወላሊበላኒ፡ አማን፡ ተመሰሎ፡ ለመድኃኒ፡ ኵሉ፡ ዓለም፡ እስመ፡ በፈቃዱ፡ ሰትየ፡ ጽዋዓ፡ ሞት፡ በእንተ፡ ፍቅረ፡ ካልኡ፡ እስመ፡ ሰምዓ፡ ቃለ፡ እንዘ፡ ይብል፡ እስመ፡ ተፋቅሮሰ፡ ፍጹም፡ ሕግ፡ | ውእቱ፨ ዘአፍቀረ፡ ቢጾ፡ ኵሎ፡ ሕገ፡ ፈጸመ፡ ገቢረ፡ ወሰምዓ፡ ካዕበ፡ ቃለ፡ እምነ፡ ብስራተ፡ መድኃኒት፨ ዘይቤ፡ አፍቅሮ፡ ለእግዚአብሔር፡ አምላክከ፨ በኵሉ፡ ልብከ፡ ወበኵሉ፡ ኃይልከ፨ ወበኵሉ፡ ነፍስከ፡ ወበኵሉ፡ ሕሊናከ፨ ወአፍቅር፡ ቢጸከ፡ ከመ፡ ነፍስከ፨ እስመ፡ በእንተ፡ እሉ፡ ትእዛዛት፡ ተሰቅሉ፡ ኦሪት፡ ወነቢታት፨ ወላሊበላ፡ ተሰቅለ፡ ቦሙ፡ እስከ፡ ይበጽሕ፡ ለሞት፡ እስመ፡ ሰትየ፡ ውእቱ፡ ጽዋዓ፡ ዘወለደት፡ ሞተ፡ ለሰብእ፡ ወለእንስሳ፨ ወሎቱሰ፡ ሶበ፡ ሰትየ፡ አኮ፡ ዘቀተለቶ፡ አላ፡

folio : 46


back to top

| | ከሠተት፡ ሎቱ፡ ምሥጢረ፡ ሰማይ፡ ወምድር፡ እስመ፡ ተመሳሊሁ፡ ውእቱ፡ ለኢየሱስ፡ ክርስቶስ፡ ጽዋዓ፡ ሞቱ፡ ለኢየሱስ፡ ክርስቶስ፡ ጽገወት፡ ሕይወተ፡ ለእለ፡ ሀለው፡ ውስተ፡ ሞት፨ ወብርሃነ፡ ለእለ፡ ውስተ፡ ጽልመት፨ ወብዕለ፡ ለእለ፡ ሀለው፡ ውስተ፡ ንዴት፨ ወንጽሐ፡ ለእለ፡ ሀለው፡ ውስተ፡ ርኵስ፡ ወአምልኮ፡ ጣዖት። ወአጽገየት፡ ሰብሐቶ፡ ውስተ፡ ኵሉ፡ አጽናፈ፡ ዓለም፡ በባሕር፡ ወበየብስ፡ በአሕቃል፡ ወበአላዳስ፡ ወአግነየት፡ ኵሎ፡ ሕዝበ፡ ለአምልኮቱ። ወኃይላተኒ፡ አስገደት፡ ሎቱ፡ | ታሕተ፡ እገሪሁ፨ ወረሰየቶሙ፡ ከመ፡ ይበሉ፡ አርኅው፡ ኆኃተ፡ መኳንንት። ወይትረኃዋ፡ ኆኃት፡ እለ፡ እምፍጥረት፡ ወይባእ፡ ንጉሠ፡ ስብሐት፨ መኑ፡ ውእቱ፡ ዝንቱ፡ ንጉሠ፡ ስብሐት፨ እግዚአብሔር፡ ኃያል፡ በውስተ፡ ፀብዕ፨ ምስለ፡ መኑኬ፡ ተፃብዓ፡ እግዚአብሔር። ወመኑ፡ ዘሞኦ፡ ወማእዜኑመ፡ ዕለተ፡ ጸብዕኒ፨ ወዘጸብዓሰ፡ እግዚአብሔር፡ ውእቱ፨ ወዘተጻብዓሰ፡ ወተሞዓ፡ ሰይጣን፡ ውእቱ፨ ወዕለተ፡ ፀብዕኒ፡ ዕለተ፡ ዓርብ፡ ይእቲ፨ ወሶበሰ፡ | | ትሰምዕ፡ እንዘ፡ ይብል፡ ውእቱ፡ ነቢይ፨ እግዚአብሔር፡ ኃያል፡ በውስተ፡ ፀብዕ፨ ኢይምሰልከ፡ ጽንዓ፡ እግዚአብሔር። ዘእምቅድመ፡ ዓለምሰ፡ አልቦ፡ ዘፀብኦ። እስመ፡ ምስለ፡ መላእክት፡ አልቦ፡ ዘይክል፡ ተቃውሞ፨ ወዛቲሰ፡ ፀብዕ፡ ዘዲበ፡ መስቀል፡ ይእቲ፨ ዘፀብዓቶ፡ ለሰይጣን፨ አመ፡ ሐመ፡ በትስብእተ፡ ሥጋሁ፡ በእንተ፡ አፍቅሮተ፡ ሰብእ፨ ወውእቱ፡ ሥጋ፡ ዘተሞአ፡ በኀበ፡ አዳም፨ ተሰምየ፡ ኃያለ፡ ወጽኑዓ፡ ከዊኖ፡ መዋኤ፡ በኀበ፡ ወልድ፡ ዋሕድ፡ | እግዚአብሔርሃ፡ ተብህለ፡ ገሃደ፡ ከዊኖ፡ ዕሩየ፡ ምስለ፡ መለኮቱ፨ ዛቲኬ፡ ጽዋዓ፡ ሞቱ፡ ለኢየሱስ፡ ክርስቶስ፡ ዘወለደት፡ ሕይወት፡ ወአጽገየት፡ ስብሐተ፡ በላዕሉ፡ ወበታሕቱ፨ ወጽዋፁኒ፡ ለብፁዕ፡ ላሊበላ፡ ዘአኃዘበቶ፡ ሞተ፨ አኮ፡ ዘቀተለቶ። አላ፡ ወለደት፡ ሎቱ፡ ሕይወተ፡ ወከሠተት፡ ሎቱ፡ ምሥጢራተ። እስመ፡ አልስሐት፡ ሕምዘ፡ ዘውስቴታ፡ ጽዋዓ፡ ሃይማኖት፡ ዘውስተ፡ ልቡ፨ ወተውኅወት፡ ስቴ፡ ሕምዝ፡ በስቴ፡ ምሥጢር፡ ዘውኅዘ፡ እምገቦሁ፡ ለርጢነ፡ ብዙኃን፡

folio : 47


back to top

| | በከመ፡ ተውኅጡ፡ አብትረ፡ ኢያኔስ፡ ወኢያንበሬስ፡ ዘኮኑ፡ አራዊተ፡ በበትሩ፡ ለሙሴ፡ ዘኮነ፡ አርዌ፡ ምድር፨ ወዘከመሰ፡ ወለደት፡ ሎቱ፡ ሕይወተ፨ ወዘከመሂ፡ ከሠተት፡ ሎቱ፡ ምሥጢራተ፡ እነግረክሙ፡ ወሶበ፡ ነሥአ፡ ውእተ፡ ጽዋዓ፡ ሕምዝ፡ ዘገብረት፡ ሎቱ፡ እኅቱ፡ ከመ፡ ትቅትሎ፨ ወሶበ፡ ሰትየ፡ ብፁዕ፡ ላሊበላ፡ አኃዘ፡ ይድክም፡ ወአኮ፡ ዘደክመ፡ ተመዊኦ፡ እምኃይለ፡ ሥራይ፨ አላ፡ ደክመ፡ ሶበ፡ ተሀውከ፡ ዕፄ፡ ዓቢይ፡ ዘነበረ፡ ቀዲሙ፡ እንዘ፡ ያሐምም፡ ከርሦ፨ ወሶበ፡ ረከበቶ፡ | ይእቲ፡ ሕምዝ፡ ለውእቱ፡ ዕፄ፡ ዓቢይ፡ ወተቀሥፈ፡ ባቲ፨ ወስዕነ፡ ተዓግሦ፡ ወወፅአ፡ አፍአ፡ እምውሣጤ፡ ከርሡ፡ ለብፁዕ፡ ላሊበላ፡ ወኊልቈ፡ አፅፋሪሁ፡ ለውእቱ፡ ዕፄ፡ መጠነ፡ ሐምሳ፨ ወሶበ፡ ወፅአ፡ ውእቱ፡ ዕፄ፡ ጥዕየ፡ ሥጋሁ፡ ወኵሉ፡ አባሉ፡ ወሶበ፡ እብለክሙ፡ ደክመ፡ ኢይምሰልክሙ፡ በእንተ፡ ውእቱ፡ ጽዋዓ፡ ሕምዝ፡ ዘሰትየ፨ እስመ፡ ኢይክሎሙ፡ ሥራይ፡ ለአግብርተ፡ እግዚአብሔር፨ በከመ፡ ይቤ፡ ለሊሁ፡ እግዚእነ፡ ወዘሂ፡ ይቀትል፡ ለእመ፡ ሰትዩ፡ አልቦ፡ ዘይነክዮሙ፡ | | ወአልቦ፡ ዘይሬስዮሙ፨ ወዘደክመሰ፡ በእንተ፡ ውእቱ፡ ዕፄ፡ ሶበ፡ ተሀውከ፡ እንዘ፡ ይወፅእ፡ ተነዲፎ፡ በሐፀ፡ ውእቱ፡ ኅምዝ፨ ወብፁዕሰ፡ ላሊበላ፡ እንዘ፡ ሀለወ፡ ጥዑዩ፡ በእንተ፡ ዘሐይወ፡ እምደዌሁ፨ ወሶቤሃ፡ ርእየ፡ እግዚአብሔር፡ ኂሩቶ፡ ብዙኃ፡ ለብፁዕ፡ ላሊበላ፡ ወአፍቅሮቶ፡ ሰብአ፡ ወተመስሎቶ፡ ኪያሁ፡ ወጻሕቆ፡ ለገቢረ፡ ፈቃዱ፡ ወለፈጽሞ፡ ትእዛዙ፨ ወዘከመሂ፡ ሰትየ፡ ጽዋዓ፡ ሕምዝ፡ ቀታሌ፡ በእንተ፡ ፍቅረ፡ ካልኡ፨ ፈነወ፡ ሎቱ፡ መልአኮ፡ ብርሃናዌ፡ እምነ፡ ኃይላቲሁ፨ ከመ፡ | የሐውጾ። ወከመ፡ ያምሥጣ፡ ለነፍሱ፡ ውስተ፡ ሰማያት፡ ከመ፡ ያርአዮ፡ ኅቡአተ፡ ምስጢር፡ ዘላዕሉ፨ ወሶቤሃ፡ ወረደ፡ ዝኩ፡ መልአክ፡ ብርሃናዊ፡ እንዘ፡ ያንበለብል፡ ከመ፡ እሳት፨ ወእንዘ፡ ይትፈሣሕ፡ ፈድፋደ፡ እስመ፡ ከማሁ፡ ልማዶሙ፡ ለመላእክተ፡ ብርሃን፡ ሶበ፡ ይፌንዎሙ፡ አምላከ፡ ጽድቅ፡ ኀበ፡ ኅሩያኒሁ፡ ወኀበ፡ ገባርያነ፡ ፈቃዱ፡ ለሐውጸቶሙ፨ አው፡ ለመግቦቶሙ፨ አው፡ ለአውጽአቶሙ፡ እምቤተ፡ ሞቅሕ፨ አው፡ ለዜንዎቶሙ፡ ነገራተ፡ ምሥጢር፨ አው፡ ለረድኤቶሙ፡

folio : 48


back to top

| | በውስተ፡ ኵሉ፡ ጻሕቀ፡ ትካዞሙ፨ ሶበ፡ ይትፌነው፡ ኀበ፡ ቅዱሳን፡ ይትፌሥሑ፡ መላእክተ፡ ብርሃን፨ ወውእቱሰ፡ መልአክ፡ በጽሐ፡ ኀበ፡ ላሊበላ፡ በይእቲ፡ ሰዓት፡ እንተ፡ ባቲ፡ ሰትየ፡ ጽዋዓ፡ ሕምዝ፨ ወመሠጣ፡ ለነፍሱ፡ ውስተ፡ ሰማይ፡ በዓቢይ፡ ፍሥሐ፨ ወእንዘ፡ ያዓርጎ፡ ውስተ፡ ዓየር፡ መሐሮ፡ ከመ፡ ይሕሊ፡ ወይበል፡ ፈኑ፡ ብርሃነከ፡ ወጽድቀከ፨ እማንቱ፡ ይምርሐኒ፡ ወይሰዳኒ፡ ደብረ፡ መቅደስከ፡ ወውስተ፡ አብያቲከ፡ ኦእግዚኦ፨ እበውእ፡ ኀበ፡ ምሥዋዒሁ፡ ለእግዚአብሔር፨ ኀበ፡ አምላኪየ፡ | ዘአስተፍሥሐ፡ ለውርዙትየ፨ እመኒ፡ ዓረጉ፡ ውስተ፡ ሰማይ፡ ህየኒ፡ አንተ፨ ወእመኒ፡ ወረድኩ፡ ውስተ፡ ቀላይ፡ ህየኒ፡ ሀሎከ፨ ወእመኒ፡ ነሣእኩ፡ ክንፈ፡ ከመ፡ ንስር፨ ወሰረርኩ፡ እስከ፡ ማኅለቅተ፡ ባሕር፨ ህየኒ፡ እዴከ፡ ትመርሐኒ፡ ወታነብረኒ፡ የማንከ፤ ወዘንተ፡ እንዘ፡ ይብል፡ ዓርገ፡ ውስተ፡ ዓየረ፡ ሰማይ፡ ቀዳሚት፡ ተፅዒኖ፡ በክናፈ፡ መልአክ፡ ብርሃናዊ፨ ወሶበ፡ በጽሐ፡ ውስተ፡ ምጽናዕ፡ ሰምዓ፡ ድምፀ፡ መፍርሀ፡ ወመርዕደ፨ ወአስተርአይዎ፡ መፍርሃነ፡ ገጽ፡ እለ፡ ይበኵሁ፡ | | ፮ ቀለምጺጸ፡ እሳት፡ ወእንዘ፡ ይጥሕሩ፡ በመዓት፡ ከመ፡ ዘይፈቅዱ፡ ይምሥጥዎ፡ ወአኃዘ፡ ይፍራህ፡ ላሊበላ፡ እምነ፡ ድምፀ፡ መዓቶሙ፡ ወእምነ፡ ፍሑል፡ ጥሕረቶሙ፨ ወእምነ፡ አርአያሆሙ፡ መደንግፅ፡ ዘይመሱ፡ አባለ፡ በከመ፡ ይትመሰው፡ ሰምዕ፡ እምቅድመ፡ ገጸ፡ እሳት፡ ዘንተ፡ ርእዮ፡ አኃዘ፡ ያንክር፡ በዓቢይ፡ ድንጋፄ፡ ወዝኩኒ፡ መልአክ፡ ዘይመርሆ፡ አርመመ፡ ወኢገሠፆሙ፡ ለእልክቱ፡ መፍርሃነ፡ ገጽ፡ እለ፡ አስተርአይዎ፡ ለላሊበላ፡ በግርማ፡ መደንግፅ፡ ወሶበ፡ ርእየ፡ላሊበላ፡ | ዘንተ፡ መዓቶሙ፡ ወለበወ፡ ኵሎ፡ ፍርሃተ፡ ዘይከውን፡ እምኔሆሙ፨ ወሶቤሃ፡ ይቤሎ፡ ዝኩ፡ መልአክ፡ ለላሊበላ፡ ርኢከኑ፡ ኦብእሲ፡ እሎንተ፡ መናፍስተ። ወዘከመ፡ እፎ፡ መፍርሃን፡ ወይፈቅዱ፡ ይምሥጡከ፡ በመዓት። ወይቤሎ፡ ላሊበላ፡ እወ፡ ናሁ፡ እሬኢ፡ ኦእግዚእየ። ወይቤሎ፡ ዝኩ፡ መልአክ፡ አእመርከኑ፡ እምቅድመዝ፡ ኦብእሲ፡ ዘከመ፡ ሀሎ፡ ዝየ፡ ዘከመዝ፡ ፍርሃት፨ ወይቤሎ፡ ላሊበላ፡ ለመልአክ፡ ሰሚዓሰ፡ ሰማዕኩ፡ ኦእግዚእየ፡ በውስተ፡ መጻሕፍቲሆሙ፡ ለእለ፡

folio : 49


back to top

| | ፯ ሀለው፡ ዝየ፡ እንዘ፡ ይብሉ፡ ሀሎ፡ ዓቢይ፡ ድንጋፄ፡ በውስተ፡ ምጽናዕ፡ እስመ፡ እለ፡ ይነብሩ፡ ህየ፡ መፍርሃን፡ ወመደንግፃን፡ ወሶበ፡ ትወፅእ፡ ነፍሰ፡ ኃጥእ፡ እምሥጋሃ፡ ይዘረው፡ ላቲ፡ ከመ፡ ያደንፅዋ፡ ወያፍርህዋ፨ ወይእዜሰ፡ ናሁ፡ ርኢኩ፡ በአዕይንትየ፨ ወናሁ፡ አኃዘኒ፡ ፍርሃት፡ ወረዓድ፡ ኦእግዚአብሔር፡ ወይቤሎ፡ ዝኩ፡ መልአክ፡ በል፡ ለሊከ፨ ይትነሣእ፡ እግዚአሔር፡ ወይዘረው፡ ፀሩ፨ ወይቤ፡ ብፁዕ፡ ላሊበላ፡ በከመ፡ መሓሮ፡ መልአክ፡ ወሶቤሃ፡ በረቀ፡ | ወአንበስበሰ፡መንፈስ፡ ቅዱስ፡ በላዕለ፡ ቅዱስ፡ ወብፁዕ፡ ላሊበላ፡ ወተዘርው፡ እልክቱ፡ መዓትማን፡ መፍርሃን፡ ወመደንግፃን፨ ወሶቤሃ፡ ሰሰሉ፡ ወነፍፁ፡ እለ፡ አስተርአይዎ፡ በግርማ፡ ዓቢይ፨ ወይቤሎ፡ በውእቱ፡ ጊዜ፡ ብፁዕ፡ ላሊበላ፡ ለውእቱ፡ መልአክ፨ ኦእግዚእየ፡ ለምንትኑ፡ ዘኢመሐርከኒ፡ እምቅድመ፡ ያስተርእዩኒ፡ እልክቱ፡ መደንግፃን፡ ወይቤሎ፡ ውእቱ፡ መልአክ፡ ብርሃናዊ፡ ኢይምሰልከኬ፡ ኦብእሲ፡ ክቡር፡ በከ፡ ዘኃደጉ፡ ያስተርእዩከ፡ እልክቱ፡ | | መናፍስት፡ መፍርሃን፡ ወመደንግፃን፡ አላ፡ በእንተ፡ በቊዔተ፡ ነፍስከ፡ ኃደጉ፡ ያስተርእዩከ፨ እስመ፡ ሀለወከ፡ ትግባእ፡ ውስተ፡ ሥጋከ፨ ወአመ፡ ሀሎከ፡ ውስተ፡ ዓለም፡ ይከውነከ፡ ዝክረ፡ ዝንቱ፡ ዘርኢከ፡ ወበተዜከሮ፡ ለዝንቱ፡ ድንጋፄ፨ ወታፈደፍድ፡ ጽድቀ፡ ወገቢረ፡ ሠናይ፡ በኵሉ፡ መዋዕለ፡ ሕይወትከ፡ ዘወሀበከ፡ እግዚአብሔር፡ ትሕየው፡ በውስተ፡ ዓለም፨ እስመ፡ ብዙኃነ፡ አስሐተ፡ ዝንቱ፡ ዓለምክሙ፡ እንዘ፡ ያስተዔውሮሙ፡ ከመ፡ ኢይግበሩ፡ ዘሰምዑ፡ | በውስተ፡ መጻሕፍት፡ ወከመ፡ ኢይፍርሁ፡ ዘንተ፡ ድንጋፄ፡ ዘአንተ፡ ትሬኢ፡ ወዘትረክብ፡ ነፍስከ፡ አመ፡ ፀአታ፡ እምሥጋሃ፨ ወዘየዓቢ፡ እምዝንቱ፡ ሲኦል፡ ወገሃነም፡ አመ፡ ትንሣኤ፡ ምውታን፡ አመ፡ ተኃብር፡ ነፍስ፡ ምስለ፡ ሥጋሃ፨ ዘንተኬ፡ ከመ፡ ኢይፍርሁ፡ ይወዲ፡ ግላ፡ ውስተ፡ ልቦሙ፨ ወመጻሕፍትሰ፡ አልቦ፡ ዘኢዜነው፡ ውስተ፡ ዓለም፡ ኢሠናየ፡ ወኢእኩየ፡ በመጠነ፡ ይትከሃል፡ ለሰሚዕ፨ ወአንተሂ፡ ዑቅ፡ ወለቡ፡ ዘንተ፡ ድንጋፄ፡ ወኢይዕትት፡ ዝክሩ፡ እምውስተ፡

folio : 50


back to top

| | ልብከ፡ እስከ፡ ትፌጽም፡ ዕድሜ፡ መዋዕሊከ፡ ዘተሐዩ፡ ውስተ፡ ምድር፡ ወእልክቱሰ፡ መላእክተ፡ ድንጋፄ፡ እለ፡ አስተርአዩከ፡ ኢያደልው፡ ኢለባዕል፡ ወኢለነዳይ፡ ወኢለንጉሥ፡ ወኢለመኰንን፨ ወመንፈስ፡ ቅዱስሂ፡ ዘላዕሌከ፡ ከበተ፡ ርእሶ፨ ወእልክቱሂ፡ እለ፡ አስተርአዩከ፡ ምስለ፡ ድንጋፄ፡ እስከ፡ ትሬኢ፡ ወትሌቡ፡ ፍርሃተ፡ ዓቢየ፨ ወሶበ፡ አእመርከ፡ ወጠየቀ፡ ፍርሃተ፡ ወድንጋፄ፡ ዘይከውን፡ እምኔሆሙ፡ በረቀ፡ ወአንፈጾሙ፨ ዑቅኬ፡ ወኢታተክዞ፡ ለመንፈስ፡ ቅዱስ፡ ዘየኃድር፡ ውስቴትከ፨ | እስመ፡ ቤቱ፡ አንተ፡ ለውእቱ፡ ብርሃን፡ ዘውእቱ፡ መንፈስ፡ ቅዱስ፡ ዘየኃድር፡ ውስቴትከ፡ አንተ፡ ውእቱ፡ ብርሃን፡ ኢይትረከብኬ፡ ውስተ፡ ቤቱ፡ ምንተኒ፡ እምዕዳዋት፡ ዘእንበለ፡ ዕንቈ፡ ባሕርይ፡ ወወርቅ፡ ፍቱን፡ ወብሩር፡ ጽሩይ፡ ለእሙንቱ፡ ምግባራተ፡ ሠናይ፨ ወዘንተ፡ ብሂሎ፡ ዝኩ፡ መልአክ፡ አዕረጎ፡ ውስተ፡ ሰማይ፡ ከመ፡ ያርእዮ፡ ኅቡአተ፡ ምሥጢር፡ ዘውስተ፡ ሰማይ፨ ወሶበ፡ ቀርበ፡ ውስተ፡ ሰማይ፡ ቀዳሚት፡ ተኃዘበ፡ እንዘ፡ ይመስሎ፡ ከመ፡ ትመጽኦ፡ ፍርሃት፡ ወረዓድ፡ | | ወድንጋፄ፡ በከመ፡ ቀዳሚ፡ በውስተ፡ ምጽናዕ። ወአእመሮ፡ ዝኩ፡ መልኣክ፡ ዘይመርሆ፡ ለብፁዕ፡ ላሊበላ፡ ወይቤሎ፡ ምንተኑ፡ ትትሔዘብ፡ ወምንተኑ፡ ያሔልየከ፡ ልብከ፨ ኦብእሲ፡ ዘጸውዓቶ፡ ጸጋ፡ እግዚአብሔር፡ ከመ፡ ይርአይ፡ ኅቡአተ፡ ሰማይ፨ ወይቤሎ፡ ብፁዕ፡ ላሊበላ፡ ለውእቱ፡ መልአክ፡ ኦእግዚእየ፡ እትሔዘብ፡ ፍርሃተ፡ ዘከመ፡ ቀዳሚ፡ እስመ፡ ራእያተ፡ ዘውስተ፡ ሰማይ፡ ገረመኒ፡ ፈድፋደ፡ ወይመስለኒ፡ ይእዜ፡ ዘይመጽአኒ፡ ከማሁ፡ ወአውሥኦ፡ ዝኩ፡ | መልአከ፡ ጽድቅ፡ ብርሃናዊ፡ በዓቢይ፡ ፍሥሐ፡ ወይቤሎ፡ ለብፁዕ፡ ላሊበላ፡ ኢትፍራህ፡ ኦብእሲ፡ ቅዱስ፡ ወብፁዕ፡ ዘረከብከ፡ ብፁዓተ፡ በኀበ፡ ኵሎሙ፡ ሰማያውያን፨ ወትትበፃዕ፡ ዓዲ፡ ወትትዌደስ፡ በኀበ፡ ምድራውያንሂ፨ አመ፡ ይትከሠት፡ ካዕበ፡ መድፍን፡ ኅእ፡ ዘሀለወ፡ ወትከሥት፡ በእደዊከ፡ ዘያስተርኢ፡ ወኢርእዮ፡ ወኢመኑሂ፡ እስከ፡ ይእዜ፨ ወበእንተ፡ ፍርሀትሰ፡ ኢትሐሊ፡ ወኢይምሰልከ፡ ዘትሬኢ፡ በውስተ፡ ሰማይ፡ መፍርሃነ፡ ወመደንግፃነ፡ ወደንፃውያነ፡ ወሕሱማነ፡ ራእይ፡

folio : 51


back to top

| | ወምሉዓነ፡ እከይ፡ እስመ፡ አኮ፡ ዘየዓርጉ፡ እልክቱ፡ መፍርሃን፡ ውስተ፡ ሰማይ። እስመ፡ ህየ፡ ቤቶሙ፡ ንብረቶሙ፡ ውስተ፡ ምጽናዕ፨ አላ፡ እምይእዜሰ፡ ትሬኢ፡ መላእክተ፡ መንፈሳውያነ፡ ወብርሃናዊያነ፡ ትጉሃን፡ እለ፡ ኢይነውሙ፡ እንዘ፡ ይስእሉ፡ ምሕረተ፡ ለዘመደ፡ ዚአከ፡ እሉ፡ እሙንቱ፡ እጓለ፡ እመሕያው፨ ወይትፌሥሑ፡ በእንተ፡ አሐዱ፡ ኃጥእ፡ ዘይኔስሕ፡ እም፺ ወ፱፡ ነገደ፡ ጻድቃን፡ እለ፡ ኢይፈቅድዎ፡ ለንስሐ፨ ወፈድፋደሰ፡ ይትፌሥሑ፡ በእለ፡ ከማከ፡ ይእዜ፡ ወትሬኢ፡ | ፍሥሐሆሙ፨ ወሶበ፡ ይቤሎ፡ ዘንተ፡ ተፈሥሐ፡ ብፁዕ፡ ላሊበላ፡ ወተመልዓ፡ እምኃይለ፡ መንፈስ፡ ቅዱስ፡ ወእምጽንዓ፡ ሃይማኖት፡ እስመ፡ አስተፍሥሖ፡ ቃለ፡ መልአክ፨ ወይቤ፡ ብፁዕ፡ ወቅዱስ፡ ላሊበላ፡ ለይኩን፡ እግዚኦ፡ በከመ፡ ትቤ፡ ወእምዝ፡ በጽሑ፡ ውስተ፡ ሰማይ፡ ቀዳማይ፨ ወሰምዓ፡ ብፁዕ፡ ላሊበላ፡ ድምፀ፡ ዓቢየ፡ ከመ፡ ነጐድጓድ፨ ወደምፁሰ፡ አኮ፡ ዘያፈርህ፨ አላ፡ ዘያስተፌሥሕ፡ ወሰክረ፡ ላሊበላ፡ እምሰሚዓ፡ ዝንቱ፡ ድምፀ፡ ፍሥሐ፨ ወይቤሎ፡ ለውእቱ፡ መልአክ፡ | | ምንትኑ፡ ውእቱ፡ ዝንቱ፡ ድምፅ፡ ዘሰማዕኩ፡ እንዘ፡ ይደምፅ፡ ከመ፡ ነጐድጓድ፨ ወድምፁሰ፡ ያስተፌሥሕ፡ ልበ፡ ወሰክረኒ፡ ልብየ፡ እምሰሚዓ፡ ፍሥሐሁ፨ ወይቤሎ፡ ውእቱ፡ መልአክ፡ ድምፀ፡ ስብሐቲሆሙ፡ ውእቱ፡ ለእሙንቱ፡ መላእክት፡ ዘነገረ፡ ኮከብ፡ ቀዳሚ፨ እስመ፡ ፍሡሐን፡ እሙንቱ፨ ወበእንተ፡ ዝንቱ፡ ያስተፌሥሕ፡ ስብሐቶሙ፨ ሰሚዓከ፡ ድምፆሙ፡ ዘተፈሣሕከ፨ እፎኬ፡ ትትፌሣሕ፡ ሶበ፡ ትሬእዮሙ፡ ወእንዘ፡ ዘንተ፡ ይቤሎ፡ አስተርአይዎ፡ ግብተ፡ ዑጹፋነ፡ | ብርሃን፡ ወምሉዓነ፡ ቅዳሴ፡ ወገልበቦ፡ ብርሃኖሙ፡ ወዖዶ፡ ከመ፡ እንተ፡ ደመና፨ ወይቤልዎ፡ በፍሥሐ፡ በሐከ፡ ኢሳይያስ፡ ካልእ፡ ዘነጸረ፡ ምሥጢራተ፡ ሰማይ፡ ወክብረ፡ ስብሐቶሙ፡ ለሕያዋን፡ እለ፡ ኢይነውሙ፨ ወዘንተ፡ ሰሚዖ፡ ብፁዕ፡ ላሊበላ፡ ተፈሥሐ፡ ወአንፈርዓፀት፡ ልቡ፡ ወበርሃት፡ ገጹ፡ እምፀሐይ፨ እስመ፡ ከደነቶ፡ ፀዳለ፡ ስኖሙ፡ ለብርሃናዊያን፨ ወይቤሎሙ፡ ላሊበላ፡ እንዘ፡ ይትፌሣሕ፡ ሰላምክሙ፡ ያዕርፍ፡ ላዕሌየ፡ ኦአጋእዝትየ፡ እስመ፡ ፈድፋደ፡ ሐወዘኒ፡ ቃልክሙ፨ ወይደልወኒኬ፡

folio : 52


back to top

| | አሀሉ፡ ምስሌክሙ፡ ወይኩን፡ ክፍልየ፡ ወማኅደርየ፡ ኀቤክሙ፡ በትንባሌ፡ ዚአክሙ፡ ወበስእለትክሙ፨ ወአኮ፡ በምግባርየ፡ ዘእብል፡ ከመ፡ ይኩን፡ ማኅደርየ፡ ምስሌክሙ፨ አላ፡ በኃይለ፡ ጸሎትክሙ፡ ወበትጋሀ፡ ቅዳሴክሙ፡ እንዘ፡ እትአመን፡ ወእጼወን፨ ወበምግባሩሰ፡ ለሰብእ፡ ኢይትከሀሎ፡ ከመ፡ ይንበር፡ ምስሌክሙ፡ ምንተኒ፡ አፈድፍዶ፡ ኂሩት፡ ለእመ፡ አጥረየ፡ ይመስለኒ፡ ዘኢይደልዎ፡ ከመ፡ ይርከብ፡ ስብሐተ፡ ወክብረ፡ ዘላዕሌክሙ፡ ወተሠጥውዎ፡ እልክቱ፡ ብርሃናውያን፡ | ለብፁዕ፡ ወለቅዱስ፡ ብእሴ፡ እግዚአብሔር፡ ላሊበላ፡ ወይቤልዎ፡ በእንተ፡ ማኅደርሰ፡ ዘትቤ፡ ወበእንተ፡ ክብር፡ ወስብሐት፡ ዘለከ፡ የዓቢ፨ ወንሕነሰ፡ ኢንክል፡ በጺሐ፡ ኀበ፡ ዘተኃድር፡ አንተ፡ ወኢንክል፡ ረኪበ፡ ስብሐት፡ ዘሀለወከ፡ ትርከብ፡ ወብርሃንከኒ፡ የዓቢ፡ እምብርሃንነ፨ ኅድግሰ፡ እምኔነ፡ እምእለ፡ ይትሌዓሉነሂ፡ ሀለወከ፡ ትዕበይ፡ በክብር፡ ወበስብሐት፨ በቅድመ፡ እግዚአብሔር፡ ወበቅድመ፡ በግዑ፡ ወበቅድመ፡ መንፈሱ፡ ቅዱስ፨ ወክብሮሙሰ፡ ወስብሐቶሙ፡ ለእለ፡ ይትሌዓሉ፡ | | እምኔነ፡ ትሬኢ፡ ሶበ፡ ተዓዱ፡ ወተዓርግ፡ እምኀቤነ፡ ውስተ፡ ሰማይ፡ ካልእ፨ ወበህየ፡ ትሰምዕ፡ ዘየዓቢ፡ እምዘ፡ ሰማዕከ፡ ወበዝየ፡ ወትትፌሣሕ፡ እምፍሥሐ፡ ዘተፈሣሕከ፡ በዝየ። ወይቤልዎ፡ ብፅዓን፡ ለከ፡ ኦብእሲ፡ ክቡር፡ ዘኮንከ፡ ቢጸ፡ ምስለ፡ እሳታውያን፨ ወተደመ፡ ብፁዕ፡ ወቅዱስ፡ ላሊበላ፡ ሶበ፡ ይብልዎ፡ የዓቢ፡ ማኅደርከ፡ እምነ፡ ማኅደርነ፡ ወክብርከ፡ እምክብርነ፡ ወስብሐቲከ፡ እምስብሐቲነ፨ ወከሠተ፡ አፉሁ፡ ብፁዕ፡ ወቅዱስ፡ ላሊበላ፡ ብፁዕ፡ ዘኃረይኮ፡ ወዘተወከፍኮ፨ | ወዘአኅደርኮ፡ ውስተ፡ ኣዕፃዲከ፡ ሀብ፡ ሣህለከ፡ ዘኢይትበተክ፨ ሰብእሰ፡ እምኢክህለ፡ ከመ፡ ይርከብ፡ ዘከመዝ፡ ስብሐተ፡ በምግባረ፡ ጽድቁ፡ ለእመ፡ ኢኮነ፡ በምሕረትከ፨ ወዘንተ፡ እንዘ፡ ይብል፡ ብፁዕ፡ ላሊበላ፡ ይቤሉ፡ ኵሎሙ፡ ብርሃናውያን፡ ኃይላት፡ እለ፡ ውስተ፡ ሰማይ፡ ቀዳማዊ፨ እንዘ፡ ያወሥእዎ፡ ለብፁዕ፡ ላሊበላ፡ በቃለ፡ ፍሥሐ። በከመ፡ ሰማዕከ፡ እምኀቤነ፨ ከማሁ፡ ውእቱ፡ ክብርከ፡ ወልዕልናከ፡ ወማኅደርከ፡ የዓቢ፡ እምኔነ፡ ወእምእለ፡ ይትሌዓሉነ፨ ወእምዝ፡ ቀነጸ፡ መልአከ፡ ጽድቅ፡ ብርሃናዊ፡

folio : 53


back to top

| | ወሰረረ፡ ውስተ፡ ሰማይ፡ ዳግማይ፡ እንዘ፡ ይፀውሮ፡ ለብፁዕ፡ ላሊበላ፡ ወይቤሎ፡ ተፈሣሕ፡ ኦብእሴ፡ እግዚአብሔር፡ በዓፀደ፡ ትጉሃን፡ መላእክት፡ ወርኢ፡ ዘንተ፡ ዓየረ፡ ብርሃን፡ እስመ፡ ደለወከ፡ ጸጋ፡ ዓቢይ፡ ከመ፡ ትርአይ፡ ዘንተ፡ ራእየ፨ ወዘንተ፡ እንዘ፡ ይብሎ፡ ሰምዓ፡ ድምፀ፡ ዓቢየ፡ ከመ፡ ቃለ፡ ማይ፡ ብዙኅ፡ ወሐዋዝ፡ ጣዕሙ፡ ወግርማ፡ ራዕሙሂ፡ የዓቢ፡ እምዘ፡ ሰምዓ፡ ውስተ፡ ቀዳሚ፡ ሰማይ፨ ወይቤሎ፡ ብፁዕ፡ ወቅዱስ፡ ላሊበላ፡ ለመልአክ፡ ዘሀሎ፡ ምስሌሁ፡ እፎ፡ ይፈድድ፡ | ዝንቱ፡ ድምፅ፡ ግሩም፡ ወይጌርም፡ እምዘ፡ ሰማዕኩ፡ ቀዳሚ፨ ወተሠጥዎ፡ ውእቱ፡ መልአክ፡ ወይቤሎ፡ ኢይቤለከኑ፡ እልክቱ፡ ቀዳማውያን፡ እሙንቱ፨ ሀለወከ፡ ዳግመ፡ ትስማዕ፡ ዘኢሰማዕከ፡ በዝየ፡ ድምፀ፡ ስብሐተ፡ ዚአነ፨ ወይቤሎ፡ ብፁዕ፡ ላሊበላ፡ ነዋ፡ ሰማዕኩ፡ በከመ፡ ትቢለኒ፡ ያስተርእዩኒኑ፡ በከመ፡ አስተርአዩኒ፡ ቀዳማውያን፨ ወድምፀ፡ ስብሐቶሙሰ፡ ሰማዕኩ፡ ወመጠነ፡ እክል፡ ሰሚዓ፡ ወመጠነ፡ አግመረ፡ ምስማዕየ፨ ወይቤሎ፡ ውእቱ፡ | | መልአክ፡ ብርሃናዊ፡ ኢትትኃደግ፡ ዘእንበለ፡ ትርአዮሙ፨ እስመ፡ በእንተ፡ ዝንቱ፡ ተፈኖኩ፡ ከመ፡ አዕርገ፡ ወከመ፡ ትትፌሣሕ፡ አንተኒ፡ በነጽሮቶሙ፡ ለብርሃናውያን፡ ወበርእየተ፡ ኅቡአቶሙ፡ ሰማያዊት፨ ወይቤሎ፡ ብፁዕ፡ ላሊበላ፡ እፎኬ፡ የዓቢ፡ ብርሃኖሙ፡ እብርሃነ፡ ሰማይ፨ ወክብረ፡ መላእክትኒ፡ የዓቢ፡ ካዕበተ፡ እምክብረ፡ መላእክት፡ ወስብሐቲሆሙ፨ ወይቤሎ፡ ዝኩ፡ መልአክ፡ ለብፁዕ፡ ላሊበላ፡ እስመ፡ ከማሁ፡ ሥርዓተ፡ መዓርጊሆሙ፡ በከመ፡ ሠርዖሙ፡ ፈጣሪሆሙ። | ወባሕቱ፡ ለቡ፡ ከመ፡ ትርአዮሙ፡ ለእሉ፡ መንፈሳውያን፡ ወናሁ፡ ኮነ፡ ጊዜሁ፡ ከመ፡ ያስተርእዩከ፨ ወእንዘ፡ ይብል፡ ከመዝ፡ አንበስበሰ፡ ብርሃኖሙ፡ ለእሉ፡ እሳታውያን፨ ወተሐውሰ፡ ብርሃን፡ ምስለ፡ ብርሃን፡ እስመ፡ ሰማይኒ፡ ዘብርሃን፨ ወመላእክትኒ፡ እለ፡ ሀለው፡ ህየ፡ ዑጹፋነ፡ ብርሃን፡ ዘኢይትነገር፡ ወዘኢይትሔለይ፡ ወበረቁ፡ በቅድሜሁ፡ እልክቱ፡ እሳታውያን፡ ወጸርሑ፡ እንዘ፡ ይብሉ፡ በቃለ፡ ትፍሥሕት፡ ሐዌሳ፡ ሐዌሳ፡ ለዘበጽሐ፡ ኀቤነ፡ እምነ፡ ቈላት፡ ዝእንግዳ፡ ዘተለዓለ፡

folio : 54


back to top

| | እምነ፡ ሥጋውያን፡ ወኮነ፡ ቢጸ፡ ለእለ፡ አልቦሙ፡ ሥጋ፨ ወብፁዕሰ፡ ላሊበላ፡ አንከረ፡ በተደመ፡ ዓቢየ፡ አንክሮ፡ ርእዮ፡ ክብረ፡ ስብሐቶሙ፡ ወግርማሆሙ፡ ወስነ፡ ዑጻፌሆሙ፡ ዘያንበለብል፡ አማዕበለ፡ ነበስባሰ፡ ብርሃኑ፡ ወአልባሲሆሙኒ፡ በረቀ፡ በቅድሜሁ፨ ወይቤልዎ፡ እልእክቱ፡ ብርሃናውያን፡ ለብፁዕ፡ ላሊበላ፡ ሶበ፡ ርእይዎ፡ እንዘ፡ ያነክር፡ በተደሞ፡ ዓቢይ፡ ምንተኑ፡ ታነክር፡ ኦብእሲ፨ ኢሳይያስ፡ ሐዲስ፡ ዘነጸረ፡ ቀዳሚ፡ አርአያ፡ ስብሐቲሁ፡ ለእግዚአብሔር፡ እንዘ፡ ይነብር፡ ዲበ፡ መንበሩ፡ | ዓቢይ፡ ወልዑል፡ ነዋኅ፡ ወምጡቅ፡ ወምሉዕ፡ ቤተ፡ ስብሐቲሁ፡ ወሱራፌል፡ ይቀውሙ፡ ዓውዶ፨ ወለለ ፩ እምኔሆሙ፡ በበ ፮ ክነፊሆሙ፡ ይጸርሑ፡ እንዘ፡ ይብሉ፡ ቅዱስ፡ ቅዱስ፡ ቅዱስ፡ እግዚአብሔር፡ ፀባዖት፡ ፍጹም፡ ምሉዕ፡ ሰማያተ፡ ወምድረ፡ ቅድሳተ፡ ስብሐቲከ፨ ወተለዓለ፡ ምርፋቀ፡ ኆኅት፡ እምቃል፡ ዘይኬልሑ፨ ዘንተ፡ ርእዮ፡ ኢሳይያስ፡ አንከረ፨ ወአንተኒ፡ ኪኪያነኑ፡ ታነክር፡ ርእየከ፡ ክብረነ፡ ወስብሐቲነ፡ ዘሀሎ፡ ዲቤነ፡ ወብርሃነ፡ ዘውስቴትነ፨ በእንቲአነሰ፡ ኢታንክር፨ አላ፡ | | መፍትው፡ ለነ፡ ንወድስ፡ ክብረከ፡ ወአንተኒ፡ ድልወት፡ ለከ፡ ታንክር፡ ርእሰከ፡ ወትሰብሖ፡ ለዘአክበረከ፡ ዓቢየ፡ ክብረ፡ እስመ፡ ፈድፋደ፡ አክበረከ፡ ወክብር፡ ተውህበ፡ ለከ፡ ዘየዓቢ፡ እምክብረ፡ ካልአኒከ፨ ወብፁዕሰ፡ ላሊበላ፡ እስከ፡ ይእዜ፡ ኢተናበቦሙ፡ ወኢያውሥኦሙ፡ ወኢምተኒ፡ አሐተ፡ ቃለ፨ እስመ፡ ሀለወ፡ በዓቢይ፡ አርምሞ፡ ወበዓቢይ፡ ተደሞ፡ በእንተ፡ ዘርእየ፡ አርአያ፡ ስብሐቶሙ፡ ለእሙንቱ፡ እሳታውያን፨ ወካዕበ፡ አውሥእዎ፡ እልክቱ፡ ትጉሃን፡ ዘካልእ፡ ሰማይ፨ ወይቤልዎ፡ | ተሠጥመኑ፡ ልብከ፡ ውስተ፡ ፍሥሐ። ወለምንት፡ ዘኢታውሥኣነ፡ እንዘ፡ መጠነዝ፡ ንትናገረከ፨ ወንሕነሰ፡ ንትፌሣሕ፡ በእንቲሰከ፨ ከመ፡ ዘረከበ፡ ምህርካ፡ ብዙኃ፨ ለምንተ፡ ዘኢትትናበብ፡ ምስሌነ፡ እንዘ፡ መጠነዝ፡ ፍሥሐ፡ ንትናገረከ፨ ወብፁዕሰ፡ ወቅዱስ፡ ላሊበላ፡ እንዘ፡ ሀሎ፡ ውስተ፡ ፍሥሐ፡ ዓቢይ፡ አስተጋቢአ፡ ሕሊናሁ፡ እንዘ፡ ያነክር፡ ዕበዮሙ፡ ለእሙንቱ፡ መላእክት፡ እለ፡ ተስአልዎ፨ እስመ፡ ራእዮሙ፡ ያደምም፡ ወያስተዓፅብ፡ ግርማሆሙ። ወሶበ፡ ይቤልዎ፡ ለምንት፡

folio : 55


back to top

| | ዘኢታወሥኣነ፡ ተሠጥመኑ፡ ልብከ፡ ውስተ፡ ፍሥሐ፡ ወሶቤሃ፡ አኃዘ፡ ይበሎሙ፡ ብፁዕ፡ ላሊበላ፡ ሊተሰ፡ አኮ፡ ድልወት፡ ሊተ፡ ከመ፡ እትናገር፡ ምስሌክሙ፨ እስመ፡ አንሰ፡ እምመሬታውያን፡ አነ፨ ወበእንተ፡ ዝንቱ፡ አነክር፡ ኪያክሙ፡ እምአመ፡ ተወለድኩ፡ እስከ፡ ይእዜ፡ ኢርኢኩክሙ፨ ወባሕቱ፡ አነክር፡ ዮም፡ አመ፡ ነጸርኩክሙ፡ አነክር፡ ዕበየክሙ፡ በከመ፡ ዜነውኒ፡ እለ፡ ሀለው፡ እምታሕቴክሙ፡ መላእክት፡ እለ፡ ውስተ፡ ቀዳሚ፡ ሰማይ፨ ወአውሥእዎ፡ እልክቱ፡ መላእክት፡ ወይቤልዎ፡ | ወንሕነኒ፡ ንዜንወከ፡ ወንሰብክ፡ ለከ፡ በእንተ፡ ክብርከ፨ ወበእንተ፡ ካልኣኒነ፡ እለ፡ ሀለው፡ መልዕልቴነ፨ እስመ፡ ውእቶሙሂ፡ የዓቢዩ፡ እምኔነ፨ ወስብሐቲሆሙኒ፡ እምስብሐቲነ፨ ወክብሮሙኒ፡ እምክብርነ፨ ወብርሃኖሙኒ፡ እምብርሃንነ፨ ወለከሰ፡ ክብርከኒ፡ እምክብርነ፨ ወስብሐቲከኒ፡ እምስብሐቲነ፨ ወብርሃንከኒ፡ እምብርሃንነ፡ የዓቢ፨ ወብፁዕሰ፡ ወቅዱስ፡ ላሊበላ፡ ያስተዓፅብ፡ ፈድፋደ፡ ወይብል፡ መኑኬ፡ ዘይክል፡ ረኪበ፡ ዘከመዝ፡ ዕበየ፡ ወባሕቱ፡ ብፁዓን፡ ለእለ፡ | | ተኃድገ፡ ሎሙ፡ ኃጢአቶሙ፨ ወለእለ፡ ኢሐሰበ፡ ሎሙ፡ ኵሎ፡ ጌጋዮሙ፨ ብፁዕ፡ ብእሲ፡ ዘኢኈለቈ፡ ሎቱ፡ እግዚአብሔር፡ ኃጢአቶ፨ ወዘአልቦ፡ ጽልሑት፡ ውስተ፡ ልቡ፨ ይእዜ፡ አእመርኩ፡ ዘይቤ፡ ገባሬ፡ መላእክት፡ አበ፡ ኵሉ፨ ሠርጐ፡ ዓለም፡ እግዚእነ፡ ኢየሱስ፡ ክርስቶስ፡ እስመ፡ አኮ፡ በመስፈርት፡ ዘይሁብ፡ እግዚአብሔር፡ መንፈሰ፡ ዘእንበለ፡ መስፈርት፡ ይነሥኡ፡ ክብረ፨ አማን፡ ውእቱ፡ ዘይቤ፡ ጳውሎስ፡ እንዘ፡ ይነግር፡ ኂሩቶ፡ ለአብ፨ ወልዶ፡ ጥቀ፡ ኢምህከ፡ እምኔነ፨ ምንትኑ፡ | እንከ፡ ዘኢመጠወነ፨ ለእመ፡ ወልዶ፡ መጠወ፡ ለሞት፡ በእንተ፡ ቤዛ፡ ኵልነ፨ ወምንተኒ፡ ክብረ፡ ኢይቄቂ፡ ከመ፡ የሀበነ፨ ፍርቃን፡ ወውዳሴ፡ ይደልዎ፡ እምኀቤክሙ። እስመ፡ በእንቲአክሙ፡ ተብህለ፡ ዘይሬስዮሙ፡ ለመላእክቲሁ፡ መንፈሰ፨ ወለእለ፡ ይትለአክዎ፡ ነደ፡ እሳት፨ ወይደልዎ፡ ካዕበ፡ እምኀቤነሂ፡ ስብሐት፡ ወአኰቴት፨ እስመ፡ ተብህለ፡ በእንቲአነ፡ ወገብሮ፡ እግዚአብሔር፡ ለእጓለ፡ እመሕያው፡ በአርአያሁ፡ ወበአምሳሊሁ፨ ወነፍሐ፡ ውስተ፡ ገጹ፡ መንፈሰ፡

folio : 56


back to top

| | ሕይወት፨ ወኮነ፡ እጓለ፡ እመሕያእ፡ በመንፈሰ፡ ሕይወት፨ ወዘንተ፡ እንዘ፡ ይብል፡ ላሊበላ፡ መሠጦ፡ ዝኩ፡ መልአክ፡ ውስተ፡ ዓየረ፡ ሰማይ፡ ሣልሳይ፡ ዘየዓቢ፡ እምነ፡ ሰማይ፡ {ዳግማይ፡} በብርሃንኒ፡ ወበኵሉ፡ ክብር፨ ወመላእክቲሁኒ፡ ለሰማይ፡ ሣልስ፡ የዓብዩ፡ እምነ፡ መላእክት፡ ዘሰማይ፡ ዳግማይ፨ ወዘንተ፡ ርእዮ፡ ብፁዕ፡ ላሊበላ፡ ተፈሥሐ፡ ፍሥሐ፡ ውሱከ፨ ወፈድፈደት፡ ፍሥሐሁ፡ ዘተፈሥሐ፡ በቅድመ፡ መላእክት፡ ዘዳግም፡ ሰማይ፨ ወበነጽሮ፡ ብርሃኖሙ፡ ለመላእክት፡ ዘሣልስ፡ ሰማይ። | ወዝኩሰ፡ መልአክ፡ ዘይመርሖ፡ ለብፁዕ፡ ላሊበላ፡ ሶበ፡ አብጽሖ፡ ውስተ፡ ዓየረ፡ ሰማይ፡ ሣልስ፨ ይቤሎ፡ ነጽርኬ፡ ኦብእሲ፡ ዘንተ፡ ዓየረ፡ ሰማይ፡ ሣልስ፡ በለብዎ፨ ምንት፡ ይሤኒ፡ ዝንቱ፡ ዓየረ፡ ሰማይ፡ ዘብርሃን፨ ወፈድፋደ፡ ይሤኒ፡ ወይኄይስ፡ እምዘ፡ ነጸርከ፡ ቀዳሚ፨ ወአንተኒ፡ አፈድፍድ፡ ፍሥሐ፡ እምዘ፡ ነጸርቀ፡ ቀዳሚ፡ በነጽሮቱ፡ ለዝንቱ፡ ብርሃን፡ ዓቢይ፡ ዘኢይደልዎ፡ ለዓይነ፡ ሥጋ፡ ከመ፡ ይጠንቅቅ፡ ጠይቆታ፨ እስመ፡ ጥበብ፡ ተኃድር፡ ውስተ፡ ሕፅኑ፡ ለአብ፨ ቀዳማዊኒ፡ አልቦ፡ ዘፈጸመ፡ | | ፯ አእምሮታ፨ ወደኃራዊኒ፡ አልቦ፡ ዘረከበ፡ አሰራ፡ ወአልቦ፡ ዘተሣየጣ፡ በወርቅ፡ ቀይህ፨ ወዘኢኮነ፡ ሤጣ፡ ወርቀ፡ አፌዝ፨ ይእቲኬ፡ ጥበብ፡ ዘገብረት፡ ዘንተ፡ ኵሎ፡ ወእንተ፡ ይትሬእያ፨ ወካልእኒ፡ ሀለወከ፡ ትርአይ፡ ዘየዓቢ፡ እምዘ፡ ርኢከ፡ ቀዳሚ፡ ወዘኢይበጽሖ፡ ሕሊና፡ ሰብእ፡ ወኢዘለነ፡ ዘመላእክት፡ አእምሮ፨ ይእቲኬ፡ ጥበብ፡ ዘገብረት፡ ዘንተ፡ ግበረ፨ ወዘንተ፡ እንዘ፡ ይቤሎ፡ ሰምዓ፡ ላሊበላ፡ ጕሕና፡ ስብሐቶሙ፡ ለመላእክተ፡ ሰማይ፡ ሣልስ፡ እንዘ፡ ይደምፅ፡ ከመ፡ ነጐድጓድ፡ ወእንዘ፡ ይኄይል፡ ድምፁ፡ | ጥቀ፨ ወይቤሎ፡ ዝኩ፡ መልአክ፡ ብርሃናዊ፡ ለብፁዕ፡ ላሊበላ፡ አጽምዕኬ፡ ኦብእሲ፡ ዘሰሐበተከ፡ ሐብለ፡ ጥበብ፡ ወአብጽሐተከ፡ እስከ፡ ዝየ፡ ከመ፡ ትርኣይ፡ ዘንተ፡ ምሥጢረ፨ ወከመ፡ ትስማዕ፡ ነጐድጓደ፡ ስብሐቶሙ፡ ለትጉሃን፡ መላእክት፡ ዘያሞግድ፡ በበሰማዩ፨ ወአንተኒኬ፡ ተፈሣሕ፡ ፈድፋደ፡ ወሰብሖ፡ ለእግዚአብሔር፡ አምላክከ፡ ዘኵሎ፡ ይመልክ፨ ወካዕበ፡ ይቤሎ፡ ውእቱ፡ መልአክ፡ ብርሃናዊ፡ ለብፁዕ፡ ላሊበላ፡ መፍትው፡ ለከ፡ ከመ፡ ታእኵቶ፡ ፈድፋደ፡ ለዘአፍቀረከ፡

folio : 57


back to top

| | ፰ እስመ፡ ፈድፋደ፡ አፍቀረከ፡ ወረሰየከ፡ ትኅበር፡ ሰብሖ፡ ምስለ፡ መላእክት፨ ወተፈሣሕኬ፡ ወይዕበይ፡ ፍሥሐከ፡ ወተሠጥዎ፡ ብፁዕ፡ ላሊበላ፡ ወይቤሎ፡ ለመልአክ፡ ለፍሥሐየሰ፡ አልባቲ፡ አቅም፡ ወኢመስፈርተ፡ እስመ፡ ለሰሚዓ፡ ድምፀ፡ ዝንቱ፡ ስብሐተ፡ አልቦ፡ ዘይትዔረዮ፡ በጣዕም፡ ወለወይንሂ፡ ኢይከውን፡ መጠነ፡ ቀለምጺጽ፡ ፍሥሐ፡ ዝንቱ፡ ስብሐት፡ ወዘንተ፡ እምድኅረ፡ ይቤሎ፡ በጽሑ፡ ውስተ፡ ሰማይ፡ ሣልስ፨ ወርእየ፡ ብፁዕ፡ ላሊበላ፡ | መላእክተ፡ እለ፡ ሀለው፡ ህየ፡ ዘፍድፋድ፡ ስብሐቶሙ፡ ለእሉ፡ እምነ፡ ቀዳማውያን፨ ወቅዱስኒ፡ ላሊበላ፡ ይትዌሰክ፡ ፍሥሐ፡ ለለሰማዩ፡ ሶበ፡ ይሬኢ፡ ክብሮሙ፡ ለትጉሃን፡ መላእክት፨ ወብርሃኖሙኒ፡ ዘየኃይድ፡ ዓይነ፡ ዘኢይከውኖ፡ ለእጓለ፡ እመሕያው፡ ይንብብ፡ በእንቲአሁ፨ ወእልክቱሰ፡ መላእክት፡ እለ፡ ውስተ፡ ሰማይ፡ ሣልስ፨ ሶበ፡ ርእይዎ፡ አንበስበሱ፡ በቅድሜሁ፡ በፍሥሐ፨ ወይቤልዎ፡ አስትዓ፡ ለከ፡ እምኀቤነ፡ ኦብእሲ፡ ዘተለዓልከ፡ እምነ፡ መሬታውያን፡ ወከበርከ፡ ፈድፋደ፡ | | እምኔሆሙ፨ ወእምኔነሂ፡ ትትሌዓል፡ ወክብርከ፡ ዓዲ፡ የዓቢ፡ እምክብርነ፨ ወብፁዕሰ፡ ላሊበላ፡ ሰሚዖ፡ ያነክር፨ ወበእንተ፡ ክብርኒ፡ ዘይነብቡ፡ በእንቲአሁ፡ መላእክት፡ በኀበ፡ በጽሐ፡ ሰማይ፡ ያስተዓፅብ፡ እንዘ፡ ይብል፡ እፎ፡ ሀለዎ፡ ይርከብ፡ ዘከመዝ፡ ክብረ፨ በአይኑ፡ ገድል፡ ወበአይኑ፡ ፃማ፡ ይረክብ፡ ዘከመዝ፡ ስብሐት፡ ወይቤልዎ፡ እሙንቱ፡ መላእክት፡ እለ፡ ውስተ፡ ሰማይ፡ ሣልስ፨ ወዜነውዎ፡ በእንተ፡ ክብረ፡ ካልአኒሆሙ፡ መላእክት፡ እለ፡ ሀለው፡ ውስተ፡ ራብዕ፡ ሰማይ፡ ሀሰው፨ ወዘከመ፡ ሀለዎ፡ | ለብፁዕ፡ ላሊበላ፡ ይትለዓል፡ እምኔሆሙ፡ ለእሙንቱ፡ መላእክት፡ እለ፡ ሀለው፡ ውስተ፡ ራብዕ፡ ሰማይ፨ ወቅዱስሰ፡ ላሊበላ፡ ሰሚዖ፡ ዘንተ፡ እምአፈ፡ እልክቱ፡ መናሕርተ፡ ቅዳሴ፡ ወአብሕርተ፡ ስብሐት፡ ተመልዓ፡ ፍሥሐ፡ በኃይለ፡ መንፈስ፡ ቅዱስ፡ ወርእዮ፡ ስነ፡ ስብሐቶሙ፡ ወብርሃኖሙ፡ ዘይፈደፍድ፡ እምብርሃነ፡ ቀዳማውያን፡ አንከረ፡ ወአኃዘ፡ ይበል፡ ባርክዎ፡ ለእግዚአብሔር፡ ኵልክሙ፡ መላእክቲሁ፨ ጽኑዓን፡ ወኃያላን፡ እለ፡ ትገብሩ፡ ቃሎ፡ ወእለ፡ ትሰምዑ፡ ቃለ፡ ነገሩ፨

folio : 58


back to top

| | መፍትው፡ ለክሙ፡ ኦእሳታውያን፡ መንፈሳውያን፡ ትበልዎ፡ ለከ፡ ይደሉ፡ እግዚኦ፡ ክብር፡ ወስብሐት፡ ኃይል፡ ወአኰቴት፡ ወቅድሳት፡ ወፍርቃን፡ ወውዳሴ፨ ለዘአሠርገወክሙ፡ በዝንቱ፡ ሠርጕ፡ ዐቢይ፡ ዘኢኮነ፡ በቅድመ፡ ብርሃንክሙ፡ ከመ፡ ቀለምጺጽ፡ ብርሃነ፡ ፀሐይ፨ ወስነ፡ አልባሲክሙ፡ ዘአልቦ፡ ሤጥ፨ ወበእንቲአየሂ፡ ፈድፋደ፡ አእኵትዎ፡ እንዘ፡ መሬታዊ፡ አነ፡ ወሐመድ፡ ዘኢኮነ፡ ድልወትየ፡ ከመ፡ እነጽሮሙ፡ ለጻድቃን፡ ሰብእ፨ ዘእምአንጋድየ፡ እለ፡ እሙንቱ፡ | ዘርአ፡ አዳም፡ ወዘርአ፡ አብርሃም፡ ረሰየኒ፡ ከመ፡ እርአይ፡ ክብረክሙ፡ ወስብሐቲክሙ፨ ወዘንተ፡ ሶበ፡ ይብል፡ ብፁዕ፡ ላሊበላ፡ ተሠጥውዎ፡ እልክቱ፡ መላእክት፡ መንፈሳውያን፨ ወይቤልዎ፡ በእንቲአነሰ፡ ወበእንተ፡ ክብርነሂ፡ ኢታንክር፨ እስመ፡ ክብር፡ ዘዚአከ፡ የዓቢ፡ እምክብረ፡ ዚአነ፨ ወዘንተ፡ እንዘ፡ ይብልዎ፡ መላእክት፡ እለ፡ ውስተ፡ ሰማይ፡ ራብዕ፨ ነሥኦ፡ ዝኩ፡ መልአክ፡ ወአዕረጎ፡ ውስተ፡ ዓየረ፡ ሰማይ፡ ሐምስ፨ ወተውኅጠ፡ ቅዱስ፡ላሊበላ፡ በብርሃነ፡ ዓየረ፡ ሰማይ፡ ሐምስ፡ እስመ፡ | | ብርሃና፡ የዓቢ፡ እምብርሃነ፡ ኵሎን፡ ሰማያት፡ ወበእንተዝ፡ አንፈርዓፀ፡ ብፁዕ፡ ወቅዱስ፡ ላሊበላ፡ ዓቢየ፡ ነፈርዓፀ፡ ዘየዓቢ፡ እምኵሉ፡ ፍሥሐሁ፡ ወነፈርዓፁ፡ ዘተፈሥሐ፡ ወአንፈርዓፀ፡ ወረከበ፡ በአርባዕቱ፡ ሰማያት፡ እለ፡ ዓደዎን፡ እንዘ፡ ይፈድፍድ፡ ሰብሖቶ፡ ለእግዚአብሔር፨ በእንተ፡ ዘርእየ፡ ክብረ፡ ወሰብሐተ፡ ለለሰማዩ፨ ወመላእክትኒ፡ እለ፡ የኃድሩ፡ ውስቴቶን፨ ዘየዓቢ፡ ክብረ፡ ካልእ፡ እምካልኡ፨ ወአመሰ፡ በጽሐ፡ ውስተ፡ ዓየረ፡ ሰማይ፡ ሐምስ፡ ተመልዓ፡ ፍሥሐ፡ ዓቢየ፡ እስመ፡ | እምኵሎን፡ ሰማያት፤ እለ፡ ኃለፈ፡ ዲቤሆን፡ የዓቢ፡ ብርሃን፡ ዘህየ፨ ወአኃዘ፡ ይበል፡ ወየሐሊ፡ ጥቀ፡ ፍቁር፡ አብያቲከ፡ እግዚኦ፡ እግዚአ፡ ኃያላን፨ ተፈሥሐት፡ ነፍስየ፡ በአፍቅሮ፡ አዕፃዲከ፡ እግዚአ። ልብየኒ፡ ወሥጋየኒ፡ ተፈሥሐ፡ በእግዚአብሔር፡ ሕያው፨ ብፁዓን፡ እለ፡ ይትረዓዩ፡ ውስተ፡ ፂኦተ፡ ስብሓቲከ፡ ለለጌሠሙ፡ እንዘ፡ የሐልዩ፡ ወያደምፁ፡ ስብሐተ፡ ዘኢጸገብ፡ ጣዕሙ፨ አማን፡ ውእቱ፡ ዘይቤ፡ ዳዊት፡ ነቢይ፡ በመዝሙር፡ እንዘ፡ ይብል፨ እስመ፡ ትኄይስ፡ አሐቲ፡ ዕለት፡ ውስተ፡

folio : 59


back to top

| | አዕፃዲከ፡ እምአእላፍ፨ ወበእንተዝ፡ አብደረ፡ ይትገደፍ፡ ውስተ፡ ቤት፡ እግዚአብሔር፨ በከመ፡ ይቤ፡ ለሊሁ፡ አብደርኩ፡ እትገደፍ፡ ውስተ፡ ቤተ፡ እግዚአብሔር። እምእንበር፡ ውስተ፡ ቤተ፡ ኃጥአን፨ እስመ፡ ትኄይስ፡ አሐቲ፡ ዕለት፡ ውስተ፡ አዕፃዲከ፡ እምአእላፍ፤ ወአነሂ፡ እብል፡ አሐተ፡ ሰአልክዎ፡ ለእግዚአብሔር፡ ወኪያሃ፡ አኃሥሥ፨ ከመ፡ እኅድር፡ ቤቶ፡ ለእግዚአብሔር፡ በኵሉ፡ መዋዕለ፡ ሕይወትየ፨ ወከመ፡ ያርእየኒ፡ ዘያሠምሮ፡ ለእግዚአብሔር፨ ወከመ፡ እጸመድ፡ ውስተ፡ ቤተ፡ | መቅደሱ፨ ወተሠጥዎ፡ ዝኩ፡ መልአክ፡ ወይቤሎ፡ ለብፁዕ፡ ላሊበላ፡ እፎ፡ አንከረ፡ ልብከ፡ እስመ፡ ሐለይከ፡ ወትቤ፡ በመዝሙረ፡ ዳዊት፡ ጥቀ፡ ፍቁር፡ አብያቲከ፡ እግዚኦ፡ እግዚአ፡ ኃያላን፡ ተፈሥሐት፡ ነፍ{ስየ}፡ በአፍቅሮ፡ አዕፃዲከ፡ እግዚኦ፨ ፈድፋደኑ፡ አስተፍሥሐከ፡ ብርሃነ፡ ዝንቱ፡ ዓየረ፡ ሰማይ፡ ሐምስ፤ ወአውሥኦ፡ ላሊበላ፡ ለውእቱ፡ መልአክ፡ ወይቤሎ፡ አማን፡ ተፈሣሕኩ፡ በዝንቱ፡ ብርሃን፡ ዓቢየ፡ ፍሥሐ፡ ዘኣልቦ፡ መስፈርት፨ ወይቤሎ፡ ውእቱኒ፡ መልአክ፡ ለብፁዕ፡ ላሊበላ፡ መፍትው፡ | | ለከ፡ ትትፈሣሕ፡ እስመ፡ ኮንከ፡ ከመ፡ ዘይትፋላይ፡ እምክብር፡ ውስተ፡ ክብር፨ እምፍሥሐ፡ ውስተ፡ ፍሥሐ፨ ወእምብዕል፡ ውስተ፡ {ብዕል}፨ እስመ፡ ዓረገ፡ እምድር፡ ወዓደውከ፡ ዓየረ፡ ሰማይ፡ ቀዳሚት፨ ኢረከበከ፡ ኃዘን፡ ዘእንበለ፡ ፍሥሐ፨ ወፍሥሐሁኒ፡ አኮ፡ ዘአሐዱ፡ ኅብሩ፡ አላ፡ እንዘ፡ ይትዌሰክ፡ ፍሥሐ፡ በዲበ፡ ፍሥሐ፨ ወይእዜኒ፡ ሶበ፡ በጻሕከ፡ ውስተ፡ ዓየረ፡ ሰማይ፡ ሐምስ፨ ተፈሣሕከ፡ ሶበ፡ ርኢከ፡ ብርሃኖ፨ እፎኬ፡ ትትፌሣሕ፡ ሶበ፡ ትሰምዕ፡ ድምፀ፡ ስብሐቶሙ፡ ለመላእክት፡ እለ፡ | ይነብሩ፡ ውስተ፡ ሰማይ፡ ሐምስ፨ ወዘንተ፡ እንዘ፡ ይብሎ፡ አብጽሖ፡ ውእቱ፡ መልአከ፡ ውስተ፡ ሰማይ፡ ሐምስ፨ ወእምዝ፡ ኣንጐድጐደ፡ ድምፀ፡ ስብሐቶሙ፡ ለመላእክት፡ ለእለ፡ ይነብሩ፡ ህየ፨ እንዘ፡ ይበልሕ፡ ወይኄይል፡ ድምፁ፡ ለአጽምዖ፨ ወብፁዕሰ፡ ላሊበላሰ፡ ሰክረ፡ እምድምፀ፡ ስብሐት፡ ዘሰም{ዓ፡ ውሱከ፡} እምድምፀ፡ ስብሐት፡ ዘውስተ፡ ኃምስ፡ ሰማይ፡ ሐምስ፨ ወእንዘ፡ ያነክር፡ ቅዱስ፡ ብፁዕ፡ ላሊበላ፡ አስተርአይዎ፡ ብርሃናውያን፡ መእክት፡ እለ፡ ሀለወ፡ ህየ፨ ወአንበስበሰ፡

folio : 60


back to top

| | ብርሃኖሙ፡ ለእሙንቱ፡ መላእክት፡ በቅድሜሁ፡ ከመ፡ እንተ፡ ያንበሰብስ፡ ደመና፡ በሑሰተ፡ ነፋስ፨ ወጸርሑ፡ ኵሎሙ፡ እንዘ፡ ይብሉ፡ ሰላም፡ ለከ፡ ኦብእሲ፡ መካህ፨ ዘሐፀነቶ፡ ጥበብ፡ እንዘ፡ ትሴስዮ፡ እምነ፡ መና፡ ዘታፈደፍ{ድ}፡ ክብረ፡ እምክብረ፡ መላእክት፨ ወይእዜኒ፡ ተፈሣሕ፡ ኦብእሲ፡ መካህ፡ በዓፀደ፡ ትጉሃን፡ ዘአልቦ፡ ውስቴታ፡ ድካመ፡ ጠባይዕ፡ ወኢሕሊና፡ ሥጋ፡ ወኢአፍቅሮተ፡ ድቃስ፡ ወኢፈቲወ፡ ንዋም፨ ተፈሣሕኬ፡ በዝየ፡ በኀበ፡ አልቦ፡ ረኃበ፡ ወኢጽምዕ፨ | እስመ፡ ነቢበ፡ ስብሐት፡ ዘመላኮት፨ ሲሳይነ፡ ወስቴነ፨ ኀበ፡ አልቦ፡ ጽልመት፡ ዘእንበለ፡ ብርሃን፨ አንሶሱ፡ በፍሥሐ፡ ውስተ፡ ዝንቱ፡ መካን፨ እስመ፡ ከፈለከ፡ ዘከመዝ፡ ሥልጣነ፡ ዘኵሎ፡ ይእኅዝ፨ ተፈሣሕ፡ ምስሌነ፡ እስከ፡ ተዓርግ፡ ኀበ፡ ዘየዓቢ፡ እምዝንቱ፡ ወቅዱስሰ፡ ወብፁዕ፡ላሊበላ፡ ያነክር፡ በፍሥሐ፡ ግርማሆሙ፨ ወፀዳለ፡ ብርሃኖሙ፨ ወስነ፡ አክሊላቲሆሙ፤ ዘይፀዓዱ፡ እምበረድ፡ ወይበርህ፡ እመባርቅት፨ ወተመሥጠ፡ ዓዲ፡ በክነፈ፡ ዝኩ፡ መልአክ፡ እምድኅረ፡ ተፈሥሐ፡ | | ምስለ፡ መላእክት፡ እለ፡ ሀለው፡ ውስተ፡ ሐምስ፡ ሰማይ፨ ወበጽሐ፡ ውስተ፡ ዓየረ፡ ሣድስ፡ ሰማይ፨ ወርእየ፡ በህየኒ፡ ብርሃነ፡ ዘየዓቢ፡ እምብርሃነ፡ ዓየር፡ ዘሐምስ፡ ሰማይ፨ ወተፈሥሐ፡ ፍሥሐ፡ ዘኢይከውኖ፡ ለእጓለ፡ እመሕያው፡ ከመ፡ ይርከብ፡ ፍሥሐ፡ ዘከመዝ፨ ወእምዝ፡ ተለዓለ፡ ውስተ፡ ሰማይ፡ ሳድስ፡ ወሰምዓ፡ ጕህና፡ ስብሐት፡ ወርእየ፡ ክብሮሙ፡ ለመላእክት፡ እለ፡ ይነብሩ፡ ህየ፨ ወክብሮሙኒ፡ ወስብሐቶሙ፡ የዓቢ፡ እምስብሐቲሆሙ፡ ወእምክብሮሙ፡ | ለመላእክት፡ ዘውስተ፡ ሰማይ፡ ሐምስ፨ ወይቤልዎ፡ እልክቱኒ፡ መላእክት፨ በከመ፡ ይቤልዎ፡ ቀዳማውያን፨ ወአምኅዎ፡ በፍሥሐ፨ በከመ፡ አምኅዎ፡ እለ፡ ኃለፉ፡ ወዓደወ፡ እምኀቤሆሙ፨ ወእምዝ፡ መሠጦ፡ ዝኩ፡ መልአክ፡ ለብፁዕ፡ ላሊበላ፡ ወአብጽሖ፡ ውስተ፡ ዓየረ፡ ሰማይ፡ ሳብዕ፨ ወርእየ፡ ብፁዕ፡ ላሊበላ፡ ብርሃነ፡ ውእቱ፡ ዓየር፡ ዘኢርእየ፡ በኀበ፡ ስድስቱ፡ ሰማያት፨ ወበዝኃ፡ አንክሮቱ፡ ለቅዱስ፡ ወይቤ፡ ይባርክዎ፡ ሰማያት፡ ወሰማየ፡ ሰማያት፡ ለእግዚአብሔር፡

folio : 61


back to top

| | ለዘሰቀሎሙ፡ ከመ፡ ቀመር፡ ወከለሎሙ፡ በብርሃን፡ ዘኢይትሔለይ፡ ውስተ፡ ልበ፡ ሰብእ፨ ወዘዕድው፡ እምሕሊና፡ እጓለ፡ እመሕያው፡ ወአኃዘ፡ ውእቱኒ፡ ይክላሕ፡ ወይበል፡ በአስተብፅዖ፨ በእንተ፡ እለ፡ ይነብሩ፡ ውስተ፡ ሰማይ፡ ሳብዕ፨ ወይቤ፡ ብፁዓን፡ ኵሎሙ፡ እለ፡ ይነብሩ፡ ውስተ፡ ቤትከ፨ ወለዓለመ፡ ዓለም፡ ይሴብሑከ፡ ብፁዕ፡ ብእሲ፡ ዘእምኀቤከ፡ ረድኤቱ፡ እግዚኦ፡ ወዘይሔሊ፡ በልቡ፡ ዘበላዕሉ፨ ወብፁዕሰ፡ ላሊበላ፡ ሀሎ፡ ይቀውም፡ በማእከለ፡ ሞገደ፡ ስብሐት፡ በዓየረ፡ ሰማይ፡ ሳብዕ፡ | እስመ፡ ደምፀ፡ ስብሐት፡ ዘታሕቱሂ፡ ዘይትፌኖ፡ እምኀበ፡ መላእክት፡ እለ፡ ይነብሩ፡ ውስተ፡ ፯ቱ፡ ሰማያት፡ በህየ፡ ይሰማዕ፡ ድምፀ፡ ነጐድጓደ፡ ስብሐቶሙ፡ እንዘ፡ የዓርግ፡ ምስለ፡ ጣዕመ፡ መዓዛ፡ ሠናይ፡ ውስተ፡ ማኅደረ፡ ቅድሳቱ፡ ለትሥልስተ፡ አዶናይ፨ ወዘላዕሉሂ፡ ድምፀ፡ ስብሐት፡ ዘውእቱ፡ ህላዌሆሙ፡ ለመላእክት፡ እለ፡ ይነብሩ፡ ውስተ፡ ሰማይ፡ ሳብዕ፡ ይደምፅ፡ በህየ፡ ዘየዓቢ፡ እምአእላፍ፡ ድምፀ፡ ነጐድጓድ፨ ወብፁዕሰ፡ላሊበላ፡ ይደመም፡ ሰሚዖ፡ ድምፀ፡ ስብሐት፤ | | ዘታሕቱሂ፡ እንዘ፡ የዓርግ። ወዘላዕሉሂ፡ እንዘ፡ ያንጐደጒድ፡ ወድምፁሂ፡ ወጣዕሙሂ፡ ይሤኒ፡ እምስብሐተ፡ ኵሎን፡ ሰማያት፡ ስድስቱ፡ እለ፡ ዓደዎሙ፡ ብፁዕ፡ ላሊበላ፡ ወበእንተ፡ ውእቱ፡ ድምፀ፡ ስብሐት፡ ዘየዓውዶ፡ ከመ፡ እንተ፡ ደመና፡ ምስለ፡ ጣዕም፡ ዓቢይ፨ ወምስለ፡ መዓዛ፡ ሠናይ፨ ዘአልቦ፡ ዘይትዔረዮ፡ ለመዓዛሁ፨ ወቅዱስሰ፡ላሊበላ፡ ተውኅጠ፡ አፍአሁ፡ ወውሥጡ፡ በብርሃን፡ ወበስብሐት፡ ወበፍሥሐ፡ ዘድምፀ፡ ስብሐት፡ ዘላዕሉ፡ ወዘታሕቱ፨ እስመ፡ በህየ፡ | ተፀዓቅዎ፡ ድምፀ፡ ፍሥሐ፡ በዲበ፡ ድምፀ፡ ፍሥሐ፡ ዘየዓቢ፡ እምኵሉ፡ ፍሥሐ፡ ዘረከበቶ፡ እንዘ፡ የዓድዎን፡ ለስሱ፡ ሰማያት፡ ኵሎን፨ ወዝኩሰ፡ መልአክ፡ ብርሃናዊ፡ ዘይመርሆ፡ ለብፁዕ፡ ላሊበላ፡ ሶበ፡ ርእዮ፡ እንዘ፡ ይዴመም፡ በአንከሮ፡ ዓቢይ፨ ይቤሎ፡ ምንተኑ፡ ታነክር፡ ወምንተ፡ ታስተዓፅብ፡ ከመዝ፡ እስመ፡ ርኢኩከ፡ እንዘ፡ ታነክር፡ አመ፡ ተዓድዎን፡ ለስሱ፡ ሰማያት፡ ወይእዜሰ፡ እሬእየከ፡ በዓቢይ፡ አንክሮ፡ እንዘ፡ ታስተአድም፡ ብርሃኖ፡ ለዓየረ፡ ሰማይ፡ ሳብዕ፡ ወድምፀ፡ ስብሐትኒ፡

folio : 62


back to top

| | ዘይሰማዕ፡ በዝየ፨ ወተሠጥዎ፡ ብፁዕ፡ ላሊበላ፡ ለውእቱ፡ መልአክ፡ ወይቤሎ፡ ኦእግዚእየ፡ ሀሎኩ፡ አማን፡ በአንክሮ፡ ዓቢይ፡ በእንተ፡ ዝንቱ፡ ብርሃነ፡ ዓየር፨ ወበእንተ፡ ዝንቱ፡ ድምፀ፡ ስብሐት፡ ዘይሰማዕ፡ በውስቴቱ፨ እስመ፡ ኢርኢኩ፡ ዘከመዝ፡ ብርሃነ፡ እምአመ፡ ዓረጉ፡ እምድር፡ ውስተ፡ ሰማይ፡ ኢርኢኩ፡ ዘከመዝ፡ ብርሃነ፡ በውስተ፡ ኵሎን፡ ዓየራት፨ ወኢሰማዕኩ፡ ዓዲ፡ ዘከመዝ፡ ስብሐተ፡ ዘይኄይል፡ ድምፁ፡ እምድምፀ፡ አእላፍ፡ ነጐድጓድ፨ ወበእንተ፡ ዝንቱ፡ አንከርኩ፡ ፈድፋደ፡ | እምነከራ፡ ዘረከበኒ፡ በኵሎን፡ ዓየራት፡ ወበኵሎን፡ ሰማያት፨ ወቀዲሙሰ፡ ሶበ፡ ዓየረ፡ ሰማይ፡ ቀዳሚት፡ ዓጺወነ፡ ምጽናዓ፡ ኀበ፡ ይነብሩ፡ መፍርሃነ፡ ገጽ፨ ወርኢኩ፡ ብርሃነ፡ ዘህየ፡ ተፀዓቅዎ፡ ድምፀ፡ ፍሥሐ፡ በኤበ፡ ድምፀ፡ ፍሥሐ፡ ዘየዓቢ፡ እምኵሉ፡ ፍሥሐ፡ ዘረከበቶ፡ እንዘ፡ የዓድዎን፡ ለ፯ቱ፡ ሰማያት፡ ኵሎን፨ ወዝኩሰ፡ መልአክ፡ ብርሃናዊ፡ ዘይመርሆ፡ ለብፁዕ፡ ወለቅዱስ፡ ላሊበላ፡ ሶበ፡ ርእዮ፡ እንዘ፡ ይዴመም፡ በአንክሮ፡ ዓቢይ፡ ይቤሎ፡ ምንተኑ፡ ታንክር፡ ከመዝ፡ ወታስተዓፅብ፡ | | አመ፡ ርኢኩከ፡ እንዘ፡ ታነክር፡ አመ፡ ተዓድዎን፡ ለ፯ሰማያት፡ መሰለኒ፡ ዘኢትረክብ፡ ዘከማሁ፡ ብርሃነ፡ ወዘከማሁ፡ ፍሥሐ፨ ወሶበ፡ ዓርግነ፡ ውስተ፡ ሰማይ፡ ቀዳሚት፡ ረከብኩ፡ ብርሃነ፡ ዘየዓቢ፡ እምብርሃነ፡ ዓየር፨ ወብርሃነ፡ መላእክትኒ፡ ዘውስቴታ፨ ዘያፀድል፡ ምስብዒተ፡ እምፀሐይ፨ ዘንተ፡ ርእይየ፡ ተፈሣሕኩ፡ ፍሥሐ፡ ዘኢተፈሣሐኩ፡ ዘከማሁ፡ ፍሥሐ፡ እምአመ፡ ተወለድኩ፡ እስከ፡ አሜሃ፡ መሰለኒ፡ ዘአልቦ፡ ዘይከብሮሙ፡ ዘአልቦ፡ ዘይመስሎሙ፡ ወአልቦ፡ ዘከማሁ፡ | ብርሃነ፡ ዘእሬኢ፨ ወይቤሉኒ፡ እልክቱ፡ መላእክት፡ ኢታንክር፡ በእንተ፡ ክብርነ፨ እስመ፡ ሀለው፡ እለ፡ ይትሌዓሉነ፨ ወዘንተ፡ ሰሚዕየ፡ አንከርኩ፡ ወእቤ፡ እፎኬ፡ ይመስል፡ ብርሃን፡ ዘይፈደፍድ፡ እምዝንቱ፨ ወሶበ፡ ዓረግነ፡ ካዕበ፡ ውስተ፡ ዓየረ፡ ሰማይ፡ ዳግሚት፡ ርኢኩ፡ በህየኒ፡ ብርሃነ፡ ዘየዓቢ፡ እምብርሃነ፡ ዓየረ፡ ሰማይ፡ ቀዳሚት፨ ወክብረ፡ መላእክትኒ፡ ይዓቢ፡ እምክብረ፡ መላእክት፡ ዘህየ። ወተፈሣሕኩ፡ በብርሃኖሙኒ፡ ወበጣዕመ፡ ስብሐቶሙ፨ ወበህየኒ፡ መሰለኒ፡ ዘኢረክብ፡

folio : 63


back to top

| | ዘከማሁ፨ ወእምዝ፡ ይቤሉኒ፡ እልክቱኒ፡ መላእክት፡ ዘዳግም፡ ሰማይ፨ በከመ፡ ይቤሉኒ፡ ቀዳማውያን፡ ወዜነውኒ፡ በእንተ፡ ክብረ፡ መላእክት፡ ዘውስተ፡ ሣልስ፡ ሰማይ። ወበህየ፡ ርኢኩ፡ በከመ፡ ይቤሉኒ፡ ክብሮሙኒ፡ ወስብሐቲሆሙኒ፨ ወእልክቱኒ፡ ካዕበ፡ ሰበኩ፡ ሊተ፡ በእንተ፡ ክብሮሙ፡ ለመላእክት፡ እለ፡ ውስተ፡ ራብዕ፡ ሰማይ፨ ወእልክቱኒ፡ ካዕበ፡ ነገሩኒ፡ ክብረ፡ ካልአኒሆሙ፡ መላእክት፡ ለእለ፡ የኃድሩ፡ ውስተ፡ ሐምስ፡ ሰማይ፨ ወረከብኩ፡ በህየ፡ በከመ፡ ዜነውኒ፡ | እሙንቱኒ፨ ወእምዝ፡ ዓረግነ፡ እምህየኒ፡ ውስተ፡ ዓየረ፡ ሳድስ፡ ሰማይ፡ ወርኢኩ፡ ብርሃነ፡ ዘየዓቢ፡ እምብርሃነ፡ ኵሎን፡ ሰማያት፡ ሐምስቱ፡ ወክብረ፡ መላእክትኒ፡ ርኢኩ፡ ዘውስተ፡ ሰማይ፡ ሳድስ፡ ዘየዓቢ፡ እምክብረ፡ ካልአኒሆሙ፡ ወእምህየኒ፡ ዓረግነ፡ ሰሚዓነ፡ ክብረ፡ ዝንቱ፡ ሰማይ፡ ሳብዕ፨ ወነዋ፡ ንቀውም፡ ውስተ፡ ዓየራቲሁ፨ ወተፈሣሕነ፡ በሰሚዓ፡ ድምፀ፡ ስብሐት፡ ዘይደምፅ፡ በዝየ፨ ወበእንተ፡ ዝንቱ፡ ፈድፋደ፡ አነክር፡ ወአስተዓፅብ፡ በተደሞ፡ ዓቢይ፡ ወዘንተ፡ ብሂሎ፡ | | አርመመ፡ ብ{ፁ}ዕ፡ ላሊበላ፡ ወተሠጥዎ፡ ዝኩኒ፡ መልአክ፡ ጽድቅ፡ ብርሃናዊ፡ ወይቤሎ፡ እሙነ፡ ትቤ፡ አልቦ፡ ዘረከብከ፡ እምአመ፡ አዕረጉከ፡ እምድር፡ ወአብጻሕኩከ፡ እስከ፡ ዝየ፡ ዘከመዝ፡ ብርሃነ፡ ዘዓየር፨ እስመ፡ ይትዌሰክ፡ ብርሃን፡ ዲበ፡ ብርሃን፡ እስከ፡ በጻሕከ፡ ዝየ፨ ወብርሃነ፡ ዓየርኒ፡ የዓቢ፡ እምብርሃነ፡ ካልእ፡ ዓየር። ወሰማይኒ፡ የዓቢ፡ እምብርሃነ፡ ካልእ፡ ሰማይ። ወብርሃነ፡ መላእክትኒ፡ የዓቢ፡ እምብርሃነ፡ ካልአኒሆሙ፡ መላእክት፨ ወዝንቱሰ፡ ዓየረ፡ ብርሃን፡ ዘትሬኢ፡ እስመ፡ ተፍጻሜቶን፡ | ውእቱ፡ ለኵሎሙ፡ ዓየራት፨ ወበእንተ፡ ዝንቱ፡ የዓቢ፡ ተውሳከ፡ ብርሃኑ፡ እምኵሎን፡ ዓየራት፨ ወለከሂ፡ መፍትው፡ ለከ፡ ከመ፡ ትትፈሣሕ፡ ፈድፋደ፡ በዝየ፡ ነጺረከ፡ ዘንተ፡ ዓየረ፡ ብርሃን፡ እስከ፡ ትትፌሣሕ፡ ዘተዓቢ፡ ፍሥሐ፡ ሶበ፡ ትኔጽር፡ ክብረ፡ መላእክት፡ ዘውስተ፡ ሳብዕ፡ ሰማይ፡ ሶበ፡ ተዓርግ፡ ኀቤሆሙ፡ ወት{ሬእዮ፡} ሙ፨ እስመ፡ እምክብረ፡ ኵሎሙ፡ መላእክት፡ እለ፡ ርኢኮሙ፡ የዓቢ፡ ክብሮሙ፡ ለእሙንቱ፡ መላእክት፡ ወድምፀ፡ ስብሐቶሙኒ፡ የዓቢ፡ እምድምፀ፡ ስብሐት፡ ዘሰማዕከ፨

folio : 64


back to top

| | እስመ፡ ስብሐተ፡ ኵሎሙ፡ መላእክት፡ ይትዔለድ፡ በህየ፡ እንዘ፡ የዓርግ፡ ውስተ፡ ጽርሐ፡ ቅድሳቱ፡ ለልዑል፨ ወዘንተ፡ ብሂሎ፡ አዕረጎ፡ ዝኩ፡ መልአክ፡ መንፈሳዊ፡ ውስተ፡ ሰብዕ፡ ሰማይ፨ እንዘ፡ ይትፌሣሕ፡ በፍሥሐ፡ ዓቢይ፡ ወኣዚዝ፨ ወእንዘ፡ ይብሎ፡ ለብፁዕ፡ ላሊበላ፡ ተፈሣሕ፡ ኦብእሲ፡ ክቡር፡ ምሉዓ፡ ጸጋ፨ ዘኢይተመቈሰ፡ እምኵሉ፡ ሀብት፡ ሰማያዊት፡ መንፈሳዊት፨ እስመ፡ ናሁ፡ በጻሕከ፡ ውስተ፡ ሰማይ፡ ሳብዕ፡ ዘየዓቢ፡ ክብሩ፡ እምክብረ፡ ኵሎሙ፡ ሰማያት፨ እስመ፡ ዝየ፡ | ውእቱ፡ ምዕላደ፡ ኵሎሙ፡ ስብሐታት፨ ወዘንተ፡ እንዘ፡ ይብሎ፡ ውእቱ፡ መልአክ፡ ለብፁዕ፡ ላሊበላ፡ ወእንዘ፡ ይነግሮ፡ ነገረ፡ ፍሥሐ፡ ርእየ፡ ቅዱስ፡ ወብፁዕ፡ ላሊበላ፡ ባሕረ፡ ብርሃን፡ እንዘ፡ ያመዓብል፡ ወይፀዓቅ፡ በዓለመ፡ ሰማይ፡ ሳብዕ፨ ወእንዘ፡ ይትጓዳዕ፡ ብርሃን፡ ምስለ፡ ብርሃን፨ ወአንከረ፡ ብፁዕ፡ ላሊበላ፡ ርእዮ፡ ዘንተ፡ ብርሃነ፡ ዘኢርእየ፡ በኀበ፡ ኵሎሙ፡ ሰማያት፨ ወእንዘ፡ ዘንተ፡ ያስተዓፅብ፡ አስተርአይዎ፡ ግብተ፡ ጠባይዓነ፡ እሳት፨ እለ፡ የኃድሩ፡ ውስተ፡ ሰማይ፡ ሳብዕ፨ | | ፰ ወብርሃኖሙኒ፡ ወስብሐቲሆሙኒ፡ የዓቢ፡ እምክብረ፡ ካልአኒሆሙ፡ መላእክት፨ ወአክሊላቲሆሙኒ፡ ይበርህ፡ እምአክሊላቲሆሙ፡ ለእልክቱ፡ መላእክት፨ ወይቤልዎ፡ በሐከ፡ ኦብእሲ፡ አምላክ፡ ዘአብጠልከ፡ እምኔከ፡ ግዕዘ፡ ሰብእ፡ ምድራውያን፨ ወሜጥከ፡ ሕሊናከ፡ ውስተ፡ ሕሊና፡ ሰማያዊ ውያን፨ ወኮንከ፡ ልዑለ፡ ምግባር፡ እምአብያጺከ፡ ደቂቀ፡ አዳም፨ ወበ{እ}ንተ፡ ዝንቱ፡ ይከውን፡ ማኅደርከ፡ ውስተ፡ ዘየዓቢ፡ ማኅደር፨ ኅድግሰ፡ እምኔሆሙ፡ ወእምኔነሂ፡ ይትሌዓል፡ ክብርከ፨ በኵሉ፡ | በኵሉ፡ ፍናዌ፡ ወበኵሉ፡ ገብርከ፡ ወበኵሉ፡ ገጽ፨ እስመ፡ በሉዓሌ፡ ሰማይ፡ ተኃድር፨ ውስተ፡ ውሤጤ፡ መንጣላዕት፨ ኀበ፡ ቦአ፡ ኢየሱስ፡ ክርስቶስ፡ በኵረ፡ አብ፡ ዘእምቅድመ፡ ዓለም፨ ወበኵረ፡ ድንግል፡ በደኃሪ፡ መዋዕል። ዘተወልደ፡ በመንክር፡ ልደት፡ ተመሲሎ፡ ኪያክሙ፨ በእንተ፡ ዝንቱ፡ የዓቢ፡ ክብርክሙ፡ ለጻድቃን፡ እምክብረ፡ መላእክት፡ እለ፡ እምታሕቴነ፡ ወእምኔነ፨ ወእምእለ፡ ይትሌዓሉነ፡ ወእምነ፡ ኪሩቤልኒ፡ ወሱራፌል፡ የዓቢ፡ ክብረ፡ ጻድቃን፡ ሰብእ፨ እስመ፡

folio : 65


back to top

| | ፱ ሥጋ፡ ዘለብሰ፡ መለኮት፡ እምወለተ፡ ምድራውያን፨ ሀሎ፡ መልዕልተ፡ ኪሩቤል፡ ሱራፌል፡ ወእልክቱሂ፡ ጻድቃን፡ ተወልቲዎሙ፡ በይእቲ፡ ሥጋ፡ የዓርጉ፡ መልዕልተ፡ ኪሩቤል፡ ወሱራፌል፨ ኀበ፡ ሀለወ፡ እግዚኦሙ፡ ዘተሰምየ፡ እኁሆሙ፡ በከመ፡ ይቤ፡ ለሊሁ፡ ዘተሳተፈ፡ ምስሌሆሙ፡ ሥጋ፡ ወደመ፡ ወዓፅመ፡ ወጸጒረ፡ ወአሥራወ፨ ወበእንተ፡ ዝንቱ፡ እብለክሙ፡ ኦኃውየ፨ እስመ፡ ነሣእኩ፡ ዘዚአክሙ፡ ከመ፡ አሀብክሙ፡ ዘዚአየ፨ ወኀበ፡ ሀሎኩ፡ አነ፡ ህየ፡ ይሄሉ፡ ዘይትለአክኒ፨ | ኢሰማዕከኑ፡ ኦብእሲ፡ እንዘ፡ ይነግር፡ ዕበየ፡ ልዕልናክሙ፡ ጳውሎስ፡ ዘከመ፡ ትትሌዓሉ፡ እምኔነ፡ ወይብል፡ እስመ፡ አኮ፡ እመላእክተ፡ ዘነሥኦ፡ ለዘነሥኦ፨ አላ፡ እምዘርአ፡ አብርሃም፡ አልዓለ፨ ምንትኑ፡ ልዕልና፡ ዘርአ፡ አብርሃም፨ አኮኑ፡ ዘርኡኒ፡ ለአብርሃም፡ክርስቶስ፡ ወክርስቶስኒ፡ አኮኑ፡ ነበረ፡ በየማነ፡ አብ፡ መልዕልተ፡ ኵሎሙ፡ መላእክት፡ ወሊቃነ፡ መላእክት፨ አኮኑ፡ አንትሙሂ፡ ትሴፈው፡ ከመ፡ ተሀልው፡ ኀበ፡ ሀለወ፡ ውእቱ፡ በከመ፡ ይቤ፡ ለክሙ፡ ለሊሁ፡ አነ፡ እሁበክሙ፡ ከመ፡ ትብልዑ፡ | | ወትስተዩ፡ ምስሌየ፡ በውስተ፡ ማዕድየ፨ በመንግሥቱ፡ ለአቡየ፡ ወእመሰኬ፡ አሰፈወክሙ፡ ውእቱ፡ ከመ፡ ተሀልው፡ ኀበ፡ ሀለወ፡ ውእቱ፨ አእምሩ፡ በዝንቱ፡ ከመ፡ ትትሌዓሉ፡ እምኔነ፨ ወንሕነሰ፡ ኢንክል፡ ዓሪገ፡ መልዕልተ፡ ኪሩቤል፡ ወሱራፌል፡ ኀበ፡ ሀለወ፡ ሥጋ፡ ዚአክሙ፡ ዘለብሶ፡ ፈጣሬ፡ ኵልክሙ፡ ወኵልነ፡ መላእክት፨ ወአንትሙሰኬ፡ ትክሉ፡ ዓሪገ፡ መልዕልተ፡ ኪሩቤል፡ ወሱራፌል፡ ኀበ፡ ሀለወ፡ ለባሴ፡ ሥጋክሙ፡ ከመ፡ ትርፍቁ፡ ምስሌሁ፨ እስመ፡ ኢይትሔሰው፡ ቃሉ፡ ዘተብህለ፡ | እምወልድ፡ ለኀበ፡ አብ፡ ኵሎሙ፡ እለ፡ አምኑ፡ ብየ፡ ይኩኑ፡ ከማነ፨ ከመ፡ አሐዱ፡ ንሕነ። በከመ፡ አንተ፡ አብ፡ ብየ፡ ምስሌየ፡ ወአነሂ፡ ብከ፡ ምስሌከ፨ ከመ፡ እሙንቱሂ፡ ይኩኑ፡ አሐደ፡ ከማነ፡ ከመ፡ አሐዱ፡ ንሕነ፡ ከመ፡ ያእምር፡ ዓለም፡ ከመ፡ አንተ፡ ፈነውከኒ፨ ወእፈቅድ፡ ከመ፡ ይርአዩ፡ ስብሐትየ፡ ዘወሀብከኒ፨ ዘሀሎ፡ ምስሌከ፡ እምቅድመ፡ ይትፈጠር፡ ዓለም፨ እስመ፡ አነሂ፡ አፍቀርክዎሙ፡ በከመ፡ አንተ፡ አፍቀርከኒ፨ ዝንቱኬ፡ ቃል፡ ዘየዓርገክሙ፡ መልዕልተ፡

folio : 66


back to top

| | ኪሩ ቤል፡ ወሱራፌል፡ ኀበ፡ ሀለወ፡ ለባሴ፡ ሥጋክሙ፡ ወዓቃሜ፡ ኪዳን፡ ምስሌክሙ፡ ዘተካየድክሙ፡ ለእለ፡ ትገብሩ፡ ፈቃዶ፡ ከመ፡ ተሀልው፡ ኀበ፡ ሀለወ፨ ወከመ፡ ትንበሩ፡ ኀበ፡ ነበረ፨ ወሶበሂ፡ ትሰምዕ፡ እምአፈ፡ ጳውሎስ፡ እንዘ፡ ይብል፡ እስመ፡ አኮ፡ እመላእክት፡ ዘተወክፈ፡ ኢይምሰልክሙ፡ ዘመነነ፡ ርኢ፡ ዘከመ፡ ገብረነ፡ ፈጣሪነ፡ በዘከመዝ፡ አርአያ፡ ወበዘከመዝ፡ ሱራሔ፡ ስነ፡ ወበዘከመዝ፡ ፀዳለ፡ ብርሃን፡ ዘኢይትሔለይ፡ ክብሩ፡ ወዘንተሰ፡ ዘይቤ፡ ጳውሎስ፡ አኮ፡ በእንተ፡ | መንኖትነ፨ አላ፡ በእንተ፡ እመ፡ መለኮት፨ እስመ፡ ሀለው፡ እለ፡ ይብልዋ፡ ለእግዝእትነ፡ ማርያም፡ ወረደት፡ እምኃይላት፡ ወኢኮነት፡ እምዘርአ፡ አዳም፨ ወዘንተኬ፡ ሕሊናሆሙ፡ ከመ፡ ያብጥል፡ ይቤ፡ እስመ፡ አኮ፡ መላእክተ፡ ዘተወክፈ፨ አላ፡ እምዘርአ፡ አብርሃም፡ አልዓለ፡ እስመ፡ እምዘርአ፡ አብርሃም፡ ይእቲ፡ እግዚእትነ፡ ማርያም፡ ወዘንተ፡ እንዘ፡ ይብልዎ፡ በረቀ፡ በቅድሜሁ፡ አርአያ፡ ስብሐቲሁ፡ ለእግዚአብሔር፡ መልዕልተ፡ ኪሩቤል፡ ወሱራፌል። ወአንበልበለ፡ ብርሃነ፡ ለንጳስ፨ | | ወአርአያሆሙኒ፡ ለእልክቱ፡ ኪሩበውያን፡ ግሩም፡ ፈድፋደ፡ ወመደንግፅ፡ ወቦሙ፡ ሰረገላ፡ ወመትሕቴሆሙ፡ ዘሀሎ፡ ይሰመይ፡ ጌልጌላ፨ ወይፀውሮሙ፡ ምስለ፡ ኃይል፡ ዓቢይ፨ በኀበ፡ ሖሩ፡ የሐውር፡ ርቱዓ፡ ከመ፡ መንኰራኵር፨ ወቦሙ፡ ክንፍ፡ ዘእሳት፡ በበ፮ቱ፡ ፮ቱ። በክልኤቱ፡ ክንፍ፡ ይከድኑ፡ ገጾሙ፡ ወበክልኤቱ፡ ክንፍ፡ ይከድኑ፡ እግሮሙ። ወበክልኤቱ፡ ክነፊሆሙ፡ ይሰሩ፡ ኀበ፡ ዘፈቀደ፡ ይፄዓን፡ ዲቤሆሙ፡ እግዚአ፡ ኃይል፡ ስሙ፡ እንዘ፡ ይፀውሩ፡ ሰረገላ፡ ዘነድ፡ ዘቦ፡ ፬ቱ፡ መዓዝን፡ | ወሎሙኒ፡ ቦሙ፡ ፬ቱ፡ ገጽ፡ ለለ፩፡ እምኔሆሙ። ወመልዕልቲሆሙኒ፡ ለእሙንቱ፡ ኪሩባውያን፡ ሰማይ፡ ስፉሕ፡ ዘኅብረ፡ በረድ። ወለዘይነብር፡ ዲቤሁ፡ ይመስል፡ ኅብሩ፡ ከመ፡ ዕንቈ፡ ኢያሰጲድ፡ ወሰርዲኖ። ወይወፅእ፡ እምውእቱ፡ ሰረገላ፡ ቃል፡ ዓቢይ፡ ከመ፡ ቃለ፡ ማይ፡ ብዙኅ፡ ወከመ፡ ቃለ፡ ነጐድጓድ፡ ጽኑዕ፨ ወይወፅእ፡ ካዕበ፡ ንጥረ፡ መብርቅ፡ መፍርህ፡ ወመደንግፅ። ወፀዓዕ፡ ግሩም። ወዘንተ፡ ርእዮ፡ ብፁዕ፡ ላሊበላ፡ ወድቀ፡ በገጹ። እስመ፡ ኢይክል፡ ርእዮቶ፡ ወነጽሮቶ፡ ወኢርእየ፡

folio : 67


back to top

| | እምቅድመ፡ ዝንቱ፡ ዘከመዝ፡ መፍርሃ፡ ወመደገግፀ፨ ወእንዘ፡ ሀለወ፡ ብፁዕ፡ ላሊበላ፡ ወዲቆ፡ በገጹ፡ እስመ፡ ስዕነ፡ ተዓግሦ፡ እምአርአያ፡ ስብሐቲሁ፡ ለእግዚአብሔር፨ ወመጽአ፡ ቃል፡ እመልዕልተ፡ ኪሩቤል፡ ዘይብል፡ ይትነሣእ፡ ላሊበላ፡ ወመጽአ፡ አሐዱ፡ እምሱራፌል፡ ወአንሥኦ፡ ወይቤሎ፡ ቁም፡ ወአጽንዕ፡ ልበከ፡ ኦብእሲ፡ ዘሰሐበተከ፡ ሐብለ፡ ጥበብ፡ በፍቅራ፡ ወአብጽሐተከ፡ እስከ፡ ነጽሮ፡ ዝንቱ፡ ምሥጢር፡ ከመ፡ ትነጽር፡ ኅቡአቶን፡ ለኵሎን፡ ሰማያት፡ ወክብረ፡ እልክቱኒ፡ | መላእክት፡ እለ፡ ሀለው፡ በበሰማዩ፡ እንዘ፡ ይትዌሰክ፡ ክብረ፡ ፬፡ እምአሐዱ፡ እስከ፡ በጻሕከ፡ ዝየ፡ ወርኢከ፡ አርአያ፡ ስብሐቲሁ፡ ለእግዚአብሔር፨ ወክብረ፡ እልክቱኒ፡ ኪሩባውያን። ወእምድኅረ፡ ነበቦ፡ ዝኩ፡ ሱራፌል፡ መጽአ፡ ቃል፡ እመልዕልተ፡ ሰማይ፡ ዘኅብረ፡ በረድ፡ ወይቤሎ፡ ለብፁዕ፡ላሊበላ፡ ናሁ፡ አዕተትኩ፡ ፍርሃተ፡ እምኔከ። ወአንብር፡ ልበከ፡ ውስተ፡ ኵሉ፡ ዘእነግረከ፨ ወናሁ፡ ርኢከ፡ ምሥጢራተ፡ ሰማይ፡ ወክብሮሙኒ፡ ለመላእክት። ወድምፀ፡ ስብሐቶሙኒ፨ | | ወአሥምር፡ ልበከ፡ በቅድሜየ፨ ወኩን፡ ንጹሐ፡ ወትጉሃ፨ ከመ፡ ትንሣእ፡ ሜላተ፡ ብርሃን፡ ንጹሐ፡ ዘየዓቢ፡ ብርሃን፡ እምኵሎሙ፡ ብርሃናት፡ ዘርኢከ፨ አነ፡ ውእቱ፡ እግዚአብሔር፡ ርኁቀ፡ መዓት፡ ወብዙኃ፡ ምሕረት፡ ወጻድቅ። ዘእትናገረከ፡ እመልዕልተ፡ ኪሩቤል፡ ሕያዋን፡ እስመ፡ አኮ፡ ዘእትናገረከ፡ በከመ፡ ተናገርክዎ፡ ለሙሴ፡ እምአምሳለ፡ ኪሩቤል፡ እለ፡ ኢይትሐወሱ፡ ዘተገብረ፡ እምአምሳሊሆሙ፡ መልዕልተ፡ ምስሐል፡ በውስተ፡ ደብተራ፡ መርጡል፡ ቀዳሚት፨ ናሁ፡ | እትናገረከ፡ በከመ፡ ትሬኢ፡ እምዲበ፡ ኪሩቤል፡ ሕያዋን፡ እለ፡ ያንሶስው፡ በውስተ፡ አርያም፡ ወበውስተ፡ ኵሉ፡ ኀበ፡ ዘእፈቅድ፨ ወክሥት፡ እዝነ፡ ልብከ፡ ወለቡ፡ ዘአርአየከ፡ ከመ፡ ትግበር፡ ሊተ፡ ቤተ፡ መቅደሰ፡ በዲበ፡ ምድር፡ በዘቦቱ፡ ኣኃድር፡ ም{ስለ፡} ሰብእ። ወበዘቦቱ፡ እትቄደስ፡ እምአፈ፡ ሕዝብየ፡ እለ፡ ኃረይኩ፡ እለ፡ ይቄድሱ፡ ስምየ፡ እለ፡ ለብሱኒ፡ በሃይማኖት፡ እለ፡ ይጼውዑኒ፡ ወይብሉኒ፡ አቡነ፡ ዘበሰማያት፨ እስመ፡ አነ፡ ወለድክዎሙ። ወአንተሂ፡ ለቡ፡ ከመ፡

folio : 68


back to top

| | ትግበር፡ በከመ፡ አርአይኩከ። በከመ፡ ገብረ፡ ሊተ፡ ደብተራ፡ ሙሴ፡ መእመንየ፨ በከመ፡ አርአያ፡ ዘአርአይክዎ፡ በደብረ፡ ሲና፡ አርአያሃ፡ ለደብተራ፡ ቀዳሚት። ከማሁ፡ ገብረ፡ በከመ፡ ኵሉ፡ ዘአርአይክዎ። ወአንተሂ፡ ለቡ፡ ወጠይቅ፡ ወዑቅ፡ ከመ፡ ትግበር፡ በከመ፡ አርአይኩከ። ወዘአርአየከሰ፡ አኮ፡ በከመ፡ አርአይክዎ፡ ለሙሴ፨ ወአኮ፡ በከመ፡ ገብረ፡ ሙሴ፡ ዘትገብር፡ ሊተ፡ መቅደስየ፨ ሙሴሰ፡ ገብረ፡ ሊተ፡ ደብተራ፡ በዕፅ፡ ወበአጌያት፡ ወአዕማዲሁኒ፡ ዘዕፅ፨ | ወምዕማዲሁኒ፡ ወሠራዊቲሁኒ፡ ዘዕፅ፡ ወመክደናኒ፡ ዘሠቅ፡ እንተ፡ ላዕሉ፨ ወአንተሰ፡ አኮ፡ ዘተኃሥሥ፡ ዕፀ፡ ለአዕማድ፡ ወለምዕማዱ፡ ወለሠርዌሁ፨ ወዘንተ፡ ብሂሎ፡ አርአዮ፡ አብያተ፡ ዓቢያተ፡ ዘእምአሐቲ፡ ዕብን፡ ወኊልቆንሰ፡ ለእማንቱ፡ አብያተ፡ ዘአርአዮ፡ ፲ እማንቱ፨ ወግብረቶንሰ፡ ዘዘ፡ ዚአሁ፡ ኀበሪሆን፡ ወዘዘ፡ ዚአሁ፡ አርአያሆን፡ ቦ፡ እንተ፡ ሙባኦን፡ ፀባብ፡ ወቦ፡ እንተ፡ ውሥጦን፡ ርኅብ፨ ወቦ፡ እንተ፡ ሙባኦን፡ ርኅብ፡ ወእንተ፡ ውሥጦን፡ ፀባብ፨ | | ወዓየራተ፡ ቅጽሮንሂ፡ ነዋኅ፡ ጥቀ፡ ወልዑል። ወኑኃቶንሂ፡ ለእሎን፡ አብያተ፡ ክርስቲያናት። ቦ፡ እምኔሆን፡ ዘየዓቢ፡ ካልእ፡ እምካልኡ። ወኀበሪሆንሂ፡ ዘዘ፡ ዚአሁ። ቦ፡ እምኔሆን፡ እንተ፡ ያቅየሐይሕ፡ ወቦ፡ እምኔሆን፡ ዘኀበሪሁ፡ ከመ፡ ዕብነ፡ በልቴት። ወቦ፡ እምኔሆን፡ ዘጋስ፡ ኅበሪሆን። ወቦ፡ እምኔሆን፡ ዘኅብረ፡ ሐመደ፡ ክቦ፡ ኅበሪሆን። ወቦ፡ እምኔሆን፡ ዘዓቢይ፡ ኑኃ፡ ግደሚሆን። ለአሐቲ፡ እምአሐቲ፡ የዓቢ፡ ዓዲ፡ ኑኃ፡ ሥሮን፨ | ወዘንተ፡ ኵሎ፡ እምድኅረ፡ አርአዮ፡ ለላሊበላ፡ ዝኩ፡ እግዚአ፡ ኃይል፡ ዘይነብር፡ ውስተ፡ ሰማይ፡ ስፉሕ፡ ዘኅብረ፡ በረድ። ዘሀሎ፡ መልዕልተ፡ ርእሶሙ፡ ለ፬ቱ፡ እንስሳ፡ እለ፡ እሙንቱ፡ ኪሩባውያን፨ ይቤሎ፡ ዑቅኬ፡ አእምር፡ ወለቡ፡ ከመ፡ ትግበር፡ ሊተ፡ እሎንተ፡ አብያተ፡ ክርስቲያናት፨ በዘቦቶን፡ እትቄደስ፡ ወእሲባሕ፡ በዲበ፡ ምድር። እስመ፡ ሀለው፡ ሕዝብ፡ እለ፡ ኃረይኩ፡ እለ፡ ያዓርጉ፡ ሊተ፡ በውስቴቶን፡ መሥዋዕተ፡ ወቍርባነ፡ ወዕጣነ፡ ዘመዓዘ፡ ሠናይ፨ ወአንተሂ፡

folio : 69


back to top

| | አእምር፡ ከመ፡ ትግበር፡ በከመ፡ አርአይኩከ፨ ወአኮ፡ ዘአሐዱ፡ ገጽ፡ ወአኮ፡ ዘአሐዱ፡ ኅብር። ዘአርአይኩከ፡ አላ፡ ዘዘ፡ ዚአሁ፡ ኅበሪሆን፡ ለእማንቱ፡ አብያተ፡ ክርስቲያናት፨ ወአንተሂ፡ ደዮን፡ ውስተ፡ ልብከ፡ ዘከመ፡ ርኢከ፡ እስመ፡ ቦ፡ እምኔሆን፡ ዘየዓቢ፡ አምጣኒሆን፡ በኑኅኒ፡ ወበግድምኒ፡ ወሠሮንሂ፡ የዓቢ፡ ለአሐቲ፡ እምአሐቲ። ወዑቅ፡ አንተሂ፡ ከመ፡ ትግበር፡ በከመ፡ አርአይኩከ። በበ አምጣኒሆን፡ እንዘ፡ ኢትዌስክ፡ ኢዲበ፡ ኑኆን፡ ወኢዲበ፡ ግድሚን፡ ወኢዲበ፡ ሠሮን፨ አላ፡ | በከመ፡ ርኢከ፡ ግበር፡ እስመ፡ ብዑድ፡ ውእቱ፡ ዘአርአይኩከ፡ እስመ፡ እምአሐቲ፡ ዕብን፡ ርኢከ፡ እንዘ፡ ይወፅአ፡ እሎን፡ ዓሠርቱ፡ አብያተ፡ ክርስቲያት፨ ወአልቦ፡ አሕባል፡ ዘትፈቅድ፡ ለጠፈሮን። ወኢዕፀ፡ ለመዋጽሕቲሆን፨ ወኢሠርዌ፡ ለእዕማዲሆን፡ ወለምዕማዶን፡ ወኢፅቡረ፡ ለመዓዝንቲሆን። እስመ፡ በአሐቲ፡ ዕብን፡ ትፌጽም፡ ኵሎ፡ መፍቅደ፡ ቤተ፡ መቅደሶን። ወህላዌሆንሰ፡ ለእሎን፡ አብያተ፡ መቅደስ፡ ዘአርአየከ፡ ውስተ፡ ልበ፡ ምድር፡ ሀለዋ፡ እስከ፡ ይእዜ፡ | | ወይሄልዋ፡ ካዕበ፡ ውስተ፡ ልበ፡ ምድር፡ እምይእዜ፡ እስከ፡ ይትከሠታ፡ በእደዊከ። ወሶበ፡ ርእየ፡ ብፁዕ፡ ላሊበላ፡ ኵሎ፡ ዘአርአዮ፡ ወሶበ፡ ሰምዓ፡ ኵሎ፡ ዘነገሮ፨ ወይቤሎ፡ ለእግዚአብሔር፡ አብሐኒኬ፡ ኦእግዚኦ፡ ከመ፡ እንብብ፡ በቅድሜከ፡ ለእመ፡ ይደልወኒ፡ በከመ፡ ረሰይከኒ፡ ድልወ፡ ከመ፡ እርአይ፡ ምሥጢረ፡ ሰማያቲከ፨ ወክብረ፡ መላእክተከ፡ ወስብሐቶሙኒ፡ ዘይትፌኖ፡ ለከ፡ እምኀቤሆሙ፡ እምቀዳሚት፡ ሰማይ፡ እስከ፡ ሳብዓት፡ እንዘ፡ ይትዌሰክ፡ ብርሃን፡ በዲበ፡ ብርሃን፡ | ለለ፡ ሰማዩ፨ ወእምኵሉሰ፡ ዘየዓቢ፡ ረሰይከኒ፡ ከመ፡ አርአይ፡ ስብሐቲከ፡ መልዕልተ፡ ኪሩቤል፡ እንዘ፡ ያንበለብል፡ ፀዳለ፡ ስብሐቲከ፨ ወይእዜኒ፡ አብሐኒ፡ እግዚኦ፡ ከመ፡ እንብብ፡ በቅድሜከ፨ ወይቤሎ፡ እግዚአ፡ ኃያላን፡ ዘይነብር፡ ላዕለ፡ ሰረገላ፡ ኪሩቤል፡ ንብብ፡ እስመ፡ ረከብከ፡ ሞገሰ፡ በቅድሜየ። በከመ፡ ረከበ፡ ሙሴ፡ ገብርየ፨ ዘተናገርክዎ፡ ገጸ፡ በገጽ፡ ከመ፡ ዘይትናገር፡ ብእሲ፡ ምስለ፡ ቢጹ። እስከ፡ ተሰብሐ፡ ኅብረ፡ ገጹ፡ እምነጽሮ፡ ምዕዛርየ፨ ወዘንተ፡ ሰሚዖ፡ ብፁዕ፡

folio : 70


back to top

| | ላሊበላ፡ ሰገደ፡ ቅድመ፡ ገጹ፡ ለአኃዜ፡ ኵሉ፨ ወአኃዘ፡ ይንብብ፡ ወይቤ፡ እግዚኦ፡ አነኑ፡ እክል፡ ከመ፡ እግበር፡ ዘንተ፡ ኦጽራሐ፡ መንግሥትከ፡ ዘአርአይከኒ፡ ዓሠርተ፡ አብያተ፡ እምአሐቲ፡ ኰኵሕ። ወግብረቶንሰ፡ ዘዘ፡ ዚአሆን፡ ወሠናያት፡ እማንቱ፡ ጥቀ። ወይኤድማ፡ ለአዕይንት፡ ወይሔውዛ፡ ለልብ። እስመ፡ አዕማዶንሂ፡ ኢኮነ፡ ዘዕፅ፡ ወአቅማሪሆንሂ፡ ኢኮነ፡ ዘዕፅ፡ አኅባለ፡ ጠፈሮንሂ፡ አልቦ፡ ላዕሌሆን፡ ወመሬትሂ፡ አልቦን። እፎኬ፡ እክል፡ አነ፡ ፃዕፃዕ፡ ዘከመዝ፡ አብያተ፡ | እግበር። ወዘከመ፡ እፎ፡ ውእቱ፡ መብዓለ፡ ምግባሪሆን። በመፍጽሕኑ፡ አው፡ በጕድብ፡ ይትገበራ፡ ዘከመ፡ እሎን፡ አብያተ፡ ክርስቲያናት፡ ዘአርአይከኒ፡ እንበለ፡ ዕፅ፡ ወመሬት። ወበአይ፡ ኃይል፡ ወሥልጣን፡ ካዕበ፡ ዘእክል፡ ገቢረ፡ ዘከመዝ። ወተሠጥዎ፡ እግዚእ፡ ወነበቦ፡ እመልዕልተ፡ ኪሩቤል። ወይቤሎ፡ ገቢረሰ፡ አኮ፡ አንተ፡ ዘትገብር፡ ሊተ፡ በኃይለ፡ እጓለ፡ እመሕያው። አላ፡ አነ፡ ውእቱ፡ ገባሪሆን፡ ወኬንያሆን፡ {ሐ}ናጺሆን፡ ወነዳቂሆን፡ ወጣኒሆን፡ ወፈጻሚሆን። ወባሕቱ፡ | | በምክንያተ፡ ተልእኮ፡ በእንቲአሆን፡ ትሰመይ፡ አንተ፡ ገባሪሆን፡ ወአርአዮ፡ ካዕበ፡ ሐፃውንተ፡ በዘቦቶን፡ ይትገበር፡ አርአያሆን፡ ለእማንቱ፡ አብያተ፡ ክርስቲያናት፡ ዘርእየ፡ በውስተ፡ ሰማይ፡ ሳብዕ። ወብፁዕ፡ ላሊበላ፡ ሰሚዖ፡ ኵሎ፡ ዘነበቦ፡ እግዚእ፡ ኃያላን፡ ወርእዮ፡ ኵሎ፡ ዘአርአዮ፡ ይቤ፡ ፈቃድከ፡ ለይኩን፡ እግዚኦ፡ ወአኮ፡ ፈቃደ፡ ዚአየ፡ ወባሕቱ፡ ለይርድአኒ፡ ኃይልከ፡ እስመ፡ ፅቡስ፡ አነ። ወይቤሎ፡ መስተፅዕነ፡ ኪሩቤል፡ ኢትበል፡ ፅቡስ፡ አነ፡ ወኢትተክዝ፡ በእንተዝ፡ | ወአነሂ፡ አምላክከ፡ ኢይፈቅድ፡ ኃይለ፡ ፈረስ፡ ወኢይሠምር፡ በአቊያ{ጸ}፡ ብእሲ። እሠምር፡ በእለ፡ ይፈር{ሁኒ፨} ወበኵሎሙ፡ እለ፡ ይትዌከሉ፡ በምሕረትየ፡ ወዘንተ፡ ብሂሎ፡ ሰፍሐ፡ የማኖ፡ ወረሰየ፡ መልዕልተ፡ ርእሱ፡ ከመ፡ እንተ፡ ተድባብ። ወይቤሎ፡ ለብፁዕ፡ ላሊበላ፡ ናሁ፡ አንበርኩ፡ እዴየ፡ ዲበ፡ ርእስከ፡ ወአልበስኩከ፡ ኃይለ፡ ወኩን፡ ጽኑዓ፡ ከመ፡ ዕብነ፡ አድማስ፡ ለነዲቀ፡ ቤትየ። ወለገድልኒ፡ ካዕበ፡ ከመ፡ ኢይማዕከ፡ ጸላኢ። ኢተዓውቀተከኑ፡ ኃይል፡ ዘለበስከ፡

folio : 71


back to top

| | ኦብእሲ። ወይቤሎ፡ ብፁዕ፡ላሊበላ፡ ናሁ፡ አቅነትከኒ፡ ወልታ፡ ጽኑዕ፡ ኦእግዚእየ። ወእለ፡ መኑ፡ ካዕበ፡ እለ፡ ይትለአኩኒ፡ ውስተ፡ ሕንጻ፡ እሎን፡ አብያተ፡ ክርስቲያናት። ወይቤሎ፡ እግዚአብሔር፡ ብዙኃን፡ ሀለው፡ እምነ፡ ሰብእ፡ እለ፡ ይትለአኩከ። ወእመልዕ፡ ላዕሌሆሙ፡ ኃይለ፡ መንፈስየ። ወአኃሪ፡ እምኔሆሙ፡ ሊቃነ፡ ጠበብት፡ ከመ፡ ቤሴላኤል፡ ወኤልያብ፡ ሊቃነ፡ ጠበብት፡ እለ፡ አርድእዎ፡ ለሙሴ፡ በውስተ፡ ደብተራ፡ ኦሪት፡ እንተ፡ ተገብረት፡ ሊተ፡ በዘአኃድር፡ ምስለ፡ ሰብእ፡ | ወለከሰ፡ አኮ፡ ሰብእ፡ ጠበብት፡ ባሕቲቶሙ፡ ዘይረድኡከ፡ ለሕንጻ፡ ውእቱ፡ ማኅፈድ። አላ፡ መላእክትኒ፡ ኢይርኅቁ፡ እምኔከ፡ እንዘ፡ ይትራድኡከ። ወባሕቱ፡ ኢያስተርአዩ፡ ለሰብእ፡ ወለከሰ፡ ኢይትኃብኡከ። ወይቤላ፡ ብፁዕ፡ ላሊበላ፡ ለይኩን፡ እግዚኦ፡ በከመ፡ ትቤለኒ። ወይቤሎ፡ ካዕበ፡ ዝኩ፡ ዘይነብር፡ ዲበ፡ ሰረገላ፡ እሳት፡ ዘይነድድ። ወዘይፄዓን፡ ዘባነ፡ ሰማይ፡ ስፉሕ፡ ዘኅብረ፡ በረድ። ስማዕ፡ ኦምእመንየ፡ ወኢይምሰልከ፡ በእንተ፡ አብያተ፡ ክርስቲያናት፡ ዘትፃሙ፡ | | በከ፨ አላ፡ መድኃኒተ፡ ብዙኃን፡ ይከውን፡ በውስቴቶን። ወብዙኃን፡ ቦን፡ ይድኅኑ፡ ተፀዊኖሙ፡ ወተአሚኖሙ፡ በኃይለ፡ ጸሎትከ፡ ለገባሪሆን። እስመ፡ ያስተፌሥሐ፡ ለዘይኔጽሮን፡ አብያተ፡ ክርስቲያናት፡ ዘሀለዎን፡ ይትከሠታ፡ በእደዊከ። ወብዙኃን፡ ሕዝብ፡ ይሠገሩ፡ በመቃጥነ፡ ፍቅርየ፡ በእንቲአሆን፡ ወየአኵቱኒ፡ ወያፈደፍዱ፡ ሰብሐትየ፡ እንዘ፡ ይብሉ፡ ስብሐት፡ ለእግዚአብሔር፡ ለዘከሠተ፡ እሎንተ፡ አብያተ፡ ክርስቲያናት፡ እምአሐቲ፡ ዕብን፡ በእደ፡ መሬታውያን፡ | መንክር፡ እግዚአብሔር፡ በላዕለ፡ ቅዱሳኒሁ። አምላከ፡ እስራኤል፡ ውእቱ፡ ይሁብ፡ ኃይለ፡ ወጽንዓ፡ ለሕዝቡ። ወይትባረክ፡ እግዚአብሔር። ወከመዝ፡ እትአኰት፡ ወእሴባሕ፡ እምእለ፡ ይኔጽሩ፡ ማኅፈዳተ፡ መቅደስየ፡ ዘሀለዋ፡ ያስተርእያ፡ ዲበ፡ ምድር፡ እምአሐቲ፡ ኰኵሕ። ወአነሂ፡ ናሁ፡ {አቀውም፡ ምስሌከ፡ ኪዳነ፡ ዮም፡ በዛቲ፡ ዕለት፨} ኵሉ፡ ዘይበጽሕ፡ ውስተ፡ ማኅፈዳት፡ ዘሀለወከ፡ ትሕንጾን፡ ወይትጋነይ፡ በውስቴቶን። እንዘ፡ ይትአመን፡ በኃይለ፡ ጸሎትከ፡ ወይዜክረከ፡

folio : 72


back to top

| | ወይብለከ፡ መሐረኒ፡ እግዚኦ፡ ወተሠሃለኒ። ወኢትሚጥ፡ ገጸከ፡ እምኔየ። በእንተ፡ እላንቱ፡ ማኅፈዳተ፡ ምሥጢራቲከ፡ ዘአርአይከ፡ በዲበ፡ ምድር፡ እንበለ፡ ዕፅ፡ ወመሬት። ወዘእንበለ፡ አህባል፡ ወመዋጽሕት። ወበእንተ፡ ብፁዕ፡ ላሊበላ፡ ገብርከ፡ ዘበእደዊሁ፡ ከሠትከ፡ ዘንተ፡ መንክረ፡ በእንተ፡ ዘተልእከከ፡ ለሕንጻሆን፡ ወበእንተ፡ ፃማሁ፡ ወበእንተ፡ ሐፉ፡ ወድካሙ፡ ወበእንተ፡ ሩጸታቲሁ፡ ፍሉሕ፡ {ወ}በእንተ፡ ምግባራቲሁ፡ ንጹሕ፡ ወዘንተ፡ እንዘ፡ ይብል፡ ሶበ፡ ጸለየ፡ በርትዕት፡ | ሃይማኖት፡ ወበሕሊና፡ ንጽሕት። ወበልብ፡ ጽሪት። ዘአልቦ፡ ጽልሑት፡ ወዘአልቦ፡ ቂም፡ ወዘአልቦ፡ ኑፋቄ። ወበተአምኖ፡ ኃጣውእ፡ ላዕለ፡ እደ፡ ካህን፡ አነ፡ እሰምዖ፡ ጸሎቶ። ወእትዌከፎ፡ ስእለቶ፡ ከመ፡ መዓዘ፡ ሠናይ፡ ዘውስተ፡ እደዊሆሙ፡ ለሊቃነ፡ ካህናት፡ ሰማያውያን። እለ፡ ይከውን፡ ጸሎተ፡ ኵሎሙ፡ ቅዱሳን። መሃይምናን፡ እምዲበ፡ ምድር፡ ውስተ፡ ማዕጠንቶሙ፡ ወእሰሪ፡ ሎቱ፡ ኵሎ፡ ኃጢአቶ፡ ለእመ፡ ኮነ፡ ከመ፡ ኳኳ፡ አፀዓድዎ፡ ከመ፡ በረድ። | | ወለእመ፡ ኮነ፡ ከመ፡ ለይ፡ አነጽሖ፡ ከመ፡ ፀምር፡ ወእሬስዮ፡ ንጹሐ፡ ከመ፡ ዕለት፡ እንተ፡ ባቲ፡ ተወልደ፡ እምከርሠ፡ ጥምቀት። ወእሁበከ፡ ለከ፡ መጽሐፈ፡ ዕዳሁ፡ ከመ፡ ትሥጥጦ፡ በእደዊከ። ወአነውኅ፡ ላዕሌሁ፡ መዋዕለ፡ በዲበ፡ ምድር። ወእባርክ፡ ሎቱ፡ ቤቶ፡ ወብእሲቶ፡ ወውሉዶ፡ ወገራውሂሁ። ወኵሎ፡ ጥሪቶ፡ ዘአጥረየ። ዘአፍአኒ፡ ወዘውሥጥኒ፡ ወአስተባዝኅ፡ ሎቱ፡ መራዕየ፡ እንስሳሁ። ወአመ፡ ከዓብት፡ ሎቱ፡ ክምረ፡ ዓውደ፡ እክሉ። ወአነ፡ እባልሖ፡ | እመሥገርት፡ ነዓዊት፡ ወእምነገር፡ መደንግፅ። ወእጼልሎ፡ በገበዋትየ። ወእኤዝዞሙ፡ ለመላእክትየ፡ ከመ፡ ይዕቀብዎ፡ በኵሉ፡ ፍናዊሁ። ወበእደዊሆሙ፡ ከመ፡ ያንሥእዎ፡ ከመ፡ ኢትትዓቀፍ፡ በዕብን፡ እግሩ። ወእሁቦ፡ ሥልጣነ፡ ከመ፡ ይኪድ፡ ከይሴ፡ ወአቃርብተ፡ ወኵሎ፡ ኃይለ፡ ጸላኢ። ወኢይመውዖ፡ ፀር። ወእመቦ፡ ዘተዋቀሦ፡ በጕሕሉት፡ አድኅኖ፡ አነ፡ እምዝንቱ። ወኵሉ፡ ዘጌሠ፡ ውስተ፡ መርጡልከ፡ እንዘ፡ ያንሶሱ፡ በእገሪሁ፡ ወእሬስዮ፡ ከመ፡ ያንሶሱ፡ ውስተ፡ አዕፃዳተ፡

folio : 73


back to top

| | ፲ ገነተ፡ ኤዶም፡ ወውስተ፡ መርኅባ፡ ለኢየሩሳሌም፡ ሰማያዊት። ወውስተ፡ አዕፃዳተ፡ መንግሥትየ፡ ጽጐ፡ ሀገራ፡ ዘይመስል፡ ማኅወ። ወፀዳለ፡ ብርሃና፡ ይበዝኅ፡ እምአእላፍ፡ ብርሃነ፡ ፀሐይ፡ ወእሁቦ፡ መጽሐፈ፡ ብርሃን፡ ኅትምተ፡ ዘኢየአምራ፡ ካልእ፡ ዘእንበለ፡ ዘነሥአ። ወለኵሉ፡ ዘያበውእ፡ መባአ፡ እመኒ፡ ኅዳጠ፡ ወእመኒ፡ ብዙኃ፡ እትዌከፍ፡ እምነ፡ እዴሁ፡ ወእትሜጠዎ፡ ሰፊሕየ፡ የማንየ፡ ኵሎ፡ መባኣ፡ ዘያመጽኡ፡ ውስተ፡ ማኅፈደ፡ መቅደስየ፡ ዘይትገበር፡ በእደዊከ። እመኒ፡ ቅብዓ፡ | አብአ፡ እጠልል፡ ርእሶ፡ በቅብዓ፡ ሣህልየ፡ ወኢይስሕክ፡ ሥጋሁ፡ እስከ፡ ለዓለም። ወኢይጠፍዕ፡ ማኅቶተ፡ ብርሃኑ፡ እምቅድመ፡ ገጹ። ወይትቄበለኒ፡ በፍሥሐ፡ አመ፡ ዳግም፡ ምጽአትየ። ምስለ፡ ደናግል፡ ጠባባት፡ እለ፡ ኢጠፍዓ፡ መኃትዊሆን። ወኢይረክቦ፡ ጽልመት፡ ወኢይቀውም፡ አፍኣ፡ እምኆኅተ፡ መርዓየ፡ እንዘ፡ ይጐደጕድ፡ አንቀጸ፡ መንግሥትየ፡ ምስለ፡ ደናግል፡ አብዳት፡ እለ፡ ጠፍዓ፡ መኃትዊሆን። አላ፡ ይበውእ፡ ውስተ፡ ውሣጤ፡ ጽርሕ፡ ዘቤተ፡ መርዓ፡ ምስለ፡ ደናግል፡ ንጹሐት፡ እለ፡ ኢጠፍዓ፡ | | መኃትዊሆን፡ በነፋሰ፡ ኃጢአት። ወለእመኒ፡ አብአ፡ አጰርኬ፡ ስርናየ፡ እምእክለ፡ ገራውኂሁ፡ ውስተ፡ ቤተ፡ መቅደስየ፡ ዘአሐንጾን፡ በእደዊከ። እትዌከፎ፡ ከመ፡ መሥዋዕት፡ ሙሴ፡ ወከመ፡ መሥዋዕቱ፡ ለመልከ፡ ጼዴቅ። ወለእመኒ፡ አብአ፡ ዘኮነ፡ እምነ፡ አልባስ፡ አነ፡ እትዌከፎ፡ ከመ፡ ሰንዱነ፡ ዮሴፍ፡ በዘቦቱ፡ ከደነ፡ ሥጋየ፡ አውሪዶ፡ እምዲበ፡ መስቀል። ወበዘቦቱ፡ ገነዘኒ። አመ፡ ጥዕምኩ፡ ሞተ፡ በፈቃደ፡ ርእስየ፡ በእንተ፡ ፍቅረ፡ ዚአክሙ፡ ለሰብእ። ወለእመኒ፡ አብአ፡ ዘኮነ፡ እምነ፡ አፈዋተ፡ ዕጣን፡ እትዌከፎ፡ | ከመ፡ አፈዋተ፡ ኒቆዲሞስ፡ በዘቦቱ፡ ቀብዓኒ፡ ሥጋየ፡ በከመ፡ ሕገ፡ ሰብእ፡ ዘከመ፡ ይገብሩ፡ ወአፄኑ፡ ሎቱ፡ መዓዛሁ። ከመ፡ ፄና፡ ዕፍረታ፡ ለብእሲት፡ ዘቀብዓተኒ፡ በቢታንያ። ወእኤዝዝ፡ ከመ፡ ይዝክርዎ፡ በተዓይነ፡ ትጉሃን፡ ሰማያውያን። በከመ፡ አዘዝኩ፡ በእንተ፡ ይእቲ፡ ብእሲት፡ ከመ፡ ይዝክርዋ፡ ውስተ፡ ኵሉ፡ አጽናፈ፡ ዓለም፡ ኀበ፡ ተሰብከ፡ ወንጌለ፡ መንግሥትየ። ወከማሁ፡ እሬሲ፡ ከመ፡ ይትለዓል፡ ልዕልና፡ ዝክሩ፡ በኀበ፡ ኵሎሙ፡ ሰማያውያን፡ ወምድራውያን። ወአጠልል፡ ሎቱ፡ ቍርባኖ። ወእዜክር፡ ሎቱ፡

folio : 74


back to top

| | መሥዋዕቶ። ወዘንተ፡ ብሂሎ፡ እግዚአ፡ ኃያላን፡ ነዝኃ፡ ዲቤሁ፡ ቅብዓ፡ መንግሥት። ወይቤሎ፡ ናሁ፡ ቀባዕኩከ፡ ቅብዓ፡ መንግሥት፡ ከመ፡ ትንግሥ፡ ለሕዝብየ፡ እስከ፡ ትፌጽም፡ ማኅፈዳተ፡ ምሥዋዕየ፡ ወአገርር፡ ለከ፡ ፀረከ፡ እለ፡ በዓውድከ። ወለእመኒቦ፡ ዘተንሥአ፡ ላዕሌከ፡ ኢይክል፡ ይቁም፡ ቅድመ፡ ገጽከ። ወአነ፡ እወዲ፡ ፍርሃተ፡ ውስተ፡ ልበ፡ ኵሎሙ፡ እለ፡ የዓልውከ። ወዑቅ፡ አንተሂ፡ ከመ፡ ታዕትት፡ እምሕዝበ፡ መንግሥትከ፡ ኵሎ፡ ዓመፃ፡ ወግፍዓ። ወዘንተ፡ ኵሎ፡ ኪዳነ፡ ሰሚዖ፡ ብፁዕ፡ ላሊበላ፡ ሰገደ፡ ወዲቆ፡ በገጹ፡ በቅድመ፡ | እግዚአ፡ ኃያላን፡ ወይቤ፡ እግዚአ፡ እግዚእየ፡ ምንትኑ፡ አነ፡ ከመ፡ እኩን፡ ንጉሠ፡ ዲበ፡ ሕዝብከ፡ ዘአልብየ፡ አእምሮ። እስመ፡ ሕፁፀ፡ ልብ፡ አነ፡ ወኢይክል፡ ኰንኖቶሙ፡ በከመ፡ ይደሉ። ወነበቦ፡ እግዚአብሔር፡ ወይቤሎ፡ ትክልኑ፡ አፅርዖቶ፡ ለቃልየ፡ ዘወፅአ፡ እምአፉየ፡ ወዓቢይ፡ ትእዛዝየ። ወወድቀ፡ ካዕበ፡ ወይቤሎ፡ አኮ፡ ዘአዓቢ፡ ትእዛዘከ። አላ፡ እስመ፡ አእምር፡ ኅፀፀ፡ ልብየ፡ ወውኅደተ፡ አእምሮትየ፡ ዘነገርኩከ፡ ወፅበስየ። ወተሠጥዎ፡ ውእቱ፡ ዘይነብር፡ ላዕለ፡ ሰረገላ፡ መፍርህ፡ ወይቤሎ፡ አኮኑ፡ አነ፡ ቀደምኩ፡ አእምሮ፡ ኵሉ፡ | | ፍናዊከ፡ እምቅድመ፡ እፍጥርከ፡ ወእምቅድመ፡ እልሐኰ፡ በከርሠ፡ እምከ፡ ጠየቁ፡ ኣሰረ፡ ምሕዋርከ፡ ወአነ፡ ቀፃዕኩ፡ ኵሎ፡ መዳልወ፡ ግዕዝከ፡ ወረሰይኩከ፡ ምእመንየ፡ ወረከብኩ፡ ልበከ፡ ጽሩየ፡ ወዕሡረ፡ በሐብለ፡ ፈቃድየ። ወውዑየ፡ በእሳተ፡ ፍቅርየ። ወበእንተዝ፡ ቀባዕኩከ፡ ቅብዓ፡ ቅዱሰ፡ እስመ፡ እዴየ፡ ትረድአከ፡ ወመዝራዕትየ፡ ታጸንዓከ፡ ኢበቊዕ፡ ጸላኢ፡ በላዕሌከ፡ ወውሉደ፡ ዓመፃ፡ ኢይደግም፡ አሕምምተከ። ወእመትሮሙ፡ ለፀርከ፡ በቅድመ፡ ገጽከ። ወአኃሥሮሙ፡ ለጸላእትከ። ወሣህልየሰ፡ | ኢይከልዕ፡ እምኔከ። ወእትጋየጸ፡ ለዘይትጋየጸከ። ወእጸልኦ፡ ለዘጸልአከ፡ በአሐዱ፡ ፍና፡ ለእመ፡ ጸብዑከ፡ በሰብዑ፡ ፍናው፡ ይነትዑ፡ እምኔከ፡ ጸላእትከ፡ ወአሐዱ፡ እምነ፡ ሐራከ፡ ይሰድዶሙ፡ ለእልፍ። ወይሜምዑ፡ እምድምፀ፡ ቈፅል፡ ወይትነገፉ፡ እምግርማ፡ ዚአከ። ወአኮ፡ በአድርጎ፡ አፍራስ፡ ወኢበአብዝኆ፡ ሠራዊት፡ ወኢበአክብዶ፡ ኵናት፡ ወኢበአጽፍቆ፡ ወላትው፡ አላ፡ በስመ፡ ዚአየ፡ እረድአከ፡ አነ። እስመ፡ አእመርኩ፡ ወጠየቁ፡ ምግባሪከ። እስመ፡ አነ፡ ዘእፈትን፡ ልበ፡ ወኵለያተ። እምቅድመ፡ ሕሊና፡ ኵሎ፡

folio : 75


back to top

| | አእምር። ወእምቅድመ፡ ሕሊና፡ እፈትን። ወዘንተ፡ ብሂሎ፡ ለዝኩ፡ መልአክ፡ ለዘአዕረጎ፡ እምድር፡ ይቤሎ፡ እንዘ፡ ይብል፡ ናሁ፡ ረሰይኩከ፡ ወሤምኩከ፡ ከመ፡ ትኩን፡ ዓቃቢሁ፡ በኵሉ፡ መዋዕሊሁ። ወይቤሎ፡ ካዕበ፡ ለብፁዕ፡ ወለቅዱስ፡ ላሊበላ፡ ወአ ንተሂ፡ ኢትተክዝ፡ በይነ፡ መንግሥት፡ እስመ፡ አነ፡ በእንተ፡ ክብር፡ ኃላፊ፡ ዘእሠይመከ። አላ፡ በእንተ፡ አብያተ፡ ክርስቲያናት፡ እለ፡ ርኢከ፡ ከመ፡ ትሕንጸን፡ በእንተዝ፡ ቀባዕኩከ፡ ቅብዓ፡ መንግሥት። ወረሰይኩከ፡ መሲሐ፡ ለሕዝብየ። እስከ፡ ትፌጽሞን፡ ለእላንቱ፡ አብያተ፡ መቅደስየ። | እስመ፡ ለከ፡ ደለወከ፡ ከመ፡ ታወፅኦን፡ እምልበ፡ ምድር፡ በሥልጣነ፡ ዚአየ። ወአኮ፡ በጥበበ፡ እጓለ፡ እመሕያው። እስመ፡ ብዑድ፡ ውእቱ፡ እምጥበበ፡ ሰብእ። ወዘንተ፡ ብሂሎ፡ አዘዞ፡ ለመልአክ፡ ብርሃናዊ፡ ከመ፡ ያግብአ፡ ውስተ፡ ምድር፡ ወይሡጣ፡ ለነፍሱ፡ ውስተ፡ ሥጋሁ። ወዝንቱሰ፡ ኵሉ፡ ዘኮነ፡ በሠለስቱ፡ ዕለት፡ ውእቱ። ወዘርእየሂ፡ ምሥጢራተ፡ ሰማያት፡ ሰብዑ። ወክብረ፡ መላእክት፡ እለ፡ ሀለው፡ በበሰማዩ፡ እንዘ፡ ይትዌሰክ፡ ብርሃነ፡ ሰማይ፡ እምብርሃነ፡ ሰማይ። ወብርሃነ፡ መላእክት፡ እምብርሃነ፡ መላእክት። ወአርአያ፡ | | ስብሐቲሁኒ፡ ለእግዚአብሔር፡ መልዕልተ፡ ኪሩቤል፡ ዘነበቦ፡ እመልዕልቲሆሙ፡ እግዚአ፡ ኃይል። ወአመ፡ ሣልስት፡ ዕለት፡ ተመይጠ፡ ውስተ፡ ሥጋሁ፡ በእደ፡ መልአክ፡ ብርሃናዊ፡ ዘተአዘዘ፡ እምኅበ፡ እግዚአብሔር፡ ከመ፡ ያግብኦ፡ ውስተ፡ ሥጋሁ፡ እምአመ፡ መሠጦ። በከመ፡ ተንሥአ፡ እግዚኡ፡ እሙታን፡ አመ፡ ሣልስት፡ ዕለት፡ ወአኮ፡ ከመ፡ ዮናስ፡ ዘነበረ፡ ውስተ፡ ከርሠ፡ አንበሪ፡ ሠለሰ፡ መዋዕለ፡ ወሠሉስ፡ ለያልየ፡ በላህ፡ መሪር፡ ወበብካይ፡ ዕፁብ። አላ፡ ነበረ፡ ውስተ፡ ዓቢይ፡ ፍሥሐ፡ ውስተ፡ ዓፀደ፡ ትጉሃን፡ ወውስተ፡ አብያተ፡ ብርሃን፡ ከመ፡ | ኤርምያስ፡ ነቢይ፡ ዘርእየ፡ ምስጢራተ፡ ትንቢት፡ በእንተ፡ ርደቱ፡ ለእግዚእነ፡ እምሰማይ፡ ወበእንተ፡ ተመስሎቱ፡ ሰብአ፡ ወብፁዕሂ፡ ላሊበላ፡ በሣልስት፡ ዕለት፡ ተመይጠ፡ ዲበ፡ ምድር፡ ርእዮ፡ ወነጺሮ፡ ምሥጢራተ፡ ሰማይ፡ ወተቀቢዖ፡ ቅብዓ፡ መንግሥት። ወዓቂሞ፡ ኪዳነ፡ ምስለ፡ እግዚኡ፡ ወለቢዎ፡ ግብረ፡ ሕንጻሆን፡ ለአብያተ፡ ክርስቲያናት፡ ዘአርአዮ፡ ከመ፡ ይግበር፡ በከመ፡ ርእየ። ወእልክቱሰ፡ ሕዝብ፡ እለ፡ ንቡራን፡ ውስተ፡ ሥጋሁ፡ አስተዳለው፡ መጋንዘ፡ ወመዋጥሐ፡ በዘይገንዝዎ፡ ወይቀብርዎ፨

folio : 76


back to top

| |ቃል፡ ኪዳን፡ እንደ፡ ተቀበለ፡ ለፈጣሪው፡ miniature | | እንደ፡ ሞተ፡ ቅዱስ፡ ላሊበላ፡ miniature

folio : 77


back to top

| | ወባሕቱ፡ ኢተሀበሉ፡ ይግንዝዎ፡ እስመ፡ ኢቈረ፡ ሥጋሁ፡ ከመ፡ ሕገ፡ በድን፡ በዝንቱ፡ ሠሉስ፡ መዋዕል፡ እስመ፡ ምውቅ፡ ሥጋሁ፡ በላህበ፡ መንፈስ፡ ቅዱስ፡ ዘኅዱር፡ ውስቴቱ፨ ወላሊበላሰ፡ ነቅሐ፡ እምስካቡ፡ ከመ፡ ዘጽሕወ፡ እምወይን፨ ወአብርሃ፡ ገጹ፡ ከመ፡ ፀሐይ፡ እምነ፡ ራዕያት፡ ዘርእየ፡ ወእምነ፡ ስብሐቲሁኒ፡ ለእግዚአብሔር፨ ወተንሢኦ፡ አእኰቶ፡ ወሰብሖ፡ ለእግዚአብሔር፨ እንዘ፡ ይብል፡ አእኵተከ፡ እግዚኦ፡ እስመ፡ ተወከፍከኒ፡ ወስላተ፡ ጸላኢ፡ ኢረሰይከኒ፨ እግዚኦ፡ አምላኪየ፡ ጸራኅኩ፡ ኀቤከ፡ | ወተሠዓልከኒ፨ እግዚኦ፡ አውፃእካ፡ እምሰኦል፡ ለነፍስየ፨ ወአድኃንከኒ፡ እምእለ፡ ይወርዱ፡ ውስተ፡ ግብ፨ ወሠወርከኒ፡ በዕለተ፡ ቀትል፡ መልዕልተ፡ ርእስየ፨ ምንተኑ፡ አዓሥየከ፡ እግዚኦ፡ እግዚአብሔር፡ በእንተ፡ ኵሉ፡ ዘገበረከ፡ ሊተ፨ ወእልክቱሰ፡ እለ፡ ፈቀዱ፡ ይግንዝዎ፡ አስተዳሊዎሙ፡ ኵሎ፡ መፍቅደ፡ መግነዝ፨ አንከሩ፡ ወተደሙ፡ ወአኃዙ፡ ይበሉ፡ ዮም፡ ርኢነ፡ መንክረ፡ ምውት፡ ዘሠላስ፡ መዋዕል፡ ተንሥአ፡ በከመ፡ ሰማዕነ፡ መንክራቲሁ፡ ለመድኃኒነ፨ እስመ፡ ይቤ፡ በወንጌል፡ አንሥኦ፡ ለአልዓዛር፡ | | በረቡዕ፡ ዕለት፡ እምድኅረ፡ ፄዓ፡ በድኑ፨ ወይእዜኒ፡ አንሥኦ፡ ለብፁዕ፡ ወለቅዱስ፡ ላሊበላ፡ በቅድሜነ፡ በሣልስት፡ ዕለት፡ እምአመ፡ ሞተ፨ ወአኃዝዎ፡ ይሰአልዎ፡ ለብፁዕ፡ ላሊበላ፡ ወይቤልዎ፡ አይቴኑ፡ ነበርከ፡ በዝንቱ፡ ኵሉ፡ ሠሉስ፡ መዋዕል፨ ወዘከመ፡ ምንት፡ ነበርከ፡ ወምንትኑ፡ ምክንያተ፡ ሞተከ፨ ወምንት፡ ምክንያተ፡ ተንሥአትከ፨ ወዘንተ፡ ብሂሎሙ፡ አርአይዎ፡ መዋጥሐ፡ ወመጋንዘ፨ ወይቤልዎ፡ ነዋ፡ እሉ፡ መዋጥሕ፡ ወመጋንዝ፡ ዘአስተዳሎነ፡ በዘንቀብረከ፨ ወባሕቱ፡ ነበርነ፡ እንዘ፡ ንጸንሕ፡ እስከ፡ ይቈርር፡ | ሥጋከ፡ ወሶበ፡ ቈረ፡ እምወዳዕነ፡ ወእምገነዝናከ፨ ወውእቱሰ፡ ይቤሎሙ፡ ይትባረክ፡ እግዚአብሔር፡ ዘአድኃነኒ፡ እምዘ፡ ሐለይክሙ፡ አንትሙ፡ እስመ፡ ኢኮነ፡ ሕሊናሁ፡ ለእግዚአብሔር፡ ከመ፡ ሕሊናክሙ፨ ወኢምክሩ፡ ከመ፡ ምክርክሙ፡ በከመ፡ ይቤ፡ በአፈ፡ ነቢዩ፨ ኢኮነ፡ ምክርየ፡ ከመ፡ ምክርክሙ፡ ወሕሊናየ፡ ከመ፡ ሕሊናክሙ፨ በከመ፡ ይርኅቅ፡ ሰማይ፡ እምድር። ከማሁ፡ ይርኅቅ፡ ሕሊናየ፡ እምሕሊናክሙ፡ ወዘንተ፡ ይቤሎሙ፨ ወራዕያተሰ፡ ዘርእየ፡ ኢነገሮሙ፡ ወኢምንተኒ፨ ዝንቱ፡ ውእቱ፡ ፍሬ፡ ፍቅር፡

folio : 78


back to top

| | ዘተመክዓበ፡ በላዕለ፡ ቅዱስ፡ ላሊበላ፡ በእንተ፡ ጽዋዕ፡ ዘሰትየ፡ በእንተ፡ ፍቅረ፡ ቢጹ፡ ሶበ፡ ርእየ፡ እንዘ፡ ይመውት፡ ካልኡ፡ በኅምዘ፡ ሥራይ፡ ዘተገብረ፡ በእንቲአሁ፡ ይእቲኬ፡ ፍቅር፡ ዘአብጽሐቶ፡ ውስተ፡ ዝንቱ፡ ኵሉ፡ ጸጋ፡ መንፈሳዊ፨ እስከ፡ ርእየ፡ ምሥጢራተ፡ ሰማይ፡ ወአርአያ፡ ስብሐቲሁ፡ ለእግዚአብሔር፡ በላዕለ፡ ኪሩቤል፡ እንዘ፡ ያንበለብል፡ ጸዳለ፡ ሱራሔሁ፨ እስመ፡ ዕሤታ፡ ለፍቅር፡ ዐቢይ፡ ውእቱ፨ እስመ፡ ባቲ፡ ይትፌጸም፡ ኵሉ፡ ምግባራተ፡ ሠናይ፨ በከመ፡ ይቤ፡ ጳውሎስ፡ ዘአፍቀረ፡ ቢጸ፡ ኵሎ፡ ሕገ፡ ፈጸመ፡ ገቢረ፨ ወካልኡን፡ ይቤ፡ አፍቅሩ፡ | ቢጸክሙ፡ እስመ፡ ተፋቅሮ፡ ይደመሰሶን፡ ለኵሎን፡ ኃጣውእ፨ አማንኬ፡ ተፈጸመ፡ ቃለ፡ ሐዋርያ፡ ዘይቤ፡ በላዕለ፡ ብፁዕ፡ ላሊበላ፡ ፈርየሂ፡ ወተመክዓበ፨ ወለነኒ፡ ይረስየነ፡ ጽሑቃነ፡ ለአፍቅሮ፡ ቢጽነ፨ እግዚእነ፡ ወመድኃኒነ፡ ኢየሱስ፡ ክርስቶስ፡ በጸሎቱ፡ ወበስእለቱ፡ ወበሀብተ፡ ረድኤቱ፨ ወበፃማ፡ ገድለ፡ ዚአሁ፡ ወበሐፈ፡ ድካሙ፡ ዘተወክፈ፡ በሥጋሁ፡ ዝንቱ፡ ብእሲ፡ ብፁዕ፡ ወቅዱስ፡ላሊበላ፡ ዘተሰምየ፡ ገብረ፡ መስቀል፡ ወያድኅና፡ እመከራ፡ ሥጋ፡ ወነፍስ፨ ለንግሥትነ፡ ወለተ፡ ኢየሱስ፡ ለዓለመ፡ ዓለም፡ አሜን፨ ፨ ፨ | | ወእምድኅረዝ፡ ነበረ፡ ብፁዕ፡ ላሊበላ፡ እንዘ፡ {}ይትዌከፍ፡ ኵሎ፡ ፅዕለተ፡ ወኵሎ፡ ምናኔ፡ እምኀበ፡ አዝማዲሁ፨ ወእምኀበ፡ ኵሎሙ፡ ሰብእ፡ እለ፡ አስረሮሙ፡ ሰይጣን፡ ላዕሌሁ፡ እንዘ፡ ይሣለቅዎ፡ ወይብልዎ፡ ይነግሥኣ፡ ዝንቱ፨ ወቦ፡ ዘይቤ፡ ዝንቱሰ፡ ለእመ፡ /ነግሠ፡/ ይሠይጠነ፡ ለማየ፡ ልብኔ፡ ዘውእቱ፡ ዕጣነ፡ ቤተ፡ ክርስቲያን፨ ወዘንተ፡ ኵሎ፡ እምድኅረ፡ ተወክፈ፡ ሐለየ፡ በልቡ፡ እንዘ፡ ይብል፡ ናሁ፡ ኮንክዎሙ፡ ዕቅፍተ፡ ለአብያጽየ፡ ወለአኃውየ፨ ወይእዜሰ፡ ኢይነብር፡ ምስሌሆሙ፨ ይኄይሰኒ፡ ከመ፡ እፃእ፡ ገዳመ፡ | ወአንበር፡ ምስለ፡ አራዊት፨ እስመ፡ ይኄይስ፡ ነቢር፡ ምስለ፡ አራዊት፡ እምነቢር፡ ምስለ፡ ሰብእ፡ መሪረ፡ ልሳን፨ እስመ፡ ለልሳነ፡ እጓለ፡ እመሕያው፡ አልቦ፡ ዘይክል፡ እግርሮታ፡ እስመ፡ ኵሉ፡ ለፍጥረት፡ ይገርር፡ ለፍጥረተ፡ እጓለ፡ እመሕያው፨ አራዊትኒ፡ ዘይትሐወስ፡ ወአዕዋፍኒ፡ ዘይሰርር፡ ወለልሳነ፡ እጓለ፡ እመሕያውሰ፡ አልቦ፡ ዘይክል፡ አግርሮታ፡ እኪት፡ ይእቲ፡ ወምልዕተ፡ ይእቲ፡ ኅምዘ፡ ዘይቀትል፨ በከመ፡ ይቤ፡ ጳውሎስ፡ ወመንሱትሰ፡ ኢይረክበክሙ፡ ዘእንበለ፡ እምኀበ፡ ሰብእ፨ ሄኖክኒ፡ ነበረ፡

folio : 79


back to top

| | ገዳመ፡ ተግኂሦ፡ እምሰብእ፡ ኃርዮ፡ ነቢረ፡ ምስለ፡ አራዊት፡ ወአራዊትኒ፡ ኢሰሐጥዎ፨ ወእምህየ፡ ተመሥጠ፡ ከመ፡ ይርአይ፡ ኅቡአተ፡ ሰማይ፡ ኤልያስ፡ ነበረ፡ ገዳመ፡ እንዘ፡ ይሴሰይ፡ በአፈ፡ ቋዓት፡ ፍና፡ ሰርክ፡ ወእንተ፡ ጽባሕ፡ ኅብስተ፨ ወሎቱኒ፡ ኢሰሐጥዎ፡ አራዊት፡ ከመ፡ ሰሐጥዎ፡ ሰብእ፨ እስመ፡ እምገጸ፡ ኤልዛቤል፡ ጐየ፨ ወኢጐየ፡ እምገጸ፡ አራዊት፡ እስመ፡ አራዊት፡ ይገንዩ፡ ሎቱ፨ ዮሐንስኒ፡ ነበረ፡ እምንዕሱ፡ ገዳመ፨ እንዘ፡ ይሴሰይ፡ ለምለመ፡ ቈፅል፨ ወእንዘ፡ ይሰቲ፡ እምጠለ፡ ገዳም፨ ወኢሰሐጥዎ፡ አራዊት፡ ወአኃወ፡ | ኮንዎ፡ አናብስት፡ ወቶራት፨ ወዘንተ፡ ብሂሎ፡ ወፅአ፡ ገዳመ፡ ወነበረ፡ እንዘ፡ ይሴሰይ፡ ንዒዎ፡ አራዊተ፡ ወአስጊሮ፡ ጴርድክስያተ፨ ወአልቦቱ፡ ካልአ፡ ሕሊና፡ ለብፁዕ፡ላሊበላ፡ እንዘ፡ ይተግህ፡ ዘእንበለ፡ ሰብሐተ፡ እግዚአብሔር፡ ወዘእንበለ፡ ዘምሮ፡ መዓልተ፡ ወሌሊተ፨ እንዘ፡ ይጐድዕ፡ እንግድዓሁ፨ ወይብል፡ መዓልተ፡ ወሌሊተ፡ በላህ፡ መሪር፡ ወበብካይ፡ ዕፁብ፡ ወበምንዳቤ፡ ብዙኅ፨ እንዘ፡ ይትኳነን፡ በረኃብ፡ ወበጽምዕ፡ በቊር፡ ወበዕርቃን፡ በኃፍ፡ ወበድካም፨ እንዘ፡ ይትዌከፍ፡ ፃማሆሙ፡ ለገዳማውያን፨ ወሰብእሰ፡ | | ይሰምይዎ፡ አርዌ፨ ወእግዚአብሔርሰ፡ ይሰምዮ፡ ከመ፡ አሐዱ፡ እምነ፡ ኃይላት፨ እስመ፡ ይሬኢ፡ ልበ፡ ወይፈትን፡ ኵልያተ፨ እስመ፡ አኮ፡ በከመ፡ ይሬኢ፡ ሰብእ፡ ዘይሬኢ፡ እግዚአብሔር፨ እግዚአብሔርሰ፡ ልበ፡ ይሬኢ፨ ወሰብእሰ፡ ገጸ፡ ይሬኢ፨ ወብፁዕ{}ኒ፡ ላሊበላ፡ ምኑን፡ ውእቱ፡ በኀበ፡ ሰብእ፡ ወትሑት፡ በውስተ፡ ሕዝብ፨ ወባሕቱ፡ ልዑል፡ ወክቡር፡ ውእቱ፡ በኀበ፡ እግዚአብሔር፨ ወከመዝ፡ ነበረ፡ ቅዱስ፡ ወብፁዕ፡ ላሊበላ፡ በውስተ፡ ገዳም፡ ዘከመ፡ ነበሩ፡ እንዘ፡ ይሜግቦሙ፡ መንፈስ፡ እግዚአብሔር፡ እስራኤል፡ በገዳም፡ እስከ፡ ይበውኡ፡ | ውስተ፡ ምድረ፡ ርስቶሙ፡ ዘመሐለ፡ ሎሙ፡ አምላከ፡ አበዊሆሙ፨ ወብፁዕኒ፡ ላሊበላ፡ ነበረ፡ እንዘ፡ ይሜግቦ፡ ኃይለ፡ መንፈስ፡ ቅዱስ፨ ወሲሳዮ፡ ይሴሰይ፡ ንዒዎ፡ አራዊተ፡ በከመ፡ ነገርናክሙ፡ ቅድመ፨ በረከተ፡ ጸሎቱ፡ የሃሎ፡ ምስለ፡ አመተ፡ እግዚአብሔር፡ ንግሥትነ፡ ወለተ፡ ኢየሱስ፡ ወለደቂቃ፡ ኃይለ፡ ኢየሱስ፡ ኀይለ፡ ሚካኤል፡ ወልደ፡ ማርያም፡ ወለአዋልዲሃ፡ ወለተ፡ ማርያም፡ ኂሩተ፡ ሥላሴ፡ ወበረከተ፡ ጸጋሁ፡ የሃሉ፡ ላዕለ፡ ኵልነ፡ እለ፡ ተጋባእነ፡ ውእቱ፡ ዛቲ፡ ቅድስት፡ ቤተ፡ ክርስቲያን፨ ለዓለመ፡ ዓለም፡ አሜን፨

folio : 80


back to top

| | ወከመዝ፡ እንዘ፡ ሀለወ፡ ብፁዕ፡ ላሊበላ፡ በውስተ፡ ገዳም፡ አስተርአዮ፡ መልአከ፡ እግዚአብሔር፡ ዘአዕረጎ፡ ውስተ፡ ሰማይ፨ ወዘተአዘዘ፡ ከመ፡ ይዕቀቦ፡ በኵሉ፡ መዋዕሊሁ፨ ወይቤሎ፡ ሰላም፡ ለከ፡ ኦብእሴ፡ አምላክ፡ ላሊበላ፡ ወይቤሎ፡ ብፁዕ፡ ላሊበላ፡ መኑ፡ አንተ፡ ዘትትናገረኒ፡ በቃለ፡ ሰላም፨ ወይቤሎ፡ አነ፡ ውእቱ፡ መልአከ፡ እግዚአብሔር፡ ዘአዕረጉከ፡ ውስተ፡ ሰማይ፡ ወአርአይኩከ፡ ምሥጢራተ፡ ብርሃናት፨ ወዘተአዘዝኩ፡ ከመ፡ እዕቀብከ፡ ወይቤሎ፡ ብፁዕ፡ ላሊበላ፡ ሰላምከ፡ ያዕርፍ፡ ላዕሌየ፡ ኦእግዚእየ። ወይ |ቤሎ፡ ውእቱ፡ መልአክ፡ ለብፁዕ፡ ላሊበላ፡ አጽምዕ፡ ዘእነግረከ፨ ወይቤሎ፡ ላሊበላ፡ በል፡ እግዚእየ፡ እስመ፡ ይሰምዓከ፡ ገብርከ፨ ወይቤሎ፡ ውእቱ፡ መልአክ፡ ለቅዱስ፡ ወለብፁዕ፡ላሊበላ፡ ጌሠመ፡ ትመጽእ፡ ኀቤከ፡ ወለት፡ በዘከመዝ፡ ጊዜ፡ ወአመሮ፡ ኵሎ፡ ትእምርታቲሃ፡ ወአልባሲሃኒ፡ ዘትለብስ፨ ወይቤሎ፡ ይእቲኬ፡ ዘትከውነከ፡ ብእሲተ፨ ወኅሪት፡ ይእቲ፡ ከማከ፨ ወትከውነከ፡ ዘከመ፡ ልብከ፨ ወስነ፡ ምግባሪሃኒ፡ ኢየሐፅፅ፡ እምነ፡ ምግባረ፡ ዚአከ፡ ወአመተ፡ እግዚአብሔር፨ ወብዙኃ፡ | | ምግባራተ፡ ሠናይ፡ ትትሜሐር፡ እምኔሃ። ወአንተኒ፡ ተናገራ፡ በዘከመዝ፡ ግብር። ወንግራ፡ ዘከመ፡ ነገርኩከ፡ አነ። እስመ፡ እምኀበ፡ እግዚአብሔር፡ ውእቱ፡ ዝነገር። ወውእቱ፡ አዘዘኒ፡ ከመ፡ እንግርከ። ወይቤሎ፡ላሊበላ፡ ለውእቱ፡ መልአክ፡ ኦእግዚእየ፡ ሊተኑ፡ ሀለወኒ፡ ከመ፡ እንሣእ፡ ብእሲት፡ ዘከመ፡ ስነ፡ ብርሃናት፡ እምድኅረ፡ አርአይከኒ፡ በውስተ፡ ኵሎን፡ ሰብዓቱ፡ ሰማያት። ወድንጋፄኒ፡ ዘሀሎ፡ ውስተ፡ ምጽናዕ፡ ዘትቤለኒ፡ ለሊከ፡ ተዘከራ፡ ለዛቲ፡ ድንጋፄ። ወይቤሎ፡ ውእቱ፡ መልአክ፡ ለብፁዕ፡ ላሊበላ፡ | ኃጢአተኑ፡ ይከውነከ፡ ነሢአ፡ ብእሲት፡ ኦብእሴ፡ አምላክ። ዘበእንቲአሃሰ፡ አኮ፡ ዘየሐፅፅ፡ አስብከ፡ ወጸጋከ። እስመ፡ አኮ፡ በእንተ፡ ፍቅረ፡ ዓለም፡ አላ፡ በእንተ፡ ፍቅረ፡ ውሉድ። ወተቃወሞ፡ ለመልአከ፡ እግዚአብሔር፡ በእንተ፡ ዝንቱ፡ ነገር፡ እንዘ፡ ይብል፡ ኢይደልወኒ፡ ከመ፡ እንሣእ፡ ብእሲተ። ወይቤሎ፡ ውእቱ፡ መልአክ፡ ይትከሀለከኑ፡ ከመ፡ ታብጥል፡ ትእዛዘ፡ እግዚአብሔር። ወሚመ፡ ታውፅኦሙኑ፡ ለውሉድ፡ ለባሕቲትከ፡ ለእለ፡ ሀለው፡ ውስተ፡ ሐቋከ። ወእምድኅረ፡ ብዙኅ፡ ነገር፡ ይቤ፡ ብፁዕ፡ ወቅዱስ፡ ላሊበላ፡ ፈቃደ፡

folio : 81


back to top

| | ፲፩ እግዚአብሔር፡ ለይኩን፡ ወአኮ፡ ፈቃደ፡ ዚአየ። ወተሠወሮ፡ ዝኩ፡ መልአክ፡ ወእምዝ፡ በሳኒታ፡ መጽአት፡ እንታክቲ፡ ወለት፡ እንዘ፡ ታስተጋብእ፡ ኣሕማላተ፡ ገዳም፡ ወረከበ፡ ትእምርታቲሃ፡ በከመ፡ አመሮ፡ መልአከ፡ እግዚአብሔር። ወተናገራ፡ በከመ፡ ይቤሎ፡ መልአክ። ወይእቲኒ፡ ቅድስት፡ ይእቲ፡ ወአደማ፡ ላቲ፡ ውእቱ፡ ነገራ፡ ዘነገራ። እስመ፡ እምኀበ፡ እግዚአብሔር፡ ኮነ፡ ዝንቱ፡ ግገር። ወእምድኅረዝኒ፡ ነበረ፡ በውስተ፡ ውእቱ፡ ገዳም፡ ኀበ፡ ረከበቶ፡ ይእቲ፡ ወለት፡ ወይእቲሰ፡ ወለት፡ ታመጽእ፡ ሎቱ፡ ኅብስተ፡ ወሐምለ፡ ገዳምኒ፡ ብሱሉ፡ | እምነ፡ ቤተ፡ አቡሃ፡ ወእማ፡ ወከመዝ፡ ነበረ፡ ብዙኃ፡ መዋዕለ። ወእምድኅረ፡ ዝንቱ፡ ይቤላ፡ ብፁዕ፡ ላሊበላ፡ ለይእቲ፡ ወለት፡ አመ፡ በጽሐት፡ ከመ፡ ተሐውፆ። እስመ፡ ዘልፈ፡ ትዋህዮ፡ እምአመ፡ ረከበቶ፡ ኢኃደገት፡ አምኆቶ፡ እንዘ፡ ታመጽእ፡ ሎቱ፡ እምኵለ፡ መባልዕት፡ ዘረከበት። ወአሐተ፡ ዕለተ፡ ይቤላ፡ ንግረዮ፡ ለአቡኪ፡ ዘከመ፡ እቤለኪ። ወነገራ፡ ዘከመ፡ ነገሮ፡ መልአከ፡ እግዚአብሔር። ወይእቲኒ፡ አቲዋ፡ ነገረቶ፡ ለአቡሃ፡ ወአቡሃሰ፡ ፈራሄ፡ እግዚአብሔር፡ ውእቱ። ወየኣምር፡ እምቅድመ፡ ይኩን፡ ዘሀሎ፡ ይኩን። ወአእመረ፡ | | እምቅድመ፡ ትንግሮ፡ ወይቤላ፡ ለወለቱ፡ ሑሪ፡ አምጽኢዮ፨ ወሖረት፡ ወረከበቶ፡ ውስተ፡ ሐቅለ፡ ገዳም፡ ኀበ፡ ኃደገቶ፡ ወአምጽአቶ፡ ኀበ፡ ሀሎ፡ አቡሃ። ወሶበ፡ በጽሐ፡ ኀቤሁ፡ ተአምኁ፡ በበይናቲሆሙ፡ በአምኁ፡ መንፈሳዊት። ወእምድረ፡ ተአምኁ፡ ይቤሎ፡ አቡሃ፡ ለይእቲ፡ ወለት፡ ለምንትኑ፡ ተሐይጣ፡ ለወለትየ፡ ኦወልድየ። ወይቤላ፡ ብፁዕ፡ላሊበላ፡ አንሰ፡ ኢሔጥክዋ፡ በፈቃደ፡ ርእስየ። ወለእመሰ፡ እምኀበ፡ እግዚአብሔር፡ ኮነ፡ ውእቱ፡ ኢይትኃደግ፡ ዘእንበለ፡ ይኩን። ወአመሰ፡ እምኀበ፡ ሰብእ፡ ውእቱ፡ የኃልፍ፡ ወይሠዓር። ወሶበ፡ ይቤሎ፡ ብፁዕ፡ | ላሊበላ፡ ከመዝ፡ አእመረ፡ ከመ፡ መልአከ፡ እግዚአብሔር፡ አስተርአዮ፡ ሎቱ፡ ወጸውዓ፡ ለብእሲቱ፡ ውእቱ፡ ብእሲ፡ አቡሃ፡ ለይእቲ፡ ወለት፡ ወተማከራ፡ ለብእሲቱ፡ ከመ፡ የሀቦ፡ ወለቶ፡ ለላሊበላ፡ ከመ፡ ትኩኖ፡ ብእሲቶ። ወሠምረት፡ ብእሲቱኒ፡ በዝንቱ፡ ነገር። እስመ፡ መአድም፡ ውእቱ፡ ላሊበላ፡ በአርአያሁ፡ ወበግርማሁ። እስመ፡ ጸጋ፡ እግዚአብሔር፡ የዓውዶ፡ ከመ፡ እንተ፡ ፀሐይ፡ ውስተ፡ ጠፈረ፡ ሰማይ። ወያበርህ፡ እንዘ፡ ይኄይል፡ ስኑ፡ ወፀዳለ፡ ብርሃኑ፡ በውስተ፡ ዓየር። ከማሁ፡ የዓውዶ፡ ጸጋ፡ እግዚአብሔር፡ ለብፁዕ፡ ወለቅዱስ፡ ላሊበላ፡ ወአቡሃሰ፡

folio : 82


back to top

| | ወእማ፡ ለይእቲ፡ ወለት፡ ወሀብዎ፡ ወለቶሙ፡ {ለብፁዕ፡} ላሊበላ፡ ከመ፡ ትኩኖ፡ ብእሲተ፡ በከመ፡ ሕገ፡ እግዚአብሔር። ወነሥአ፡ ቅዱስ፡ ላሊበላ፡ ለይእቲ፡ ወለት፡ ወረሰያ፡ ብእሲቶ፡ በከመ፡ ሕገ፡ እግዚአብሔር፨ ወተባረኩ፡ ክልኤሆሙ፡ በማዕተበ፡ ጸጋሁ፡ ለኢየሱስ፡ ክርስቶስ፡ በከመ፡ ተባረኩ፡ ይስሐቅ፡ ወርብቃ፡ ዘወለድዎ፡ ለአበ፡ ዓሠርቱ፡ ወክልኤቱ፡ አዕፁቀ፡ ዘይት፡ ዘተጋደሎ፡ በሎዛ፡ ለብእሴ፡ እስት፡ ወበህየ፡ ሰመዮ፡ እስራኤልሃ፨ ወብፁዕሰ፡ ላሊበላ፡ ነበረ፡ ዓዲ፡ እንዘ፡ ያፈደፍድ፡ ፍርሃተ፡ እግዚአብሔር፡ ወገቢረ፡ ፈቃዱ፨ ወእንዘ፡ ይፀመድ፡ | ታሕተ፡ አርዑተ፡ ወንጌሉ፡ ለክርስቶስ፨ እምአመ፡ ረከባ፡ ለይእቲ፡ ወለት፡ እስመ፡ ፈድፋደ፡ ታፈቅሮ፡ ለእግዚአብሔር፡ ይእቲ፡ ወለት። ወበእንተዝ፡ ትትኤዘዘ፡ ለምታ። ከመ፡ ሳራ፡ ትትኤዘዞ፡ ለአብርሃም፡ ወእግዚእየ፡ ትብሎ፡ ወተሐውር፡ በትእዛዙ፡ ወበምዕዳነ፡ ዚአሁ። ወውእቱኒ፡ የሐውር፡ በምዕዳነ፡ ዚአሃ፡ እንዘ፡ ኢይትገኃሥ፡ ኢለየማን፡ ወኢለጸጋም፡ እምዕዳነ፡ ዚአሃ። ወይጥዕም፡ ቃለ፡ ዚአሃ፡ እመዓር፡ ወሦከር፡ ወከማሁ፡ ይጥዕማ፡ ላቲኒ፡ ቃለ፡ ዚአሁ፡ እምአስካለ፡ ወይን። ወከመዝ፡ ነበሩ፡ በፍቅረ፡ እግዚአብሔር፡ ፍጹም። እስመ፡ እምኀቤሁ፡ | | ለእግዚአብሔር፡ ኮነ፡ ፅምረቶሙ። ወበእንተዝ፡ ኮኑ፡ አሐደ፡ ሥጋ። በከመ፡ ይቤ፡ በውስተ፡ ኦሪት፡ በእንተ፡ ዝንቱ፡ የኃድግ፡ ብእሲ፡ አባሁ፡ ወእሞ፡ ወይተልዋ፡ ለብእሲቱ፡ ወይከውኑ፡ ክልኤሆሙ፡ አሐደ፡ ሥጋ። ወእግዚእነሂ፡ ይቤ፡ በውስተ፡ ወንጌሉ። ናሁኬ፡ አሐዱ፡ ሥጋ፡ እሙንቱ፡ ብእሲ፡ ወብእሲት። ወኢኮኑ፡ ክልኤተ፡ ዘእግዚአብሔር፡ አስተፃመረ፡ ሰብእ፡ ኢይፍልጥ። ወከመዝ፡ ኮነ፡ ፅምረቶሙ፡ ለላሊበላ፡ ወ{ለ}መስቀል፡ ክብራ፡ በፅምረተ፡ መንፈሳዊ። ወአኮ፡ በማኅሌተ፡ አጋንንት፡ በከመ፡ ይገብሩ፡ ሰብአ፡ ዓለም፨ አላ፡ | በከመ፡ ተሠርዓ፡ በሕግ፡ ዘእግዚአብሔር። ወበከመ፡ መርዓሁ፡ ለይስሐቅ፡ ምስለ፡ ርብቃ። በከመ፡ ይቤ፡ {ጳው}ሎስ፡ ክቡር፡ አውስቦ፡ እምኵለሂ፡ ወለሰብሳቦሙኒ፡ አልቦቱ፡ ስዕበት፡ ወምሰካቦሙኒ፡ ኢኮነ፡ ግማኔ። ወከመዝ፡ ነበሩ፡ ክልኤሆሙ፡ እንዘ፡ ይፀመድዎ፡ ለእግዚአብሔር፡ በፍቅር፡ ወበትሕትና፡ በውስተ፡ ቤተ፡ አቡሃ፡ ለይእቲ፡ ወለት። ወዝኩሰ፡ ጸላኤ፡ ሠናያት፡ ዲያብሎስ፡ ሶበ፡ ርእዮሙ፡ በዘከመዝ፡ ግብር፡ ቀንዓ፡ ላዕሌሆሙ፡ ወስዕነ፡ ተዓግሦ፡ ወተሀውከ፡ ሕሊናሁ፡ ወሐለየ፡ ተመይኖ። ወቦኣ፡ ውስተ፡ ልቦሙ፡ ለሰብእ፡

folio : 83


back to top

| | እለ፡ ረከቦሙ፡ እንዘ፡ ይዴለው፡ ሎቱ፡ ለማኅደሩ፡ ምሩጋነ፡ ወኵስቱራነ፡ ወዕድዋነ። ወነጸፈ፡ ውስቴቶሙ፡ ዘርቤታተ፡ እከዩ፡ በዘቦቱ፡ ያንገረግር፡ ውስተ፡ ውሣጤ፡ ልቦሙ። ወነቢሮ፡ ኀቤሆሙ፡ ቀጸቦሙ፡ ከመ፡ ይትነሥኡ፡ ላዕለ፡ላሊበላ፡ ወአንሥኡ፡ ከመ፡ ይሑሩ፡ ኀበ፡ ንጉሥ፡ ከመ፡ ያስተዋድይዎ፡ በነገር፡ ከንቱ። በከመ፡ አንሥኦ፡ ለይሁዳ፡ ላዕለ፡ መድኃኒነ፡ ከመ፡ ያግብኦ፡ ለሊቃነ፡ ካህናት። እለ፡ እሙንቱ፡ ከለባት፡ ብዙኃን፡ ወአሥዋር፡ ስቡሐን። ወለእሙንቱሰ፡ ሰብእ፡ እለ፡ አንሥኦሙ፡ ላዕለ፡ ላሊበላ፡ መሐሮሙ፡ ሰይጣን፡ መምህረ፡ እከይ፡ | ከመ፡ ይበሉ፡ በቅድመ፡ ንጉሥ፡ ናሁ፡ ነሥአ፡ላሊበላ፡ ወለተ፡ ዘተሐፅየት፡ ለካልእ፡ ብእሲ፡ ወረሰያ፡ ብእሲቶ፡ ኦንጉሥ፡ ኢታርምም፡ በእንተዝ፡ ነገር። ወናሁ፡ ሢመተ፡ መንግሥትኒ፡ ይደምፅ፡ በኵለሂ፡ በእንቲአሁ፡ ወእመሰ፡ አርመምከ፡ ይትበዋሕ፡ ወይሜብል፡ ላዕለ፡ ኵሉ፡ ሰብእ። ወዝኩሰ፡ ነጋሢ፡ እኁሁ፡ ውእቱ፡ ለብፁዕ፡ ላሊበላ፡ ሶበ፡ ሰምዓ፡ ምክንያተ፡ ነገር፡ አዘዘ፡ ከመ፡ ያምጽእዎ። እስመ፡ እምቀዲሙ፡ ይቀንዕ፡ እንበይነ፡ መንግሥቱ፡ ላዕለ፡ ላሊበላ፡ ወሖሩ፡ እለ፡ ተፈነው፡ እምኀበ፡ ንጉሥ፡ ወረከብዎ፡ ለብፁዕ፡ ላሊበላ፡ ወይቤልዎ፡ ነዓ፡ ይቤለከ፡ | | ንጉሥ፨ ወተስእሎሙ፡ {ላሊ}በላ፡ ወይቤሎሙ፡ በእንተ፡ ምንት፡ ይጼውዓኒ፡ ንጉሥ፡ ሊተ፡ ለግፉዕ፡ ዘነበርኩ፡ እንዘ፡ እሰደድ፡ እምኀቤሁ፡ ወእምነ፡ ሐራሁ፡ እንዘ፡ አልቦ፡ ዘገበርኩ። ወይእዜኒ፡ አኮ፡ ለሠናይት፡ ዘይጼውዓኒ። ወይመስለኒሰ፡ ዘረከበ፡ አሐተ፡ ምክንያተ፡ በዘይፀብዓኒ። ወበእንተ፡ ዝንቱ፡ ተንሥአ፡ ልቡ፡ ላዕሌየ፡ ከመ፡ ያሕምመኒ። በከመ፡ ተንሥአ፡ ልበ፡ ሳኦል፡ ላዕለ፡ ዳዊት። ወኃሠሠ፡ ከመ፡ ይቅትሎ፡ እንበይነ፡ ቅንዓተ፡ መንግሥቱ። ወመኑ፡ ካዕበ፡ ዘነገሮ፡ ከመ፡ ሀሎኩ፡ ዝየ። አኮኑ፡ ነበርኩ፡ እንዘ፡ አዓይል፡ እምገዳም፡ ገዳመ። ወእ/ም/በዓታት፡ | በዓተ፡ እንዘ፡ እጐይይ፡ እምቅድመ፡ ገጹ፡ ለእኁየ። በከመ፡ ዳዊት፡ ጐየ፡ እምገጸ፡ ሳኦል፡ ሳኦልሰ፡ ወዳዊት፡ ኢኮኑ፡ አኃወ፡ ቅሩባነ፡ በሥጋ፡ አላ፡ አንጋድ፡ እሙንቱ። ሳኦል፡ ወልደ፡ ቂስ፡ ዘእምነገደ፡ ብንያም። ወዳዊት፡ ዘእምነገደ፡ ይሁዳ። ወአንሰ፡ እምእኁየ፡ ተሰደድኩ፡ ህየንተ፡ እምተፈሣሕኩ፡ በመንግሥቱ፡ ለእኁየ፡ ረከበኒ፡ ኃዘን፡ ብዙኅ። ወህየንተ፡ ዘእምአፍቀረኒ፡ ጸልዓኒ፡ እኁየ፡ ወይእዜኒ፡ ኦአኃውየ፡ ንግሩኒ፡ ለእመ፡ አእመርክሙ፡ በእንተ፡ ምንት፡ ምክንያት፡ ዘይጼውዓኒ። ወይቤልዎ፡ ላዕካነ፡ ንጉሥ፡ ነዓ፡ ኦእኁነ፡ እምከመ፡ በጻሕከ፡ ተአምር፡ ምክንያተ፡ ጽዋዔከ።

folio : 84


back to top

| | ወዘንተ፡ ብሂሎሙ፡ ወሰድዎ፡ ኀበ፡ ንጉሥ፡ ወአብጽሕዎ፡ ኀቤሁ። ወይቤሎ፡ ነጋሢ፡ ለምንትኑ፡ ገበርከ፡ ከመዝ፡ ዘኢይከውን፡ ለገቢር፡ በመዋዕለ፡ መንግሥትየ። ወለምንት፡ ዘነሣእከ፡ ወለተ፡ ዘተሐፅየት፡ ለካልእ፡ ብእሲ፡ ወይቤሎ፡ ላሊበላ፡ ለነጋሢ፡ አብሐኒኬ፡ ከመ፡ እትናገር፡ ወይቤሎ፡ አበሕኩከ፡ ተናገር፨ ወይቤ፡ ብፁዕ፡ ላሊበላ፡ አልቦ፡ እግዚኦ፡ አኮ፡ አነ፡ ዘነሣእኩ፡ ዘኢያብሐኒ፡ እግዚአብሔር። ወአልቦ፡ ዘተዓገልክዎ፡ ወኢለመኑሂ፡ ወመጽኡ፡ እልክቱ፡ ሰብእ፡ እለ፡ አስተዋደይዎ፡ ቅድመ፡ ኀበ፡ ንጉሥ፡ ወኮኑ፡ ስምዓ፡ ለዕሌሁ። ወይቤሉ፡ ነሥአ፡ ወለተ፡ ዘተሐፅየት፡ ለካልእ፡ | ብእሲ። ወዘንተ፡ ሶበ፡ ሰምዓ፡ እኁሁ፡ ንጉሥ፡ አዘዘ፡ ከመ፡ ይዝብጥዎ፡ በጥብጣቤ፡ ዘሐብል። ወከመዝ፡ አኃዙ፡ ሐራሁ፡ ለንጉሥ፡ ከመ፡ ይዝብጥዎ፡ ለብፁዕ፡ ላሊበላ፡ ወላሊበላ፡ ሰ፡ አኃዘ፡ ይበል፡ እንዘ፡ ድልው፡ ለተቀሥፎ። ኪያከ፡ ተወከልኩ፡ እግዚኦ፡ ወኢይትኃፈር፡ ለዓለም። ወበጽድቅከ፡ አንግፈኒ፡ ወባልሐኒ። አጽምእ፡ እዝነከ፡ ኀቤየ፡ ወፍጡነ፡ አድኅነኒ። ኩነኒ፡ አምላኪየ፡ ወመድኃንየ። ወቤተ፡ ፀወንየ፡ ከመ፡ ታድኅነኒ። እስመ፡ ኃይልየ፡ ወፀወንየ፡ አንተ፤ ወበእንተ፡ ስምከ፡ ምርሐኒ፡ ወሲስየኒ። ወአውፅአኒ፡ እምዛቲ፡ መሥገርት፡ እንተ፡ ኃብኡ፡ ሊተ። እስመ፡ አንተ፡ | | ረዳእየ፡ እግዚኦ። ውስተ፡ እዴከ፡ አመሐፅን፡ ነፍስየ፡ ቤዝወኒ፡ እግዚአብሔር፡ አምላከ፡ ጽድቅ። ወክድነኒ፡ በጽላሎተ፡ ክነፊከ። ወዘንተ፡ እንዘ፡ ይብል፡ አኃዙ፡ {ይዝብጥዎ፡ ሐራሁ፡ ለንጉሥ፡ ወንጉሥሰ፡ አዚዞ፡} ከመ፡ ይቅሥፍዎ፨ ሖረ፡ ውስተ፡ ቤተ፡ ክርስቲያን፡ ከመ፡ ይትመጠው፡ ቍርባነ። ሶበ፡ ወጠኑ፡ ቀሢፎቶ፡ ለላሊበላ፡ ወኢያንተጉ፡ ቀሢፎቶ፡ እስከ፡ ወፅኣ፡ ንጉሥ፡ እቤተ፡ ክርስቲያን፡ ተመጢዎ፡ ቁርባነ። ይተሥፍዎ፡ እንዘ፡ ይትባረዩ፡ በበ፩። ወእግዚአብሔርሰ፡ ዘኢይገድፎሙ፡ ለእለ፡ ይትዌከሉ፡ ቦቱ፡ ፈነወ፡ መልአኮ፡ ከመ፡ ይሠውሮ፡ በጽላሎተ፡ ክነፊሁ፡ | ብርሃናዊት። ከመ፡ ኢይርከቦ፡ መቅሠፍቶሙ፡ ለሐራ፡ ንጉሥ። ወወረደ፡ ዝኩ፡ መልአከ፡ ጽድቅ፡ ወሠወሮ፡ ለብፁዕ፡ላሊበላ፡ በአክናፊሁ፡ ብሩሃት። ወመልአክሰ፡ ዓቃቢሁ፡ ውእቱ፡ ዘተውህቦ፡ እምኀበ፡ እግዚአብሔር፡ ከመ፡ ይዕቀቦ፡ በኵሉ፡ መዋዕሊሁ። ወንጉሥሰ፡ ሶበ፡ ወፅአ፡ እምቤተ፡ ክርስቲያን፡ ሰምዓ፡ ድምፀ፡ ጥብጣቤ። ወይቤሎሙ፡ ለእለ፡ ሀለው፡ ምስሌሁ፡ ምንትኑ፡ ዝንቱ፡ ድምፅ፡ ዘእሰምዕ። ወይቤልዎ፡ አኮኑ፡ አንተ፡ አዘዝከ፡ እንዘ፡ ትበውእ፡ ውስተ፡ ቤተ፡ ክርስቲያን፡ ከመ፡ ይቀሥፍዎ፡ ለላሊበላ፡ ወኪያሁኬ፡ ይቀሥፉ፡ እስከ፡ ይእዜ፡

folio : 85


back to top

| | ወደንገፀ፡ ንጉሥ፡ ወመሰሎ፡ ዘይመውት። ወአዘዘ፡ ከመ፡ ይኅድግዎ፡ ወኃደግዎ፡ ሐራ፡ ንጉሥ። ወለብፁዕሰ፡ ላሊበላ፡ ኢረከቦ፡ ወኢምንተኒ፡ እምሕማማት፡ ወአንከሩ፡ ኵሎሙ፡ ተዓይን። ወንጉሥኒ፡ አንከረ፡ ወተደመ፡ ሶበ፡ ርእዮ፡ ለእኁሁ፡ላሊበላ፡ ከመ፡ ኢለከፎ፡ ወኢምንትኒ፡ እምቅሥፈተት። ወተመይጠ፡ ላሊበላ፡ ኀበ፡ ሀለወት፡ ብእሲቱ፡ ወነገራ፡ ኵሎ፡ ዘከመ፡ ረሰይዎ፡ ወዘከመ፡ አድኃኖ፡ እግዚአብሔር፡ እምቅሥፈታቲሆሙ፡ ሠዊሮ፡ በአክናፈ፡ መልአኩ፡ ብርሃናዊ። ወአእኰትዎ፡ ኅቡረ፡ ለእግዚአብሔር፡ እንዘ፡ ይብሉ፡ | ይብሉ፡ ይትባረክ፡ እግዚአብሔር፡ አምላከ፡ እስራኤል። ዘተሠሃለነ፡ ወገብረ፡ መድኃኒተ፡ ለሕዝበ፡ ዚአሁ። ወይትባረክ፡ ስመ፡ ስብሐቲሁ፡ ቅዱስ። እስመ፡ ውእቱ፡ ኢይገድፎሙ፡ ለእለ፡ ይትዌከሉ፡ ቦቱ። ወረዳኢሆሙ፡ ውእቱ፡ ለኵሎሙ፡ ለእለ፡ ይገድፉ፡ ሕሊናሆሙ፡ ላዕሌሁ። በከመ፡ ይቤ፡ እግዚአብሔር፡ በአፈ፡ ነቢዩ፡ እስመ፡ ብየ፡ ተወከለ፡ አድኅኖ። ወእከድኖ፡ እስመ፡ አእመረ፡ ስምየ። ይጼውዓኒ፡ ወእሠጠዎ። ሀሎኩ፡ ምስሌሁ፡ አመ፡ ምንዳቤሁ። አድኅኖ፡ ወእሴብሖ። ለነዋኅ፡ መዋዕል፡ አጸግቦ። ወአርእዮ፡ አድኅኖትየ። ወይምላዕ፡ | | ስብሐቲሁ፡ ለእግዚአብሔር፡ ኵሎ፡ ምድረ፡ ለይኩን፡ ለይኩን። ወዘንተ፡ ብሂሎሙ፡ ነበሩ፡ ከመ፡ ይትናዘዙ፡ በከመ፡ ይትናዘዝ፡ ፍቁር፡ ምስለ፡ ፍቁሩ። ወአርክ፡ ምስለ፡ አርኩ። ወተናዘዘ፡ ውእቱኒ፡ በምዕዳነ፡ ዚአሃ፡ ወይእቲኒ፡ ተናዘዘት፡ በምዕዳነ፡ ዚአሁ። እስመ፡ ድኅነ፡ ምታ፡ እመቅሠፍት። እስመ፡ አብጽሕዎ፡ ውስተ፡ መቅሠፍት፡ በእንቲአሃ። ወበከመ፡ ተቀሥፈ፡ ክርስቶስ፡ በእንተ፡ ቤተ፡ ክርስቲያኑ፡ በከመ፡ ይቤ፡ ጳውሎስ፡ ዘአፍቀረ፡ ብእሲቶ፡ ርእሶ፡ አፍቀረ። ወዘንተ፡ ሰሚዖ፡ ላሊበላ፡ ይልሕብ፡ በፍቅረ፡ ዚአሃ። ወይእቲኒ፡ ንድፍት፡ ይእቲ፡ በፍቅረ፡ ዚአሁ። | በከመ፡ ታፈቅሮ፡ ቤተ፡ ክርስቲያኑ፡ ለክርስቶስ። ጸሎቶሙ፡ ወስእለቶሙ፡ ወበረከቶሙ፡ ወሀብተ፡ ረድኤቶሙ፡ ወተውካፈ፡ መሥዋዕቶሙ፡ ወመዓዛ፡ ዕጣኖሙ፡ ዘዕሉድ፡ ውስተ፡ ስያሆሙ፡ ለ፳ ወ ፬ ካህናተ፡ ሰማይ። ወነጠብጣበ፡ ሐፎሙ፡ ዘበ፡ ሰጊድ። ወፃማ፡ ድካሞሙ፡ ዘበቀዊም፡ ወጻሕቀ፡ ዚአሆሙ፡ ዘበትጋህ። ወነጸፍጻፈ፡ አንብዖሙ፡ ዘበእንተ፡ ፍቅረ፡ እግዚአብሔር። ወመፍቅደ፡ ሩጸቶሙ፡ ለገይሰ፡ ቤተ፡ ክርስቲያን፡ ወለናዝዞ፡ ሙቁሐን። ወስነ፡ ይዋሄሆሙ፡ ዘይትሜሰል፡ ከመ፡ ይዋሄ፡ በግዕ። ወሀብተ፡ ምጽዋቶሙ፡ ዘኅቡእ፡ ወዘክሡት። ወኵሉ፡ ጻሕቀ፡

folio : 86


back to top

| | ተጸምዶሙ፡ ዘፆሩ፡ በሥጋሆሙ፡ ላሊበላ፡ ወመስቀል፡ ክብራ፡ ይሃሉ፡ ምስሌ፡ ንግሥትነ፡ ወለተ፡ ኢየሱስ፡ ወምስለ፡ ወለታ፡ ኂሩተ፡ ሥላሴ፡ ወላዕለ፡ ኵሎሙ፡ እለ፡ ይትአመኑ፡ በኃይለ፡ ጸሎቶሙ፡ ለእሉ፡ ክልኤሆሙ፡ ኣዕናቍ፡ ፅዱላን፡ እለ፡ ያዋክዩ፡ ወያበርሁ፡ በውስተ፡ ጽልመት፡ ይኩነነ፡ መርሃ፡ በኀበ፡ ኵሉ፡ ዘወፈርነ። ወበኀበ፡ ኵሉ፡ ዘአቶነ። በፍጽምነ፡ ወበከዋላነ፡ በይምንነ፡ ወበጽግምነ። እስከ፡ ለዓለመ፡ ዓለም፡ አሜን፨ ወእምዝ፡ ሐለየ፡ ላሊበላ፡ ኵሎ፡ ምንዳቤያቲሁ፡ ዘረከቦ፡ እምኀበ፡ ኵሎሙ፡ አዝማዲሁ፡ ወእምኀበ፡ | ኵሎሙ፡ ሕዝብ፡ ዘተዓይነ፡ ኵርኳኔ፡ ዘንጉሥ፨ {ወይ}ቤላ፡ ለብእሲቱኒ፡ ንዒ፡ {ንፃ}እ፡ ሐቅለ፡ ከመ፡ ናዕርፍ፡ እምኵሎሙ፡ ሰብእ፡ እለ፡ ይፃረሩነ። እስመ፡ ይኄይስ፡ ነቢር፡ ምስለ፡ አራዊት፡ እምነቢር፡ ምስለ፡ ሰብእ፡ ዘግዕዙ፡ እኩይ። ወዘንተ፡ ብሂሎ፡ ነሥአ፡ ለብእሲቱ። እስመ፡ ሠምረት፡ ብእሲቱኒ፡ በዝንቱ፡ ነገር። ወወፅአ፡ ምስሌሃ፡ ውስተ፡ ገዳም፡ ወነበሩ፡ ህየኒ፡ በፍቅር፡ ጽፉቅ። እንዘ፡ እግዚአብሔር፡ የዓቅቦሙ፡ ወይሜግቦሙ፡ በኵሉ፡ ውስተ፡ ኵሉ። ወእምዝ፡ በአሐቲ፡ ዕለተ፡ አመ፡ ወፅኡ፡ ውስተ፡ ገዳም፡ ወኃደሩ፡ ውስተ፡ አሐቲ፡ በዓት፡ | | ወኃጥኡ፡ ዘይዴረሩ። ወይቤላ፡ ለብእሲቱ፡ ተንሥኢ፡ ንጸሊ፡ ኀበ፡ እግዚአብሔር፡ ከመ፡ የሀበነ፡ ዘንዴረር። ወትቤሎ፡ ብእሲቱ፡ ኦሆ፡ ኦእግዚእየ። ወጸለዩ፡ እንዘ፡ ይብሉ፡ ሰፊሆሙ፡ እደዊሆሙ፡ ወአንቃዕዲሆሙ፡ አዕይንቲሆሙ፡ ላዕለ፡ ውስተ፡ ሰማይ። ግነዩ፡ ለእግዚዕብሔር፡ እስመ፡ ኄር፡ እስመ፡ ለዓለም፡ ምሕረቱ። ግነዩ፡ ለአምላከ፡ አማልክት። እስመ፡ ለዓለም፡ ምሕረቱ። ዘይሁብ፡ ሲሳየ፡ ለኵሉ፡ ዘሥጋ፡ እስመ፡ ለዓለም፡ ምሕረቱ። ወዓዲ፡ ሰአልዎ፡ እንዘ፡ ይብሉ፡ |አቡነ፡ ዘበሰማያት፡ ይትቀደስ፡ ስምከ። ሲሳየነ፡ ዘለለዕለትነ፡ ሀበነ፡ ዮም። | ወኅድግ፡ ለነ፡ አበሳነ፡ ወጌጋየነ፡ ከመ፡ ንሕነኒ፡ ንኅድግ፡ ለዘአበሰ፡ ለነ። ወኢታብአነ፡ ውስተ፡ መንሱት፡ አላ፡ አድኅነነ፡ ወባልሐነ፡ እምኵሉ፡ እኩይ። ወነጽር፡ ውስተ፡ ብሐትውናነ። እስመ፡ አንተ፡ ትቤ፡ በአፈ፡ ነቢይከ፡ ግድፍ፡ ሕሊናከ፡ ላዕለ፡ እግዚአብሔር፡ አምላክከ፡ ወውእቱ፡ ይሴስየከ። ወበእንተዝ፡ ንሕነኒ፡ ገደፍነ፡ ሕሊናነ፡ ላዕሌከ፡ እግዚኦ። እስመ፡ አንተ፡ ምብዓሊሁ፡ ለነዳይ፡ ወመሴስይ፡ ለኵሉ፡ ዘሥጋ። እስመ፡ አንተ፡ ሴሰይኮሙ፡ ለሕዝብከ፡ እስራኤል፡ መና፡ ዘኢተዘርአ፡ ውስተ፡ ምድር፡ ዘኢያብቈሎ፡ ዝናም፡ ወዘኢሐፀኖ፡ ዓየር። ወይእዜኒ፡

folio : 87


back to top

| | ትክል፡ አጽንዖተነ፡ በዘፈቀድከ፡ እመኒ፡ በሲሳይ፡ ወእመኒ፡ ዘእንበለ፡ ሲሳይ። እስመ፡ ብዙኃን፡ እለ፡ አጽናሰኮሙ፡ ዘእንበለ፡ ሲሳይ። ወበሲሳይኒ፡ ብዙኃነ፡ መገብከ፡ ወኢያኅጣእኮሙ፡ እምዘ፡ ፈቀዱ። ወዘእንበለ፡ ሲሳይኒ፡ ዘጸንዑ፡ በኃይለ፡ ዚአከ፡ እሉ፡ እሙንቱ፡ ሙሴ፡ አሐዱ፡ ዘነበረ፡ ፵ ዕለተ፡ እክለ፡ እንዘ፡ ኢይበልዕ፡ ወማየ፡ እንዘ፡ ኢይሰቲ። ወኤልያስኒ፡ ነበረ፡ ፵ ዕለተ፡ እክል፡ እንዘ፡ ኢይበልዕ፡ ወማየ፡ እንዘ፡ ኢይሰቲ። ወፈድፈደሰ፡ ዘየዓቢ፡ እምኵሉ፡ ኑኃተ፡ ጾሙ፡ አንተ፡ አጽናዕኮ፡ ለአቤሜሌክ፡ ፷ ወ ፮ተ፡ ዓመተ፡ ዘእንበለ፡ | መብልዕ፡ ወመስቴ። አመ፡ ሖረ፡ በትእዛዘ፡ ዚአከ፡ ወበትእዛዘ፡ መምህሩ፡ ከመ፡ ኢይርአይ፡ ሙስናሃ፡ ለኢየሩሳሌም፡ በምክንያተ፡ ድውያን፡ እስመ፡ አዘዘ፡ ኤርሚያስ፡ ነቢይ፡ ከመ፡ ያምጽእ፡ በለሰ፡ ለፈውሶ፡ ድውያን። ወበህየ፡ ከደንኮ፡ በመንጦላዕተ፡ ሣህልከ። እንዘ፡ ትሴስዮ፡ ንዋመ፡ ሠናየ፡ ፷ ወ ፮ተ፡ ዓመተ። ወለነኒ፡ በዘፈቀድከ፡ ትክል፡ አጽንዖተነ። ወለከ፡ ስብሐት፡ ለዓለም፡ ዓለም፡ አሜን፨ ወእምዝ፡ ሶበ፡ ፈጸሙ፡ ጸሎቶሙ፡ አንሶሰወት፡ መስቀል፡ ክብረ፡ ውስተ፡ ውሣጤ፡ በዓት፡ ወረከበት፡ በህየ፡ ጴርድክሴ፡ | | ዓቢየ፡ ወዜነወቶ፡ ለምታ። ወአርአየቶ፡ ዘረከበቶ፡ በውስተ፡ ውሣጤ፡ በዓት፡ ወነጺሮ፡ላሊበላ፡ ባረኮ፡ ለእግዚአብሔር፡ እንዘ፡ ይብል፡ ቡሩክ፡ አንተ፡ እግዚኦ፡ ዘበልዑላን፡ ተዓርፍ፡ ወትሑታነ፡ ትሬኢ። ትካትኒ፡ ለሕዝብከ፡ እስራኤል፡ አውረድከ፡ ሎሙ፡ ዖፈ፡ ድርንቅ፡ በከመ፡ ይቤ፡ ነቢይከ። ወከመ፡ ኆፃ፡ ባሕር፡ አዕዋፍ፡ ዘይሳርር። ወወድቀ፡ ማእከለ፡ ቴዓይኒሆሙ። ወዓውደ፡ ደባትሪሆሙ፡ በልዑ፡ ወጸግቡ፡ ጥቀ። ወኢያሕጣእኮሙ፡ እምዘ፡ ፈቀዱ። ወለነኒ፡ ኢኅጣእከነ፡ ለአግብርቲከ፡ እለ፡ ስዱዳን፡ እምሰብእ፡ በእንተ፡ ኃጢአትነ። ወውእተ፡ ዖፈ፡ {}ተሴስዮሙ፡ ኃደሩ፡ | እንዘ፡ የአኵትዎ፡ ለእግዚአብሔር። ጸሎቶሙ። ወበረከቶሙ፡ ወሀብተ፡ ረድኤቶሙ፡ የሃሉ፡ ምስለ፡ ፍቅርቶሙ፡ ወለተ፡ ኢየሱስ፡ ወምስለ፡ ወለታ፡ ኂሩት፡ ሥላሴ፡ ለዓለመ፡ አሜን፨ ............................................................................................................................................................ ወእምዝ፡ ነበሩ፡ ክልኤሆሙ፡ እምይእቲ፡ ዕለት፡ ውስተ፡ ይእቲ፡ በዓት፡ ኀበ፡ በጽሑ፡ በይእቲ፡ ዕለት፡ እንዘ፡ ይሴሰዩ፡ ዘአቅረበ፡ ሎሙ፡ መንፈስ፡ ቅዱስ፡ እምአቃቂራተ፡ ገዳም፡ እንዘ፡ ይትሜሰልዎ፡ ለመክብበ፡ ነቢያት፡ ኢሳይያስ፡ ወለካልአኒሁኒ፡ ነቢያት፡ ዘነበሩ፡ እንዘ፡ ይሴሰዩ፡ እምአሕማላተ፡ ገዳም፡ ጐይዮሙ፡ እምዓመፃ፡

folio : 88


back to top

| | ወግፍዕ፡ ዘይትገበር፡ በኢሩሳሌም። ወአልቦሙ፡ ካልእ፡ ሲሳይ፡ ዘእንበለ፡ ስልቆ፡ አሕማል። ወእሉኒ፡ አፍሕርተ፡ ነቢያት፡ ላሊበላ፡ ወመስቀል፡ ክብራ፡ ነበሩ፡ እንዘ፡ የዓይሉ፡ ውስተ፡ አድባር፡ ከመ፡ ዖፍ። ወእምዝ፡ ተፈነው፡ ሐራ፡ ንጉሥ፡ እለ፡ የኃሥሥዎሙ፡ ለላሊበላ፡ ወለመስቀል፡ ክብራ፡ ውስተ፡ ኵሉ፡ አህጉር፡ ወውስተ፡ ኵሉ፡ ገዳማት፡ ወውስተ፡ ኵሉ፡ መካናት። ከመ፡ ይሞቅሕልዎሙ፡ ወከመ፡ ይቅትልዎሙ፡ በእንተ፡ ቅንዓቶሙ። እስመ፡ አንሥኦሙ፡ ሰይጣን፡ ላዕለ፡ አግብርተ፡ እግዚአብሔር፡ ከመ፡ ያመክርዎሙ። ወእሙንቱሰ፡ አግብርቲሆሙ፡ | ለሥሉስ፡ ቅዱስ። ተመኪሮሙ፡ ከመ፡ ይንሥ{ኡ፡ አክ}ሊለ፡ ሕይወት፡ ዘኢይጸመሂ፡ ዘአሰፈዎሙ፡ እግዚአብሔር፡ ለእለ፡ ያፈቅርዎ። እስመ፡ ይእቲ፡ ፈተና፡ ወመከራ፡ ሎሙ፡ በዘይትዓወቅ፡ ፍቅረ፡ እግዚአብሔር፡ ዘላዕሌሆሙ። ለእመ፡ ተወክፉ፡ በአኰቴት፡ ግፍዖሙ። ዛቲ፡ አኰቴት፡ ይእቲ፡ በኀበ፡ እግዚአብሔር። ወእሙንቱሂ፡ ኄራን፡ ዘንተ፡ ሕይወተ፡ ተሰፊዎሙ፡ ይትዌከፉ፡ ንዴቶሙ፡ በአኰቴት።በከመ፡ ተወክፈ፡ ኢዮብ፡ መከራሁ፡ ለሰይጣን፡ እንዘ፡ ይአኵቶ፡ ለእግዚአብሔር፡ በኵሉ፡ ምንዳቤሁ፡ ዘበጽሖ። ወይብል፡ እግዚአብሔር፡ ወሀበ፡ ወእግዚአብሔር፡ | | ነሥአ። ወይኩን፡ ቡሩክ፡ ስሙ፡ ለእግዚአብሔር። ዕራቅየ፡ ወፃእኩ፡ እምከርሠ፡ እምየ፡ ወዕራቅየ፡ እገብዕ፡ ወስተ፡ መሬት። ወእሉኒ፡ ከዋክብት፡ ብሩሃን፡ ላሊበላ፡ ወመስቀል፡ ክብራ፡ ተሊዎሙ፡ አሰሮ፡ ለኢዮብ፡ ይትዌከፉ፡ ተፅናሶሙ፡ በአኰቴት፡ በከመ፡ ይቤ፡ ሐዋርያ። አርአያሰ፡ አኃውየ፡ ለትዕግሥተ፡ ተፅናስክሙ፡ ብክሙ፡ ነቢይት፡ እለ፡ ተናገሩ፡ በቃሉ፡ ለእግዚአብሔር። ወሰማዕክሙ፡ ትእግሥቶ፡ ለኢዮብ፡ ዘከመ፡ ገብረ፡ ወፈጸመ፡ ሎቱ፡ እግዚአብሔር። ወርኢክሙሂ፡ ከመ፡ ብዙኅ፡ ምሕረቱ፡ ለእግዚአብሔር፡ ወመስተሣህል፡ ውእቱ፤ | ወእሉሰ፡ ዕፀወ፡ ገነት፡ ላሊበላ፡ ወመስቀል፡ ክብራ፡ ፆሩ፡ ፍሬያተ፡ ትእግሥት፡ ምስለ፡ ኵሉ፡ አቅማሐ፡ ምግባራተ፡ ሠናይ፡ ታወልቲዎሙ፡ በፍቅረ፡ እግዚአብሔር። ወእልክቱሰ፡ ሐራ፡ ንጉሥ፡ እለ፡ ተፈነው፡ ከመ፡ ይሥሥዎሙ፡ እንዘ፡ ኢይረክብዎሙ፡ ወኢይበጽሕዎሙ። አስተርአዮሙ፡ መልአከ፡ እግዚአብሔር፡ በውስተ፡ ገዳም፡ ለላሊበላ፡ ወለመስቀል፡ ክብራ፡ ወይቤሎሙ፡ ናሁ፡ ወፅኡ፡ ወዓልተ፡ ንጉሥ፡ ከመ፡ ይኅሥሡክሙ፡ ተንሥኡ፡ እምዝየ፡ ወንዑ፡ ትልውኒ፡ ኀበ፡ እመርሐክሙ፡ ወውእቱሰ፡ መልአክ፡ ዘስሙ፡ ገብርኤል፡ ወዘአዕረጎሂ፡

folio : 89


back to top

| | ለላሊበላ፡ ውስተ፡ ሰማይ፡ ወዘሠወሮሂ፡ አመ፡ ፈቀዱ፡ ይቅሥፍዎ፡ ወዘተአዘዘሂ፡ እምኀበ፡ እግዚአብሔር፡ ከመ፡ ይዕቀቦ፡ በኵሉ፡ መዋዕሊሁ፡ ለሊሁ፡ ውእቱ፡ ገብርኤል፡ ወውእቱሰ፡ መልአክ፡ ክቡር፡ ብርሃናዊ፡ ዘሥዩም፡ ዲበ፡ አእላፍ። መርሆሙ፡ እንዘ፡ የሐውር፡ ፍጽመ፡ ቅድሜሆሙ። በከመ፡ መርሆ፡ ሊቀ፡ መላእክት፡ ሚካኤል፡ ለጴጥሮስ፡ ሊቀ፡ ሐዋርያት። ወውእቶሙሂ፡ ተለውዎ፡ ለገብርኤል፡ በከመ፡ ተለዎ፡ ጴጥሮስ፡ ለሚካኤል፡ ሊቀ፡ መላእክት፡ ተፈቲሖ፡ አሞቅሑ፡ ለሄሮድስ፡ ንጉሥ፡ ወአምሢጦ፡ እማእከለ፡ | ክልኤ፡ ሠገራት፡ እስከ፡ ወፅአ፡ አሐተ፡ ሰኰተ፡ ወካልአ። ወፂኦ፡ እምኆኅተ፡ ሒፂን፡ ዘተርኅወት፡ ለሊሃ፡ እምክበደ፡ ግርማሁ፡ ለሚካኤል፡ ሊቀ፡ ኃይላት፡ ወከማሁ፡ ተለውዎ፡ላሊበላ፡ ወመስቀል፡ ክብራ፡ ለገብርኤል፡ ዘመርሆሙ፡ ከመ፡ ያድኅኖሙ፡ ወይኅብኦሙ፡ እምሐራ፡ ንጉሥ፡ እለ፡ ወፅኡ፡ ከመ፡ ይኅሥሥዎሙ፡ ወአኮ፡ መጠነ፡ አሐቲ፡ ሰኰት፡ ወካልእታ፡ መሪሆ፡ ዘኃደጎሙ። አላ፡ ወሰዶሙ፡ እስከ፡ አብጽሖሙ፡ ብሔረ፡ ምሥራቅ። ወይእቲሰ፡ ብሔር፡ ጥንተ፡ ክርስትና፡ ይእቲ፡ ዘምድረ፡ ኢትዮጵያ፡ ወአብጽሖሙ፡ | | ህየ፡ ገብርኤል፡ መልአክ። ወይቤሎሙ፡ ንበሩ፡ ዝየ፡ እስከ፡ ትትፈለጡ፡ አመ፡ በጽሐ፡ ፈቃደ፡ እግዚአብሔር፡ እስመ፡ ሀለዎ፡ ለብፁዕ፡ ላሊበላ፡ ከመ፡ ይሑር፡ ሀገረ፡ ኢየሩሳሌም። ወአንቲሰ፡ መስቀል፡ ክብራ፡ ትነብሪ፡ ዝየ፡ እስከ፡ አመ፡ ይትመየጥ፡ እኁኪ፡ ነጺሮ፡ ኵሎ፡ መካናተ፡ ምሥጢር፡ ዘእግዚእ። ኀበ፡ ተጠምቀ፡ ወኀበ፡ ተሰቅለ፡ ወኀበ፡ ተቀብረ፡ ወኀበ፡ ተወለጠሂ፡ ራእዩ፡ ወደብረ፡ ዕርገቱኒ፡ እንተ፡ እምኔሃ፡ ዓርገ፡ ኀበ፡ አቡሁ። ወነበረ፡ በየማነ፡ ወላዲሁ፡ ወኵሎ፡ መካናተ፡ ዘአንሶሰወ፡ በትስብእቱ፡ ወልድ፡ ዋሕድ፡ ዘንተ፡ ኵሎ፡ መካናተ፡ ነጺሮ፡ ላሊበላ፡ እስከ፡ | ይገብእ፡ ኀቤኪ፡ ዝየ፡ ትነብሪ። ወዘንተ፡ ሰሚዓ፡ መስቀል፡ ክብራ፡ አኃዘት፡ ትተክዝ፡ በእንተ፡ ተፈልጦታ፡ እምታ። ወሶበ፡ ርእያ፡ ገብርኤል፡ መልአክ፡ ለመስቀል፡ ክብራ፡ እንዘ፡ ተኃዝን፡ በእንተ፡ ዝንቱ፡ ነገር፡ ይቤላ፡ ለምንት፡ ታበውኢ፡ ኃዘነ፡ ውስተ፡ ልብኪ። እስመ፡ አኮ፡ ባሕቲተኪ፡ ዘየኃድገኪ፡ እግዚአብሔር፡ አላ፡ ተአዘዘ፡ ለኪ፡ እምኀቤሁ፡ ለእግዚአብሔር፡ ሚካኤል፡ መልአክ፡ ዓቢይ፡ ዘይቀውም፡ በየማኑ፡ ለአኃዜ፡ ኵሉ። መልአከ፡ ኪዳኑ፡ ውእቱ፡ ዘሥዩም፡ ዲበ፡ ኃይላቲሁ፡ ከመ፡ ይዕቀብኪ። ወአነ፡ ተአዘዝኩ፡ ከመ፡ አዕቀቦ፡ ለምትኪ። ወዘንተ፡ ብሂሎ፡ ተሠወሮሙ።

folio : 90


back to top

| | ላሊበላ፡ ሰ፡ ወመስቅል፡ ክብራ፡ ነበሩ፡ ህየ፡ በተጸምዶ፡ ዓቢይ፡ በጾም፡ ወበጸሎት፡ በቀዊም፡ ወበሰጊድ፡ መጠነ፡ ነበሩ፡ ውስተ፡ ይእቲ፡ ብሔር፡ ኅቡረ። ጸሎቶሙ፡ ወበረከቶሙ፡ የሃሉ፡ ምስለ፡ ንግሥትነ፡ ወለተ፡ ኢየሱስ፡ ወምስለ፡ ወለታ፡ ኂሩተ፡ ሥላሴ፡ ለዓለመ፡ ዓለም፡ አሜን፨ ........................................................................................................................................................................ ወእምዝ፡ እምድኅረ፡ ኅዳጥ፡ መዋዕል፡ አስተርአዮሙ፡ ገብርኤል፡ ሊቀ፡ መላእክት፡ ወይቤሎሙ፡ ሰላም፡ ለክሙ፡ ኦአግብርተ፡ እግዚአብሔር። ወይቤልዎ፡ እሉሂ፡ ሰላምከ፡ ያዕርፍ፡ ላዕሌነ። ኦምሉዓ፡ ብርሃን፡ ወፍሡሐ፡ ገጽ፡ | አብሳሬ፡ {ፍ}ሥሐ። ወይቤሎሙ፡ ናሁ፡ በጽሐ፡ ጊዜሁ፡ ለነጊድ፡ ውስተ፡ ኢሩሳሌም፡ ዘነገርኩክሙ፡ ቀዳሚ። ወይእዜኒ፡ ተሰነአሉ፡ በበይናቲክሙ። ወናሁ፡ አነሂ፡ ተአዘዝኩ፡ ከመ፡ አሰዶ፡ ለብፁዕ፡ላሊበላ፡ ሀገረ፡ ኢየሩሳሌም፡ ኀበ፡ ተወልደ፡ እግዚእየ። ወኀበ፡ ፈጸመ፡ ኵሎ፡ ግብረ፡ ትስብእቱ፡ ዘፆረ፡ በእንተ፡ አፍቅሮተ፡ ሰብእ። ወይቤሎ፡ ላሊበላ፡ ለገብርኤል፡ አይቴኑ፡ ሀለወ፡ ሚካኤል፡ ዘተአዘዘ፡ ከመ፡ ይዕቀባ፡ ለዛቲ፡ አመትከ፡ ኦእግዚእየ። እስመ፡ አልባቲ፡ አሐዱሂ፡ ዘይናዝዛ፡ እምሰብእ፡ እምድኅረ፡ ተሌለየት፡ እምኔየ። ወይቤሎሙ፡ | | ነዋ፡ ይቀውም፡ ማእከሌክሙ። ወሶቤሃ፡ ርእይዎ፡ ለሚካኤል፡ ሊቀ፡ መላእክት፡ ላሊበላ፡ ወመስቀል፡ ክብራ፡ ወአምኅዎ፡ በፍርሃት፡ ዓቢይ፡ ወዲቆሙ፡ ውስተ፡ ምድር። እስመ፡ በግርማ፡ ዓቢይ፡ ርእይዎ፡ ወአንሥኦሙ፡ ሚካኤል፡ ሊቀ፡ መላእክት። ወይቤሎሙ፡ ኢትፍርሁ፡ አፍቁራነ፡ እግዚአብሔር። አንሰ፡ ቢጽክሙ፡ ዘተአዘዝኩ፡ ከመ፡ አዕቀብክሙ፡ ለምንት፡ ትሰግዱ፡ ሊተ። ወርቱዕሰ፡ ንስግድ፡ ኵልነ፡ ለእግዚአብሔር፡ ፈጣሪነ። ወናዘዞሙ፡ ብዙኃ፡ በፍሥሐ፡ ዓቢይ፡ ወበቃል፡ ጥዑም። ወእምዝ፡ ተሌለዩ፡ ላሊበላ፡ | ወመስቀል፡ ክብራ፡ ተአሚሆሙ፡ በአምኃ፡ ቅድሳት። ወላሊበላ፡ ሰ፡ /ሖረ፡/ ምስለ፡ ገብርኤል፡ ውስተ፡ ፍኖተ፡ ኢየሩሳሌም። ወመስቀል፡ ክብራኒ፡ ተኃድገት፡ ህየ፡ ምስለ፡ ሚካኤል፡ ሊቀ፡ መላእክት፡ ወእምልቦሙሰ፡ ኢተበትከ፡ አሕባለ፡ ፍቅሮሙ፡ ወመልክዓ፡ ገጹኒ፡ ለላሊበላ፡ ሥዑል፡ ውስተ፡ ልበ፡ መስቀል፡ ክብራ፡ ወመልክዓ፡ ገጻኒ፡ ለመስቀል፡ ክብራ፡ ሥዑል፡ ውስተ፡ ልበ፡ ላሊበላ፡ ወባሕቱ፡ ተራኃቁ፡ እምዓይነ፡ ሥጋ፡ እንዘ፡ ኢይትራኃቁ፡ እምዓይነ፡ ሕሊና፡ ዘበሃይማኖት፡ ወፈነወቶ፡ ለብእሲሃ። ኀበ፡ በጻሕከ፡ መካናት። ወኀበ፡ አማኅከ፡ አብያተ፡

folio : 91


back to top

| | ክርስቲያናት፡ ዝክራ፡ ለአመትከ። ወኢትርስዓኒ፡ በጊዜ፡ ትዜከራ፡ ለነፍስከ። እስመ፡ ሐብለ፡ ፍቅርነ፡ ኢይትበተክ፡ በመጥባሕት፡ በሊህ። ወኰኵሐ፡ ኪዳንነ፡ ኢይትወቀር፡ በመፍጽሕ። ወበእንተዝ፡ ረስየኒ፡ ከመ፡ እንተ፡ ነፍስከ፡ ወሥጋከ። እስመ፡ አሐዱ፡ አባል፡ ንሕነ፡ ወኢኮነ፡ ክልኤተ። በከመ፡ ክርስቶስ፡ አሐዱ፡ አባል፡ ምስለ፡ ቤተ፡ ክርስቲያኑ። አንብረኒኬ፡ ከመ፡ ሕልቀት፡ ውስተ፡ ልብከ። ወከመ፡ ማዕተብ፡ በመዝራዕትከ። እስመ፡ ፍቅር፡ ከመ፡ ሞት፡ ጽንዕት። ወሊተሰ፡ ኃዘን፡ ውእቱ፡ ሲሳይየ። ወአንብዕ፡ ውእቱ፡ ስቴየ። | እስከ፡ አመ፡ እሬእየከ፡ ዳግመ። ወዘንተ፡ ብሂላ፡ አርመመት፡ ሶቤሃ፡ እንዘ፡ ይውኅዝ፡ አንብዓ፡ ዲበ፡ መላትሒሃ። ወያንጠበጥብ፡ ውስተ፡ እንግድዓሃ። ወይሠወጥ፡ ውስተ፡ ኅባኔ፡ መልበሳ። ወእንዘ፡ ይወርድ፡ ውስተ፡ ምድር፡ ወያርኅስ፡ መሬተ፡ ወይሬሲ፡ ፅቡረ፡ ውኂዘ፡ አንብዓ፡ እምብዝኃ፡ ፍቅራ፡ ለምታ። ወውእቱኒ፡ አውሥአ፡ ወይቤላ፡ እመሰ፡ ረሳዕኩኪ፡ ለትርስዓኒ፡ የማንየ። ወይጥጋዕ፡ ልሳንየ፡ በጒርዔየ፡ ለእመ፡ ኢተዘከርኩኪ፡ ኦእኅትየ፡ ፍቅርትየ፡ ወኀበ፡ ዘበጻሕኩሂ፡ መካናት፡ ለእመ፡ አማኅኩ፡ መቅድመ፡ ኵሉ፡ አምኆትየ፡ | | ይኩንኪ፡ ለኪ። ወዘአምኃ፡ ወሰዓማ፡ ከናፍርየ፡ ይኩንኪ፡ ከመ፡ ዘሰዓማ፡ ከናፍርኪ። ወለእመሂ፡ አንብዓ፡ አዕይንትየ፡ ይኩንኪ፡ ከመ፡ ዘአንብዓ፡ አዕይንትኪ። ወኵሉ፡ ምግባራት፡ ሠናያት፡ ዘገበርኩ፡ ለይኩን፡ ለኪ፡ ክፍለ፡ ምስሌየ፡ በኵሉ፡ ገጽ። እስመ፡ አሐዱ፡ አባል፡ ንሕነ፡ በከመ፡ ትቤሊኒ፡ አንቲ፡ እሙን፡ ውእቱ፡ ወኢኮነ፡ ሐሰተ። ወዘንተ፡ ብሂሎሙ፡ ተፋነው፡ ክልኤሆሙ። ወላሊበላ፡ ሖረ፡ ምስለ፡ ገብርኤል፡ መልአክ፡ ውስተ፡ ፍኖቱ፡ ኀበ፡ ዘተኣዘዘ፡ ለነጊደ፡ ኢየሩሳሌም። ወለመስቀል፡ ክብራኒ፡ ወሰዳ፡ ሚካኤል፡ ሊቀ፡ መላእክት፡ ተመሲሎ፡ | ከመ፡ አሐዱ፡ እምነ፡ ወራዙት፡ ወአብጽሖ፡ ኀበ፡ አንስት፡ ኄራተ፡ ብሔረ፡ ወአማኅፀና፡ ኀቤሆን፡ እንዘ፡ ይብል፡ ዕቀባ፡ ሊተ፡ ኦእኃትየ፡ ፍቁራተ፡ አምላክ፡ ዛተ፡ ወለተ፡ በእንተ፡ ፍቅረ፡ እግዚአብሔር። እስከ፡ አመ፡ እትመየጥ፡ በጺሕየ፡ ኀበ፡ ዘፈነወኒ፡ አምላክክን፡ ወእማንቱሂ፡ አውሥአሁ፡ እንዘ፡ ይብላ፡ አይቴኑ፡ ተሐውር፡ ኦእግዚእነ፡ ሠናየ፡ ራእይ፡ ወጥዑመ፡ ልሳን። እስመ፡ እምጊዜ፡ ርኢናከ፡ ተሠውጠ፡ ፍቅርከ፡ ውስተ፡ ልብነ። እስመ፡ አመ፡ ኮነ፡ ኢርኢነ፡ ዘከማከ፡ ዘይኤድም፡ ራእዩ፡ ወይጥዕም፡ ቃሉ። እስመ፡ ራእየ፡ ዚአከሰ፡ ሶበ፡ ንሬኢ፡ ያዜክረነ፡

folio : 92


back to top

| | ላህዮ፡ ለመርዓዊ፡ ሰማያዊ፡ ዘአልቦ፡ ጥልቀት፡ ውስተ፡ መርዓሁ። ወውእቱሰ፡ መልአክ፡ ዘስሙ፡ ሚካኤል፡ ዘአስተርአዮን፡ በአምሳለ፡ ወሬዛ፡ ይቤሎን፡ ለእማንቱ፡ አንስት፡ ሰአላሁኬ፡ ለእግዚአብሔር፡ ከመ፡ ትኩና፡ ድልዋተ፡ ለተወክፎ፡ ውእቱ፡ መርዓዊ፡ ሰማያዊ፡ ዘአልቦ፡ ጥልቀተ፡ ውስተ፡ ከብካቡ፡ ዘይሤኒ፡ ላህዩ፡ እምውሉደ፡ እጓለ፡ እመሕያው። ወሊተኒ፡ ፈነዋኒ፡ ወንሥአሃ፡ ለዛቲኒ፡ እኅትክን፡ ተሀሉ፡ ምስሌክን፡ እስከ፡ እትመየጥ፡ ኀቤክን፡ በጺሕየ፡ ኀበ፡ ዘፈነወኒ፡ አምላክክን። ወይቤላሁ፡ ንትዌከፋ፡ ንሕነ፡ ለዛቲ፡ እኅትነ። አኮ፡ ዘንሬእያ፡ ከመ፡ | እኅትነ። አላ፡ ከመ፡ እግዚእትነ። እስመ፡ በከመ፡ ሞገስከ፡ ሞገሳ፡ ለዛቲኒ፡ በኀቤነ። ወዘንተ፡ ብሂሎ፡ አማኅፀና፡ ሚካኤል፡ ለመስቀል፡ ክብራ፡ ኀበ፡ እማንቱ፡ አንስት፡ ወእምዝ፡ ተሠወሮን፡ ወሶበ፡ ይመጽአ፡ ትካዝ፡ ወኃዘን፡ ለመስቀል፡ ክብራ፡ በእንተ፡ ተፈልጦቱ፡ ለምታ፡ ይመጽእ፡ ሚካኤል፡ ወየስተርእያ፡ ወይናዝዛ፡ እስከ፡ የኃድእ፡ ልባ። ወትትፌሣሕ፡ እምነ፡ ጣዕመ፡ ቃሉ፡ ዘያስተፌሥሕ፡ እምስታየ፡ ወይን። ወዘይጥዕም፡ እመዓር፡ ወሦከር። ወዘልፈ፡ ኢይትፈለጥ፡ እምኔሃ። በክቡት፡ ወባሕቱ፡ ሶበ፡ ትቴክዝ፡ ይትከሠታ፡ ከመ፡ ይትናዘዝ፡ ልባ፡ በነጽሮቱ፡ | | በጣዕመ፡ ቃሉ፡ ህየንተ፡ ምታ። ወገብርኤልሰ፡ ሊቀ፡ ኃይላት፡ ዘመርሆ፡ ለብፁዕ፡ ላሊበላ፡ ወወሰዶ፡ ውስተ፡ ኢየሩሳሌም፡ ከዊኖ፡ ከመ፡ አሐዱ፡ እምነ፡ ወራዙት፡ ሠናየ፡ ራእይ፡ ወምሉዓ፡ ሞገሥ፨ ወጽሑድ፡ በቅብዓ፡ መለኮት። ወኢተፈልጠ፡ እምኔሁ፡ ኢበመዓልት፡ ወኢበሌሊት። ወኢተሠወሮ፡ ፍጹመ፡ ወኢአሐተ፡ ሰዓተ፡ በውስተ፡ ፍኖት። አላ፡ ገሃደ፡ ያንሶሱ፡ ኅቡረ፡ ምስሌሁ፡ እንዘ፡ ይትናገሩ፡ ነገራተ፡ ምሥጢር፡ ዘላዕሉሂ፡ ወዘታሕቱሂ። ወያስተፌሥሖ፡ በጣዕመ፡ ቃሉ፡ ለላሊበላ፡ እስከ፡ ይረስዕ፡ ድካመ፡ ጠባይዕ፡ ዘውስተ፡ ፍኖተ፡ ኢየሩሳሌም። ወሶበሂ፡ | ይነብር፡ ምስሌሁ፡ ይነብር። ወሶበሂ፡ ይበልዕ፡ ምስሌሁ፡ ይበልዕ፡ ወሶበሂ፡ ይሰቲ፡ ይትሜሰል፡ ከመ፡ ዘይሰቲ፡ ወመብልዓሰ፡ ወመስቴ፡ ምድራዊተ፡ ኢጥዕመ፡ ላሊበላ፡ ፍጹመ። ወእምአመ፡ ወጠነ፡ ሐዊረ፡ ኢየሩሳሌም፡ አላ፡ ሶበ፡ ይበጽሕ፡ ጊዜ፡ ድራር፡ ይጼልዩ፡ ክልኤሆሙ፡ ኅቡረ፡ ሰፊሆሙ፡ እደዊሆሙ፡ ወአንቃዕዲዎሙ፡ ላዕለ። ወሶበ፡ ይፌጽሙ፡ ጸልዮ፡ ወያስተጋብኡ፡ እደዊሆሙ፡ ወያቴሕቱ፡ አዕይንቲሆሙ፡ ውስተ፡ ምድር፡ ይረክቡ፡ ማዕደ፡ {ሥሩዓ፡} ወኅብስተ፡ ፀዓዳ፡ ከመ፡ በረድ። ወምውቀ፡ ከመ፡ ዘወፅአ፡ እምዕቶን፡ በጊዜሃ። ወልምላሜሃ፡ ሠናይ፡ ጥቀ።

folio : 93


back to top

| | ወጽዋዓኒ፡ ፀዓዳ፡ ከመ፡ ሐሊብ፡ ወጥላሌሁ፡ ፈድፋደ፡ ወያስተፌሥሕ፡ ልበ፡ ወይኢድም፡ ለአዕይንት። ኅብስቱኒ፡ ያጸግብ፡ በነጽሮ። ወጽዋዑኒ፡ ያረዊ፡ በርእዮ። ወላሊበላ፡ ሰ፡ ይሴሰይ፡ በከመ፡ ልማደ፡ ጠባይዑ። ወገብርኤልሰ፡ ይትሜሰል፡ ከመ፡ ዘይበልዕ፡ ወይሰቲ፡ ምስሌሁ፡ በእንተ፡ አፍቅሮቱ፡ ለላሊበላ፡ ወበሊዖሙ፡ ወሰቲዮሙ። ወዘተረፈ፡ ይትመሠጥ፡ ከመዝ፡ ይትወሀቦሙ፡ ዘልፈ። ወውስተ፡ ጠፈረ፡ ቤትሂ፡ ኢቦአ፡ እስከ፡ በጽሐ፡ ኀበ፡ ሊቀ፡ ጳጳሳት። ወእምዝ፡ እንዘ፡ ያንሶሱ፡ አሐተ፡ ዕለተ፡ ይቤሎ፡ላሊበላ፡ ለገብርኤል፡ ለምንትኑ፡ ኦእግዚእየ፡ ዘኢትገብር፡ ሊተ፡ | በከመ፡ ገበርከ፡ ሊተ፡ ቀዳሚ፡ አመ፡ አዕረገኒ፡ ውስተ፡ ሰማይ። አሜሃሰ፡ ፆርከኒ፡ በአክናፊከ፡ ብሩሃት፡ እስከ፡ አብጻሕከኒ፡ ውስተ፡ ኵሎን፡ ሰማያት። ወአርአይከኒ፡ ኵሎ፡ ምሥጢራተ፡ ብርሃናት፡ መጠነ፡ እክል፡ ርእየ። ወይቤሎ፡ ገብርኤል፡ አኮ፡ ኵሎ፡ ዕለተ፡ ዘይዌጥሑ፡ ቅዱሳን፡ ሰብእ፡ ዲበ፡ አክናፈ፡ መላእክት። ወአኮ፡ ኵሎ፡ ዕለተ፡ ዘይፄዓኑ፡ ደመናተ። ወሐዋርያትኒ፡ አኮ፡ ኵሎ፡ ዕለተ፡ ዘይትመሠጡ፡ በደመናት፡ አላ፡ ቦ፡ ሶበ፡ ያንሶስው፡ በእገሪሆሙ፡ እስከ፡ ይረክቡ፡ ፃማ፡ ዓቢየ፡ እምድካመ፡ ፍኖት፡ ከመ፡ ይፈድፍድ፡ ዓስበ፡ ሩፀቶሙ። ወከመ፡ ይርከቡ፡ ምዝጋና፡ በኀበ፡ እግዚኦሙ፡ | | እስመ፡ ተሳተፍዎ፡ ለፃማሁ፡ ዘገብረ፡ በዲበ፡ ምድር፡ ደክመሂ፡ ወርኅበሂ፡ ወጸምዓሂ፡ ከመ፡ ይፈጽም፡ ኵሎ፡ ግብረ፡ ትስብእት፡ እስመ፡ በእንቲአሁ፡ ተብህለ፡ በእንተ፡ ፍቅረ፡ ሰብእ። ደክመ፡ እንዘ፡ እግዚአ፡ ኃይል። ርኅበ፡ እንዘ፡ መሴስይ፡ ለኵሉ። ጸምዓ፡ ዘይሁብ፡ ነቅዓ፡ ማየ፡ ሕይወት፡ ዘኢይጸምዕ፡ ዘእስትዮ፡ ለዓለም። ወእሙንቱሂ፡ ከመ፡ ይትመሰልዎ፡ ለእግዚኦሙ፡ ደክሙሂ፡ ርኅቡሂ፡ ወጸምዑሂ። ወእምድኅረሰ፡ ተወክፉ፡ ኵሎ፡ ምንዳብያተ፡ ወዘፍኖትሂ፡ ዕፀበ፡ ተውህቦሙ፡ ሥልጣን፡ ከመ፡ ይፀዓኑ፡ ዘባነ፡ ደመናት። ወተውህቦሙ፡ አክሶስያ፡ ከመ፡ ይትወጥሑ፡ | ላዕለ፡ አክናፈ፡ መላእክት። ወአንተሂ፡ ተዓገሥ፡ ኦብእሴ፡ እግዚአብሔር፡ ወአጥብዕ፡ ብበከ፡ በከመ፡ እሙንቱ፡ አጥብዑ፡ ልቦሙ፡ ለገቢረ፡ ትእዛዙ። ከመ፡ ትፈጽም፡ ሩፀተከ፡ ዘተፈኖከ፡ በእንቲአሃ። ወፈድፋደሰ፡ ኢሰማዕከኑ፡ ዘረከበት፡ እግዚእትነ፡ ማርያም፡ ትምክህተ፡ ሰማያት፡ ወምድር፡ አመ፡ መለኮት። ፃማ፡ ዓቢየ፡ ወድካመ፡ ብዙኃ፡ ወኃዘነ፡ ዕፁበ፡ ወአንብዓ፡ መሪረ። አመ፡ ጐየት፡ እምገጸ፡ ሄሮድስ። ሶበ፡ አዘዘ፡ ከመ፡ ይቅትሉ፡ ኵሎ፡ ሕፃናተ፡ ዘእምክልኤ፡ ዓመት፡ ወዘይንዕስሂ፡ እምኔሁ፡ እንዘ፡ ይመስሎ፡ ዘይረክቦ፡ ለወልዳ። በእንተ፡ ዝንቱኬ፡

folio : 94


back to top

| | እንዘ፡ ትሐውር፡ በጐይይ፡ እምኢየሩሳሌም፡ ውስተ፡ ምድረ፡ ግብጽ፡ ምስለ፡ ዮሴፍ፡ አረጋዊ፡ ወምስለ፡ ሰሎሜ። ረከባ፡ ዐቢይ፡ ምንዳቤ፡ ወኃዘን፡ ወገዓር፡ ወአንብዕ፡ ብዙኅ፡ በውስተ፡ ፍኖት። አኮ፡ ከማከ፡ ዘአንሶሰወት፡ በፍሥሐ። አላ፡ በላህ፡ ብዙኅ። ቦአመ፡ ትበኪ፡ በእንተ፡ ዮሴፍ፡ ሶበ፡ ይደክም፡ እስመ፡ አረጋዊ፡ ውእቱ፡ ወሑረቶሙኒ፡ በጕጕዓ። ወቦ፡ አመ፡ ትበኪ፡ ሶበ፡ ርኅቡ፡ ወጸምዑ፡ ዮሴፍ፡ ወሰሎሜ። ወቦ፡ አመ፡ ትደክም፡ ለሊሃኒ። ወቦ፡ አመ፡ ትበኪ፡ በእንተ፡ ሕፃና፡ እስመ፡ ይመስላ፡ ዘይፌኑ፡ ሄሮድስ፡ እምሐራሁ፡ ከመ፡ ይዴግንዎሙ፡ ወየአኃዝዎሙ። ወቦ፡ አመ፡ | አብከይዋ፡ ፈያትኒ፡ አመ፡ ነሥኡ፡ ልብሳሂ፡ ወልብሶሂ፡ ለወልዳ። ወሶበ፡ ርኢከ፡ አንተሂ፡ እምበከይከ፡ ብዙኃ፡ ርእየከ፡ ኃዘና፡ ለድንግል። ወሶበ፡ ይቤሎ፡ ከመዝ፡ አውኃዘ፡ አንብዖ፡ ዲበ፡ መላትሒሁ። እስከ፡ አርሐሰ፡ ምድረ፡ ውኂዘ፡ አንብዑ፡ ወሶበ፡ ርእዮ፡ ገብርኤል፡ መልአክ፡ ለላሊበላ፡ እንዘ፡ ይበኪ። ይቤሎ፡ ሶበሰ፡ ነበርከ፡ አሜሃ፡ እንዘ፡ የዓውዳ፡ ኃዘን፡ ለድንግል፡ በዲበ፡ ኃዘን፡ ወድንጋፄ፡ በዲበ፡ ኃዘን፡ ወድንጋፄ፡ በዲበ፡ ድንጋፄ፡ በእንተ፡ ሕፃና። ወአንተሂ፡ ሶበ፡ ርኢከ፡ እምአፈድፈድከ፡ ብካየ። ኅድግስ፡ ሰብእ፡ ዘደመ፡ ነፍስ። አዕባንኒ፡ እምበከዩ፡ ሶበ፡ ቦሙ፡ ልብ፡ ወአንሰ፡ ርኢክዋ፡ ለድንግል፡ | | አሜሃኒ፡ እስመ፡ ምስሌሃ፡ ነበርኩ፡ እንዘ፡ አንሶሱ፡ አነ፡ ውእቱ፡ ገብርኤል፡ ዘአስተርአይክዎ፡ ለዮሴፍ፡ በሕልም፡ ከመ፡ ይንሣእ፡ ሕፃነ፡ ወእሞ፡ ወይሑር፡ ውስተ፡ ምድረ፡ ግብጽ። ወዘንተ፡ እንዘ፡ ይብል፡ አንበስበሰ፡ ብርሃኑ፡ በቅድመ፡ላሊበላ፡ ወአንበልበለ፡ አክናፊሁ። እስመ፡ ቀዲሙሰ፡ በአምሳለ፡ ወሬዛ፡ ሠናየ፡ ራእይ፡ ነበረ፡ እንዘ፡ ይመርሆ፡ ወይናዝዞ፡ ወያስተፌሥሖ፡ በቃለ፡ ኑዛዜሁ፡ ወአሜሃኔ፡ በጊዜ፡ ተወለጠ፡ በከዊነ፡ መልአክ፡ መጠነ፡ ይክል፡ ነጽሮቶ፡ ላሊበላ፡ ወሶቤሃ፡ ፆሮ፡ በአክናፊሁ፡ ብሩሃት፡ ወአብጽሖ፡ ኀበ፡ ዴዴሁ፡ ለሊቀ፡ ጳጳሳት። | ወዜነዎ፡ ህላዌሁ፡ ወኵሎ፡ ምግባራቲሁ፡ ወፍናዊሁ፡ ለብፁዕ፡ላሊበላ፡ ወውእቱሂ፡ ዘከመ፡ ተአዘዘ፡ ከመ፡ ይዕቀቦ፡ በኵሉ፡ መዋዕሊሁ፤ ወይቤሎ፡ ሊቀ፡ ጳጳሳት፡ ለውእቱ፡ መልአክ። እምአይቴኑ፡ ኦእግዚእየ፡ ዘከመዝ፡ ብእሲ፡ ዘኮነ፡ ዘውገ፡ መላእክት፡ እስከ፡ ትዌድሶ፡ አንተ፡ ኦእግዚእየ። ወተሠጥዎ፡ ውእቱ፡ መልአክ፡ ለሊቀ፡ ጳጳሳት፡ ወይቤሎ፡ ኢትዮጵያዊ፡ ውእቱ፡ ወትሩፈ፡ ምግባረ፡ ውእቱ፡ ብእሲሁ፡ ፈድፋደ። ወቦቱ፡ ሞገስ፡ በኀበ፡ እግዚአብሔር፡ በቅድመ፡ መላእክቲሁ። ወነገሮ፡ ዘከመ፡

folio : 95


back to top

| | ርእየሂ፡ ምሥጢራተ፡ ሰማይ። ወዘከመ፡ ተቀብዓሂ፡ ቅብዓ፡ መንግሥት፡ እምኀበ፡ እግዚአብሔር። ወዘከመሂ፡ ሀለዎ፡ ከመ፡ ይሕንጽ፡ ኣብያተ፡ ክርስቲያናት፡ ዘእንበለ፡ ዕፅ፡ ወመሬት። ዘበእንቲአሆን፡ ተቀብዓ፡ መንግሥት። ወዘንተ፡ ሰሚዖ፡ ሊቀ፡ ጳጳሳት፡ እምኀበ፡ ውእቱ፡ መልአክ፡ ዘስመ፡ ገብርኤል፡ አኃዘ፡ ይሰብሖ፡ ለእግዚአብሔር፡ እንዘ፡ ይብል፡ ቡሩክ፡ አንተ፡ እግዚኦ፡ እምቅድመ፡ ዓለም። ወይትባረክ፡ ስመ፡ ስብሐቲከ። ዘኢኃደገ፡ ዓለመከ፡ እንበለ፡ ኅሩያኒከ፡ በውስተ፡ ኵሉ፡ ብሔር፡ ወበውስተ፡ ኵሉ፡ አህጉር። | በከመ፡ ትቤ፡ ለሊከ፡ አማን፡ እብለክሙ፡ ኢይትፌጸማ፡ አህጉረ፡ እስራኤል፡ እንበለ፡ ኅሩያንየ፡ ዘበእንቲአሆሙ፡ ይሠርቅ፡ ፀሐይ። ወዘበእንቲአሆሙ፡ ይወርድ፡ ጠል፡ ወዘበእንቲአሆሙ፡ ይትባረዩ፡ ሙያጢ፡ አዝማን፡ ክረምት፡ ምስለ፡ ሐጋይ። ወመጸው፡ ምስለ፡ ጸደይ፡ ዘበኃይለ፡ ጸሎቶሙ፡ ትጸንዕ፡ ሀገር። ወበኃይለ፡ ጸሎቶሙ፡ ትሁብ፡ ምድር፡ ፍሬሃ፡ ወዕፀወ፡ ገዳምኒ፡ ይፈርዩ፡ በዝናመ፡ ትንበልናሆሙ። ወይሁቡ፡ ፍሬሆሙ፡ በበጊዜሁ፡ ወበበአስካሊሁ። ወይእዜኒ፡ ኢትኅድጋ፡ ለዓለምከ፡ እንበለ፡ ኅሩያኒከ። | | ወኢትኅድጋ፡ ለቅድሳቲከ፡ ወለቤተ፡ ክርስቲያንከ፡ እንበለ፡ ምእመናኒከ፡ ወላእካኒከ። ወኖሎተ፡ መርዔትከ፡ ወርትዕተ፡ ሃይማኖትከ፡ ኢታሰስል፡ እምልቦሙ፡ ለእለ፡ የአምኑ፡ ብከ። ለከ፡ ይደሉ፡ እግዚኦ፡ ስብሐት፡ በጽዮን። ወለከ፡ ይትፌኖ፡ ጸሎት፡ በኢየሩሳሌም። ለዓለመ፡ ዓለም፡ አሜን፨ ፨ ፨ ወዘንተ፡ ብሂሎ፡ ሊቀ፡ ጳጳሳት፡ ወፅአ፡ ኣፍኣ፡ ውስተ፡ ዴዴ፡ ኀበ፡ ሀለወ፡ላሊበላ፡ ወሶበ፡ ርእዮ፡ ብፁዕ፡ ላሊበላ፡ ወድቀ፡ ውስተ፡ ምድር፡ እንዘ፡ ይሰግድ፡ ሎቱ፡ ታሕተ፡ እገሪሁ፡ ለሊቀ፡ ጳጳሳት። ወሰፍሐ፡ እዴሁ፡ ሊቀ፡ ጳጳሳት፡ ወአንሥኦ፡ | ወሐቀፎ፡ ክሣዶ፡ ወአምኆ፡ በፍሥሐ፡ እንዘ፡ ያክሞስ፡ በብሩህ፡ ገጽ፡ ወበፍቅር፡ ዓቢይ፡ ወበቃል፡ ጥዑም። እንዘ፡ ይብሎ፡ ይዌድሶ፡ ወይብሎ፡ ለምንት፡ ትሰግድ፡ ሊተ። ርቱዕሰ፡ ንስግድ፡ ለከ፡ ንሕነ፡ እስመ፡ ተሰምዓ፡ ጸሎትከ፡ በኀበ፡ ሰማያውያን፡ ወምድራውያን፤ ወዘንተ፡ ብሂሎ፡ ሊቀ፡ ጳጳሳት፡ አዘዞሙ፡ ለደቂቁ፡ እለ፡ ሀለው፡ ምስሌሁ፡ ከመ፡ ይስግዱ። ወይቤሎሙ፡ ስግዱ፡ ታሕተ፡ እገሪሁ፡ ለዝንቱ፡ ብእሲ፡ ቅዱስ፡ ወኅሩይ፡ ከመ፡ ትንሥኡ፡ በረከቶ። እስመ፡ መሲሐ፡ እግዚአብሔር፡ ውእቱ፡ ዘቦ፡ ላዕሌሁ፡ ቅብዓ፡ መንግሥት፡ መንፈሳዊ። ወሶበ፡ ሥጋዊ።

folio : 96


back to top

| | ወሶበ፡ ይቤሎሙ፡ ከመዝ፡ ሊቀ፡ ጳጳሳት፡ አትሐቱ፡ አርእስቲሆሙ፡ ታሕተ፡ መከየዱ፡ እገሪሁ፡ እንዘ፡ የኃሥሡ፡ ፀበለ፡ እገሪሁ። ወይብሉ፡ ለትኩነነ፡ ዛቲ፡ ፀበልከ፡ ከመ፡ መሬት፡ ዘረሰያ፡ እግዚእነ፡ ፅቡረ፡ በምራቁ፡ ቅዱስ። ወጸገዎ፡ ብርሃነ፡ ለዘዕውሩ፡ ተወልደ፡ ቀቢዖ፡ ኪያሁ፡ በይእቲ፡ ፅቡር። ወለነኒ፡ ይኩነነ፡ ከማሁ፡ ዝንቱ፡ ፀበለ፡ እገሪከ፡ ወይክሥት፡ አዕይንተ፡ ልብነ፡ ዘጸልመ፡ በኃጢአት። ወላሊበላ፡ ሰ፡ ይከልኦሙ፡ ከመ፡ ኢይግሥሡ፡ እገሪሁ፡ እንዘ፡ ይብል፡ ለምንት፡ ትፃምው፡ በገሢሠ፡ እላንቱ፡ እገርየ፡ ዘኢሮፃ፡ እስከ፡ ይእዜ፡ ውስተ፡ ፍኖተ፡ ሰላም፡ | ዘእንበለ፡ ውስተ፡ ፍኖተ፡ ኃጢአት። ወከመዝ፡ ይብል፡ እንዘ፡ ያቴሕት፡ ርእሶ። ወእምዝ፡ አዘዞሙ፡ ሊቀ፡ ጳጳሳት፡ ከመ፡ ያምጽኡ፡ ማየ። ወዘንተ፡ ብሂሎ፡ አብኦ፡ ውስተ፡ ቤቱ፡ ወሐፀቦ፡ እገሪሁ፡ ለላሊበላ፡ ወተቀብዓ፡ ለሊሁ፡ ሊቀ፡ ጳጳሳት፡ በሕጻበ፡ እገሪሁ፡ ለላሊበላ፡ ወነዝኆሙ፡ ካዕበ፡ ለኵሎሙ፡ ሰብአ፡ ቤቱ። ወለእለሂ፡ ቦሙ፡ ደዌ፡ ረቀዮሙ፡ በውእቱ፡ ማይ፡ ወሐይው፡ እምደዌሆሙ፡ በኃይለ፡ ጸሎቱ፡ ለብፁዕ፡ላሊበላ፡ ላሊበላ፡ ወእምድኅረዝ፡ ነበሩ፡ ሊቀ፡ ጳጳሳት፡ ወላሊበላ፡ በባሕቲቶሙ፡ እንዘ፡ ይትናገሩ፡ ዕበያተ፡ ለእግዚአብሔር። ወተስእሎ፡ | | ሊቀ፡ ጳጳሳት፡ ለላሊበላ፡ ዘከመ፡ እፎ፡ ምክንያተ፡ ምጽአቱ። ወዘከመ፡ እፎ፡ ፃመወ፡ በፍኖተ፡ ኢየሩሳሌም።ወነገሮ፡ ብፁዕ፡ ላሊበላ፡ ኵሎ፡ ወዘከመሂ፡ ይበጽሕ፡ ሀገረ፡ ኢየሩሳሌም። ወእምድኅረዝ፡ አቅረቡ፡ ሎሙ፡ ማዕደ፡ ወበልዑ፡ ወሰትዩ፡ ወቤቱ፡ እንዘ፡ ይትናገሩ፡ ነገራተ፡ እግዚአብሔር፡ ወበሳኒታ፡ ተሰናዓሎ፡ ብፁዕ፡ ላሊበላ፡ ለሊቀ፡ ጳጳሳት፡ እንዘ፡ ይሰግድ፡ ሎቱ፡ ታሕተ፡ እገሪሁ። ወይቤሎ፡ ባርክ፡ ሊተ፡ ፍኖትየ፡ ኦአቡየ፡ በትረ፡ ያሪክ፡ አበ፡ ኵሉ፡ ዓለም፡ ወውእቱሂ፡ ሊቀ፡ ጳጳሳት፡ አውሥኦ፡ በቃለ፡ ቡራኪ፡ እንዘ፡ ይብል። ዘባረከ፡ ፍ| ኖቶ፡ ለያዕቆብ። ወዘይቤሎ፡ ኢትፍራህ፡ ወሪደ፡ ግብጽ፡ እስመ፡ አነ፡ ሀሎኩ፡ ምስሌከ። ውእቱ፡ የሃሎ፡ ምስሌከ፡ ወይባርክ፡ ፍኖተከ። ወዘመርሆሙ፡ ለእስራኤል፡ መዓልተ፡ በደመና፡ ወኵሉ፡ ሌሊተ፡ በብርሃነ፡ እሳት። ውእቱ፡ ለይምራህከ፡ ወይሠርሕ፡ ወያብርህ፡ ፍኖተከ፡ ወይትወከፍ፡ ንግደተከ። ወዘንተ፡ ብሂሎ፡ ፈነዎ፡ ሊቀ፡ ጳጳሳት፡ እንዘ፡ ይቴክዝ፡ በእንተ፡ ተፈልጦቱ፡ እስመ፡ መአድም፡ ውእቱ፡ ላሊበላ፡ በቃሉኒ፡ ወበምግባሩኒ፡ ወራእዩኒ፡ ፍሡሕ፡ ወግሩም። ወሶበ፡ ርኅቀ፡ ንስቲተ፡ እምሊቀ፡ ጳጳሳት። ፆሮ፡ ገብርኤል፡

folio : 97


back to top

| | ፲፫ በአክናፊሁ፡ ብሩሃት፡ ወወሰዶ፡ ወአብጽሖ፡ ሀገረ፡ ኢየሩሳሌም። ወአርአዮ፡ ኵሎ፡ መካናተ። ኀበ፡ ተሰብአሂ፡ እግዚእነ፡ ወኀበ፡ ተወልደሂ፡ ወኀበ፡ ገብረሂ፡ ተአምራተ፡ በአጽግቦ፡ ፶፻፡ ብእሲ። ወኀበ፡ ተወለጠ፡ ራእዩ፡ ወኀበ፡ ተሰቅለ፡ ወኀበ፡ ተቀብረ። ወመካነሂ፡ አንተ፡ እምኔሃ፡ ዓርገ፡ ውስተ፡ ሰማይ። ወኵሎ፡ መካናተ፡ ምሥጢር፡ አርአዮ፡ እንዘ፡ ይብሎ፡ ለቡ፡ እሎንተ፡ መካናተ፡ ዘከመ፡ እፎ፡ ኑባሬ፡ ሥርዓቶን። እስመ፡ በእንተዝ፡ ተፈኖከ፡ ዝየ። ወወሰዶ፡ ካዕበ፡ ኀበ፡ ፈለገ፡ ዮርዳኖስ፡ ዘተጠምቀ፡ ቦቱ፡ እግዚእነ። ወርእየ፡ ውእተኒ፡ | ማየ፡ ዮርዳኖስ፡ ወተሐፅበ፡ ቦቱ፡ ወሰትየ፡ እምኔሁ። ወይቤሎ፡ ገብርኤል፡ መልአክ፡ ዘንተሰ፡ ኵሎ፡ መካናተ፡ ምሥጢር፡ /ዘ/{እግዚ}እነ፡ አርአይኩከ። ወአኮ፡ በዝ፡ ዘይትፌጸም። አላ፡ ለሊሁ፡ እግዚእነ፡ ያርእየከ፡ ኵሎ፡ ግብረ፡ ትስብእቱ፡ ዘተወክፈ፡ በዛቲ፡ ሌሊት። ይመጽእ፡ ኀቤከ፡ ወይከሥት፡ ለከ፡ ዘከመ፡ ተወልደ፡ ወዘከመ፡ ተጠምቀ፡ ወዘከመ፡ ኮነሂ፡ በጊዜ፡ ጥምቀቱ። እምስባሔ፡ መላእክት። ወትሬኢ፡ ካዕበ፡ ዘከመ፡ አኃዝዎ፡ ወዘከመ፡ አሰርዎ፡ ወዘከመ፡ ቀሠፍዎ፡ ወዘከመ፡ ተሣለቅዎ፡ ሊቃነ፡ ካህናት፡ | | ወረበናተ፡ አይሁድ። ወዘከመ፡ ኰርዕዎ፡ ርእሶ፡ በህለት። ወዘከመ፡ ጸፍዕዎ፡ መላትሂሁ፡ እንዘ፡ ይዘነጕጕዎ፡ ወይብልዎ፡ ተነበይ፡ ለነ፡ ክርስቶስ፡ መኑ፡ ዘጸፍዓከ። ወዘከመ፡ አልበስዎ፡ አልባሰ፡ ቀይሐ፡ ወዘከመ፡ ወረቁ፡ ውስተ፡ ገጹ፡ ምራቀ፡ ርኩሰ፡ ወዘከመ፡ አዕረግዎ፡ ዲበ፡ ዕፀ፡ መስቀል፡ ዕራቆ፡ ፈጺሞሙ፡ ላዕሌሁ፡ ኵሎ፡ ዝንጓጓ፡ ወጽርፈተ፡ ዘከመ፡ አሕለዮሙ፡ ሰይጣን፡ ወዘከመ፡ ተካፈሉ፡ አልባሲሁ፡ ኣልባዕቱ፡ ሐራ፡ ወዘከመ፡ ተዓፀው፡ ዲበ፡ ዓራዙ። ወዘከመሂ፡ ጸልመ፡ ፀሐይ፡ በጊዜ፡ ስቅለቱ፡ ወዘከመ፡ ኮነ፡ ወርኅ፡ ደመ፡ | ወዘከመ፡ ወድቁ፡ ከዋክብት። ወዘከመ፡ ኮነ፡ ጽልመት፡ ሠለስተ፡ ሰዓተ፡ እምጊዜ፡ ፯ቱ፡ ሰዓት፡ እስከ፡ ፱ቱ፡ ሰዓት። ወዘከመሂ፡ በከዩ፡ ሰማያት፡ ወምድር፡ በእንተ፡ እግዚኦሙ፡ እስመ፡ ርእይዎ፡ ስቁለ፡ ወቅንወ፡ በሐፃውንተ፡ መስቀል። ወዘከመ፡ ውኅዘ፡ ደም፡ በዲበ፡ ደም። ደመ፡ ርእሱ፡ እንዘ፡ ያንጸፈጽፍ፡ እምአክሊለ፡ ሦክ፡ ዘአስተቀፀልዎ፡ ወደመ፡ ቅሥፈታት፡ እምዘባኑ፡ እስመ፡ ብዙኃ፡ ቀሠፍዎ። ወደመ፡ ቅንዋትኒ፡ እምእደዊሁ፡ ወእምእገሪሁ፡ እስመ፡ በኃይል፡ ቀነውዎ። ወደመ፡ ገቦሁኒ፡ ዘይውኅዝ፡ እስመ፡

folio : 98


back to top

| | በኵናት፡ ረገዝዎ። ወዘከመ፡ ወፅአት፡ ነፍሱ፡ እምሥጋሁ። ወዘከመ፡ አዕረግዎ፡ እምዲበ፡ ዕፀ፡ መስቀል። ወዘከመ፡ ገነዝዎ፡ በሰንዶናት። ወዘከመ፡ ቀበርዎ፡ ውስተ፡ መቃብር፡ ወዘከመ፡ ሐተምዎ፡ በዕብነ፡ ማኅተሞሙ፡ ለአይሁድ። ወዘከመ፡ ወረደሂ፡ ለሊሁ፡ ውስተ፡ ሲኦል፡ በነፍስተ፡ ሥጋሁ። ወዘከመ፡ አውፅኦሙ፡ ለአዳም፡ ወለደቂቁ፡ እምኔሃ። ወዘከመ፡ ተንሥኣ፡ እምውታን፡ አመ፡ ሣልስት፡ ዕለት፡ ወዘከመ፡ ነበረ፡ እምድኅረ፡ ትንሣኤ። ወዘከመ፡ ዓርገሂ፡ በሰረገላ፡ ብርሃን። ዘንተ፡ ኵሎ፡ ያርእየከ፡ በዛቲ፡ ሌሊት፡ መጺኦ፡ | እግዚአ፡ ሰማያት፡ ወምድር። እስመ፡ በእንተ፡ ፍቅሩ፡ ነገድከ፡ እስከ፡ ዝየ። ወውእቱሂ፡ ይመጽእ፡ በእንተ፡ ፍቅርከ፡ ከመ፡ ይትፈጸም፡ ተምኔተ፡ ንግደትከ፡ ይክሥት፡ ለከ፡ ኵሎ፡ ትስብእተ፡ ከመ፡ ይትፈሣሕከ፡ ልብከ፡ በነጽሮ፡ ምሥጢራቲሁ። ወዘንተ፡ ኵሎ፡ እምድኅረ፡ ነገሮ፡ ገብርኤል፡ መልአክ፡ ለላሊበላ፡ ተንሥኡ፡ ከመ፡ ይጸልዩ፡ በጊዜ፡ ሰዓተ፡ ድራር። ወሶበ፡ ፈጸሙ፡ ጸሎቶሙ፡ ረከቡ፡ ማዕደ፡ ሥሩዓ፡ ወጽዋዓ፡ ምሉዓ፡ ዘነበሩ፡ ቅድመ፡ እንዘ፡ ይሴሰዩ፡ በውስተ፡ ፍኖት፡ እስከ፡ አመ፡ በጽሑ፡ ኀበ፡ ሊቀ፡ ጳጳሳት። እስመ፡ ዘእንበለ፡ | | ይእቲ፡ ዕለት፡ እንተ፡ ባቲ፡ በጽሑ፡ ኀበ፡ ሊቀ፡ ጳጳሳት፡ ኢበልዑ፡ እክለ፡ ምድር፡ እምአመ፡ ወጠኑ፡ ሐዊረ፡ ኢየሩሳሌም። ወሶበ፡ ርእዩ፡ ውእቱ፡ ኅብስተ፡ ወጽዋዓ፡ ነሥኡ፡ በአእኵቶ፡ ወበልዑ፡ ወሰትዩ፡ ወዘተረፈ፡ ተመሥጠ፡ በከመ፡ ዘልፈ፡ ይትመሠጥ። ወእምዝ፡ ኖመ፡ ላሊበላ፡ ንስቲተ። ወገብርኤልሂ፡ ይትሜሰል፡ በከመ፡ ኵሉ፡ ዘገብረ፡ ላሊበላ፡ ወሶበ፡ ይበልዕሂ፡ ይትሜሰል፡ ከመ፡ ዘይበልዕ። ወሶበሂ፡ ይሰቲ፡ ይትሜሰል፡ ከመ፡ ዘይሰቲ። ወሰበሂ፡ ይነውም፡ ይትሜሰል፡ ከመ፡ ዘይነውም። ወላሊበላ፡ ሰ፡ ሶበ፡ ኖመ፡ ንስቲተ፡ መጽአ፡ ኀቤሁ፡ | እግዚእነ፡ኢየሱስ፡ ክርስቶስ፡ በራእየ፡ ሌሊት፡ ወአርአዮ፡ ኵሎ፡ ግብረ፡ ትስብእቱ፡ እግዚእነ። በከመ፡ ነገሮ፡ ገብርኤል፡ መልአክ፡ ወዘተርፈሂ፡ እምዘ፡ ነገሮ፡ ከሠተ፡ ሎቱ፡ ኵሎ፡ ምሥጢራቲሁ። ወላሊበላ፡ ሰ፡ ፈጺሞ፡ ኵሎ፡ ራእያት፡ ዘርእየ፡ በንዋሙ፡ ነቅሐ፡ ወከልሐ፡ በዐቢይ፡ ቃል፡ እንዘ፡ ይበኪ። ወይቤሎ፡ ገብርኤል፡ መልአክ። ምንተ፡ ኮንከ፡ ኦብእሴ፡ አምላክ። በእንተ፡ ምንት፡ ዘትበኪ። ወይቤሎ፡ላሊበላ፡ በከይኩ፡ ኦእግዚእየ፡ እስመ፡ ርኢኩ፡ በዛቲ፡ ሌሊት፡ ኵሎ፡ ራእያተ፡ ዘነገርከኒ፡ ትማልም። ወፈድፋደሰ፡ አኅዘነኒ፡ ሶበ፡ ርኢኩ፡

folio : 99


back to top

| | ቅሥፈታቲሁ። ወበእንተዝ፡ በከይኩ፡ ነጺርየ፡ ኵሎ፡ ስላቀ፡ ዘገብሩ፡ ላዕለ፡ እግዚእየ። ወይቤሎ፡ ገብርኤል፡ ኢተናዘዝከኑ፡ ሶበ፡ ርኢከ፡ ትንሣኤሁ። ወይቤሎ፡ ላሊበላ፡ ተፈሣሕኩ፡ በእንተ፡ ትንሣኤሁ። ወባሕቱ፡ ሶበ፡ ተዘከርኩ፡ ሕማማቲሁ፡ በከይኩ፡ እስመ፡ ዕፁበ፡ ወክቡደ፡ ቅሥፈታተ፡ ተወክፈ፡ እግዚእነ፡ በእንተ፡ ፍቅረ፡ ዚአነ፡ ለሰብእ። ወእንዘ፡ ዘንተ፡ ይትናገር፡ መጽአ፡ እግዚእነ፡ ኢየሱስ፡ ክርስቶስ፡ ነቢሮ፡ ዲበ፡ ሰረገላ፡ ብርሃን፡ እንዘ፡ የዓውድዎ፡ ኃይላቲሁ፡ ዑፁፋነ፡ እሳት። ወበርሃ፡ ውእቱ፡ መካን፡ እስከ፡ ስዕነ፡ ላሊበላ፡ | ነጽሮ፡ እምነ፡ ፀዳሉ፡ ወሶበ፡ ርእየ፡ መንክረ፡ ግርማ፡ ወድቀ፡ ዲበ፡ ምድር፡ በገጹ፡ ወሰፍሐ፡ እዴሁ፡ ወአንሥኦ፡ ወአዕተተ፡ እምኔሁ፡ ፍርሃተ፡ ወይቤሎ፡ ሰላም፡ ለከ፡ ኦፍቁርየ፡ ወኅሩይየ፡ ወጽሙድ፡ ታሕተ፡ አርዑተ፡ ወንጌልየ። ናሁ፡ ተወከፍኩ፡ ንግደተከ፡ ወአርአይኩከ፡ ኵሎ፡ ምሥጢራተ፡ ትስብእትየ። ወበእንቲአሃ፡ ረከብከ፡ ዘንተ፡ ጸጋ። እስመ፡ አነ፡ መጻእኩ፡ ኀቤከ፡ ውስተዝ፡ መካን፡ ከመ፡ ትትፈሣሕ፡ በነጽሮትየ። እስመ፡ በእንቲአየ፡ ነገድከ፡ ወአነሂ፡ አርአይኩከ፡ ትማልም። እስከ፡ በከይከ፡ ርእየከ፡ ኵሎ፡

| | ጳጳስ፡ እንደ፡ ተገናኘ፡ ቅዱስ፡ ላሊበላ። miniature and a bit of text ክበደ፡ ቅሥፈታት፡ ወኵሎ፡ ስለቀ፡ ዘገብሩ፡ ላዕሌየ፡ ነገደ፡ ሕዝብየ፡

folio : 100


back to top

| | ጳጳስ፡ እግሩን፡ እንደጸበ፡ miniatrue ዘከመ፡ ተማህፀነት፡ እቴጌ፡ መነን፡ ንግሥት፡ miniature | | ዕብራውያን። ወተፈሣሕከ፡ ካዕበ፡ በእንተ፡ ትንሣኤየ። ወይእዜኒ፡ ተፈሣሕ፡ ኦጽሩየ፡ ልብ፡ ወንጹሐ፡ ሥጋ። እስመ፡ ናሁ፡ ረከብከኒ፡ ዘኃሠሥከኒ። ወከመዝ፡ እትራከቦሙ፡ ለኵሎሙ፡ እለ፡ የኃሡሡኒ። ወይእዜኒ፡ ሰአለኒ፡ ዘትፈቅድ፡ ከመ፡ እግበር፡ ለከ፡ ኵሎ፡ ተምኔተከ። ወወድቀ፡ ላሊበላ፡ ዲበ፡ ምድር፡ እንዘ፡ ይሰግድ፡ ለእግዚአብሔር፡ ወተንሥኦ፡ ይቤሎ፡ ምንተኑ፡ እስእለከ፡ አነ፡ ኦእግዚእየ፡ ቦኑ፡ ሕሊና፡ ስእለት፡ ውስተ፡ ልብየ፡ ዘኢተአምር፡ አንተ፡ እምቅድመ፡ ሕሊና፡ ዘተአምር፡ ዘሀለዎ፡ ሰብእ፡ ከመ፡ የሐሊ፨ | አመ፡ ፲ ወ ፪ ለሚያዝያ፡ ወእምቅድመ፡ ሕሊና፡ ዘትፈትን፡ ከመ፡ ይግበር። ወዘከመ፡ ትሬኢ፡ ሕሊና፡ ልብየ፡ ግበር፡ ሊተ። ወዘከመ፡ ተአምር፡ ፈቃደ፡ ስእለትየ። ፈጽም፡ ሊተ፡ በኂሩትከ፡ ኦእግዚእየ። ወአርኢ፡ ሣህለከ፡ ወምሕረተከ፡ ላዕለ፡ ወለተ፡ ኢየሱስ፡ አመትከ፡ ለዓለመ፡ ዓለም፡ አሜን። ....................................................................................................................................................... ወይቤሎ፡ እግዚአ፡ ኵሉ፡ ናሁ፡ አንሰ፡ እብለከ፡ ዘኢይሔሱ፡ ቃልየ፡ ወኢይዔምፅ፡ ኪዳንየ። ምስለ፡ ዓሠርቱ፡ ወክልኤቱ፡ አርዳእየ፡ ይኩን፡ ማኀደርከ፡ ወምስሌሆሙ፡ ይኩን፡ መክፈትከ፡ በኵሉ፡ ክብር፡ ወዘይትአመንሂ፡

folio : 101


back to top

| | በጸሎትከ። ከመ፡ ዘይትአመን፡ በጸሎቶሙ። ወበክዕወተ፡ ደሞሙ፡ ለጴጥሮስ፡ ወጳውሎስ፡ ይኩኖ፡ አሚኑ። ወህየንተ፡ ደሞሙ፡ ረሰይኩ፡ ሐፈ፡ ፃማከ። እስመ፡ ፃመውከ፡ በከመ፡ ፃመው፡ እሙንቱ፡ በሐዊረ፡ ፍኖት። ወተሰደድከ፡ ካዕበ፡ በግፍዕ፡ እምነ፡ አዝማዲከ። እንዘ፡ ትትዊከፍ፡ ግፍዓከ፡ በአኰቴት፡ ወአነሂ፡ ተወከፍኩ፡ ስደተከ፡ ከመ፡ ስደተ፡ ጴጥሮስ፡ ወጳውሎስ። ወህየንተ፡ ደሞሙኒ፡ ረስይኩ፡ ለከ፡ ሀፈ፡ ፃማከ፡ ዘከዓውከ፡ በእንቲአየ። ወዘሂ፡ ጌሠ፡ ውስተ፡ መርጡልከ፡ ይከውን፡ ከመ፡ ዘጌሠ፡ ውስተ፡ መቃብርየ። | ወዘአምኃ፡ ዝኅረከ፡ ኀበ፡ ይትቀበር፡ ሥጋከ። ይኩን፡ ከመ፡ ዘአምኃ፡ ዝኅርየ፡ ኀበ፡ ተቀብረ፡ ሥጋየ። ወዘይገብር፡ ተዝካረከ፡ በኵሉ፡ አውራኅ፡ ወለዓመት፡ ዓሠርተ፡ ወክልኤተ፡ ዕለታተ። ይኩን፡ ከመ፡ ዘይገብር፡ ተዝካርየ፡ ለለሰሙን፡ ፶ ወ ፪ ዕለታተ፡ እምዓመት፡ እስከ፡ ዓመት። ተዝካረ፡ ትንሣኤየ፡ እንበለ፡ ካልአን፡ ተዝካረ፡ ትስብእትየ። ወዘሂ፡ ወሀበ፡ እክለ፡ ለርኁብ፡ በዕለተ፡ ተዝካርከ። አነሂ፡ እሁቦ፡ እመና፡ ኅቡእ፡ እምኅብስተ፡ ሰማይ። ወዘሂ፡ አስተየ፡ ለጽሙዕ፡ በዕለተ፡ ተዝካርከ፡ አነ፡ እሁቦ፡ እማየ፡ ሕይወት፡ ፀዓዳ፡ ዘይውኅዝ፡ | | ሎሙ፡ ለኅሩያንየ፡ በዕለተ፡ መርዓ፡ ዓባይ፡ ወዘሂ፡ ከደነ፡ ዕሩቀ፡ እንዘ፡ ይዜክር፡ ስመከ፡ አነ፡ እከድኖ፡ ሜላተ፡ ብርሃን፡ ንጹሐ፡ ዘኢይጸመሂ፡ ዘኢተገብረ፡ በእደ፡ መሬታውያን። ወዘሂ፡ አብአ፡ አብአ፡ ዕጣነ፡ በዕለተ፡ ተዝካርከ፡ አነ፡ አበውኦ፡ ውስተ፡ ውሣጤ፡ መንጦላዕት፡ በኢየሩሳሌም{} ሰማያዊት፡ ከመ፡ ይትመዓዝ፡ መዓዛ፡ ሠናየ፡ እምውስተ፡ ማዕጠንቶሙ፡ ለ፳ ወ ፬ ካህናተ፡ ሰማይ፡ እለ፡ ያዓርጉ፡ ውስተ፡ ማዕጠንቶሙ፡ ወስእለቶሙ፡ ዕጣነ፡ መንፈሳዌ፡ ወመሥዋዕተ፡ ነባቤ፡ ዘአልቦ፡ ዘይትማሰሎ፡ | ለመዓዛሁ። ወዘሂ፡ አብአ፡ ዕጣነ፡ ወስርናየ፡ ለቍርባነ፡ ተዝካርከ። አነ፡ እሁቦ፡ እምጥብሐ፡ ሥጋየ። አመ፡ እሁቦሙ፡ ለኅሩያንየ፡ በዕለተ፡ መርዓየ። ወአመ፡ እ{ፌ}ትት፡ ሎሙ፡ ዘንተ፡ ሥጋየ፡ ለእለ፡ ይደልዎሙ። ወእጽሕፍ፡ ስሞሙ፡ ለኵሎሙ፡ እለ፡ ይትአመኑ፡ በጸሎትከ፡ ኀበ፡ ተጽሕፈ፡ ስምከ። ወዘሂ፡ ይረውጽ፡ ውስተ፡ መርጡልከ፡ እንዘ፡ ይትአመን፡ በጸሎትከ፡ እመኒ፡ እምርኁቅ፡ ወእመኒ፡ እምቅሩብ፡ አሐዱሂ፡ ነሶሳወ፡ እገሪሁ፡ ኢይትገደፍ፡ በኀቤየ፡ ወእ{ሬ}ሲ፡ ሎቱ፡ ከመ፡ ይፀዓን፡ ዲቤሁ፡ ሰረገላ፡

folio : 102


back to top

| | ብርሃን፡ አመ፡ ይወፅእ፡ ሥጋሁ፡ ህየንተ፡ ዘጌሠ፡ ውስተ፡ መርጡልከ። ወእሬሲ፡ ከመ፡ ይዕቀብዋ፡ ለመቃብርከ፡ መላእክትየ፡ ከመ፡ ይባርክዎሙ፡ ለኵሎሙ፡ እለ፡ ይፈቅዱ፡ ይትባረኩ፡ እምነ፡ አፅምከ። ወኵሉ፡ ዘሰገደ፡ ውስተ፡ ዝኅርከ፡ ኢይበል፡ ኢሰገድኩ፡ ውስተ፡ መቃብርየ። ኀበ፡ ነበረ፡ ሥጋየ፡ ሠሉሰ፡ መዋዕለ፡ ወሠሉሰ፡ ለያልየ፡ አነ፡ ውእቱ፡ ኢየሱስ፡ ክርስቶስ፡ ሰይፈ፡ ቃል፡ ወጽኑዓ፡ ኪዳን፡ ዘነበብኩከ፡ ዘንተ፡ ኵሎ። ወአልቦ፡ ዘይትኃደግ፡ ዝንቱ፡ ኵሉ፡ ዘእንበለ፡ ይኩን። ወዘንተ፡ ሰሚዖ፡ ብፁዕ፡ ላሊበላ፡ | ውስተ፡ ምድር፡ እንዘ፡ ይሴብሖ፡ ለዘአቀመ፡ ሎቱ፡ ዘከመዝ፡ ኪዳነ። ወአንሥኦ፡ እግዚእ፡ ኢየሱስ፡ ወይቤሎ፡ ኢትፍራህ፡ ቍልዔየ፡ ተኃየል፡ ወጽናዕ፡ ዲበ፡ ኃይለ፡ ጸላኢ፡ ወምላህ፡ ሰይፈ፡ ትሥልስትየ፡ ከመ፡ ትዕፅዶ፡ እስመ፡ አነ፡ ወሀብኩከ፡ ሥልጣነ፡ ከመ፡ ትኪድ፡ ርእሶ። ለካልአንሰ፡ ጻድቃን፡ አመ፡ በጽሐ፡ ፍጻሜ፡ ፀኣቶሙ፡ እምዝንቱ፡ ዓለም፡ ለእለ፡ ተፀምዱኒ፡ በኵሉ፡ ልቦሙ፡ እሁቦሙ፡ ኪዳነ፡ በከመ፡ ይደልዎሙ። ወለከሰ፡ በሕይወትከ፡ ወሀብኩከ፡ ኪዳነ፡ እንዘ፡ ኢይበጽሕ፡ ፍጻሜ፡ ፀአትከ፡ እምዝንቱ፡ ዓለም። | | ወኢኮነ፡ ጊዜሁ፡ ለፍልሰትከ። እስመ፡ ሀለወከ፡ ትሕየው፡ ብዙኃ፡ መዋዕለ፡ በዲበ፡ ምድር፡ እምይእዜ፡ እስከ፡ አመ፡ እሔውጸከ፡ አመ፡ ፍልሰትከ፡ በጽዋዓ፡ ሠናይ፡ ዘእንበለ፡ ፃዕር። ወተአቱ፡ ውስተ፡ ምዕራፊከ፡ ዘለዓለም። ወተኃድር፡ ምስለ፡ ጴጥሮስ፡ ወጳውሎስ፡ ሊቃነ፡ አርዳእየ፡ ውስተ፡ መንግሥተ፡ ሰማያት። ኀበ፡ አልቦ፡ ኃዘነ፡ ዘእንበለ፡ ፍሥሐ። ኀበ፡ አልቦ፡ ደዌ፡ ወሕማም፡ ዘእንበለ፡ ጥዒና። ኀበ፡ አልቦ፡ ረኃበ፡ ኀበ፡ ይትፌተት፡ ኅብስተ፡ ተድላ። ኀበ፡ አልቦ፡ ጽምዕ፡ ኀበ፡ አልቦ፡ ሐሩር፡ ኀበ፡ ይትቀዳሕ፡ ጽዋዓ፡ | መድኃኒት፡ ዘእምአስካለ፡ በረከት። ኀበ፡ ተሥዕረ፡ ኃላፈ፡ ወኀበ፡ ተደለወ፡ ዘኢይኃልፍ፡ ወዘኢየኃልቅ፡ ወዘኢይትዌዳዕ፡ ፍግዓ፡ በፍሥሐ፡ መንፈስ፡ ቅዱስ፡ ይከውን፡ ማኅደርከ፡ ምስለ፡ ጴጥሮስ፡ ወጳውሎስ፡ ወተሐዩ፡ በሕይወት፡ እግዚአብሔራዊት፡ ወሕይወትከሰ፡ ከመ፡ ሕይወትየ። ወፍሥሐከ፡ ከመ፡ ፍሥሐየ፡ ወተድላ፡ መንበርከ፡ በየማንየ፡ በከመ፡ እቤሎሙ፡ ለሐዋርያትየ። ትነብሩ፡ ዲበ፡ ዓሠርቱ፡ ወክልኤቱ፡ መናብርት። ወትኳንኑ፡ ዓሠርተ፡ ወክልኤተ፡ ነገደ፡ እስራኤል። ወለከሂ፡ እብለከ፡ ኢየሐፅፅ፡ መንበርከ፡

folio : 103


back to top

| | እመንበሮሙ። ወኢየሐፅፅ፡ ክብርከ፡ እምክብሮሙ፡ ወስብሐቲከ፡ እምስብሐቶሙ፡ ወብርሃንከ፡ እምብርሃኖሙ። ወሱራሔ፡ አክሊልከ፡ እምሱራሔ፡ አክሊሎሙ። ወኪዳንከኒ፡ ኢየሐፅፅ፡ እምኪዳን፡ ዘወሀብክዎሙ። እስመ፡ ምስሌሆሙ፡ ርስትከ፡ ወምስሌሆሙ፡ መክፈልትከ። ወትትፌሣሕ፡ ምስለ፡ ኵሎሙ፡ እለ፡ ይገብሩ፡ ተዝካረከ፡ ዓሠርተ፡ ወክልኤተ፡ ጊዜያተ፡ ለለወርኁ። አሐተ፡ ጊዜ፡ በኍልቈ፡ ዓሠርቱ፡ ወክልኤቱ፡ አርዳአየ። ወምስለ፡ ኵሎሙ፡ እለ፡ ይገይሱ፡ ውስተ፡ መርጡልከ፡ | ወይትአምኁ፡ ታቦተ፡ ሥጋከ። ወትትፌሣሕ፡ በውስተ፡ አዕፃዳተ፡ መንግሥትየ። ወኵሉ፡ ዘይጽሕፍ፡ መጽሐፈ፡ ገድልከ፡ በጻሕቅ፡ ወበአስተሐምሞ፡ ዓቢይ፡ ወበፍቅረ፡ ዚአከ፡ ተኣሚኖ፡ ኪዳነ፡ ዘወሀብኩከ፡ አነ፡ እጽሕፍ፡ ስሞ፡ ውስተ፡ መጽሐፈ፡ ሕይወት፡ ዘኢይደመሰስ፡ ውስተ፡ ድብዲቆኖሙ፡ ለቅዱሳን። እለ፡ ፃመው፡ ብዙኃ፡ እንዘ፡ ይትኄየሉ፡ ለበዊአ፡ ፀባብ፡ አንቀጽ፡ ወእለ፡ ፈጸሙ፡ ፍኖተ፡ ወንጌል፡ በሩጸቶሙ፡ ፍሉሕ፡ ዘኢቈረ፡ በማየ፡ ሙስና፡ ወምስሌሆሙ፡ እጽሕፍ፡ ስሞ፡ ለዘ፡ ይጽሕፍ፡ መጽሐፍ፡ ገድልከ። | | ወኵሉ፡ ፃማ፡ ዘተወከ፡ እምቅድመዝ። ወዘሀለወከሂ፡ ትትወከፍ፡ እምድኅረዝ፡ ወአኮ፡ ውስተ፡ ክርታስ፡ ዘይሠጠጥ፡ ወዘይማስን፡ ዘእጽሕፍ፡ ስሞ፡ ለዘይጽሕፍ፡ መጽሐፈ፡ ገድልከ፡ አላ፡ ውስተ፡ መጽሐፎሙ፡ ለቅዱሳን። ወለዘሂ፡ አጽሐፈት፡ መጽሐፈ፡ ገድልከ፡ ወለተ፡ ኢየሱስ፡ ንግሥት። አጽሕፍ፡ ስማ፡ ውስተ፡ መጽሐፈ፡ ሕይወት፤ ኀበ፡ ተጽሕፈ፡ አስማቲሆሙ፡ ለነቢያት፡ ወሐዋርያት። ወአስማተ፡ ጻድቃን፡ ወሰማዕት። ወአስማተ፡ ደናግል፡ ወመነኮሳት። ወአስማተ፡ ኵሎሙ፡ ማኅበረ፡ በኵር፡ እለ፡ | ጽሑፍ፡ አስማቲሆሙ፡ በሰማያት። ወለኵሉ፡ ዘያሰትት፡ መጽሐፈ፡ ገድልከ። ወኪዳነ፡ ዘወሀብኩከ። ዘኢየአምን፡ ኢይከውን፡ መክፈልቱ፡ ምስሌከ፡ ወርስቱኒ፡ ኢይትረከብ፡ ምስለ፡ ርስትከ። ወይኩን፡ ውእቱ፡ ብእሲ፡ ዘኢየአምን፡ ኪዳነ፡ ዘአቀምኩ፡ ለከ። ከመ፡ ዘይቤለኒ፡ ሊተ፡ ለክርስቶስ፡ ኢኮነ፡ እግዚአብሔር፡ አላ፡ ሰብእ፡ ውእቱ። ወኵሉ፡ ዘይትዌከፍ፡ ሰሚዖ፡ መጽሐፈ፡ ገድልከ። ይኩን፡ ከመ፡ ዘተወክፈ፡ ወንጌለ፡ መንግሥትየ። ወዘአክበረከ፡ ከመ፡ ዘአክበረ፡ ኪያየ። በከመ፡ እቤሎሙ፡ ለአርዳእየ፡ ዘኪያክሙ፡

folio : 104


back to top

| | ሰምዓ፡ ኪያየ፡ ሰምዓ። ወዘኪያክሙ፡ ክህደ፡ ኪያየ፡ ክህደ። ወአነሂ፡ እብለከ፡ ለከ፡ ዘሰምዓ፡ ኪያከ፡ ወዘእምነ፡ ኪዳንከ፡ ከመ፡ ዘሰምዓ፡ ወእምነ፡ ሊተ፡ ለእግዚእከ። አነ፡ ውእቱ፡ ዘሀሎ፡ ወይሄሉ፡ ዘእትናገረከ፡ ወኢኮንኩ፡ ባዕደ፡ አምላከ። አላ፡ አነ፡ ውእቱ፡ አልፋ፡ ወኦ፡ አነ፡ ደኃራዊ፡ ወአነ፡ ቀዳማዊ። ወእምቅድሜየኒ፡ አልቦ፡ ባዕድ፡ አምላክ፡ ወእምድኅሬየኒ፡ አልቦ፡ ካልእ፡ አምላክ፡ ዘእንበሊየ፡ ወዘክህደ፡ ፃማከ፡ ወኪዳነ፡ ዘአቀምኩ፡ ለከ። ከመ፡ ዘክህደ፡ ፃማየ፡ ዘተወከፍኩ፡ በዲበ፡ ምድር፡ ድካመ፡ ወኃፈ፡ ረኃበ፡ | ወጽምዓ፡ ወዕርቃነየ፡ በዲበ፡ ዕፀ፡ መስቀል። ወቅንዋተ፡ ሐፃውንት፡ ዘዲበ፡ እደውየ፡ ወእገሪየ። ወኵሎ፡ ሕማማትየ። ወዘሂ፡ ክህደ፡ ኪዳነከ፡ ከመ፡ ዘክህደ፡ ትንሣኤየ፡ ወዕርገትየ፡ ውስተ፡ ሰማያት። ወለከሰ፡ ፃማከሂ፡ ዘተወከፍከ፡ ወኪዳንከሂ፡ ዘአቀምኩ፡ ለከ፡ ጽሕፍት፡ ይእቲ፡ ወልክዕት። ውስተ፡ ኢየሩሳሌም፡ ሰማያዊት። ወጽሕፈታሰ፡ አኮ፡ በማየ፡ ሕመት፡ አላ፡ በደመ፡ ሕግ፡ ወኪዳን፡ በዘቦቱ፡ ይጸሐፍ፡ አስማተ፡ ኵሎሙ፡ ቅዱሳን፡ ከማሁ፡ አቅም፡ ኪዳነከ፡ ለንግሥትነ፡ ወለተ፡ ኢየሱስ፡ አመትከ፡ አሜን። | | ወዘንተ፡ ሶበ፡ ይቤሎ፡ አኃዜ፡ ኵሉ፡ ዓለም፡ ዘይነብር፡ ላዕለ፡ ሰረገላ፡ ኪሩቤል፡ ሰገደ፡ ብፁዕ፡ ወቅዱስ፡ ላሊበላ፡ ውስተ፡ ምድር፡ ወአእኰቶ፡ ለእግዚአብሔር፡ እንዘ፡ ይብል። አአኵተከ፡ እግዚኦ፡ እስመ፡ ተወከፍከኒ። ትባርከከ፡ ነፍስየ፡ ወኵሉ፡ ሕሊናየ፡ ወኵሉ፡ ልብየ፡ ወኵሉ፡ ኃይልየ። መሐሪ፡ ርኁቀ፡ መዓት፡ ወብዙኃ፡ ምሕረት፡ ወጻድቅ። ዘኢይቀሥፍ፡ ወትረ፡ ወዘኢይትመዓዕ፡ ዘልፈ። አኮ፡ በከመ፡ ኃጢአትየ፡ ዘገበርከ፡ ሊተ። ወኢፈደይከኒ፡ በከመ፡ አበሳየ፤ አንሰ፡ አኮ፡ ዘከመዝ፡ ኪዳነ፡ ወዘከመዝ፡ ዕበየ፡ ወዘከመዝ፡ ክብረ፡ ወዘከመዝ፡ | ሞገሰ፡ ዘተሳፎኩ። አላ፡ ተሳፍኩ፡ ነጠብጣበ፡ ምሕረትከ። እምነ፡ ባሕረ፡ ኂሩትከ፡ ከመ፡ ወ{እም}ተለየ፡ ርኅራኄከ፡ ከመ፡ ይርከበኒ፡ ሣህልከ። ከመዝኑ፡ ያመዓብል፡ ሞገደ፡ ምሕረትከ፡ ላዕለ፡ ኃጥአን። ኦእግዚእየ፡ ወአምላኪየ፡ ኢየሱስ፡ ክርስቶስ፡ ዘአውፃእከኒ፡ እምከርሠ፡ ቀላይ፡ {እንዘ፡ /ይኄ}ይል፡/ ለአሥጥሞ። ወከደንከኒ፡ በመንጦላዕተ፡ ሣህልከ። ወዘኢተኃዘብኩ፡ ረከብኩ፡ ጸጋከ። ወዘኢተሐለየ፡ ውስተ፡ ልብየ፡ ጸገውከኒ፡ ክብረ፡ ወስብሐተ፡ ዘእንበለ፡ ሤጥ፡ በከንቱ። ወካልአንሰ፡ ተሣየጥዋ፡ ለመንግሥትከ፡ በጸዊም፡ ወበቀዊም። እስከ፡

folio : 105


back to top

| | ፲፬ የኃብጣ፡ እገሪሆሙ። ወበጸዊምኒ፡ እስከ፡ ይጠግዕ፡ አነዳሆሙ፡ ምስለ፡ አዕፅምቲሆሙ። ወበሰጊድ፡ ካዕበ፡ እስከ፡ ይከውን፡ ሐፎሙ፡ ከመ፡ ነጽፍጻፈ፡ ደም፡ ዘይወርድ፡ ውስተ፡ ምድር። ወቦ፡ እለ፡ ተሣየጥዋ፡ በክዕወተ፡ ደሞሙ። ወቦ፡ እለ፡ ተወጊሮሙ፡ በአዕባን፡ ወተወሲሮሙ፡ በሞሰርት። ወቦ፡ እለ፡ ውዕዮሙ፡ በእሳት። ወቦ፡ እለ፡ ተሠጢሞሙ፡ ውስተ፡ ባሕር፡ ከመ፡ ዓሣት። ወቦ፡ እለ፡ ተወቂዮሙ፡ በአስይፍት። ወቦ፡ እለ፡ ተረጊዞሙ፡ በኵናት። ወቦ፡ እለ፡ ተውህበ፡ ሥጋሆሙ፡ ለአራዊት። በዘከመዝ፡ ፆታ፡ ሕማም፡ ወመቅሠፍት፡ ወምንዳቤ፡ ወመንሱት፡ | ተሣየጥዋ፡ በመንግሥተ፡ ሰማያት፡ በመንኖ፡ ነፍሶሙ፡ ወበአብድሮ፡ ፍቅርከ። ተመሲሎሙ፡ ኪያከ። ተሳቲፎሙ፡ ሕማማቲከ። ወአንሰ፡ ወኢአሐተ፡ ቅሥፈታተ፡ ኢፆርኩ፡ ጥቀ፡ ዘከመ፡ ፆሩ፡ አግብርቲከ። ወባሕቱ፡ አርአይከ፡ ምሕረተከ፡ በላዕሌየ፡ ወይቤሎ፡ እግዚእነ፡ ኢየሱስ፡ ክርስቶስ፡ ለብፁዕ፡ ወለቅዱስ፡ላሊበላ፡ አማን፡ አማን፡ እብለከ፡ እምእሉ፡ ኵሎሙ፡ እለ፡ ዘከርኮሙ፡ ኢየሐፅፅ፡ ዕሤትከ፡ በኀቤየ፡ ወይእዜኒ፡ አፅምዕ፡ በልባዌ፡ ዘእነግረከ፡ አነ። ቀዲሙሂ፡ ነገርኩከ፡ ወአርአይኩከ፡ ግብረ፡ ሕንጻሆን፡ ለአብያተ፡ ክርስቲያናት፡ እለ፡ ሀለወከ፡ ትሕንጾን። ዑቅ፡ ይእዜኒ፡ | | ከመ፡ ትፈጽም፡ መልእክተከ። እስመ፡ ብዑድ፡ ውእቱ፡ ግብረ፡ ሕንጻሆን፡ ለማኅፈዳተ፡ ምሥጢርየ፡ ዘሀለወኒ፡ እክሥቶን፡ በእደዊከ። እስመ፡ አኮ፡ በፅቡር፡ ዘትገብሮን፡ ወአኮ፡ በአፅ፡ ዘትሠውቆን፡ ወትቄምሮን። ወአኮ፡ በአሕባል፡ ዘትጠፍሮን። ወአኮ፡ በመዋጽሕት፡ ወበመሥዕርት፡ ዘትከድኖን። አላ፡ አሐዱ፡ ዕብን፡ ይፌጽም፡ ኵሎ፡ መፍቀዶን፡ ወሱራሬሆንሂ፡ አሐዱ፡ ዕብን፡ ወአቀዶንሂ፡ ዕብን፡ ወአምዶንሂ፡ ዕብን፡ ወምዕማዶንሂ፡ ዕብን። ወመከየደ፡ መሳውቲሆን፡ ዕብን፡ ወጠፈሮንሂ፡ ዕብን፡ ወቀመሮንሂ፡ ዕብን፡ ወስካትቲሆንሂ፡ ዕብን፡ ወዝንቱሰ፡ ኵሉ፡ አኮ፡ ብዙኃን፡ | አዕባን። አላ፡ አሐዱ፡ ዕብን። ወኆልቆንሰ፡ ለማኅፈዳት፡ ዘሀለዎን፡ ይትከሠታ፡ በእደዊከ፡ ዓሠርቱ፡ እማንቱ። ወግብረቶንሰ፡ ዘዘ፡ ዚአሆን፡ ቦ፡ እምኔሆን፡ ዘይሰናሰል፡ ቅጽሮን። ወቦ፡ እምኔሆን፡ እንተ፡ ባሕቲቶን። ወእለ፡ ይሰናሰልሰ፡ ቅጽሮን፡ ኃምስቱ፡ እማንቱ፡ አብያተ፡ ክርስቲያናት፡ እለ፡ በአሐቲ፡ ዓፀድ፡ ይትገበራ። ወቦ፡ እምኔሆን፡ እንተ፡ ክልኤቱ፡ አብያተ፡ ክርስቲያናት፡ ዘአሐዱ፡ ቅጽር፡ ስንሳሌሆን። ወቦ፡ እምኔሆን፡ ዘዘ፡ ዚአሁ፡ ግብረተ፡ ዘቦን። ወቦ፡ እምኔሆን፡ ዘዘ፡ ዚአሁ፡ ኅብረ፡ ራዕዮን። ወመአድማት፡ እማንቱ፡ አብያተ፡ ክርስቲያናት። ወኢከሠትኩ፡ እስከ፡

folio : 106


back to top

| | ይእዜ፡ በእደ፡ ካልአን፡ ዘከማሆን። እስመ፡ አመ፡ ሣረርኩ፡ ምድረ፡ አእመርኩከ፡ እምቅድመ፡ እፍጥርከ፡ እምከርሠ፡ እምከ፡ አእመርኩ፡ ኪያከ። ከመ፡ በእደዊከ፡ ይትከሠታ፡ እሎን፡ አብያተ፡ ክርስቲያናት፡ ዓሠርቱ። እስመ፡ ብዑድ፡ ውእቱ፡ ግብረቶን፡ እምኵሎን፡ ደባትርትየ፡ ዘገበርኩ፡ በእደ፡ ኵሎሙ፡ ኅሩያንየ። አሐቲስ፡ ደብተራ፡ ዘአርአይኩ፡ በደብረ፡ በእደ፡ ሙሴ፡ ምእመንየ፡ ዘአጌ፡ ይእቲ። ወዕፅ፡ መሣውቂሃ፡ ወመከየዲሃ።ወጠፈራኒ፡ ኢኮነ፡ ከመ፡ ጠፈረ፡ አብያተ፡ ክርስቲያናት፡ ዘይትገበራ፡ በእደዊከ። ወአኮ፡ ዘይትከደን፡ ንዋየ፡ ቅድሳቲሆን፡ ለአብያተ፡ ክርስቲያንከ፡ | በማዕሰ፡ መፂፂት፡ ከመ፡ ንዋየ፡ ቅድሳቲሃ፡ ለደብተራ፡ ሙሴ። ወደብተራከሰ፡ ኢኮነ፡ ከመ፡ ደብተራ፡ ሙሴ። ወኢሂ፡ ከመ፡ ደብተራ፡ ሰሎሞን። ወደብተራ፡ ሰሎሞንሂ፡ ዘዕፅ፡ ይእቲ፡ ወዘዕብን፡ ወዘፅቡር፡ ወዘአሕባል። ወእሉ፡ እሙንቱ፡ አብያተ፡ ክርስቲያናት፡ ዘዚአከ፡ ዘዕፅኒ፡ ኢኮነ፡ ወዘፅቡርኒ፡ ኢኮነ፡ ወኢኮነ፡ ካዕበ፡ ዘበአሕባለ፡ ጠፈር፡ ይትዓቀድ። አላ፡ ብዑድ፡ ግብረተ፡ ሕንጻከ። እስመ፡ እፈቅድ፡ ሠለስተ፡ ሕንጻ፡ ማኅፈድ፡ አርኢ፡ ዲበ፡ ምድር። አሐቲሰ፡ እንተ፡ ሙሴ፡ ይእቱ፡ ዘበአገያት፡ ወዕፀው፡ ወወርቅ፡ ወብሩር። ወካልእታሂ፡ እንተ፡ ሰሎሞን፡ ይእቲ፡ | | በዕብን፡ ወዕፀው፡ ወፅቡር፡ ወአኅባለ፡ ጠፈር፡ ወወርቅ፡ ወብሩር። ወሣልሲት፡ ደብተራየ፡ እንቲአከ፡ ይእቲ፡ ዘሀለወኒ፡ እከሥቶን፡ በእደዊከ፡ ዘእንበለ፡ ዕፅ፡ ወመሬት፡ ወዘእንበለ፡ አኅባለ፡ ጠፈር። ወአዕባኖንሂ፡ ይትበደር፡ እምወርቅ፡ ወእምብሩር፡ ወእምዕንቈ፡ ሰነፔር፡ ክቡር። እስመ፡ እምአሐቲ፡ ኰኵሕ፡ ይትገበራ፡ ወበእንተ፡ ዘኮና፡ ብዑዳተ፡ እምክልኤቱ፡ ደባተር፡ ቀዳማውያት። አሐቲ፡ እንተ፡ ሙሴ፡ ወካልእታ፡ እንተ፡ ሰሎሞን። ወሣልሲትሰ፡ እንቲአከ፡ ውእቶን፡ ደባትር፡ ዘይትገበራ፡ በእደዊከ፡ ዘብዑድ፡ ግብረቶን። ወውስተ፡ ውእቶን፡ ደባትሪከ፡ ዘተጋነየ፡ ይነሥእ፡ | በከመ፡ ሰአለ፡ ወይረክብ፡ በከመ፡ ጸለየ። ወዘጌሠ፡ ኀቤሆን፡ ኢይፃሙ፡ ወዘአብአ፡ ሎቶን፡ አምኃሁ፡ እትዌከፎ፡ ከመ፡ ቍርባነ፡ ሥጋየ፡ ወከመ፡ ሞጻሕተ፡ ደምየ። ለእመ፡ አብአ፡ በንጹሕ፡ ሕሊና፡ ወበጽሩይ፡ ልብ፡ ወበአእምሮ፡ ምሕረተ፡ ዚአየ፡ ወበተዘክሮ፡ ኪዳን፡ ዘአቀምኩ፡ ለከ። ወለኵሉ፡ ዘተጸምደ፡ ውስተ፡ ውእቶን፡ አብያተ፡ ክርስቲያናቲከ፡ እስከ፡ ጸአተ፡ ነፍሱ፡ እምሥጋሁ፡ እንዘ፡ ይትአመን፡ በኃይለ፡ ጸሎትከ። አነ፡ እሬሲ፡ መክፈቶ፡ ምስሌከ። ወርስቶ፡ ምስለ፡ ርስትከ፡ ወበአቶ፡ ውስተ፡ በኣትከ፡ ወውዳሴሁ፡ እሬሲ፡ ዕሩየ፡ ምስለ፡ ውዳሴ፡ ዚአከ፡

folio : 107


back to top

| | ወክብሮ፡ ከመ፡ ክብርከ። ወአክሊልከ፤ ወብርሃኖ፡ ከመ፡ ብርሃንከ፤ ወትርሲቶ፡ ከመ፡ ሠርጐ፡ ትርሲትከ። ለእመ፡ አዕረፈ፡ እንዘ፡ ይጐደጒድ፡ ዝኅረ፡ ዚአከ፡ ወእንዘ፡ ይትኣማኅ፡ ታቦተ፡ ሥጋከ። ወእንዘ፡ ይትቀባዕ፡ እምፀበለ፡ ዕፍረትከ። አነ፡ ኣቀብዖ፡ እምፅፍረት፡ ሰማያዊ፡ ዘኢይትመዘመዝ፡ መዓዛሁ፡ በብዙኅ፡ አዝማን። ወባሕቱ፡ ጽናዕ፡ ወተኃየል፡ ወጥባዕ፡ ለሕንጻ፡ ማኅድየ። እስመ፡ ብዙኃት፡ ነፍሳት፡ እለ፡ ይድኅና፡ በውስቴቶን፡ ተአሚኖን፡ በኃይለ፡ ጸሎትከ፡ ወተጸዊኖን፡ በትንብልና፡ ዚአከ። ወአነሂ፡ ኢያሴስል፡ ጸጋየ፡ ወምሕረትየ፡ | እምኔሆን። ወሀብተ፡ ረድኤትየ፡ ኢያአትት፡ እምውስተ፡ አብያቲሆን። ወርስቶን፡ ምስሌ፡ ርስትከ። ወለዛቲኒ፡ ንግሥት፡ ወለተ፡ ኢየሱስ፡ ዘሐነጸት፡ ሕንጻ፡ ማኅፈድከ። እንዘ፡ ትሲፎ፡ ኪዳነከ፤ ይኩን፡ ማኅደራ፡ ምስሌከ። እመኒ፡ እድ፡ ወእመኒ፡ አንስት፡ ይኩን፡ ምስሌከ፡ ማኅደሮሙ፡ ለእለ፡ ይትአመኑ፡ በኃይለ፡ ጸሎትከ። ለዓለመ፡ ዓለም፡ አሜን። ...................................................................................................................................................................... ወዘንተ፡ ሶበ፡ ይቤሎ፡ እግዚእነ፡ ኢየሱስ፡ ክርስቶስ፡ ለብፁዕ፡ ወለቅዱስ፡ ላሊበላ፡ ተፈሥሐ፡ ወተሐሥየ፡ ብፁዕ፡ ላሊበላ፡ ወተመልዓ፡ እምኃይለ፡ መንፈስ፡ ቅዱስ። ወአኃዘ፡ | | ይበል፡ አዳም፡ ቃልከ፡ ኦእግዚእየ፡ ወጽኑዕ፡ ኪዳንከ፡ ወኢይትሔሰው፡ ቃልከ፡ ኦእግዚእየ፡ ስብሐት፡ ለከ። እምአፈ፡ ኵሎሙ፡ ሕዝብከ። ወቅድሳት፡ ለከ፡ እምአፈ፡ ኵሎሙ፡ ትጉሃኒከ። ወበእንተ፡ ሕንጻ፡ አብያተ፡ ክርስቲያናቲከሰ፡ ቀዲሙኒ፡ አመ፡ አርአይከኒ፡ እቤለከ፡ ይርድአኒ፡ ኃይልከ፡ ኦእግዚእየ። ወአኮ፡ ዘእክል፡ ገቢሮቶን፡ ለእላንቱ፡ አብያተ፡ ክርስቲያናት። አላ፡ በኃይለ፡ ዚአከ፡ ይትገበራ፡ እስመ፡ ሠምረ፡ ፈቃደ፡ ዚአከ። ወአንሰ፡ መሬት፡ ወሐመድ፡ ወሕፁፅ፡ እምኵሉ፡ ሰብእ። ወለእመሰ፡ አንተ፡ ፈቀድከ፡ ከመ፡ ትክሥቶን፡ | በእደውየ፡ አልቦ፡ ዘይሰዓነከ፡ ወአልቦ፡ ግብር፡ ዘይጸንዓከ። እስመ፡ አንተ፡ ፈጣሪሁ፡ ለኵሉ፡ ፍጡር። ወይእዜኒ፡ ፈቃድከ፡ ለይኩን፡ ወይርድአኒ፡ ኃይለ፡ ዚአከ። ወይቤሎ፡ እግዚእነ፡ ኢየሱስ፡ ክርስቶስ፡ ቀዲሙኒ፡ እቤለከ፡ መላእክትየኒ፡ ኢይርኅቁ፡ እምኔከ፡ ወእሙንቱ፡ ይረድኡከ፡ ወይኤምሩከ፡ ወይሜጥኑ፡ ለከ፡ በበአካሎን፡ ለእማንቱ፡ አብያተ፡ ክርስቲያናት። ወይእዜኒ፡ ኢይሔሱ፡ ቃልየ፡ ዘወፅአ፡ እምአፉየ፡ ወእሙንቱ፡ መላእክት፡ ይርድኡከ። ወበእደዊሆሙ፡ ለእለ፡ ይገብርዋ፡ አነ፡ እገብር። ወበእደዊሆሙ፡ ለእለ፡ ይቄድስዎን፡

folio : 108


back to top

| | አነሂ፡ እቄድሶን፡ እስመ፡ ማኅፈደ፡ ዘምክህ፡ እሰምዮን። እስመ፡ በውስቴቶን፡ ይትነገር፡ ስብሐተ፡ ሞትየ፡ ወትንሣኤየ፡ ወስብሐተ፡ ዕርገትየ፡ ውስ{ተ}፡ ሰማያት። ወስብሐተ፡ ዳግም፡ ምጽአትየ፡ በዓቢይ፡ ስብሐት፡ ወተዝካረ፡ ኵሉ፡ በዓላትየ። ወባሕቱ፡ ጐጒዕ፡ ከመ፡ ትፈጽም፡ ገቢሮቶን፡ እስመ፡ በጽሐ፡ ጊዜሁ፡ ለሕንጻሆን። ቀዲሙ፡ ቀባዕኩከ፡ ቅብዓ፡ መንግሥት፡ በውስተ፡ ሳብዕ፡ ሰማይ። ወይእዜኒ፡ እስሚ፡ ለከ፡ ስመ፡ መንግሥትከ። ወይኩን፡ ስመ፡ መንግሥትከ፡ ገብረ፡ መስቀል፡ እስመ፡ ኀበ፡ ይጼዋዕ፡ መስቀል፡ ህየ፡ ይሂሉ፡ ረድኢት፡ ወህየ፡ ይበዝኅ፡ | መዊዕ። እስመ፡ ገብረ፡ መዋኢ፡ ብሂል። እስመ፡ አነ፡ ሞዕክዎ፡ ለሰይጣን፡ አመ፡ አንጦላዕኩ፡ መልክዕየ፡ ይምነ፡ ወጽግመ፡ ላዕለ፡ ወታሕተ። አመ፡ ተሰቀልኩ፡ ዲበ፡ ዕፀ፡ መስቀል። ወበእንተዝ፡ ተሰምየ፡ መስቀል፡ መዋዔ። ወበእንተዝ፡ ይደልዎሙ፡ ለነገሥት፡ ከመ፡ ይሰመዩ፡ በዝንቱ፡ ስም፡ ዘውእቱ፡ ገብረ፡ መስቀል፡ ከመ፡ ይማዕዎ፡ ለፀሮሙ፡ በውስተ፡ ኵሉ፡ ፀብዕ፡ እስመ፡ ገብረ፡ መዊአ፡ ወበኀበ፡ ሖረ፡ ይመውእ፡ ወበኀበ፡ ፀብዓ፡ ይትኄየል፡ ወይጸንዕ። ወለከሂ፡ ሰመይኩከ፡ በዝንቱ፡ ስም፡ ዘውእቱ፡ ገብረ፡ መስቀል፡ ወመስቀለሰ፡ ሶበ፡ ትሰምዕ፡ | | ኢታምስል፡ መስቀለ፡ ዘዕፅ፡ አላ፡ አነ፡ ውእቱ፡ መስቀል፡ ዘአመስቀልኩ፡ መልክዕየ፡ በዕለተ፡ ዓርብ፡ እስከ፡ እመውኦ፡ ለሰይጣን፡ ወእስከ፡ እቂንዎ፡ በቅንዋትየ፡ ወአሥገርክዎ፡ በላዕፈ፡ ሥጋየ፡ እስከ፡ ለጽለጸ፡ ናላሁ፡ ስናፔ፡ መለኮትየ። ወብዙኃን፡ እለ፡ አርአዩ፡ መዊአ፡ በትእምርተ፡ መስቀል። ወሙሴኒ፡ ከፈለ፡ ባሕረ፡ በትእምርተ፡ መስቀል፡ ወአሥጠሞ፡ ካዕበ፡ ለፈርዖን፡ በትእምርተ፡ መስቀል። ወካዕበ፡ አንተኒ፡ ትመውኦ፡ ወለኵሉ፡ መናግንቲሁ። ወብዙኃን፡ እለ፡ ተሰምዩ፡ በዝንቱ፡ ስም፡ ወኢኃብረ፡ ስሞሙ፡ ምስለ፡ ምግባሮሙ። ወለከሰ፡ | ስመከኒ፡ ኃብር፡ ምስለ፡ ምግባርከ። ሰላምየ፡ ወኃይለ፡ ረድኤትየ፡ ወፍቅርየ፡ ወትውክልተ፡ መስቀልየ፡ የሃሉ፡ ምስሌከ፡ ወምስለ፡ ወለተ፡ ኢየሱስ፡ ንግሥት፡ እመትየ፡ ለዓለም፡ ዓለም። ወዘንተ፡ ብሂሎ፡ ባረኮ፡ እግዚእነ፡ ወዓርገ፡ ውስተ፡ ሰማይ፡ እንዘ፡ ይሬእዮ፡ ላሊበላ፡ በከመ፡ ርእይዎ፡ አርዳኢሁ፡ ምስለ፡ እሙ፡ አመ፡ ዓርገ፡ ፄዊዎ፡ ፄዋ፡ ወላሊበላ፡ ኒ፡ ሰገደ፡ ውስተ፡ ምድር፡ ነጺሮ፡ ዕርገቶ፡ ለእግዚእነ፡ኢየሱስ፡ ክርስቶስ፡ ወገብርኤልሂ፡ ሀሎ፡ ምስለ፡ ላሊበላ፡ ይቀውም፡ ውስተ፡ ዝኩ፡ መካን፡ ኀበ፡ ተናገሮ፡ ለላሊበላ፡ ወኀበ፡ መካን፡ ዘወሀቦ፡ ኪዳነ።

folio : 109


back to top

| | ወእምድኅረ፡ ዝንቱ፡ ይቤሎ፡ ገብርኤል፡ ለብፁዕ፡ rend="rubric">ላሊበላ፡ ኦብእሲ፡ እግዚአብሔር፡ ረከብከ፡ ጸጋ፡ ዓቢየ፡ ዘኢረከቡ፡ ካልአን፡ ዘከመዝ፡ ጸጋ፡ እንበለ፡ ኅዳጣን። ወይእዜኒ፡ ተንሥእ፡ ከመ፡ ትፈጽም፡ መልእክተከ፡ ዘተአዘዝከ፡ እስመ፡ ተፈጸመ፡ ለከ፡ ኵሉ፡ ተምኔትከ፡ ዘበእንቲአሆን፡ ነገድከ። ወለእግዚእከኒ፡ ርኢኮ፡ በውስተ፡ ክልኤሆን፡ አህጉር፡ በላዕሉሂ፡ ኢየሩሳሌም፡ ወበታሕቱሂ፡ ኢየሩሳሌም። ወይቤሎ፡ ላሊበላ፡ ይትባረክ፡ እግዚአብሔር፡ ዘኢከልዓኒ፡ ጸሎትየ። ወኢያርኃቀ፡ ሣህሎ፡ እምኔየ። ወኢያስተኃፈረኒ፡ እምተስፋየ፡ ወኢተሐየያ፡ ለንግደትየ። ወባሕቱ፡ | ስደኒ፡ ውስተ፡ ኵሎን፡ መካናተ፡ ዘእግዚእነ፡ ከመ፡ እትአማኅ፡ ወእትባረክ፡ እምኔሆሙ። ወሶቤሃ፡ አብጽሖ፡ ገብርኤል፡ ለላሊበላ፡ ውስተ፡ ኵሎን፡ መካናተ፡ ምሥጢር፡ ዘእግዚእነ። ወተአምኃ፡ እንዘ፡ ያንገረግር፡ ውስተ፡ መድረከ፡ ኆኃቲሆን። ወእንዘ፡ ይልሕስ፡ ፀበለ፡ እምነ፡ ቶልሳሮቅጦናቲሆን። ወእምቅድመ፡ ኵሉ፡ አምኃሁ፡ ይብል፡ ውስተ፡ ኵሉ፡ መካን፡ ኀበ፡ በጽሓ፡ ትኤምኃኪ፡ አመትኪ፡ መስቀል፡ ክብራ፡ ኦታቦተ፡ ኪዳኑ፡ ለእግዚአብሔር። ወማኅደረ፡ ቅድሳቱ፡ ለልዑል። ወበዳግም፡ አምኆቱ፡ ይብል፡ እኤምኃኪ፡ አነሂ፡ ገብርኪ፡ ወልደ፡ | | አመትኪ፡ ኦእምየ፡ ቅድስት፡ ቤተ፡ ክርስቲያን። ወውስተ፡ ዮርዳኖስሂ፡ ሶበ፡ ተጠምቀ፡ በጺሖ፡ ኀበ፡ ተጠምቀ፡ እግዚእነ፡ ይቤ፡ ሕፅበኒ፡ ወአንጽሐኒ፡ እምኃጢአትየ፡ ወእምአበሳየኒ፡ አንጽሐኒ፤ ወለአመትከሂ፡ መስቀል፡ ክብራ፡ ሕፅባ፡ እምርስስሐታ፡ በዝንቱ፡ ማየ፡ ዮርዳኖስ፡ ዘተጠመቀ፡ ቦቱ፡ እንዘ፡ አልብከ፡ ኃጢአተ፡ ከመ፡ ተሀብ፡ ስርየተ፡ ለኃጥአን፡ ከመ፡ ንንሣእ፡ ንሕነ፡ ኃይለ፡ ተወሪዶትከ። ወከመዝ፡ አምኃ፡ ላሊበላ፡ ኵሎ፡ መካናተ፡ ዘኢየሩሳሌም፡ እንዘ፡ ይነዝኅ፡ አንብዖ፡ ውስተ፡ ራግዛቲሆን፡ አውኂዞ፡ ከመ፡ እንተ፡ ማይ፡ እንዘ፡ ይብል፡ ለይኩን፡ እግዚኦ፡ | ዝንቱ፡ ምጻሕተ፡ አንብዕየ፡ ሊተ፡ ለኃጥእ፡ ከመ፡ አንብዓ፡ ለይእቲ፡ ብእሲት፡ ዘአርሐሰት፡ ወመዝመዘት፡ እገሪከ። ወአንተሂ፡ ትቤላ፡ ተኃድገ፡ ለኪ፡ ኃጢአትኪ፡ ሃይማኖትኪ፡ አሕየወተኪ፡ ሑሪ፡ እትዊ፡ በሰላም። ወሊተሂ፡ ለገብርከ፡ ረሲ፡ በሰላም፡ ተመይጦትየ፡ እስመ፡ በፈቃድከ፡ ትቤለኒ፡ ለሊከ፡ ጐጕዕ፡ ከመ፡ ትፈጽም፡ መልእክተከ፡ እስመ፡ በእደዊከ፡ ሀለዎን፡ ይትከሠታ፡ አብያተ፡ ክርስቲያናት፡ ብዙኃት፡ ዘእምኣሐቲ፡ ኰኵሕ፤ ወይእዜኒ፡ ሠርሕ፡ ፍኖትየ፡ በከመ፡ ሠራሕከ፡ ፍኖቶሙ፡ ለብርሃናተ፡ ዓለም፡ ሐዋርያቲከ። ወዘንተ፡ ብሂሎ፡ አንሶሰወ፡ ብፁዕ፡

folio : 110


back to top

| | ላሊበላ፡ ለተመይጦ፡ ውስተ፡ ብሔረ፡ ኢትዮጵያ፡ ኀበ፡ ሀለዋ፡ እላንቱ፡ አብያተ፡ ክርስቲያናት፡ እለ፡ ተብህላ፡ ሀለዎን፡ ይትሐነጻ፡ እንበለ፡ ዕፅ፡ ወመሬት፡ እንበለ፡ ሐብል፡ ወመዋጽሕት። ወእምዝ፡ ነሥኦ፡ ገብርኤል፡ ወፆሮ፡ ዲበ፡ አክናፊሁ፡ ብሩሃት፡ ወሰረረ፡ መልዕልተ፡ ዓየር፡ ወአብጽሖ፡ ወስተ፡ ብሔር፡ ኀበ፡ ሀለወት፡ መስቀል፡ ክብራ። ወይእቲሰ፡ ብሔር፡ ጥንተ፡ ክርስትና፡ ይእቲ፡ እምነ፡ አህጉራተ፡ ኢትዮጵያ። ወመስቀል፡ ክብራሰ፡ ሀለወት፡ ትትናዘዝ፡ ምስለ፡ ሚካኤል፡ እንዘ፡ ይዜንዋ፡ ምጽአቶ፡ ለምታ፡ ወብጽሐቶ፡ በይእቲ፡ ዕለት፡ ዘከመ፡ ይበጽሕ። ወሶበ፡ | በጽሐ፡ ሰዓተ፡ ብጽሐቱ፡ ይቤላ፡ ተደለዊ፡ ለተራክቦ፡ ምትኪ። ወእንዘ፡ ዘንተ፡ ይቤላ፡ በጽሐ፡ ገብርኤል፡ እንዘ፡ ይፀውሮ፡ ለላሊበላ፡ ወአንበሮ፡ ቅድመ፡ ገጻ፡ ለመስቀል፡ ክብራ፡ ወተንሥአት፡ መስቀል፡ ክብራ፡ በፍሥሐ፡ ወሐቀፈቶ፡ ክሳዶ፡ ወአምኃቶ፡ በፍቅር፡ ዓቢይ፡ ወአንገርገረት፡ በቅድሜሁ፡ ለገብርኤል፡ እንዘ፡ ትሰግድ፡ ወትብል፡ ሰላም፡ ለመልአከ፡ ጽድቅ፡ ሰላም፡ ለመልአከ፡ ብርሃን። ቀዲሙኒ፡ ሰማዕኩ፡ በእንቲአከ፡ ከመ፡ አብሳሬ፡ ፍሥሐ፡ ወዜናዌ፡ ትፍሥሕት፡ አንተ። ወከመዝ፡ ብሂላ፡ አምኃቶ። እስመ፡ ረከበት፡ ፍሥሐ፡ በነጽሮቶሙ፡ | | ለክልኤሆሙ፡ ሊቃነ፡ መላእክት። ወበነጽሮቱኒ፡ ለምታ። እስመ፡ በህየ፡ ተራከቡ፡ መልአክ፡ ምስለ፡ መልአክ፡ ወሰብእ፡ ምስለ፡ ሰብእ። ወበህየ፡ ኮኑ፡ አሐደ፡ መርዔተ፡ ወአሐደ፡ ነገደ፡ እመሬታውያን፡ ክልኤቱ፡ ላሊበላ፡ ወመስቀል፡ ክብራ፡ ወእምእሳታውያን፡ ክልኤቱ፡ ሚካኤል፡ ወገብርኤል፡ ወከመዝ፡ አርባዕቲሆሙ፡ አኃዙ፡ ይትናገሩ፡ ዕበያቲሁ፡ ለእግዚአብሔር፡ ዘከመ፡ ርእየ፡ ላሊበላ፡ ነገራ፡ ኵሎ፡ ነገራተ፡ ምሥጢር፡ በኢየሩሳሌም፡ እንተ፡ በውስቴቶን፡ ተገብረ፡ መድኃኒት። ዘርእየሂ፡ በራዕየ፡ ሌሊት፡ ኵሎ፡ ቅሥፈታቲሁ፡ ለመድኃኒነ፡ | ነገራ። ወይእቲኒ፡ ነገረቶ፡ ኵሎ፡ ንብረታ፡ ዘከመ፡ ነበረት። ወራእየኒ፡ ዘርእየ፡ ምታ፡ ይእቲኒ፡ ርእየት፡ ወአልቦ፡ ወኢአሐዱሂ፡ ዘተሠወራ፡ እምኵሉ፡ ምሥጢራት። እስመ፡ በአሐቲ፡ ሌሊት፡ ርእዩ፡ ክልኤሆሙ። ወላሊበላ፡ እንዘ፡ ሀሎ፡ በኢየሩሳሌም። ወመስቀል፡ ክብራኒ፡ እንዘ፡ ሀለወት፡ በኢትዮጵያ፡ ርእየት፡ ኵሎ፡ ምሥጢራተ፡ ዘርእየ፡ ምታ፡ በኢየሩሳሌም። ወከመዝ፡ ተዜያኒዎሙ፡ አኃዙ፡ ይሰብሕዎ፡ ለእግዚአብሔር፡ ወስባሔ፡ መንክር፡ ምስለ፡ እልክቱ፡ ክልኤሆሙ፡ ሊቃነ፡ መላእክት። እንዘ፡ ይብሉ፡ ይባርክዎ፡ ኵሉ፡ ግብረ፡ እግዚእ፡ ለእግዚአብሔር። ስቡሕኒ፡

folio : 111


back to top

| | ውእቱ፡ ወልዑልኒ፡ ውእቱ፡ ለዓለም። ይባርክዎ፡ ደቂቀ፡ እጓለ፡ እመሕያው፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም። ይባርክዎ፡ መላእክተ፡ እግዚእ፡ ለእግዚአብሔር። ስቡሕኒ፡ ውእቱ፡ ወልዑልኒ፡ ውእቱ፡ ለዓለም። ወከመዝ፡ ባረክዎ፡ አርባዕቲሆሙ፡ ቶሲሖሙ፡ ቡራኬ፡ መላእክት፡ ወሰብእ። እስመ፡ በህየ፡ አማኅበሩ፡ ክልኤቱ፡ ነገድ፡ ዘላዕሉ፡ ወዘታሕቱ። ወእማንቱሰ፡ አንስት፡ ዘአማኅፀና፡ ሚካኤል፡ ለመስቀል፡ ክብራ፡ ኀቤሆን፡ ከመ፡ ይዕቀባሃ፡ ወበይእቲ፡ ዕለት፡ አስተርአዮን፡ እንዘ፡ ይጸንሐሁ፡ | እስከ፡ ይትመየጥ፡ በከመ፡ ይቤሎን። ወሶበ፡ ርእያሁ፡ አኃዛ፡ ይትፈሥሐ። ወአምኃሁ፡ በፍቅር፡ እንዘ፡ ይብላ፡ ዳኅንኑ፡ ንግደትከ፡ ኦወሬዛ፡ ሠናየ፡ ራእይ። ብእሴ፡ አምላክ። ወይቤሎን፡ ሚካኤል፡ ዳኅነ፡ ለይረሲ፡ ኪያክን፡ ኦፍቁራተ፡ እግዚአብሔር፡ አይቴኑ፡ ሀለወት፡ ዘአማኅፀንኩክን። ወሶበ፡ ይቤሎን፡ ከመዝ፡ ሖራ፡ ከመ፡ ይጸውዓሃ፡ እምኀበ፡ ሀለወት። እስመ፡ ውስተ፡ ካልእ፡ መካን፡ ሀለወት፡ ምታ። ወእማንቱሰ፡ አንስት፡ ኢያእመራሁ፡ ለምታ፡ እስመ፡ ኢርእያሁ፡ ቀዲሙ፡ አላ፡ ሚካኤል፡ ባሕቲቱ፡ አማኅፀኖን። ወላሊበላ፡ | | እስመ፡ ሖረ፡ ሀገረ፡ ኢየሩሳሌም፡ ምስለ፡ ገብርኤል፡ ወሶበ፡ ርእያሃ፡ ለመስቀል፡ ክብራ፡ ምስለ፡ ላሊበላ፡ ይቤላሃ፡ ምስለ፡ መኑ፡ ሀሎኪ፡ ኦእግዚእትነ፡ በአይቴኑ፡ ተአምሪዮ፡ ለዝንቱ፡ ብእሲ። ወትቤሎን፡ አኣምሮ፡ ኦአኃትየ። እስመ፡ እኁየ፡ ውእቱ፡ ወፍቁርየ፡ ውእቱ። ወበጽሐ፡ ይእዜ፡ እንዘ፡ የኃሥሠኒ። ወይቤላሃ፡ ነዋኬ፡ ውእቱ፡ ብእሲ፡ ዘአማኅፀነኪ፡ ኀቤነ፡ ውእቱኬ፡ የኃሥሠኪ፡ ወንዒ፡ ከመ፡ ትትራከቢዮ። ወሖረት፡ መስቀል፡ ክብራ፡ ምስለ፡ ምታ፡ ኀበ፡ እማንቱ፡ አንስት፡ ወበጽሐት፡ ኀበ፡ ሀሎ፡ ሚካኤል፡ ምስለ፡ መላህቅቶን፡ ለእለ፡ አምጽአሃ። ወሶቤሃ፡ አወፈደሃ፡ ለሚካኤል፡ | ወሚካኤልኒ፡ ባረኮን፡ ለእማንቱ፡ አንስት፡ እንዘ፡ ይብል፡ ቡሩካተ፡ ኩና፡ በበረከተ፡ ሥሉስ፡ ቅዱስ፡ ወበበረከተ፡ እግዝእተ፡ ኵልነ፡ ድንግል፡ ንግሥተ፡ ኵሎን፡ አንስት፤ ወይቤላ፡ ኵሎን፡ አሜን። ወሰገዳ፡ ታሕተ፡ እገሪሁ፡ እንዘ፡ ይብላ፡ ኢትርስዓነ፡ ኦእግዚእነ፡ በጸሎትከ፡ በኀበ፡ ኵሉ፡ ዘሖርከ፡ እስመ፡ ንሬኢ፡ ጸጋ፡ እግዚአብሔር፡ ዘየዓውደከ። ወኢታንትግ፡ ሐውጾተነ፡ ወኢትዘከር፡ ኃጢአተነ፡ ወዘንተ፡ እንዘ፡ ይብላሁ። ወፅኡ፡ ከመ፡ ይሑሩ፡ ፍኖቶሙ፡ አርባዕቲሆሙ፡ ወመስቀል፡ ክብራ፡ ወላሊበላ፡ ሚካኤል፡ ወገብርኤል፡ እንዘ፡ ይመርሕዎሙ። ወሶበ፡ ርኅቁ፡ ንስቲተ፡ እምነ፡

folio : 112


back to top

| | ሀገር፡ ነሥእዎሙ፡ ሚካኤል፡ ወገብርኤል፡ ዲበ፡ አክናፊሆሙ፡ ብሩሃት፡ ወአብጽሕዎሙ፡ ቅሩበ፡ ኀበ፡ ሀለወ፡ ነጋሢ፡ እኁሁ፡ ለላሊበላ፡ ዘስሙ፡ ሐርበይ፡ በከመ፡ ነገርኩክሙ፡ ቅድመ። ወእንዘ፡ ሀለው፡ ላሊበላ፡ ወመስቀል፡ ክብራ፡ ኀበ፡ አብጽሕዎሙ፡ መላእክት፡ ቅሩበ፡ ሀገረ፡ እንዘ፡ ሀለወ፡ ነጋሢ፡ መጽአ፡ ሌሊተ፡ እግዚእነ፡ ኢየሱስ፡ ክርስቶስ፡ ኀበ፡ ነጋሢ፡ ወአደንገፆ፡ በንዋሙ፡ በእንተ፡ ዘአኅሠመ፡ ቀዲሙ፡ ላዕለ፡ እኁሁ፡ ላሊበላ፡ ወገሠፆ፡ ብዙኃ፡ በእንቲአሁ። በከመ፡ ገሠፆ፡ ለላባ፡ ከመ፡ ኢያኅሥም፡ ላዕለ፡ ያዕቆብ፡ አመ፡ ዴገኖ። ወከማሁ፡ ገሠፆ፡ ለውእቱኒ፡ ነጋሢ፡ ዘውእቱ፡ እኁሁ፡ ለላሊበላ፡ | ወነገሮ፡ ከመ፡ ተፈጸመት፡ መዋዕለ፡ መንግሥቱ፡ ወተውህበት፡ ለላሊበላ፡ አኮ፡ በእንተ፡ ክብረ፡ ዓለም፡ አላ፡ በእንተ፡ አብያተ፡ ክርስቲያናት፡ ዘሀለዎን፡ ይትሐነጻ፡ እንበለ፡ ዕፅ፡ ወመሬት፡ ወአዘዞ፡ ከመ፡ ይትቀበሎ፡ ለእኁሁ። ወነገሮ፡ ሀገሮሂ፡ ኀበ፡ ሀለወ፡ ላሊበላ፡ ወይቤሎ፡ ሑር፡ ተቀበሎ፡ በክብር፡ ዓቢይ፡ ወበፍሥሐ፡ ወበማኅሌት፡ መንፈሳዊ፡ እስመ፡ አነ፡ ቀባዕክዎ፡ ቅብዓ፡ ቅዱሰ፡ ቅብዓ፡ መንግሥት፡ መንፈሳዊ፡ በከመ፡ ይደልዎሙ፡ ለነገሥት፡ እለ፡ ተኃርዩ፡ እምከርሠ፡ እሞሙ። ወተቀብዑ፡ ቅብዓ፡ መንግሥት፡ ዘይበቍዕ፡ ለአእምሮ፡ ፍትሕ፡ ወለመዊአ፡ | | ዕልዋን። ወይእዜኒ፡ ሑር፡ ተቀበሎ፡ በከመ፡ እቤለከ፡ በክብር፡ ወበፍሥሐ። ወኢይኅዘን፡ ልብከ፡ እንበይነ፡ መንግሥትከ፡ እስመ፡ ተውህበት፡ ለላሊበላ፡ ወአኮ፡ በእንተ፡ መንግሥት፡ ዘበምድር፡ ኃላፊ፡ ዘወሀብክዎ፡ መንግሥተ። አለ፡ በእንተ፡ ሕንጻ፡ አብያተ፡ ክርስቲያናት። ወአንተሂ፡ ኅሥሥ፡ መንግሥተ፡ ሰማያት፡ ዘኢየኃልፍ። መንግሥትሰ፡ ዘበ፡ ምድር፡ ኃላፊ፡ ውእቱ። ወባሕቱ፡ ተንሢአከ፡ ሑር፡ ተቀበሎ፡ ለእኁከ፡ በዛቲ፡ ዕለት፡ ሶበ፡ በጽሐ። ወአንብሮ፡ ዲበ፡ መንበረ፡ መንግሥትከ፡ እንዘ፡ ትባርኮ፡ በበረከት፡ ሰማያዊት። ወለሊከ፡ በእደዊከ፡ ላጽያ፡ ለሥዕርተ፡ | ርእሱ፡ አመ፡ ዕለተ፡ ታነብሮ፡ ዲበ፡ መንበረ፡ መንግሥት፡ በከመ፡ ይደሉ፡ ለመርዓ፡ መንግሥት። ወዘንተ፡ ብሂሎ፡ እግዚእነ፡ ኢየሱስ፡ ክርስቶስ፡ በራእየ፡ ሌሊት፡ ተሠወሮ። ወእምዝ፡ ነቅሐ፡ ነጋሢ፡ እንዘ፡ ይርዕድ፡ ወያንቀለቅል፡ አዕፅምቲሁ፡ እምራእየ፡ ግርማሁ፡ ለዘአስተርአዮ። ወፈርሃ፡ እምቃለ፡ ተግሣጽ፡ ዘገሠፆ። ወተንሢኦ፡ ሰገደ፡ ነጋሢ፡ እንዘ፡ ይብል፡ ኦእግዚኦ፡ ሶበ፡ አስተርአይከኒ፡ በራእየ፡ ሌሊት፡ ወገሠፅከኒ፡ በእንተ፡ ዘአሕሰምኩ፡ ቀዲሙ፡ ላዕለ፡ እኁየ። አርዓይኒ፡ ግርማከ፡ ወመሰወኒ፡ ቃለ፡ ተግሣጽከ። እፎ፡ እክል፡ እቁም፡ ቅድመ፡ ገጽከ፡ በዕለት፡ ኵነኔ፡

folio : 113


back to top

| | ፲፭ ዓባይ፡ እምዕፁብ፡ አመ፡ ይድኅኑ፡ ጻድቃን፡ አነ፡ ኃጥእ፡ በአይቴ፡ አስተርኢ፡ ሀለወኒ፡ ወአይኑ፡ መካን፡ ይሤውረኒ። እስመ፡ ምድርኒ፡ ወኵሉ፡ ግብር፡ ዘላዕሌሃ፡ ይውዒ። ወሰማያትኒ፡ እንበለ፡ ድምፅ፡ ይትረኃዋ፡ ወይሴስላ። ወኢያስተርኢ፡ አሰሮን፡ ለሰማያት፡ ወምድር፡ ወአልቦ፡ ዘይተርፍ፡ እንበለ፡ ባሕቲቱ፡ መብረቀ፡ ስብሐቲከ፡ ከመ፡ ቦቱ፡ ይርአይ፡ ኵሉ፡ ዘነፍስ፡ ምግባራቲሁ። ጻድቅኒ፡ ጽድቆ፡ ወኃጥእኒ፡ ኃጢአቶ። እስመ፡ ቦቱ፡ ይትከሠት፡ ምግባራተ፡ /ኵሉ፡/ ወኅቡአቲሆሙ፡ ለኵሎሙ፡ ደቂቀ፡ እጓለ፡ እመሕያው፡ ለጻድቅኒ፡ ይትከሠት፡ ኅቡአተ፡ ጽድቁ። ወለኃጥእኒ፡ ያስተርኢ፡ ኅቡአተ፡ ኃጢአቱ፡ | አይቴኬ፡ ይትኃባእ፡ ዘከማየ፡ ኃጥእ። ወአነኒ፡ አይቴኑ፡ እሤወር፡ በይእቲ፡ ዕለት፡ ዕለተ፡ ደይን። አመ፡ ይትወኃጡ፡ ሰማያት፡ ወምድር፡ በነደ፡ እሳት። ወእንበይነ፡ መንግሥትሰ፡ ፈቃደከ፡ ለይኩን፡ ወለዘፈቀድከ፡ ሀባ፡ ምንት፡ ይበቍዓኒ፡ መንግሥት፡ ዘበምድር። ያድኅነኒኑ፡ እምድንጋፄ፡ ግርማከ፡ ዘሰአተ፡ ደይን። ወዘንተ፡ ብሂሎ፡ ውእቱ፡ ነጋሢ፡ ጸውዖሙ፡ ለኵሎሙ፡ ሐራሁ፡ ወበጽሑ፡ ኀቤሁ፡ ኵሎሙ፡ ወዓልያኒሁ፡ ለነጋሢ፡ ወኵሎሙ፡ ተዓይኒሁ፡ ተጋብኡ፡ በትእዛዙ፡ ወነገሮሙ፡ ዘከመ፡ አስስተርአዮ፡ እግዚአብሔር፡ ወዘከመ፡ ገሠጾ፡ በእንተ፡ ዘአኅሠመ፡ ቀዲሙ፡ ላዕለ፡ እኁሁ፡ | | ወነገሮሙ፡ ካዕበ፡ ዘከመ፡ ተውህበ፡ መንግሥቱ፡ ለላሊበላ፡ እኁሁ። ወይቤሎሙ፡ ተንሥኡኬ፡ ንሑር፡ ወንትቀበሎ፡ እስመ፡ ከማሁ፡ አዘዘኒ፡ እግዚአብሔር፡ ከመ፡ እትቀበሎ፡ ወከመ፡ አንብሮ፡ ዲበ፡ መንበረ፡ መንግሥትየ። ወከመ፡ ለልየ፡ በእዴየ፡ እቅርጽ፡ ሥዕርቶ፡ በከመ፡ ይደሉ፡ ለመርዓ፡ መንግሥት። ወይቤልዎ፡ ሐራሁ፡ ምንተኑ፡ ዝንቱ፡ ነገር፡ ዘንሰምዕ፡ እምኔከ፡ እስመ፡ ተሰብረ፡ ልብነ፡ በኃዘን፡ እንበይነ፡ መንግሥትከ፡ እስመ፡ በሕይወትከ፡ ተኃድጋ። ወይቤሎሙ፡ ነጋሢ፡ ሊተሰ፡ ፍሥሐ፡ ኮነኒ፡ ኃዲገ፡ መንግሥት። ወለእመሰ፡ አእመርኩ፡ ዘከመዝ፡ ድንጋፄ፡ | ቀዲሙኒ፡ እምኢነበርኩ፡ ዲበ፡ መንበረ፡ መንግሥት፡ እስመ፡ ግርማሁ፡ አደንገፀኒ፡ ለዘአስተርአየኒ፡ ትማልም፡ በራእየ፡ ሌሊት። ወነቂሕየ፡ ስዕንኩ፡ ቀዊመ፡ ወተናግሮ፡ እስመ፡ ብሕመ፡ ልሳንየ፡ ወበእንተዝ፡ ተበትከ፡ ፍቅረ፡ መንግሥት፡ እምሥርወ፡ ልብየ። እስመ፡ ተዘከርክዎ፡ ለሰዓተ፡ ደይን፡ ዘአልባቲ፡ አድልዎ፡ ኢለነገሥት፡ ወኢለመኳንንት፡ ኢለባዕል፡ ወለነዳይ፡ ዘእንበለ፡ ባሕቲቱ፡ ምግባሩ፡ ዘያደሉ፡ ሎቱ። ወዘአስተርአየኒ፡ ይቤለኒ፡ መንግሥትሰ፡ ዘበምድር፡ ኃላፊ፡ ውእቱ፡ ኅሥሥ፡ መንግሥተ፡ ሰማያት። ወዘንተ፡ ብሂሎ፡ ተንሥአ፡ ነጋሢ፡ እንዘ፡ ያንሶሱ፡ በእገሪሁ፡

folio : 114


back to top

| | ወተለውዎ፡ ኵሎሙ፡ ሐራሁ፡ ወኖሎተ፡ አብቀልትሂ፡ እንዘ፡ ይረውጹ፡ ድኅሬሁ። ወሐራሁኒ፡ እንዘ፡ ያጌብርዎ፡ ከመ፡ ይጸዓን። ወውእቱሰ፡ ዓበዮሙ፡ እንዘ፡ ይብል፡ ኢይፂዓን፡ አንሰ፡ እስከ፡ እረክቦ፡ ለእኁየ፡ ከመ፡ ይትኃደግ፡ ሊተ፡ ዘቀዲሙ፡ ኃጢአትየ፡ ዘአኅሠምኩ፡ ላዕለ፡ እኁየ። ወከመዝ፡ አንሶሰወ፡ በእገሪሁ፡ እስከ፡ ረከቦ፡ ለእኁሁ። ወለላሊበላ፡ ኒ፡ ይቤሎ፡ ገብርኤል፡ ተንሥእ፡ ተራከቦ፡ ለእኁከ፡ እስመ፡ ናሁ፡ መጽአ፡ እንዘ፡ ያንሶሱ፡ በእገሩሁ፡ ወበፅዓ፡ እንዘ፡ ይብል፡ ኢይፂዓን፡ ዲበ፡ በቅልየ፡ እስከ፡ እረክቦ፡ ለእኁየ። ወተንሥአ፡ ላሊበላ፡ ፡ ወአንሶሰወ፡ በፍኖት፡ እንተ፡ ባቲ፡ ይመጽእ፡ እኁሁ፡ | ንጉሥ፡ ወተናጸሩ፡ ክልኤሆሙ። ወሰገደ፡ ንጉሥ፡ ቅድመ፡ ሶበ፡ ነጸሮ፡ ለላሊበላ፡ ወሰገደ፡ ላሊበላ፡ ወተንሢኦ፡ ተአምኁ፡ በበይናቲሆሙ፡ በፍቅር፡ ፍጹም። ወተግኅሡ፡ እምፍኖት፡ ወነበሩ፡ ክልኤሆሙ፡ ወለእለ፡ ይቀውሙ፡ ቅድሜሁ፡ አዘዞሙ፡ ንጉሥ፡ ከመ፡ ይሰስሉ። ወሰሰሉ፡ ሐራሁ፡ እምቅድሜሁ። ወአኃዘ፡ ንጉሥ፡ ይትናገር፡ ምስለ፡ላሊበላ፡ እኁሁ፡ ከመ፡ ያስተስሪ፡ ሎቱ፡ በእንተ፡ ዘሰደዶ፡ ቀዲሙ፡ ወአስተስረየ፡ ሎቱ፡ እኁሁ። ወእምድኅረዝ፡ ተናገሩ፡ ካልአ፡ ዘሀሎ፡ ውስተ፡ ልቦሙ፡ ንጉሥኒ፡ ወላሊበላኒ፡ ወነገሮ፡ ንጉሥ፡ ለላሊበላ፡ ዘከመ፡ አስተርአዮ፡ በራእየ፡ | | ሌሊት፡ ወዘከመ፡ አዘዘ፡ ከመ፡ ያንብሮ፡ ዲበ፡ መንበረ፡ መንግሥት። ወላሊበላኒ፡ ነገሮ፡ ዘከመ፡ ቀብዖ፡ ቅብዓ፡ መንግሥት፡ ወዘከመ፡ ሰመየ፡ ሎቱ፡ ስመ፡ መንግሥቱ። ወዘንተ፡ ኵሎ፡ እንዘ፡ ይነግሮ፡ላሊበላ፡ ለእኁሁ፡ በኁፋሬ፡ ይትናገር፡ እንዘ፡ ይብል፡ አኮ፡ ለክብረ፡ ዓለም፡ ዘይቤለኒ፡ ከመ፡ እንበር፡ ዲበ፡ መንበርከ፡ አላ፡ በእንተ፡ አብያተ፡ ክርስቲያናት፡ ዘሀለዎን፡ ይትከሠታ፡ በእደ፡ ገብርከ፡ ኃጥእ። ወይቤሎ፡ አነኒ፡ አእመርኩ፡ ዘንተ፡ ኦእኁየ፡ ለይሡቅ፡ መንበረከ፡ በጽድቅ፡ እግዚአ፡ ኃያላን፡ ወንጉሠ፡ እስራኤል። በከመ፡ ሦቀ፡ መንበሮ፡ ለዳዊት፡ ገብሩ፡ ወለሰሎሞን፡ | ወልዱ። ወዘንተ፡ ብሂሎ፡ ተንሥአ፡ ነጋሢ። ወእኁሁኒ፡ ወአንሶሰው፡ ኅቡረ፡ ተፅዒኖሙ፡ ክልኤሆሙ፡ ዲበ፡ በቅለ፡ ነጋሢ፡ ወበጽሑ፡ ኀበ፡ ታዕካ፡ መንግሥት፡ ወቦኡ፡ ውስተ፡ ቤተ፡ ንጉሥ፡ ወአዘዘ፡ ነጋሢ፡ ከመ፡ ይትጋብኡ፡ ኵሎሙ፡ ሠራዊቱ፡ ወሠርዓ፡ ሕገ፡ ለመርዓ፡ መንግሥት። ወነሥአ፡ ንጉሥ፡ መላጼ፡ በእዴሁ፡ ወቀረፀ፡ ሥዕርቶ፡ ለላሊበላ፡ ወአንበሮ፡ ዲበ፡ መንበረ፡ መንግሥት፤ ወአዖደ፡ ዓዋዲ፡ እንዘ፡ ይብል፡ ነግሠ፡ላሊበላ፡ በፈቃደ፡ እግዚአብሔር። ወአዘዘ፡ እኁሁ፡ ከመ፡ ይትኰነኑ፡ ኵሉ፡ ሕዝብ፡ ለላሊበላ፡ ወኵሎ፡ ዘይደሉ፡ ለንጉሥ፡ ሎቱ፡

folio : 115


back to top

| | የሀቡ፡ ወፍትሐኒ፡ ኀቤሁ፡ ያብኡ። ወሰምዮ፡ እኁሁ፡ ስመ፡ መንግሥቱ፡ ገብረ፡ መስቀል፡ በከመ፡ ሰመዮ፡ እግዚአብሔር፡ እምቅድመ፡ ይንበር፡ ዲበ፡ መንበረ፡ መንግሥት። ወላሊበላሰሰ፡ አመ፡ ነበረ፡ ዲበ፡ መንበረ፡ መንግሥት፡ አኃዘ፡ ይጸመድ፡ ለጽሙና፡ ዘየዓዓቢ፡ እምጽሙና፡ መነኮሳት። እስመ፡ ይእቲ፡ ሢመተ፡ መንግሥት፡ ኮነቶ፡ ከመ፡ ሢመተ፡ ምንኵስና፡ እስመ፡ ተወድየ፡ ውስተ፡ ልቡ፡ መልሕቀ፡ ትሕትና፡ ወእምአመ፡ ነግሠ፡ ኢበልዓ፡ እማዕደ፡ መንግሥቱ። አላ፡ ቦቱ፡ አሐዱ፡ ረድአ፡ ዘስሙ፡ ክርስቶስ፡ ኃረዮ፡ ወውእቱ፡ ረድእ፡ ይሣየጥ፡ | ሎቱ፡ ግብረ፡ እደዊሁ፡ ወይሁቦ፡ ሲሳዮ፡ ኅብስተ፡ ይቡሰ፡ በጸብሐ፡ አሕማል፡ ፈቲቶ፡ ሠለስተ፡ አፍዕምተ። ወኢይዌስክ፡ እምዝ፡ ካልአ፡ መባልዕተ። ወስቴሁኒ፡ ምልዓ፡ አሐቲ፡ ጽዋዕ። ወጽዋዑኒ፡ ንስቲት፡ ይእቲ፡ ወኢታረዊ። ወከመዝ፡ ነበረ፡ በኵሉ፡ መዋዕለ፡ ሕይወቱ፡ እምአመ፡ ነግሠ፡ እስከ፡ አመ፡ ፈለሰ። Mi|cles ወእምዝ፡ ኮነ፡ አሐተ፡ ዕለተ፡ እንዘ፡ ይፈቅድ፡ ላሊበላ፡ ከመ፡ ይደረር፡ መጽኡ፡ ሠለስቱ፡ አኃው፡ ቅሩበ፡ ጽርሐ፡ መንግሥቱ፡ ኀበ፡ ይረፍቅ፡ ውእቱ። ወእልክቱሰ፡ ሠለስቱ፡ እኃው፡ ሰአልዎ፡ እንዘ፡ ይብሉ፡ ሀበነ፡ እግዚእነ፡ ዘንበልዕ፡ እስመ፡ አልብነ፡ ዘንዴረር፡ ዮም። | | ወዘንተ፡ ሶበ፡ ይቤሎ፡ አሐዱ፡ ወሀቦ፡ ላሊበላ፡ አሐደ፡ አፍዕምተ፡ እምድኅረ፡ አኃዘ፡ ከመ፡ ይትፈዓም። ወካልኡኒ፡ ሰአሎ፡ ከማሁ፡ ወሎቱኒ፡ ወሀቦ፡ ካልአ፡ አፍዕምተ። ወሣልሱኒ፡ ሰአሎ፡ ከማሁ። ወአዘዘ፡ ለረድኡ፡ ከመ፡ የሀቦ፡ ሎቱ፡ ሣልሳመ፡ አፍዕምቶ። ወተፈጸመ፡ ሲሳዩ፡ ለገብረ፡ መስቀል፡ እስመ፡ ኢይበልዕ፡ እንበለ፡ ሠለሥቱ፡ አፍዕምት። ወሶበ፡ ርእየ፡ ረድኡ፡ ከመ፡ ኃልቀ፡ ዘይሴሰይ፡ ገብረ፡ መስቀል፡ ነሥአ፡ ቅራፈ፡ ውእቱ፡ ኅብስት፡ ወፈተተ፡ ወአርሐሰ፡ በጽብሐ፡ ስልቆ፡ ሐምል። ወወሀቦ፡ ለላሊበላ፡ ወኢነሥአ፡ ወዓበዮ፡ እንዘ፡ ይብል፡ እመሰ፡ ሠለስተ፡ አፍዕምተ፡ ዘእሴሰይ፡ | ተወክፈ፡ ሊተ፡ በእደ፡ አግብርቲሁ፡ እፎኬ፡ እበልዕ፡ ካልአነ፡ ፍተታተ። ወእመሰ፡ በላዕኩ፡ ዘንተ፡ ዘትሁበኒ፡ ይከውነኒ፡ ከመ፡ ዘኢወሀብኩ። እስመ፡ በላዕኩ፡ ካልአ፡ ህየንተ፡ ዘወሀብኩ። ወዘንተ፡ ተናገረ፡ ገብረ፡ መስቀል፡ ምስለ፡ ረድኡ፡ ወቤተ፡ ጽውሙ። ነፍሱሰ፡ ጽግብት፡ እምእክለ፡ መንፈስ፡ ቅዱስ፡ ዘውእቱ፡ ቃለ፡ እግዚአብሔር፡ እስመ፡ ፈጸማ፡ ለቃል፡ ዘተብህለት፡ እምአፈ፡ ሐዋርያ፡ አፍቅሩ፡ ቢጸክሙ፡ እምርእስሙ፡ ፈድፋደ። አማንኬ፡ ተፈጸመት፡ ዛቲ፡ ቃል፡ በላዕለ፡ ገብረ፡ መስቀል፡ ላሊሁ፡ ከመ፡ ይርኃብ፡ ለባዕዳን፡ ያጸግብ፡ ወለሊሁ፡ ከመ፡ ይጽማዕ፡

folio : 116


back to top

| | ለባዕዳን፡ ያረዊ። በከመ፡ ይቤ፡ እግዚእነ፡ በወንጌል፡ ብፁዓን፡ እለ፡ ይርኅቡ፡ እስመ፡ እሙንቱ፡ ይትፌሥሑ፡ ወይጸግቡ። ዛቲ፡ ቃለ፡ ከመ፡ ይፈጽም፡ ወሀበ፡ ገብረ፡ መስቀል፡ ሠለስተ፡ አፍዕምተ፡ ዘይሴሰይ፡ ለሊሁ። አኮ፡ ኃጢኦ፡ ዘይሁብ፡ እንዘ፡ ንጉሥ፡ ውእቱ፡ አላ፡ ከመ፡ ይትመዝገን፡ በኀበ፡ እግዚአብሔር፡ ወሀበ፡ ሲሳዮ። ወእምዝ፡ አዘዞ፡ ለረድኡ፡ ከመ፡ የሀቦሙ፡ ለእልክቱ፡ ሠለስቱ፡ አኃው፡ ካልአ፡ መብልዓ፡ ወመስቴ። ወለእመ፡ ዕሩቃንኒ፡ ነጺሮ፡ ከመ፡ የሀቦሙ፡ አልባሰ። ወሶበ፡ ወፅአ፡ ውእቱ፡ ረድእ፡ ርእዮሙ፡ ለእልክቱ፡ አኃው፡ ሠለስቱ፡ እንዘ፡ | የዓርጉ፡ ውስተ፡ ሰማይ፡ እስመ፡ መላእክት፡ እሙንቱ፡ ዘመጽኡ፡ ኀበ፡ ገብረ፡ መስቀል፡ ከመ፡ ያመክሩ፡ ኂሩቶ፡ ወከመ፡ የሐውጽዎ። ወከመዝኬ፡ ይሔውጽዎ፡ መላእክት፡ ለኵሉ፡ ሰብእ፡ ለዘያፈቅር፡ ነግደ፡ ተመሲሎሙ፡ በአምሳለ፡ ነዳያን፡ ወእግዚእነሂ፡ ይሔውጾሙ፡ ወይትአነገድ፡ ውስተ፡ ቤቶሙ፡ ለእለ፡ ያፈቅሩ፡ ነግደ። በከመ፡ ተአንገደ፡ ውስተ፡ ቤቱ፡ ለአብርሃም። ወይባርኮሙ፡ በከመ፡ ባረኮ፡ ሎቱ፡ ወለዘርኡ። ወበከመ፡ ባረኮ፡ ለገብረ፡ መስቀል፡ ዝንቱኬ፡ ውእቱ፡ መንክራቲሁ፡ ለገብረ፡ መስቀል፡ ዘፆረ፡ ክበደ፡ ጽሙና፡ ወክበደ፡ ጽምዕ። እስመ፡ ኢበልዓ፡ | | በመዋዕለ፡ መንግሥቱ፡ ዘእንበለ፡ ሠለሥቱ፡ አፍዕምት። ወኢሰትየ፡ ዘእንበለ፡ አሐቲ፡ ጽዋዕ። ጸሎቱ፡ ወስእለቱ፡ ወሀብተ፡ ረድኤቱ፡ ወአሶተ፡ ጸጋሁ፡ የሃሉ፡ ምስሌ፡ ንግሥትነ፡ ወለተ፡ ኢየሱስ፡ ወምስለ፡ ውሉድ፡ ኃይለ፡ ኢየሱስ፡ ኃይለ፡ ሚካኤል፡ ወልደ፡ ማርያም፡ ወምስለ፡ አዋልዲሃ፡ ወለተ፡ መርያም፡ ኂሩተ፡ ሥላሴ፡ ወምስለ፡ ኵሎሙ፡ ነጋድያን፡ እለ፡ መጽኡ፡ እንዘ፡ ይትአመኑ፡ በኃይለ፡ ጸሎቱ፡ ለዝንቱ፡ ብእሲ፡ ፀዋሬ፡ ግብረ፡ ምስኵስና፡ ዘበንግሥ፡ ውእቱ፡ ለይኩን፡ ለነ፡ ተንባሌ፡ በቅድመ፡ እግዚአብሔር፡ አዘኪሮ፡ ኪዳኖ፡ ዘወሀቦ፡ | አመ፡ ፲ ወ ፪ ለግንቦት፡ እግዚኡ፡ እንዘ፡ ይብል፡ ኵሉ፡ ዘጌሠ፡ ውስተ፡ መርጡልከ። ወተቀብዓ፡ እምፀበለ፡ ዝኅርከ። ይኩን፡ መክፈልቱ፡ ምስሌከ። ወይረሲ፡ መክፈልተነ፡ ምስሌሁ፡ በከመ፡ ኪዳኑ፡ ለዓለመ፡ ዓለም፡ አሜን፨ ፨ ፨ ወኮነ፡ በአሐዱ፡ እመዋዕል፡ እንዘ፡ ያመጽኡ፡ ለገብረ፡ መስቀል፡ ጸባሕቶ፡ ለነጋሢ፡ ዘከመ፡ ይደልዎ፡ ለንጉሥ። ከመ፡ የሀቡ፡ ወያወፍዩ፡ ግብሮሙ፡ ዘይረክቦሙ፡ ነሥኡ፡ ብዙኃ፡ መቃጽወ፡ እለ፡ ምሉዓን፡ መዓረ፡ ወፀዊሮሙ፡ በጽሑ፡ ኀበ፡ ሐይቀ፡ ፈለግ፡ ዘይወርድ፡ በኃይል፡ ወይከልእ፡ ሕዝበ፡ ከመ፡ ይዕድው። እስመ፡ መዋዕሉሁኒ፡ መዋዕለ፡ ክረምት፡

folio : 117


back to top

| | ውእቱ። ወነበሩ፡ ማዕዶተ፡ እንዘ፡ ይጸንሑ፡ እስከ፡ የኃልፍ፡ ክበደ፡ ውኂዝ። ወሶበ፡ ጐንደዩ፡ ንስቲተ፡ ቦኡ፡ ውስተ፡ ፈለግ፡ እስመ፡ ፈርሁ፡ ትእዛዘ፡ መላህቅቲሆሙ። እስመ፡ አዘዝዎሙ፡ ከመ፡ ፍጡነ፡ ያምጽኡ፡ ግብሮሙ፤ ወሶበ፡ ቦኡ፡ ወአንሶሰው፡ ማእከለ፡ ማይ፡ ኃየሎሙ፡ ውኂዝ። ወገደፉ፡ እልክተ፡ መቃጹተ፡ እለ፡ ምሉዓነ፡ መዓረ። ወአንኰርኰሮሙ፡ ማይ፡ ማእከለ፡ አዕባን፡ ለእማንቱ፡ መቃጹት፡ ሙዳየ፡ መዓር፡ ወወሰዶሙ፡ እንዘ፡ ያንኰረኵሮሙ። ወጐነኮሙ፡ ውስተ፡ አሐዱ፡ ገጽ፡ እምነ፡ መካነ፡ ፈለግ። ወእሙንቱሰ፡ ሰብእ፡ ወፅኡ፡ እምነ፡ ማይ፡ ወኃይል፡ ዓቢይ፡ ወአተው፡ | ውስተ፡ ሀገር፡ ወዜነው፡ ለመላህቅቲሆሙ፡ ኵሎ፡ ዘረከቦሙ፡ በውስተ፡ ማይ፡ ወዘከመ፡ ገደፉ፡ መቃጹተ፡ መዓር፡ ውስተ፡ ማይ፡ ሶበ፡ ኃየሎሙ፡ ውኂዝ። ወእልክቱኒ፡ መላህቅተ፡ ሕዝብ፡ ሖሩ፡ ወነገርዎ፡ ለላሊበላ፡ ንጉሥ። ወውእቱሰ፡ ኢተምዓ፡ ወኢያኅዘኖ፡ ጥቀ። እስመ፡ የዋህ፡ ውእቱ፡ ከመ፡ ርግብ፡ ወጠቢብ፡ ካዕበ፡ ከመ፡ አርዌ፡ ምድር። በከመ፡ ይቤ፡ እግዚእነ፡ በወንጌል፡ ኩኑ፡ ጠቢባነ፡ ከመ፡ አርዌ፡ ምድር፡ ወየዋሃነ፡ ከመ፡ ርግብ። ወጠቢብሰ፡ በምግባረ፡ ሠናይ፡ በከመ፡ ይቤ፡ ጳውሎስ፡ ኩኑ፡ ጠቢባነ፡ ለርእስክሙ፡ ወለነፍስክሙሂ፡ ወለቢጽክሙሂ። ወየዋህኒ፡ ውእቱ፡ | | ገብረ፡ መስቀል፡ ንጉሥ፡ በከመ፡ ይቤ፡ ላዕከ፡ አሕዛብ፡ እመቦ፡ ዘይሔሊ፡ ከመ፡ ጠቢብ፡ ውእቱ፡ አብደ፡ ለይረሲ፡ ርእሶ፡ ከመ፡ ይኩን፡ ጠቢበ። እስመ፡ አዕበዳ፡ እግዚአብሔር፡ ለጥበበ፡ ዝዓለም፡ ወሶበ፡ ነገርዎ፡ በእንተ፡ ጥፍዓተ፡ ግምዔያተ፡ መዓር፡ ኢተምዓ፡ ወኢተከዘ። አላ፡ ይቤ፡ ከመ፡ ዘይትለሐይ፡ እንዘ፡ ያክሞስስ፡ አዕድዎስ፡ እመ፡ ኢያዕደውኖ፡ እምነ፡ ማይ፡ ለውእቱ፡ መዓር፡ ወባሕቱ፡ ማይ፡ ጐጕዓ፡ ወተመጠዎ፡ ዘእንበለ፡ ፈቃድነ። ወዘንተ፡ ሶበ፡ ይቤ፡ ንጉሥ፡ እንዘ፡ ያክሞስስ። ሰሐቅዎ፡ ኵሎሙ፡ ሐራሁ፡ እለ፡ ይቀውሙ፡ ዓውዶ፡ እስመ፡ በፍሥሐ፡ ተናገሮሙ፡ ንጉሥ፤ ከመ፡ | ዘይትለሐይ። ወነበራ፡ እማንቱ፡ ግምዔያተ፡ መዓር፡ ብዙኃ፡ መዋዕለ፡ ተደፊኖን፡ በውኂዘ፡ ማይ። ወሶበ፡ ኃለፈ፡ ጊዜሁ፡ ለምልዓተ፡ ፈለግ፡ ወተጋውሐ፡ ማይ፡ ወሰሰለ፡ እምልዓቱ፡ ወአስተርአየ፡ ምድረ፡ ኆፃ፡ ዘፈለግ፡ ተረክቡ፡ እልኩ፡ ሙዳያተ፡ መዓር፡ ድኁናን፡ ወሕያዋን፡ ወኢፈቅዖሙ፡ ዕብን፡ ለአሐዱኒ፡ እምኔሆሙ፡ ወማኅተመ፡ መክደኖሙኒ፡ ኢተፈትሐ፡ ወኢተቀልዓ፡ ወፆሩ፡ እለ፡ ረከቡ፡ ጸዊዖሙ፡ ካልአነ፡ ሰብአ፡ እለ፡ ይረድእዎሙ፡ ፀዊረ። ወነሥኡ፡ ወፆሩ፡ ወአብጽሑ፡ ኀበ፡ ንጉሥ። ወይቤልዎ፡ ነዋ፡ ኦእግዚእነ፡ ንጉሥ፡ ዝኩ፡ መዓር፡ ዘተገድፈ፡

folio : 118


back to top

| | ውስተ፡ ፈለግ፡ በኢተክዕወ፡ መዓሩ፡ ወኢተሰብረ፡ ግምዔያቲሁ። እስመ፡ መንጦላዕተ፡ ጸሎትከ፡ ከደኖሙ፡ እንዘ፡ ሀለው፡ ውስተ፡ ማይ፡ ድፉናነ፡ መጠነዝ፡ መዋዕለ፡ ወኢተቀልዓሂ፡ ማኅተመ፡ መክድኖሙ። ወይቤ፡ ንጉሥኒ፡ ርእዮ፡ ወነጺሮ፡ ዕፁበ፡ ግብረ፡ ወመንክረ፡ ለዘይሰምዖ፡ ይቤ፡ ስብሐት፡ ለከ፡ ኦእግዚኦ፡ እስመ፡ አልቦ፡ ነገር፡ ዘይሰዓነከ፡ ዕፁብኒ፡ ቀሊል፡ በኀቤከ፡ ወአልቦ፡ ግብር፡ ዘይጸንዓከ። ወይቤሎሙ፡ ካዕበ፡ ንጉሥ፡ ለሐራሁ፡ ርእዩኬ፡ ኦሕዝበ፡ እግዚአብሔር፡ ንሕነሰ፡ ፈቀድነ፡ ንሴሰይ፡ ዘንተ፡ መዓረ፡ እንበለ፡ ይብጻሕ፡ ጊዜሁ። ወከልዓነ፡ እግዚአብሔር፡ ወዓቀቦ፡ | በእደ፡ ማይ። ወአመ፡ ጊዜሁ፡ ወሀበነ፡ አውፂኦ፡ እምከርሠ፡ ማይ። አንትሙኒ፡ አእኵትዎ፡ ለእግዚአብሔር፡ ለዘከመዝ፡ ጸጋ፡ ጸገወ፡ ለሰብእ፡ እስመ፡ በእንቲአክሙ፡ ተገብረ፡ ዝመንክር፡ ከመ፡ ኢያሕጕል፡ ሲሳየክሙ፡ ወይቤሉ፡ ሕዝብኒ፡ ስብሐት፡ ለእግዚአብሔር፡ ለአምላከ፡ አማልክት፡ ለንጉሠ፡ ነገሥት። ለዘወሀበነ፡ ኪያከ፡ ዘትፀውር፡ ክበደ፡ ኃጣውኢነ። ወንሕነኒ፡ በወልታ፡ ጸሎትከ፡ ተከሊለነ፡ ንሴፎ፡ ንድኃን፡ ወሰማይኒ፡ ወበምድርኒ፡ እስመ፡ አንተ፡ ፀዋሬ፡ ንዴት፡ ወጽሙና፡ ከመ፡ መነኮሳት።ወዘንተ፡ ሰሚዖ፡ እምአፈ፡ ሕዝብ፡ ይቤሎሙ፡ አርምሙ፡ እስመ፡ ፈድፋደ፡ | | ይጸልዕ፡ ውዳሴ፡ ከንቱ፡ ዘበዓለም፡ እምፈተወ፡ ከመ፡ የዓይ፡ ሥጋሁ፡ በእሳት፡ እምይስማዕ፡ ውዳሴ፡ ዘለዓለም፡ እስመ፡ ውዳሴ፡ ከንቱ፡ ያጠፍዕ፡ ነፍሰ፡ ሰብእ፡ ለእመ፡ ተወክፈ፡ በልቡ፡ ወሶበ፡ ይዌድሶ፡ ሰብእ፡ ለገብረ፡ መስቀል፡ ንጉሥ፡ ኢይትዌከፍ፡ በልቡኒ፡ ወበእዘኒሁኒ፡ ከመ፡ ይስማዕ፡ ኢይፈቱ፡ እስመ፡ ይሰምዖ፡ ለክርስቶስ፡ እንዘ፡ ይኬልህ፡ በቤተ፡ ክርስቲያን፡ በቃለ፡ ወንጌሉ፡ ቅዱስ፡ እንዘ፡ ይብል፡ አሌለክሙ፡ ሶበ፡ ሠናየ፡ ይብል፡ ላዕሌክሙ፡ ወይዌድሱክሙ፡ እስመ፡ ከማሁ፡ ረሰይዎሙ፡ ለቀደምትክሙ። ርእዩኬ፡ ፍቁራንየ፡ መድምማቲሁ፡ ለገብረ፡ | መስቀል፡ ንጉሥ፡ ዘከመ፡ ገብረ፡ ሎቱ፡ እግዚአብሔር። እስመ፡ ለማይኒ፡ አዘዛ፡ ከመ፡ ትኵኖ፡ አመት። ከመ፡ እንተ፡ ትትኤዘዝ፡ አመተ፡ ለእግዝእታ። ከማሁ፡ ተአዘዘቶ፡ ማይ፡ ለገብረ፡ መስቀል፡ እስመ፡ ኢፈትሐት፡ ማኅተመ፡ ዘግምዔ፡ መዓር። ወኢሰቈረት፡ አሐተሂ፡ እምኔሆን፡ አላ፡ ዓቀበት፡ በትእዛዘ፡ እግዚአብሔር። እስመ፡ ቀጸባ፡ እግዚአብሔር፡ ከመ፡ ኢታሕጕል፡ ንዋየ፡ መሲሑ፡ ወኅሩዩ፡ ገብረ፡ መስቀል፡ ውኂዘ፡ ክረምትሰ፡ አዕባነኒ፡ ይፈጽሕ። ሶበ፡ ያንኰረኵር፡ ዲበ፡ ዕብን። ወአዕዋመኒ፡ ይበትክ፡ እምሥረዊሆሙ፡ እስመ፡ ኃያል፡ ማየ፡ ፈለግ፡ ዘክረምት፡ ወውስተ፡ ማይ፡ ኃያል፡

folio : 119


back to top

| | ዘይሁብ፡ ምሕዋረ። ውእቱ፡ ዓቀቦሙ፡ ከመ፡ ኢይሰቈሩ፡ ወከመ፡ ኢይትፈታሕ፡ ማኅተመ፡ መክደኖሙ፡ በከመ፡ ዓቀቦ፡ ለዮናስ፡ በውስተ፡ ከርሠ፡ አንበሪ። ወከማሁ፡ ዓቀቦን፡ ለእማንቱ፡ ግምዔያተ፡ መዓር። በኃይለ፡ ጸሎቱ፡ ለላሊበላ፡ ጸሎቱ፡ ወስእለቱ፡ ወበረከቱ፡ ወሀብተ፡ ረድኤቱ፡ የሃሉ፡ ምስሌ፡ ንግሥትነ፡ ወለተ፡ ኢየሱስ፡ ወምስለ፡ ወልዳ፡ መስፍን፡ ኃይለ፡ ኢየሱስ፡ ወምስለ፡ ወለታ፡ ኂሩተ፡ ሥላሴ፡ አሜን። ወለነኒ፡ ይሡቀነ፡ ከመ፡ ኢንተንትን። ወይሕቅፈነ፡ ከመ፡ ኢንትመነን። ወይባልሐነ፡ እመሥገርተ፡ ሰይጣን። ወይምርሐነ፡ ውስተ፡ ብርሃን። ወይክድነነ፡ | በመንጦላዕተ፡ ስእለቱ፡ ከመ፡ ኢንትኰነን። በግርምት፡ ወዕፅብት፡ ሰዓተ፡ ደይን። ከመ፡ ንቁም፡ ምስሌሁ፡ በየማነ፡ መድኅን። ለዓለም፡ አሜን። ወኮነ፡ ካዕበ፡ በአሐዱ፡ ዕለት፡ እመዋዕል፡ ተርእየ፡ መንክር፡ ትሕትና፡ በላዕለ፡ ገብረ፡ መስቀል፡ እንዘ፡ ንጉሥ፡ ውእቱ፡ ዘተመሰለ፡ ነዳየ፡ ወኮነ፡ ሎሙ፡ ዘውገ፡ በመንኖ፡ ዓለም። ወኢኮነ፡ በስዒነ፡ ብዕል። አላ፡ በእንተ፡ መንግሥተ፡ ሰማያት፡ ተነድየ፡ እንዘ፡ ንጉሥ፡ ውእቱ፡ ዘንቡር፡ ዲበ፡ መንበረ፡ መንግሥት። አሐተ፡ ዕለተ፡ አስተዳለወ፡ ማዕደ፡ ዘከመ፡ ይደሉ፡ ለንጉሥ። ወዘይበቍዕ፡ ወየአክል፡ ለሠራዊቱ። ወወሀቦሙ፡ መብልዓ፡ ቅሡማተ፡ በጣዕም፡ | | ዘዘዚአሁ፡ ወወሀቦሙ፡ ስቴ፡ ሜስኒ፡ ከመ፡ ይትፈሥሑ፡ ሠራዊቱ። ውእቱሰ፡ ወፅአ፡ እምውሣጤ፡ መንጦላዕቱ፡ ለቢሶ፡ አፅርቅተ፡ ዘከመ፡ ይለብሱ፡ ነዳያን፡ ወሖረ፡ ኀበ፡ ይረፍቁ፡ ነዳያን፡ ወፂኦ፡ እንተ፡ መፍልስት፡ እንዘ፡ አልቦ፡ ዘይሬእዮ። ወቦአ፡ ማእከለ፡ ነዳያን፡ ወነበረ፡ ምስሌሆሙ፡ ከመ፡ ይትመጠው፡ ኅብስተ፡ ንዴት፡ እምእደ፡ ሐራሁ፡ እለ፡ ይሁቡ፡ ለነዳያን፡ በትእዛዘ፡ ዚአሁ፡ እስመ፡ ያሜክራ፡ ለነፍሱ፡ በኵሉ፡ ፍናዋተ፡ ጽድቅ፡ ወያገርራ፡ ለሥጋሁ። ወእንዘ፡ ሀሎ፡ ገብረ፡ መስቀል፡ ማእከሌሆሙ፡ ለነዳያን፡ በጽሐ፡ ዘይከፍሎሙ፡ ኅብስተ፡ ለነዳያን፡ ወበጽሐ፡ ኀበ፡ ላሊበላ፡ ወወሀቦ፡ ሎቱኒ፡ ወኃለፈ፡ | ውእቱ፡ ብእሲ፡ ወዓሌ፡ ንጉሥ፡ ወእምድኅረዝ፡ ርእዮ፡ ለገብረ፡ መስቀል፡ በማእከለ፡ ነዳያን፡ አሐዱ፡ እምነ፡ መዓንዝራን፡ ወአእመረ፡ ከመ፡ ንጉሥ፡ ውእቱ፡ ወነሥአ፡ ዕንዚራሁ፡ ወዘበጠ፡ አውታሮን፡ በድኅንፃሁ፡ ወይቤ፡ እንዘ፡ የዓነዝር፡ ካልአንሰ፡ ውስተ፡ ተፈግዖ፡ በጥብሐ፡ ላህም፡ ወበስቴ፡ ሜስ። ወንጉሥሰ፡ ምስለ፡ ነዳያን፡ ከመ፡ ፅኑስ፤ ወሶበ፡ ሰምዓ፡ ገብረ፡ መስቀል፡ ዘንተ፡ ቃለ፡ እምአፈ፡ መዓንዝር፡ ተንሥአ፡ ፍጡነ፡ ወቦአ፡ ውስተ፡ ውሣጤ፡ መንጦላዕተ፡ እንዘ፡ የኃዝን፡ በእንተ፡ ዘርእዮ፡ ውእቱ፡ መዓንዝር። እስመ፡ ይፈቅድ፡ ይፈጽም፡ ኵሎ፡ ጽድቀ፡ በሥውር፡ ወበኅቡእ፡ በከመ፡ ይቤ፡ እግዚእነ፡ በወንጌል፡ በኅቡእ፡ ይኩን፡ ጽድቅክሙ፡

folio : 120


back to top

| | ወኢያእምርክሙ፡ ሰብእ፡ ከመ፡ ጸምክሙ። እስመ፡ አቡክሙ፡ ዘይሬእየክሙ፡ በኅቡእ፡ ይዓሥየክሙ፡ ክሡተ፤ ወገብረ፡ መስቀልሰ፡ ውእተ፡ ኅብስት፡ ዘተመጠወ፡ እምእደ፡ አግብርቲሁ፡ ተሴስዮ፡ ኃደረ፡ ምስለ፡ ረድኡ። ከመዝ፡ ገብረ፡ መንክረ፡ ወዕፁበ፡ ግብረ። እስመ፡ ኮነ፡ ሱታፌሆሙ፡ ለነዳያን፡ በእንተ፡ መንግሥተ፡ ሰማያት። ከመ፡ ይፈጽም፡ ቃለ፡ ዘተብህለ፡ እምአፈ፡ ኤጲስ፡ ቆጶስ፡ ኵሉ፡ ዓለም፡ ዘውእቱ፡ ኢየሱስ፡ ክርስቶስ፡ ብፁዓን፡ ነዳያን፡ በመንፈስ፡ እስመ፡ ሎሙ፡ ይእቲ፡ መንግሥተ፡ ሰማያት። ጸሎቱ፡ ወስእለቱ፡ ተዓርግ፡ ውስተ፡ ጽርሐ፡ ቅድሳቱ፡ ለልዑል፡ እንዘ፡ ትምዕዝ፡ ከመ፡ ጽንሐሐ፡ ዕጣን። እስመ፡ እምአፈ፡ ንጹሕ፡ | ተፈነወት፡ ወትበውእ፡ ውስተ፡ ውሣጤ፡ መቅደሱ፡ ለሊቀ፡ ካህናት፡ ዓቢይ፡ እንዘ፡ አልቦ፡ ዘይከልዓ፡ ከመ፡ በአክናፈ፡ ትሑታን፡ ትፄዓን፡ በእንተ፡ ተኃብሮቱ፡ ለነዳያን። ወንሐነሰ፡ ለእመ፡ ኢበላዕነ፡ ቅሡማተ፡ ወልምሉማተ፡ እስከ፡ ይሰብሕ፡ ሥጋነ፡ ኢንክል፡ ከመ፡ ንቢት፡ አሐተ፡ ሌሊተ፡ ለእመ፡ ረከብነ፡ ኢነኃድግ፡ ወለእመ፡ ኢረከብነ፡ ነኃሥሥ፡ ከመ፡ ንርከብ፡ እስመ፡ አልብነ፡ ሙቀተ፡ መንፈስ፡ ዘያጌብረነ፡ ለጸዊም። ወገብረ፡ መስቀልሰ፡ እንዘ፡ ሀሎ፡ ውስተ፡ መንበረ፡ መንግሥት፡ ኢበልዓ፡ ወኢሰትየ፡ ለፍትወተ፡ ሥጋሁ፡ ከመ፡ ይኩን፡ ፍግዓሁ፡ ፍጹመ፡ በእደ፡ መርዓ፡ ዘኢየኃልፍ፡ በሰማያት። ወለነኒ፡ ኢይፍልጠነ፡ እምውእቱ፡ | | ማዕደ፡ መርዓ፡ እግዚእነ፡ ወመድኃኒነ፡ ኢየሱስ፡ ክርስቶስ፡ በኃይለ፡ ጸሎቱ፡ ለገብረ፡ መስቀል፡ መሲሑ፡ ዘተጸምደ፡ ለአርዑተ፡ ጽሙና፡ እንዘ፡ ይነብር፡ ዲበ፡ መንበረ፡ መንግሥቱ። ወይዕቀባ፡ ለንግሥትነ፡ ወለተ፡ ኢየሱስ፡ ለዓለመ፡ ዓለም፡ አሜን። ወዓዲ፡ ኮነ፡ በአሐዱ፡ እመዋዕል። ወሀሎ፡ ውስተ፡ አሐቲ፡ ሀገር፡ እምአህጉራተ፡ መንግሥቱ፡ አሐዱ፡ ዓላዊ፡ ዘዓለዎ፡ ለገብረል መስቀል፡ ንጉሠ፡ መሲሐውያን፡ ወፈነዎ፡ ለወልዱ፡ ገብረ፡ መስቀል፡ ኀበ፡ ውእቱ፡ ዓላዊ፡ ከመ፡ ይፅብዖ፡ ለውእቱ፡ ብእሲ፡ ዘአፅረሮ፡ ለገብረ፡ መስቀል፡ ወሶበ፡ በጽሐ፡ ውእቱ፡ ወልደ፡ ነጋሢ፡ ውስተ፡ ሀገሩ፡ ለዓላዌ፡ ንጉሥ፡ | ወተዓየነ፡ ውስተ፡ ፩እምነ፡ መካን፡ ተጸዊኖ፡ ውስተ፡ ጕንደ፡ ደብር። ወለአከ፡ አሐደ፡ ብእሴ፡ መኰንነ፡ ምስለ፡ ወዓልያኒሁ፡ ኀበ፡ ውእቱ፡ ዓላዊ፡ በቃለ፡ ሰላም፡ እንዘ፡ ይብል፡ አቡየአ፡ ለአከኒአ፡ ኀቤከአ፡ እንዘ፡ ይብልአ፡ ነዓ፡ ከመአ፡ ንግበርአ፡ ሰላመአ፡ ለምንትአ፡ ተዓልወኒአ፡ ይመስለከኑ፡ ዘኢያኰነኒ፡ እግዚአብሔር፡ ወለእመሰአ፡ ዘአኰነኒአ፡ እግዚአብሔርአ፡ ተዓልወኒአ፡ አልቦአ፡ ኀበ፡ ታመስጥአ፡ እምእዴየአ። ወውእቱሰ፡ ብእሲ፡ ዓላዊ፡ አግብአ፡ መልእክቶ፡ በተዓይሮ፡ ከመ፡ ስናክሬም፡ እንዘ፡ ይብል፡ አልብየአ፡ ሰላመአ፡ ምስሌሁአ፡ ለአቡከአ፡ ወምስሌከኒአ። ወኢይፈርህ፡ እምኔክሙአ።

folio : 121


back to top

| | ፲፮ ወኢሰጠው፡ ቃልክሙ። ወከመሰአ፡ አመስጥአ፡ እምእዴክሙአ፡ ኢትስአልአ፡ መነሂአ፡ ለሊከአ፡ አእምርአ፡ ከመአ፡ ኢትክለኒአ። ወለእመሰአ፡ ትፈቅድአ፡ ከመአ፡ ንትቃተልአ፡ ተደለውአ፡ ወአነሂአ፡ እመጽእኣ፡ ኀቤከአ፡ ተደሊ፡ ውየአ። ወሰሚዖ፡ ወልደ፡ ነጋሢ፡ ይቤ፡ ለይኩንአ፡ አንሰአ፡ ኢይፀብዓከአ፡ አምላከ፡ አቡየአ፡ ይሜጥወከአ፡ ውስተ፡ እዴየአ። ወበሳኒታ፡ ተደለው፡ ከመ፡ ይትቃተሉ፡ ወተዓየኑ፡ ኀበ፡ ይትረአዩ። ወይቤሎ፡ ወልዱ፡ ለውእቱ፡ ዓላዊ፡ ለወልደ፡ ገብረ፡ መስቀል፡ ንጉሠ፡ ክርስቲያን፡ ኅድግ፡ አንተኒ፡ ሐራከ፡ ወአነሂ፡ እኃድግ፡ ሐራየ፡ ወንትቃተል፡ ክልኤነ፡ በበይናቲነ። ወይቤሎ፡ ወልደ፡ | ገብረ፡ መስቀል፡ ኢይቤለከኑ፡ ትማልም፡ አንሰ፡ ኢይፀብዓከ፡ በኃይልየ። ወለዛቲኒ፡ ትዕይርትከ፡ ይሬስያ፡ ከመ፡ ትዕይርተ፡ ጎልያድ። ወአነሂ፡ እመጽኣ፡ ኀቤከ፡ በኃይለ፡ አምላኪየ፡ ከመ፡ ዳዊት፡ ምእመን። ወዘንተ፡ ብሂሎ፡ ተበሐቶ፡ ለውእቱ፡ ወልደ፡ ዓላዊ። ወይቤሎ፡ ውእቱ፡ ወልድ፡ ተዓያሪ፡ ለወልደ፡ ገብረ፡ መስቀል፡ መቅደመሰ፡ አንተ፡ ፃእ፡ ሊተ፡ ወወፅአ፡ ሎቱ፡ ወደርበዮ፡ ውእቱ፡ ዓላዊ፡ ወኢረከቦ፡ ወኢምንተኒ፡ እስመ፡ ዓደወቶ፡ ኵናት፡ በኃይለ፡ ጸሎቱ፡ ለገብረ፡ መስቀል፡ ንጉሥ። ወገብረ፡ መስቀልሰ፡ ይኔጽር፡ ኵሎ፡ ዘይገብር፡ ወልደ፡ ዓላዊ፡ ምስለ፡ ወልዱ፡ ወንጻሬሁሰ፡ አኮ፡ በዓይነ፡ ሥጋ፡ | | አላ፡ በዓይነ፡ መንፈስ፡ ርእየ፡ እንዘ፡ ሀሎ፡ በሀገረ፡ ሮሐ። ወወልዱሰ፡ ርኁቀ፡ ሀሎ፡ ኀበ፡ ሀገረ፡ ዓላዊ፡ ወምሕዋሩሰ፡ መጠነ፡ ሰሙን። ወሶበ፡ ደርበዮ፡ ወልደ፡ ዓላዊ፡ ለወልዱ፡ ርእየ፡ በመንፈስ፡ እንዘ፡ ሀሎ፡ ርኁቀ፡ ወርእዮ፡ ይቤ፡ ዕቀቦ፡ እግዚኦ፡ ከመ፡ ብንተ፡ ዓይን፡ ወበጽላሎተ፡ ክነፊከ፡ ክድኖ። ወሶበ፡ ይቤ፡ ከመዝ፡ ገብረ፡ መስቀል፡ ንጉሥ፡ ዓደወቶ፡ ኵናት፡ ለወልዱ፡ ዘተፈነወት፡ እምእደ፡ ዓላዊ። ወበዳግም፡ ደርበዮ፡ ወልደ፡ ገብረ፡ መስቀል፡ ለወልደ፡ ዓላዊ፡ ወወግዖ፡ ወቦአቶ፡ ኲናት፡ ለውእቱ፡ ዓላዊ፡ እንተ፡ ክሳዱ፡ ወወፅአት፡ አንተ፡ ጒርዔሁ፡ መጠነ፡ ስዝር፡ ወጸመረቶ፡ ምስለ፡ ምድር። ወከመዝ፡ ሞተ፡ ውእቱ፡ ዕቡይ። ወወልዱሰ፡ | ለገብረ፡ መስቀል፡ ድኅነ፡ ተከዲኖ፡ በኃይለ፡ ጸሎቱ፡ ለአቡሁ፡ ወርእየ፡ ካዕበ፡ ገብረ፡ መስቀል፡ እንዘ፡ ይመውት፡ ውእቱ፡ ዓላዊ፡ በእደ፡ ወልዱ። ወአዘዞሙ፡ ለሠራዊቱ፡ ከመ፡ ይወውዑ፡ በዓቢይ፡ ቃል፡ በፍሥሐ፡ እስመ፡ ሞአ፡ እግዚአብሔር፡ በእደ፡ አግብርቲሁ። ወተሞአ፡ ሰይጣን፡ ምስለ፡ ላዕካኒሁ። ወሶበ፡ ሞተ፡ ውእቱ፡ ወልደ፡ ዓላዊ፡ ተሰብሩ፡ ሠራዊቱ፡ ለዓላዊ። ወዴገንዎ፡ ሠራዊቱ፡ ለወልደ፡ ገብረ፡ መስቀል፡ ወአኅለቅዎሙ፡ ለዓላውያን፡ ወአኃዝዎ፡ ለአቡሁ፡ ለውእቱ፡ ወልድ፡ ዘሞት፡ ወአሰርዎ፡ ወአብጽሕዎ፡ ኀበ፡ እግዚኦሙ። ወኵሎ፡ ኣስተራቲዖ፡ ተመይጠ፡ ኀበ፡ አቡሁ። ወወሀቦ፡ ለአቡሁ፡ ውእተ፡ ዓላዌ፡ ዘአምጽአ፡ አሲሮ። ወአቡሁሰ፡ መሐሪ፡ ውእቱ፡

folio : 122


back to top

| | ከመ፡ እግዚአብሔር። ወሶበ፡ ርእዮ፡ ገብረ፡ መስቀል፡ ይቤሎ፡ ለምንት፡ ዓለውከኒ። ወይእዜኒ፡ ሰረይኩ፡ ለከ፡ ዘቀዲሙ፡ ጌጋይከ። ወእምይእዜ፡ ኢትድግም፡ ዘከመዝ፡ ምግባረ፡ ሑር፡ ውእቱ፡ ውስተ፡ አብያቲከ፡ ወውስተ፡ ሀገርከ፡ ውእቱሰ፡ ብእሲ፡ ድሩክ፡ ወፅቡይ፡ ውእቱ። ወሶበ፡ ወፅአ፡ እምኀበ፡ ንጉሥ፡ ህየንተ፡ ዘእምወደሶ፡ አኃዘ፡ ይሣለቆ፡ ሎቱ፡ ወለሐራሁ፡ እንዘ፡ ይብል፡ እፎ፡ አብዳን፡ እሉ፡ ሕዝብ፡ ቀዲሙ፡ ዓላውክዎሙ፡ ወእግዚአብሔር፡ አግብአኒ፡ ውስተ፡ እዴሆሙ። ወይእዜኒ፡ ፈነውኒ፡ ሕያውየ፡ ወአልቦ፡ ዘረሰዩኒ። እመሰ፡ ኢአብዱ፡ እምቀተሉኒ። ወዘንተ፡ ብሂሎ፡ ተፅዕነ፡ ፈረሰ፡ ወአኃዘ፡ ይሑር። ወሀለወት፡ | አሐቲ፡ ኦም፡ ውስተ፡ ፍኖት፡ ወባቲ፡ ሦከ፡ ወወግዓቶ፡ ለውእቱ፡ ብእሲ፡ ወቦአት፡ ውስተ፡ ፍጽሙ፡ ከመ፡ ሐፅ፡ ወበጊዜሃ፡ ሞተ፡ ውእቱ፡ ዕቡይ። ወዜነውዎ፡ ለንጉሥ፡ ከመ፡ ሞተ፡ ወሰሚዖ፡ ንጉሥ፡ ይቤ፡ እስመ፡ ኢሰሰለ፡ ትዕቢት፡ እምልቡ። ወበእንተዝ፡ ሞተ፡ እስመ፡ ጸዓለነ። ርእዩኬ፡ ኦፍቁራንየ፡ ዘከመዝ፡ መድምመ፡ ዘተገብረ፡ በኃይለ፡ ጸሎቱ፡ ለገብረ፡ መስቀል፡ ወራእየሂ፡ ዘርእየ፡ እንዘ፡ ሀሎ፡ ርኁቀ። እስመ፡ በከመ፡ ይሬኢ፡ አምላኮሙ፡ ይሬእዩ፡ መምለክያኒሁ። እስመ፡ መንፈስ፡ ቅዱስ፡ ዘላዕሌሆሙ፡ ይከሥት፡ ሎሙ፡ ኵሎ፡ ኅቡአተ። ጸሎቱ፡ ወስእለቱ፡ ለገብረ፡ መስቀል፡ የሃሉ፡ ምስለ፡ ንግሥትነ፡ ወለተ፡ ኢየሱስ፡ | | ወየሃሉ፡ ምስለ፡ ኵልነ፡ ወሰይፈ፡ ረድኤቱ፡ ትግዝሞ፡ ለፀርነ፡ በከመ፡ ገዘመቶ፡ ለውእቱ፡ ዓላዊ፡ አሜን። ወአሐተኒ፡ ዕለተ፡ ዘአርአየ፡ መንክራቲሁ፡ ገብረ፡ መስቀል፡ እፈቅድ፡ እንግርክሙ። ወሀለወት፡ አሐቲ፡ ብእሲት፡ ብዕልት። ወእንዘ፡ ትዴረር፡ ወትበልዕ፡ ሥጋ፡ እንስሳ፡ አኃዘት፡ ትብላዕ፡ ሥጋ፡ ሰብእኒ፡ ዘበሐሜት። ወሐመየቶ፡ ለላሊበላ፡ በነገር፡ ካልእ፡ እንዘ፡ ትጸርፍ፡ ሎቱ፡ ወተፍዕመት፡ ሥጋ፡ ወሐነቃ፡ ውእቱ፡ ሥጋ፡ ወኢወረደሂ፡ ታሕተ፡ ወኢወፅአ፡ ኣፍኣ። አላ፡ ነበረ፡ ማእከለ፡ ጕርዔሃ፡ እንዘ፡ ያጠውቃ፡ ዘበሐኒቅ። ወፈቀደ፡ ይፃእ፡ ዓይና፡ እምብዝኃ፡ ጥዋቄ፡ ሕንቀት። ወጸርሐት፡ በውስተ፡ | ልበ፡ እንዘ፡ ትብል፡ አበስኩ፡ ለከ፡ ኦእግዚእየ፡ገብረ፡ መስቀል፡ መሲሑ፡ ለእግዚአብሔር። ወኢይደግም፡ እምይእዜ፡ ጸውዖተከ። ወኢይዘክር፡ ስመከ፡ በእከይ፡ ዘእንበለ፡ በሠናይ። ወዘንተ፡ ሶበ፡ ትቤ፡ ወፅአ፡ ውእቱ፡ ምታረ፡ ሥጋ፡ ምስለ፡ ደመ፡ ጕርዔሃ፡ ወወድቀ፡ ውስተ፡ ምድር። ጸሎቱ፡ ወስእለቱ፡ ለገብረ፡ መስቀል፡ የሃሉ፡ ምስለ፡ ንግሥትነ፡ ወለተ፡ ኢየሱስ፡ ወሐብለ፡ ረድኤቱ፡ ይሕንቆ፡ ለዕድውነ፡ አሜን። ወካዕበ፡ አሐተ፡ ዕለተ፡ ኣኃዘ፡ ይጽርፍ፡ ሎቱ፡ አሐዱ፡ ብእሲ፡ ለላሊበላ፡ እንዘ፡ የሐምዮ። ወብእሲቱሰ፡ ለውእቱ፡ ብእሲ፡ ተቤሎ፡ ኢትጽርፍ፡ ላዕለ፡ ገብረ፡ እግዚአብሔር፡ ወመሲሐ፡ እግዚአብሔር፡ ውእቱ፡ ዓ

folio : 123


back to top

| |ዲ። ወተምዓ፡ ለብእሲቱ፡ ወተንሥአ፡ እምኀበ፡ ይነብር፡ ወዓርገ፡ ውስተ፡ ምስካቡ፡ ወኖመ። ወሶበ፡ ነቅሐ፡ እምንዋሙ፡ ረከበ፡ ክልኤተ፡ አዕይንቲሁ፡ ዕውራነ፡ ወዜነዋ፡ ለብእሲቱ፡ ከመ፡ ዖሩ፡ አዕይንቲሁ። ወብእሲቱሰ፡ ትቤሎ፡ ኢይቤለከኑ፡ ኢትጽርፍ፡ ላዕለ፡ ገብረ፡ እግዚአብሔር፡ አርአየኬ፡ እግዚአብሔር፡ ኃይሎ፡ ላዕሌከ፡ እስመ፡ ጸረፍከ፡ ላዕለ፡ ገብሩ፡ በዑረተ፡ ልብከ። ወእግዚአብሔር፡ አዖሮን፡ ለአዕይንቲከ። ከመ፡ ይኩን፡ ዕውረ፡ ውሥጥከኒ፡ ወአፍአከኒ፡ ወይእዜኒ፡ ኢትኅዘን፡ በእንተ፡ ዑረተ፡ አዕይንቲከሰ። አላ፡ ኅዘን፡ በእንተ፡ ነፍስከ፡ እስመ፡ ትትኳነን፡ በእሳተ፡ ገሃነም፡ ለእመ፡ ኢነሳሕከ። በከመ፡ ይቤ፡ እግዚእነ፡ | በወንጌል፡ ኵሉ፡ ዘነበበ፡ ጽርፈተ፡ ላዕለ፡ ወልደ፡ እጓለ፡ እመሕያው፡ ይትኃደግ፡ ሎቱ፡ ወዘሰ፡ ጸረፈ፡ ዲበ፡ መንፈስ፡ ቅዱስ፡ ኢይትኃደግ፡ ሎቱ፡ ኢበዝ፡ ዓለም፡ ወኢበዘይመጽእ። ዘጸረፈሰ፡ ዲበ፡ እጓለ፡ እመሕያው፡ ዘይቤ፡ ላዕለ፡ እለ፡ ኢተጠምቁ። ወዘሰ፡ ጸረፈ፡ ላዕለ፡ መንፈስ፡ ቅዱስ፡ ዲበ፡ እለ፡ ነሥኡ፡ መንፈሰ፡ ቅዱሰ፡ እምከርሠ፡ ጥምቀት፡ ወይእዜኒ፡ ኢይምሰልከ፡ ዲበ፡ ሰብእ፡ ዘጸረፍከ። አላ፡ ዲበ፡ መንፈስ፡ ቅዱስ። ወከመዝ፡ ገሠጸቶ፡ ይእቲ፡ ብእሲት፡ ለብእሲሃ፡ እስመ፡ መንፈስ፡ ቅዱስ፡ አስተናገራ። ወይእዜኒ፡ ኦፍቁራንየ፡ ኢይፃእ፡ ጽርፈት፡ እምአፉነ፡ ላዕለ፡ እኁነ፡ ክርስቲያናዊ፡ እስመ፡ ተወልደ፡ | | እመንፈስ፡ ቅዱስ። ወበእንተዝ፡ ንሰመይ፡ ጸራፍያነ፡ ላዕለ፡ መንፈስ፡ ቅዱስ፡ ሶበ፡ ጸረፍነ፡ ላዕለ፡ ክርስቶሳዊ። ያድኅነነኬ፡ ቅግዚአብሔር፡ እስመ፡ እምዘ፡ ከመዝ፡ ልማድ፡ እስመ፡ ጳውሎስኒ፡ ይሜህረነ፡ ከመ፡ ኢንርግም፡ እስከ፡ ለሰይጣን፡ አኮ፡ ኃዚኖ፡ ለሰይጣን፡ ዘይሜህር፡ ከመዝ፡ አላ፡ ከመ፡ ኢንልክር፡ ጥቀ፡ ለመርገም፡ በልሳንነ፡ ከመ፡ ኢንድኃጽ፡ ለዕለ፡ እኁነ። ንትማኅፀንኬ፡ በኃይለ፡ ጸሎቱ፡ ለገብረ፡ መስቀል፡ ከመ፡ ያዑሮ፡ ለሰይጣን፡ ዘያስሕተነ፡ ወዘይሜህረነ፡ ከመ፡ ንጽርፍ፡ በከመ፡ አዖሮ፡ ለውእቱ፡ ብእሲ፡ ዘጸረፈ፡ ላዕሌሁ፡ ጸሎቱ፡ ወስእለቱ፡ ወበረከቱ፡ የሃሉ፡ ምስለ፡ ንግሥትነ፡ ወለተ፡ ኢየሱስ፡ | ወምስለ፡ ወልዳ፡ ኃይለ፡ ኢየሱስ፡ ወይባርከነ፡ ለኵልነ፡ አሜን፤ ስምዑኬ፡ ኦፍቁራንየ፡ እንግርክሙ፡ ዘከመ፡ ኮነ፡ ግብረ፡ ፀአቶን፡ ለእላንቱ፡ አብያተ፡ ክርስቲያናት፡ እምልበ፡ ምድር። በእደ፡ ላሊበላ፡ ልዑለ፡ ዝክር፡ ወዘከመ፡ እፎ፡ ግብረ፡ ሕንጻሆን፡ ኮነ፡ እንበለ፡ ዕፅ፡ ወመሬት፡ ወዘእንበለ፡ አኅባለ፡ ጠፈር፡ ወመዋጽሕተ። ሰማዕክሙኑ፡ ዘከመዝ፡ ግብረ፡ ዜና፡ ወሚመ፡ ርኢክሙኑ፡ በአዕይንቲክሙ፡ ዘከመዝ፡ መንክረ፡ ወዘከመዝ፡ መድምመ፡ መድፍን፡ ኅቡእ፡ ዘተከሥተ፡ በእደ፡ ላሊበላ፡ እምልብኒ፡ ተመሥጠረ፡ ወእምሕሊናኒ፡ ተሠወረ፡ ዝኩ፡ ገባሬ፡ ኵሉ፡ ወፈጣሬ፡ ኵሉ፡

folio : 124


back to top

| | ዘአምጽአ፡ ኵሎ፡ ዓለመ፡ በጽዋዔ፡ ቃሉ፡ አመ፡ በጽሐ፡ ጊዜሁ፡ ለሕንጻ፡ እሎን፡ አብያተ፡ ክርስቲያናት። ወአመ፡ ወርዘወ፡ ሐናጺሆን፡ በሥጋኒ፡ ወበመንፈስኒ። ፈቀደ፡ እግዚአብሔር፡ ከመ፡ ይክሥት፡ መድፍኖ፡ ኅቡአ፡ ዘነበረ፡ እምቀዳሚ፡ ተከቢቶ። አመ፡ ሣረረ፡ ምድረ፡ ወሐለየ፡ ከመ፡ ያርኢ፡ ምሥጢሮ፡ ለሕዝብ፡ ለእለ፡ ይደልዎሙ፡ ከሢቶ፡ እምልበ፡ ምድር፡ ወጥበብ፡ መንክር፡ ወበምሥጢር፡ ኅቡእ። በከመ፡ አውፅአ፡ ቀዳሚ፡ እምከርሠ፡ ምድር፡ ኵሎ፡ አዝርእተ፡ ምድር፡ በበዘመዱ፡ ወበበአርአያሁ። ወዕፀወኒ፡ ከማሁ፡ በበአርአያሁ፡ ወበበአምሳሊሁ። ወአንስሳኒ፡ ብዙኃ፡ በበአርአያሆሙ፡ ወበበአምሳሊሆሙ። | ወከማሁ፡ ፈቀደ፡ ለእሎንሂ፡ አብያተ፡ ክርስቲያናት፡ ያወፅኦን፡ እምድር፡ አኮ፡ ዘአሐዱ፡ ኅብሮን። ወኢሂ፡ ዘአሐዱ፡ ግብረቶን፡ ወኢተኃብር፡ አሐቲ፡ ምስለ፡ ካልእታ፡ በኵሉ፡ ኅብራ፡ ወበኵሉ፡ ግብራ። ወሶበ፡ በጽሐ፡ ጊዜሁ፡ ከመ፡ ይትከሠታ፡ ኵሎን፡ አብያተ፡ ክርስቲያናት፡ ዓሠርቱ፡ ዘእምአሐቲ፡ ዕብን። ይቤሎ፡ እግዚአብሔር፡ ለላሊበላ፡ በጽሐ፡ ጊዜሁ፡ ከመ፡ ይትከሠታ፡ አብያተ፡ ክርስቲያናት፡ በእደ፡ ዚአከ፡ ዘአርአይኩከ፡ ቀዳሚ። ወአንተኒ፡ ጽናዕ፡ ወተኃየል፡ ከመ፡ ትፈጽም፡ መልእክተከ። እስመ፡ ብዙኃን፡ ነፍሳት፡ ይድኅኑ፡ በውስቴቶን። አስተፋጥን፡ ሐኒጾቶን። ወናሁ፡ አዘዝክዎሙ፡ ለመላእክትየ፡ ከመ፡ ይርድኡከ። | | ወላሊበላ፡ አግበረ፡ ሐፃውንተ፡ ብዙኃ፡ ዘዘ፡ ዚአሁ፡ ግብረቶን። ቦለጸሪብኒ፡ ወቦ፡ ሐፂን፡ ለመፍጽሕኒ፡ ወቦ፡ ሐፂን፡ ለወቂር። ዘንተ፡ ኵሎ፡ ሐፃውንተ፡ ገብረ። ወካልኣነኒ፡ ብዙኃተ፡ ሐፃውንተ፡ ገብረ፡ በዘይትፌጸም፡ ሕንጻ፡ መቅደስ፡ ዘእምአሐቲ፡ ኰኵሕ፡ ወእምአሜሃሰ፡ ኢሐለየ፡ ላሊበላ፡ ሕሊና፡ ዘበምድር፡ ኢለመፍቅደ፡ ሥጋሁ፡ ወለመፍቅደ፡ ብእሲቱ። አላ፡ ይሔሊ፡ ኵሎ፡ አሚረ፡ በእንተ፡ እሎን፡ አብያተ፡ ክርስቲናት፡ ከመ፡ ይፈጽም፡ በከመ፡ ርእየ፡ በውስተ፡ ሰማይ፡ እንዘ፡ ያኄይሎ፡ መንፈስ፡ ቅዱስ፡ በኵሉ፡ ውስተ፡ ኵሉ። ወአግቢሮ፡ ሐፃውንተ፡ በዘይገብር፡ ሕንጻ፡ መቅደስ፡ አዘዞሙ፡ ለኵሎሙ፡ | ሕዝብ፡ ከመ፡ ይትጋብኡ፡ ኀቤሁ። ወይቤሎሙ፡ ሶበ፡ ተጋብኡ፡ ንግሩ፡ ዓስበክሙ፡ ዘትነሥኡ፡ ኵልክሙ እለ፡ ትትራድኡኒ፡ ውስተ፡ ሕንጻ፡ አብያተ፡ ክርስቲያናት፡ እስመ፡ አዘዘኒ፡ እግዚአብሔር፡ ከመ፡ እግበር። አንትሙኒ፡ ንግሩ፡ በበቃልክሙ፡ ዘከመ፡ ትነሥኡ፡ ዓስበክሙ። ዘሂ፡ ይትራዳእ፡ ውስተ፡ ግብረ፡ ጸሪብ። ወዘሂ፡ ይፃሙ፡ በአውፅኦ፡ መሬት። ወኵልክሙ፡ ንግሩ፡ በበቃልክሙ፡ ወዘከመ፡ ትቤሉኒ፡ እሁበክሙ፡ ከመ፡ ኢትበሉኒ፡ አገበረነ፡ እንበለ፡ ፈቃድነ፡ ከመ፡ ኢይኩን፡ ፃማክሙ፡ በከ፡ ሶበ፡ ታንጐረጕሩ። ወነገሩ፡ ኵሎሙ፡ በከመ፡ ሕሊና፡ ልቦሙ። ውእቱኒ፡ ወሀቦሙ፡ በከመ፡ ይቤልዎ፡ ወኢያንተገ፡ ውሂቦቶሙ፡

folio : 125


back to top

| | እምአመ፡ ወጠነ፡ ሐኒጸ፡ አብያተ፡ ክርስቲያናት፡ እስከ፡ ፈጸመ፡ ለለዕለቱ፡ ይሁቦሙ፡ ዓስቦሙ። ለዘይወቅርሂ፡ ወለዘይጸርብሂ፡ ወለዘያወፅእሂ፡ መሬተ፡ እምጽራበ፡ ቤተ፡ ክርስቲያን፤ ወእምውስተ፡ ሕዝብሰ፡ ብዙኃን፡ እለ፡ ተረክቡ፡ ምሉዓነ፡ ጥበብ። እለ፡ ወደየ፡ ላዕሌሆሙ፡ እግዚአብሔር፡ መንፈሰ፡ አእምሮ፡ ከመ፡ ቤሲላኤል፡ ወኢልያብ። ወተደለወ፡ ገብረ፡ መስቀል፡ ከመ፡ ይግበር፡ በከመ፡ አርአዮ፡ እግዚአብሔር፡ ወአኃዘ፡ ይውጥን። ወመላእክትኒ፡ አኃዙ፡ ያንሶስው፡ ምስሌሁ፡ እንዘ፡ ይሜጥኑ፡ ሎቱ፡ ምድረ፡ በበአምጣኖን፡ ለኵሉ፡ በበፆታሁ፡ ለንዑስኒ፡ ወለዓቢይኒ። ወውእተኒ፡ ምድረ፡ | ኀበ፡ ገብረ፡ አብያተ፡ ክርስቲያናት፡ ተሣየጡ፡ በወርቁ፡ እምኀቤሆሙ፡ ለእለ፡ ይኴንንዋ፡ ለይእቲ፡ ምድር፡ እንዘ፡ ያፈደፍድ፡ ኂሩተ። ወለእመሰ፡ ፈቀደ፡ ከመ፡ ይንሣእ፡ መኑ፡ እምከልኦ፡ ለንጉሥ። ወገብረ፡ ቀዳሚተ፡ ቤተ፡ ክርስቲያነ፡ በከመ፡ አርአዮ፡ እግዚአብሔር፡ በመንክር፡ ግብር፡ ወበመድምም፡ ኪን፡ ዘኢይትከሀሎ፡ ለእጓለ፡ እመሕያው፡ ከመ፡ ይግበር፡ ዘእንበለ፡ ጥበበ፡ እግዚአብሔር። ወአሠነየ፡ አፍአሂኒ፡ ወውሥጣኒ፡ ወአሠርገዋ፡ በመሳክው፡ ሠናያን፡ ወስቅሱቃን፡ እሙንቱ፡ ወሰቅሰቆሙኒ፡ ኢኮነ፡ ዘዕፅ፡ ወአዕማዲሆሙኒ፡ ብልዙናት፡ እማንቱ። ወገብረ፡ እንተ፡ ቅድሜሃኒ፡ ክልኤተ፡ አብያተ፡ | | ክርስቲያናት። ወሙፃኦንሰ፡ አሐዱ፡ አንቀጽ፡ ወይፈልጦን፡ አንቀጽ፡ ውሣጣይ። ወእንተ፡ ድኅሬሃኒ፡ ገብረ፡ አሐተ፡ ቤተ፡ ክርስቲያን፡ ዓባየ። ወአሠነያ፡ በብዙኅ፡ ሠርጕ። ወአኮ፡ በወርቅ፡ ወበብሩር፡ አላ፡ ሠርጓኒ፡ ዘዕብን። ወኍልቈ፡ አዕማዲሃሰ፡ ፸ ወ ፪ቱ፡ በኍልቈ፡ ፸ ወ ፪ቱ፡ አርድእት፡ እንተ፡ በየማናኒ፡ ገብረ፡ አሐተ፡ ቤተ፡ ክርስቲያነ። ወእንተ፡ በጸጋማኒ፡ ገብረ፡ አሐተ፡ ቤተ፡ ክርስቲያነ። ወሰመያ፡ ለቀዳሚት፡ ቤተ፡ ማርያም፡ ወለእንተ፡ ቅድሜሃኒ፡ ክልኤተ፡ አብያተ፡ ክርስቲያናት፡ ለአሐቲ፡ ሰመያ፡ ደብረ፡ ሲና፡ ወለካልእታኒ፡ ሰመያ፡ ጎልጎታ፡ ወለእንተ፡ የማናኒ፡ ሰመያ፡ ቤተ፡ መስቀል። ወለእንተ፡ ፀጋማኒ፡ | ሰመያ፡ ቤተ፡ ደናግል። ወከመዝ፡ አስተአኃዘ፡ ፭ተ፡ ቤተ፡ ክርስቲያናተ፡ ሠናያነ፡ ዘእምአሐቲ፡ ኰኵሕ። ወክልኤተኒ፡ አብያተ፡ ክርስቲያናተ፡ ሠናያተ፡ ዘእምአሐቲ፡ ኰኲሕ። ወክልኤተኒ፡ አብያተ፡ ክርስቲያናት፡ ገብረ፡ ሠናያተ፡ ወግብረቶንሰ፡ ብዑድ፡ ውእቱ፡ ወቅሩባን፡ እማንቱ። ወባሕቱ፡ ይፈልጦን፡ ቅጽር፡ ዘሀሎ፡ ማእከሎን። ወለእልክቱሂ፡ ክልኤሆን፡ ሰመያ፡ ለአሐቲ፡ ቤተ፡ ገብርኤል።ወለካልእታኒ፡ ሰመያ፡ ቤተ፡ አባ፡ መጣዕ። ወከመዝ፡ አስተአኃዘ፡ እሎንተ፡ ክልኤተ፡ አብያተ፡ ክርስቲያናት። ወደመሮን፡ በቅጽር፡ ወፈለጦን፡ ካዕበ፡ በቅጽር፡ ወገብረ፡ ካዕበ፡ ክልኤተ፡ አብያተ፡ ክርስቲያናተ፡ መአድማነ፡

folio : 126


back to top

| | ሕንፃ፡ ላሊበላ፡ miniature | | ወግብረቶንሰ፡ ኢይኃብር፡ ለክልኤሆን። ወለእሎንሂ፡ ሰመያ፡ ለአሐቲ፡ ቤተ፡ መርቆሬዎስ። ወለካልእታኒ፡ ሰመያ፡ ቤተ፡ አማኑኤል። ወከመዝ፡ አስተአኃዞን፡ ለክልኤሆን፡ አብያተ፡ ክርስቲያናት፡ ወገብረ፡ አሐቲኒ፡ ቤተ፡ ክርስቲያነ፡ እንተ፡ ባሕቲታ፡ ወግብረታኒ፡ ብዑደ፡ ውእቱ፡ በትእምርተ፡ መስቀል፡ ገብራ፡ በከመ፡ አመሩ፡ ሎቱ፡ መላእክት። ወበከመ፡ አርአይዎ፡ እንዘ፡ ይሜጥኑ፡ ሎቱ፡ ምድረ። ወሰመያ፡ ላቲኒ፡ ቤተ፡ ጊዮርጊስ። ወከመዝ፡ ፈጸሞን፡ ለዓሠርቱ፡ አብያተ፡ ክርስቲያናት። ወግብረቶንሰ፡ ዘዘዚአሆን፡ ወአርአያሆንሂ፡ ዘዘዚአሆን። ወአልቦ፡ ዘገብረ፡ ገብረ፡ መስቀል፡ ወኢምንተኒ፡ ዘእንበለ፡ ዘአርአዮ፡ | እግዚአብሔር። አላ፡ ገብረ፡ በከመ። ርእየ፡ በውስተ፡ ሳብዕ፡ ሰማይ፡ ወኢወሰከ፡ ኢዲበ፡ ኑኆን፡ ወኢዲበ፡ ቆሞን፡ ወኢዲበ፡ ሰሮን፡ አላ፡ በከመ፡ ርእየ፡ በከመ፡ ይቤሎ፡ እግዚአብሔር፡ ኢትወስክ፡ ኢዲበ፡ ቆሞን፡ ወኢዲበ፡ ሰሮን። ወሶበ፡ አኃዘ፡ ይውጥን፡ ሕንጻሆን፡ አኃዙ፡ መላእክትኒ፡ ይትራድእዎ፡ በውስተ፡ ኵሉ፡ ግብር። ወኮኑ፡ አሐደ፡ መርዔተ፡ መላእክት፡ ወሰብእ፡ በውእቱ፡ መዋዕል። እስመ፡ ተደመሩ፡ መላእክት፡ ኀበ፡ ኵሎሙ፡ መስተገብራነ፡ ቤተ፡ ክርስቲያን፡ ኀበ፡ ጸረብትኒ፡ ወኀበ፡ ወቀርትኒ። ወኀበ፡ ፀወርተ፡ መሬትኒ፡ መዓልተሰ፡ ይትጌበሩ፡ መላእክት፡ ምስለ፡ ሰብእ፡ ውስተ፡ ሕንጻ፡ አብያተ፡ ክርስቲያን። ወሌሊተሰ፡ ይትገበሩ፡ መላእክት፤

folio : 127


back to top

| | መዓልተ፡ ሶበ፡ ይገብሩ፡ አሐተ፡ ዕመተ። ወበሳኒታ፡ ይትረከብ፡ ከዊኖ፡ አርባዕተ፡ ዕመተ። እስመ፡ መላእክት፡ ይገብሩ፡ በኵሉ፡ ለያልይ። ወእለ፡ ርእዩ፡ ይቤሉ፡ ምንትኑዝ፡ መንክር። ንሕነሰ፡ ኃደግነ፡ አሐሰ፡ ዕመተ፡ ታማልም። ወይእዜሰ፡ ኮነ፡ አርባዕተ፡ ዕመተ። እስመ፡ ኢይአምሩ፡ እሙንቱ፡ ሰብእ፡ ከመ፡ መላእክት፡ ይገብሩ፡ እስመ፡ ኢይሬእይዎሙ። ወላሊበላሰ፡ የአምርዎ፡ ዘንተ፡ እስመ፡ የአምሩ፡ መላእክት፡ ኂሩቶ። ወበእንተዝ፡ ኢይሤወርዎ፡ እስመ፡ ኮንዎ፡ ኣብያጸ፡ እሳታውያን፡ ወበእንተዝ፡ ኢይትኃብእዎ፡ ወከመዝ፡ ፈጸመ፡ ሐኒጸቶን፡ ለእላንቱ፡ አብያተ፡ ክርስቲያናት፡ ዓሠርቱ። ወግብረቶንሰ፡ | እምአሐዱ፡ ዕብን። ርእዩኬ፡ ኦፍቁራንየ፡ ዘከመዝ፡ ብእሴ፡ ዘበእዴሁ፡ ተከሥታ፡ እሎን፡ አብያተ፡ ክርስቲያናት፡ ዘኢተገብረ፡ ዘከማሆን፡ በኀበ፡ ካልአን፡ በሐውርት። በአይ፡ ልሳን፡ ንክል፡ ነጊረ፡ ግብረቶን፡ ለእሎን፡ አብያተ፡ ክርስቲያናት። ወግብረተ፡ ቅጽሮንሂ፡ ኢንክል፡ ነጊረ፡ ኅድጉሰ፡ እንተ፡ ውሥጦን። ዘርእየኒ፡ ኢይጸግብ፡ በነጽሮ። ወበአንክሮኒ፡ ኢይክል፡ ልብ፡ ፈጽሞ። እስመ፡ መንክር፡ ተገብረ፡ በእደ፡ ላሊበላ፡ ዘኢይትከሀሎ፡ ለሥጋዊ፡ ከመ፡ ይኈልቍ፡ መንክራቲሁ። እመቦ፡ ዘይኌልቆሙ፡ ለከዋክብተ፡ ሰማይ። ይኋልቆሙ፡ ለመንክራትኒ፡ ዘተገብራ፡ በእደ፡ ላሊበላ፡ | | ቤተ፡ ማርያምን፡ እም{}ዳአነፀ፡ miniature

folio : 128


back to top

| | ወለእመሰቦ፡ ዘይፈቅድ፡ ከመ፡ ይርአይ፡ ገብረ፡ ሕንጻሆን፡ ለአብያተ፡ ክርስቲያናት፡ ዘተገብራ፡ በእደ፡ ላሊበላ፡ ይምጻእ፡ ወይርአይ፡ በአዕይንቲሁ፡ እስመ፡ አኮ፡ ዘይበልያ፡ ሕንጻ፡ ማኅፈዱ፡ ለላሊበላ፡ ከመ፡ ደብተራ፡ ሙሴ። ወኢሂ፡ ከመ፡ ምኵራበ፡ ሰሎሞን፡ ዘይነስትዎን፡ ዓላውያን። ማኅፈደ፡ ደብተራሁሰ፡ ለገብረ፡ መስቀል፡ ኢያንቀለቅላ፡ ወኢይማስና፡ እስከ፡ ታስተርኢ፡ ኢየሩሳሌም፡ ሰማያዊት፡ ዲበ፡ ምድር፡ እንተ፡ ድሉት፡ ለኅሩያን፡ እለ፡ ይደልዎሙ፡ ከመ፡ ይኅድሩ፡ ውስቴታ። ጴጥሮስ፡ ወጳውሎስ፡ ምስለ፡ ኢየሱስ፡ ሊቆሙ፡ ፈጸሙ፡ ሐኒጾተ፡ መርጡላ፡ ለድንግል፡ በሠለስቱ፡ አዕባን፡ እንዘ፡ ይለመልማ፡ | ከመ፡ ሰምዕ፡ በትእዛዘ፡ እግዚአብሔር። ወላሊበላ፡ ኒ፡ ፈጸመ፡ ዓሠርተ፡ አብያተ፡ ክርስቲያናት፡ በአሐዱ፡ ዕብን። እንዘ፡ ትረድኦ፡ ጸጋ፡ እግዚአብሔር፡ ምስለ፡ ኃይላቲሁ። ጴጥሮስ፡ ወጳውሎስ፡ ሐነጹ፡ ነፍሳተ፡ ብዙኃ፡ በአሐዱ፡ ሐይማኖት። ወላሊበላ፡ ኒ፡ ሐነጸ፡ ብዙኃ፡ አብያተ፡ ክርስቲያናት፡ በአሐዱ፡ ዕብን። ጴጥሮስ፡ ወጳውሎስ፡ ሣረሩ፡ አብያተ፡ ክርስቲያናት፡ ዲበ፡ አሐዱ፡ ኰኵሕ። ወግብረቶንሰ፡ በፅቡር፡ ወበአኅባለ፡ ጠፈር፡ ወበመዋጽሕት፡ ዘዕፅ፡ ወአዕማዲሆንኒ፡ ዘዕፅ። ወላሊበላ፡ ኒ፡ ሣረረ፡ ብዙኃተ፡ አብያተ፡ ክርስቲያናት፡ ዘእምአሐዱ፡ ዕብን፡ ዘአልቦ፡ ጽቡረ፡ ለመአኅዝቲሆን፡ | | ዘአልቦ፡ ጠፈር፡ ለመአቀዶን፡ ወዘአልቦ፡ መሥዕርተ፡ ለመክደኖን። ወኵሎሰ፡ ግብረቲሆን፡ ኢንክል፡ ንንግር፡ በበገጹ። እስመ፡ ብዙኅ፡ ፆታ፡ ግብረቶን። ናሁ፡ ተስዕነኒ፡ ሊተሰ፡ ላዕላዓ፡ ልሳን፡ ከመ፡ እጽሐፍ፡ ለክሙ፡ ኵሎ፡ ኂሩታቲሁ፡ ለዝንቱ፡ ብእሲ፡ ክቡር፡ ላሊበላ፡ ዘከብረ፡ እምኵሎሙ፡ መሬታውያን፡ በጥበብኒ፡ ወበስነ፡ ጽድቅኒ፡ ተብህለ፡ ከመ፡ ሰሎሞን፡ ጠቢብ፡ እምኵሉ፡ እጓለ፡ እመሕያው፡ ወእምኵሎሙ፡ ጠቢባነ፡ ግብጽ። ወውእቱኒ፡ ገብረ፡ ምኵራበ፡ በኢየሩሳሌም፡ በአዕባን፡ ዓበይት፡ ዘዘሳምን፡ ወዘዘ፡ ሳብዕ፡ ኑኆን። እንዘ፡ ይረድኦ፡ ኪራም፡ ንጉሠ፡ ጢሮስ፡ በዕፀወ፡ ቄድሮና፡ | ወበዕፀወ፡ ጳውቄና፡ ወበዕፀወ፡ ቄጳርስ። ወፈጸመ፡ ክልኤቱ፡ አብያተ። ቤተ፡ እግዚአብሔርኒ፡ ወቤተ፡ ርእሱኒ፡ በ፳፡ ዓመት። ወላሊበላ፡ ሰ፡ ገብረ፡ ዓሠርተ፡ አብያተ፡ ክርስቲያናት፡ በአሐዱ፡ ዕብን፡ እንዘ፡ ይረድኦ፡ ወልደ፡ እግዚአብሔር። እምእለ፡ ክልኤቱ፡ ጠቢባን፡ ተገብራ፡ ክልኤቱ፡ ምኵራባት። ምኵራቡሰ፡ ለአሐዱ፡ ጠቢብ፡ በዕብን፡ ወበዕፀው፡ ወበአሕባል፡ ወበፅቡር። ወካልኡኒ፡ ጠቢብ፡ ገብረ፡ ማኅፈዳቲሁ፡ ዘእምአሐቲ፡ ዕብን። እንዘ፡ ኢይፈቅድ፡ ወኢምንተኒ፡ ለመፍቅዶን። ወኢዕፀ፡ ለመሳክዊሆን፡ ወኢአኅባለ፡ ለመአቂዶን፡ ወኢፅቡረ፡ ለመአኅዝቲሆን። እስመ፡ በአሐቲ፡ ዕብን፡ ፈጸመ፡ ኵሎ፡

folio : 129


back to top

| | ፲፯ ግብረታቲሆን። ግብረ፡ ቅጽሮንሂ፡ ዘእምአሐዱ፡ ዕብን። ወግብረተ፡ ውሣጥያቲሆንሂ፡ ዘእምአሐዱ፡ ዕብን። ወእምፃማ፡ ውሣጥያቲሆንሰ፡ የዓቢ፡ ፃማ፡ ቅጽራቲሆን። ኵሉኬ፡ ሰብእ፡ እንዘ፡ ኢትዮጵያዊ፡ ውእቱ፡ ዘኢበጽሐ፡ ውስተ፡ ሀገረ፡ ሮሐ፡ ቅድስት፡ እንዘ፡ ይሰምዕ፡ ዜናሆን፡ ለእላንቱ፡ አብያተ፡ ክርስቲያናት፡ እለ፡ ተገብራ፡ ዘእምአሐቲ፡ ዕብን፡ ይትሜሰል፡ ከመ፡ ብእሲ፡ ዘኢያፈቅር፡ ከመ፡ ይርአይ፡ ገጾ፡ ለእግዚእነ፡ ወመድኃኒነ፡ ኢየሱስ፡ ክርስቶስ፡ ወብፁዕሰ፡ ወቅዱስ፡ላሊበላ፡ ሶበ፡ ፈጸመ፡ ሕንጻሆን፡ ለእማንቱ፡ አብያተ፡ | ክርስቲያናት፡ ዘከመ፡ አርአዮ፡ እግዚአብሔር። ኢፈቀደ፡ ከመ፡ ይጐንዲ፡ ላዕሌሁ፡ ሢመተ፡ መንግሥት፡ ወኢፈቀደ፡ ከመ፡ ትዕዱ፡ ላዕለ፡ ወልዱኒ። አላ፡ ይቤ፡ ይሚጣ፡ ለዚቲ፡ ሢመተ፡ መንግሥት፡ ወያግብአ፡ ኀበ፡ እስራኤል። እስመ፡ ሎሙ፡ ይቤሎሙ፡ በእንቲአክሙ፡ ፈጠርክዎሙ፡ ለኵሎሙ፡ አሕዛብ፡ ወካዕበ፡ መሐለ፡ ሎሙ፡ እንዘ፡ ይብል፡ ኢይሜንኖሙ፡ ለሕዝበ፡ ያዕቆብ። ወኢያስተሐቅሮሙ፡ ለሕዝበ፡ እስራኤል። እስመ፡ ኪያሆሙ፡ ኃረይኩ፡ እምኵሎሙ፡ አሕዛብ። በከመ፡ ይቤ፡ ነቢይ፡ መሐለ፡ እግዚአብሔር፡ ለዳዊት፡ በጽድቅ፡ | | ወኢይኔስሕ። እስመ፡ ይቤሎ፡ አነብር፡ ዲበ፡ መንበርከ፡ ወይእዜኒ፡ ለያግብኣ፡ እግዚአብሔር፡ ለዛቲ፡ መንግሥት፡ ኀበ፡ እስራኤል፡ ወኢይትኃጣእ፡ እምነ፡ ቤተ፡ እስራኤል፡ ዘይነብር፡ ዲበ፡ መንበረ፡ መንግሥት። ኢያጐንዲ፡ እግዚአ፡ ኃያላን፡ ዛቲ፡ ሢመተ፡ መንሥት፡ ኢያጐንዲ፡ እግዚኣ፡ ኃያላን፡ ዛቲ፡ ሢመተ፡ መንግሥት፡ ኢዲቤየ፡ ወኢዲ፡ አዝማድየ። ወናሁ፡ አንሰ፡ ፈጸምኩ፡ መልእክትየ፡ ዘበእንቲአሃ፡ ሤመኒ፡ ሢመተ፡ መንግሥት። እንዘ፡ ለሊሁ፡ እግዚአብሔር፡ ይገብር፡ በእደ፡ መላእክቲሁ። ከመዝ፡ ይቤ፡ ገብረ፡ መስቀል፡ ንጉሥ፡ እስመ፡ ኢያፈቅር፡ ሢመተ፡ ዘበምድር፡ | ፈጺሞ፡ መልእክቶ፡ ወመጽዊቶ፡ ኵሎ፡ ጥሪቶ። እስከ፡ ኢይተርፍ፡ አሣዕነ፡ ዲበ፡ እገሪሁ። ወአሠርጊዎ፡ አብያተ፡ ክርስቲያናቲሁ፡ ዘገብረ፡ በውስተ፡ ኵሉ፡ በሐውርት። ወእሎንተኒ፡ ዓሠርተ፡ ማኅፈዳተ፡ ዘገብረ፡ ዘእምአሐቲ፡ ዕብን። አሠርገወ፡ በሠርጕ፡ ዘይደሉ፡ ለቤተ፡ ክርስቲያን፡ በመስቀልኒ፡ ወበአልባስኒ፡ ወቦ፡ ዘአሠርጊዎን፡ በሥዕልኒ። ወፈድፋደሰ፡ ገብረ፡ መድምመ፡ በመካነ፡ ጎልጎታ። በድነ፡ መካሀ፡ ዘለበግዑ፡ ዘኢየዓፂ፡ በድኑ። ወካልአነሂ፡ ሥዕለተ፡ ብዙኃ፡ ገብረ፡ እስመ፡ በእንቲአሆን፡ ይተግህ፡ መዓልተ፡ ወሌሊተ። ወኢይሔሊ፡ ካልአ፡ መፍቅደ፡ ሥጋ፡ ኢመብልዓ፡ ለሲሲቱ።

folio : 130


back to top

| | ወኢልብሰ፡ ለዓራዙ። ወኢተከዘ፡ በእንተ፡ ብእሲቱኒ፡ ወበእንተ፡ ውሉዱኒ፡ ዘእንበለ፡ በእንዚአሆን፡ ለአብያተ፡ ክርስቲያናት። ወሶበ፡ ፈጸሞን፡ ጸለየ፡ በውስቴቶን፡ እንዘ፡ ይብል፡ ኵሉ፡ ዘጌሠ፡ ውስተ፡ እላንቱ፡ አጽራሐ፡ ቅድሳቲከ፡ ዘገበርከ፡ በእደ፡ ዚአየ፡ ሀበኒ፡ አሥራተ፡ ኦእግዚእየ፨ ወይቤሎ፡ እግዚአብሔር፡ ይኩንከ፡ በከመ፡ ትቤ። ለእመ፡ ጌሠ፡ ውስተ፡ ቤተ፡ ክርስቲያንከ፡ በንጹሕ፡ ኦኅሩይየ፡ ከማሁ፡ በከመ፡ ሰአልከ። አንተሰ፡ ፈጸምከ፡ መልእክተከ፡ ወዓቀብከ፡ ሃይማኖተከ። እምይእዜሰ፡ ጽኑሕ፡ ለከ፡ አክሊለ፡ ጽድቅ፡ ወርኅው፡ ለከ፡ ኆኅተ፡ መንግሥተ፡ ሰማያት፡ ከመ፡ ትባእ፡ በፍሥሐ። ወዘንተ፡ እምድኅረ፡ | ይቤሎ፡ መድኃኒነ። ሐመ፡ ብፁዕ፡ ላሊበላ፡ ንስቲተ፡ ወአዕረፈ፡ አመ፡ ፳ ወ ፪፡ ለወርኃ፡ ሐዚራን። ወተመጠው፡ ነፍሶ፡ ንጽሕት፡ መላእክተ፡ ብርሃን። ወፆሮ፡ ገብርኤል፡ ዲበ፡ አክናፊሁ። ወካልአን፡ መላእክት፡ እንዘ፡ ይዜምሩ፡ በቅድሜሁ፡ ወበጽኅሬሁ። አዕረግዎ፡ ውስተ፡ ሰማይ። ወአተወ፡ ገብረ፡ መስቀል፡ ውስተ፡ ምዕራፊሁ፡ ዘለዓለም። ወኃደረ፡ ምስለ፡ ጴጥሮስ፡ ወጳውሎስ፡ እስመ፡ ከመዝ፡ ኪዳን፡ ተውህቦ፡ እምኀበ፡ መድኅን፡ ናሁኬ፡ ለካእኩ፡ ለክሙ፡ ኦፍቁራንየ፡ ንስቲተ፡ ዜና፡ እምትሩፋቲሁ፡ ለገብረ፡ መስቀል፡ ከመ፡ ይትፈሣሕ፡ ልብክሙ፡ ወይኩነነ፡ ለኵልነ፡ እለ፡ ተጋባእነ፡ ዝየ፡ ኃይለ፡ ጸሎቱ፡ ጊራ፡ | | ምክህ፡ ለርእስነ። ወጸዳለ፡ ሱራሔ፡ ለገጽነ። ወኵሕለ፡ መድኃኒት፡ ለአዕይንቲነ። ወአዕኑገ፡ ሣህል፡ ለእዛኒነ። ወመዓዛ፡ ሠናየ፡ ለአዕናፈነ። ወማኅተመ፡ ጽድቅ፡ ለከናፍሪነ። ወሞጣሕተ፡ ፍሥሐ፡ ለዘባንነ። ወእልታሐ፡ መዊእ፡ ለእንግድዓነ፤ ወአውቃፈ፡ ምሕረት፡ ለእደዊነ። ወሕልቀተ፡ ፍቅር፡ ለአፃብኢነ። ወአሣዕነ፡ አድኅኖ፡ ለእገሪነ። ወስቴ፡ ሕይወት፡ ለጽምዕነ። ወኅብስተ፡ መና፡ ለርኃብነ። ወኀበ፡ ቦአ፡ ቤተ፡ መርዐ፡ መርዓ፡ ምስሌሁ፡ ያብአነ። በጽላሎተ፡ ክነፊሁ፡ እንዘ፡ ይከድነነ። ወኀበ፡ ረፈቀ፡ ያርፍቀነ። ለዓለመ፡ ዓለም፡ አሜን፨ ................................................................ ................................................................ .................................................................. | ለዘጸሐፎ፡ ወለዘአጽሐፎ፨ ለዘአንበቦ፡ ወለዘተርጐሞ፡ ወለዘሰምዓ፡ ቃላቲሁ፡ ኅቡረ፡ ይምሐሮሙ፡ እግዚአብሔር፡ በመንግሥተ፡ ሰማያት። በጸሎታ፡ ለማርያም፡ ወዲተ፡ አምላክ። ወበትንብልናሆሙ፡ ለሚካኤል፡ ወገብርኤል፡ ወበጸሎተ፡ ነቢያት፡ ወሐዋርያት፡ ወበጸሎተ፡ ጻድቃን፡ ወሰማዕት። ወበጸሎተ፡ ላሊበላ፡ ወመስቀል፡ ክብራ፡ እግዚአብሔር፡ ይምሐራ፡ ለንግሥትነ፡ ወለተ፡ ኢየሱስ፡ /ወለውሉዳ፡ ኃይለ፡ ኢየሱስ፡ ኃይለ፡ ሚካኤል፡ ወልደ፡ ማርያም፡ ወላአዋልዲሃ፡ {ወለተ፡ ማርያም፡} ኂሩተ፡ ሥላሴ፡ ለዓለመ፡ ዓለም፡ አሜን። .............................................................. ............................................................. .............................................................

Text visualization help

Page breaks are indicated with a line and the number of the page break. Column breaks are indicated with a pipe (|) followed by the name of the column.
In the text navigation bar:

References are relative to the current level of the view. If you want to see further navigation levels, please click the arrow to open in another page.

Each reference available for the current view can be clicked to scroll to that point. alternatively you can view the section clicking on the arrow.

Using an hyphen between references, like LIT3122Galaw.1-2 you can get a view of these two sections only

Clicking on an index will call the list of relevant annotated entities and print a parallel navigation aid. This is not limited to the context but always refers to the entire text. Also these references can either be clicked if the text is present in the context or can be opened clicking on the arrow, to see them in another page.

In the text:

Click on ↗ to see the related items in Pelagios.

Click on to see the which entities within Beta maṣāḥǝft point to this identifier.

^[!] contains additional information related to uncertainties in the encoding.

Superscript digits refer to notes in the apparatus which are displayed on the right.

to return to the top of the page, please use the back to top button

London, British Library, BL Oriental 718

Transcription of the manuscript

Catalogue Bibliography